1, 2. Visoneka vyasolola ngachilihi nge zangi yapwa yayilemu chikuma?

ZANGI yapwa yayilemu havilinga vyaYehova Kalunga vyosena. (WaYowano 1, 4:16) Yesu Kulishitu uze apwile watete kutenga, atwamine naIse mwilu hamyaka yayivulu chikuma, kaha alinangwile nge Yehova apwa Kalunga wazangi. (Wavaka-Kolose 1:15) Yesu naikiye asolwele eyi zangi mukuyoya chenyi chosena mwilu nahano hamavu. Ngocho twafwelela chikupu ngwetu Yehova naYesu navayulanga lika muzangi.

² Omu mutu umwe ahulishile Yesu amulweze lushimbi lwalulemu hajishimbi josena, Yesu ambile ngwenyi: “‘Zangenunga Yehova Kalunga kenu namichima yenu yosena, namyono yenu yosena, navishinganyeka vyenu vyosena.’ Elu lukiko lushimbi lwalulemu kaha nawa lukiko lwatete. Kaha lwamuchivali, lunalifwaneko, lukiko vene elu ngwavo: ‘Zangenunga vakwenu nganomu mwalizanga enu vavene.’”—Mateu 22:37-39.

3. Uno veya vapwa ‘vakwetu’?

 ³ Chapwa chachilemu kuzanga vatu vosena. Yesu ambile ngwenyi, twatela kuzanga Yehova nakuzanga nawa vakwetu. Uno veya vapwa ‘vakwetu’? Nge twambata chipwe twasomboka, kaha vaka-mahyetu vakiko vakwetu twalihata navo chikuma. Vandumbwetu muchikungulwilo navatu vaze tweji kuwananga mumulimo wakwambulula navakiko nawa vapwa vakwetu. Muchihande chino, natulinangula omu tunahase kusolwelamo zangi kuli vakwetu.

4. Vatu vanahase kufukila ngachilihi muulo wavo chamokomoko nashili vatwama nayo?

⁴ Yehova atengele Alama naEve nakuvanunga hamwe. Ou ukiko wapwile ulo watete. Kalunga asakile vapwenga vakuwahilila muulo wavo nakusema vana mangana vazalise hamavu. (Kuputuka 1:27, 28) Oloze omu valikangile kuli Yehova, ulo wavo walyenyekele, kaha shili nakufwa vyatanda kuli etu tuvosena. (Wavaka-Loma 5:12) Chamokomoko navyuma kanevi, vatu vanahase kufukila muulo wavo makumbi ano. Yehova uze ahakileko ulo, ahana valunga napwevo jindongi jamuMbimbiliya jize vatela kukavangiza.—Tangenu WaChimoteu 2, 3:16, 17.

5. Mwomwo ika zangi yapwila yayilemu muulo?

⁵ Mbimbiliya yasolola nge zangi yamwenemwene yeji kulingisanga usepa ukole. Omu mukiko chapwa namuulo. Kaposetolo Paulu alumbunwine omu yapwa zangi yamuchano, ambile ngwenyi: “Zangi yeji kutalililanga chikoki kaha nawa yeji kutetelanga. Zangi kayevwa lwisoko. Kayeshi kulitukwojolako, kayeshi kulivwimbako, kayeshi kulinga mwakuhingamako, kayeshi kufwila vyuma vyayo yiveneko, kayeshi kukwata washi matotoko. Kayeshi kulama kokoko. Kayeshi kuwahilila navilinga vyakuhengako, oloze yeji kwivwilanga kuwaha muchano. Yeji kufwikanga vyuma vyosena, nakwitavila vyuma vyosena, nakutalilila vyuma vyosena, nakukakachila muvyuma vyosena. Zangi kayakumako.” (Wavaka-Kolinde 1, 13:4-8) Nge natushinganyeka mazu ahanjikile Paulu nakuwakavangiza, kaha tunahase kupwa vakuwahilila muulo wetu.

6, 7. (a) Vyuma muka yahanjika Mbimbiliya kutalisa kumutwe watanga? (b) Uno lunga muka-Kulishitu atela kuzakama ngachilihi puwenyi?

⁶ Yehova asakwile mutu uze atela kupwa mutwe watanga. Paulu ambile ngwenyi: “Ngunasake mutachikize ngwenu, mutwe walunga hilunga apwa Kulishitu, kaha mutwe wapwevo apwa lunga, kaha mutwe waKulishitu apwa Kalunga.” (Wavaka-Kolinde 1, 11:3) Yehova asaka lunga apwenga mutwe watanga wazangi, uze kapwa waukenya chipwe walifwiko. Yehova apwa Mutwe walikoji, kaha nawa wakuzeneka lifwi. Ngocho, Yesu avumbika chiyulo chaKalunga chazangi. Ambile ngwenyi: “Ami ngwazanga Tata.” (Yowano 14:31) Nge Yehova apwile wamukalu muchima, kachi Yesu kahanjikile awa mazuko.

⁷ Numba tuhu lunga apwa mutwe watanga, oloze Mbimbiliya yahanjika ngwayo atela kuvumbika puwenyi. (WaPetulu 1, 3:7) Uno lunga nahase kulinga ngachilihi ngocho? Atela kuzakama vyuma ali nakusaka puwenyi nakuvivumbika. Mbimbiliya yamba ngwayo:  “Enu malunga, twalenuho lika kuzanganga mapwevo jenu, nganomu Kulishitu nawa azangile chikungulwilo nakulyecha ivene hachikiko.” (Wavaka-Efwesu 5:25) Eyo, Yesu afwililile vaka-kumukavangiza. Nge mutwe watanga mwapwa wazangi ngana mwaYesu, kaha nachipwa chachashi kuli pwevo kumuzanga, nakumuvumbika, nakwitavila vyuma mwahanjika.—Tangenu WaChituse 2:3-5.

8. Uno twatela kumona ngachilihi vandumbwetu?

⁸ Makumbi ano, vatu vavavulu mukaye kosena veji kulemesanga Yehova. Vapwa vandumbwetu. Uno twatela kuvamona ngachilihi? Mbimbiliya yamba ngwayo: “Tulingenunga vyuma vyamwaza kuli vosena, chikumanyi kuli vaze twalikata navo mulufwelelo.” (Wavaka-Ngalesha 6:10; tangenu Wavaka-Loma 12:10.) Kaposetolo Petulu asonekele ngwenyi, twatela “kwononoka kumuchano, nakupwa jino nazangi yakuzanga vandumbwetu.” Petulu alwezele nawa vakwavo vaka-Kulishitu ngwenyi: “Oloze chachinenenyi, pwenunga nazangi yayinene yakulizanga navakwenu.”—WaPetulu 1, 1:22; 4:8.

9, 10. Mwomwo ika vatu jaKalunga vapwila vakulinunga?

⁹ Liuka lyetu lyamukaye kosena lyapwa  lyakulipwila. Mwomwo ika? Mwomwo twalizanga chikuma navandumbwetu. Chuma chachilemu chikumanyi, twazanga Yehova nakwononoka jishimbi jenyi, kaha eji kutukafwanga nashipilitu yenyi yajila yize yapwa ngolo jenyi. Shipilitu yaKalunga yeji kutukafwanga tulinunge hamwe navandumbwetu mukaye kosena.—Tangenu WaYowano 1, 4:20, 21.

¹⁰ Paulu ashindakanyine hachishina chakuzanga vakwetu vaka-Kulishitu, ambile ngwenyi: “Vwalenu muchima wakeke, nalikoji, nakulinyisa, nakuvova, nakutalilila chikoki. Itavilenunga lika tutenga twavakwenu, nakulikonekelanga navakwenu namuchima wakusuuluka numba tuhu mutu umwe ali nachuma chimwe chakumulingisa ayayavale hali mukwavo. Nge muze Yehova amikonekelele namuchima wakusuuluka, nayenu mwatela kulinga mwomumwe. Oloze kuvyuma vyosenevi, vwalenunga zangi, mwomwo yikiko yeji kununganga vatu hamwe mujila yakukupuka.” (Wavaka-Kolose 3:12-14) Chikupu vene, twawahilila hakwijiva nge tweji kusololanga zangi yize “yeji kununganga vatu hamwe mujila yakukupuka,” chamokomoko nokwo twafuma.

11. Vatu jaKalunga muliuka lyenyi vavatachikijila havyuma muka?

¹¹ Zangi yamwenemwene nakulinunga chavatu jaYehova vyeji kuvasololanga nge vatwama mukwitava chamuchano. Yesu ambile ngwenyi: “Vatu vosena navakatachikiza ngwavo enu mwapwa mutumbaji twami kachi nge namulizanganga mwenumwenu.” (Yowano 13:34, 35) Kaha kaposetolo Yowano asonekele ngwenyi: “Vana vaKalunga navana vaLiyavolo vavamwena aha: Weshowo keshi kulinga mwakwolokako nauze azeneka kuzanga ndumbwenyi kavapwa vakuli Kalungako. Mwomwo ou ukiko mujimbu mwevwa lyehi kufuma kukuputuka ngwavo, tulizangenga navakwetu.” (WaYowano 1, 3:10, 11) Zangi nakulinunga vyeji kusololanga Vinjiho jaYehova kupwa vaka-kukavangiza Kulishitu vamuchano, vaze eji kuzachisanga Kalunga kwambulula mujimbu wamwaza waWangana mukaye kosena.—Mateu 24:14.

12, 13. Vyuma muka vali nakulinga vatu ‘vamuliyongomena lyalinene’ makumbi ano, kaha vyuma muka navisoloka kuli vakiko kalinwomu?

¹² Vangamba jaYehova vavavulu makumbi ano vapwa ‘vamuliyongomena lyalinene’ lize lyazala navatu vakumafuchi akulisezaseza, kaha veji kukundwizanga Wangana waKalunga. “Ava vakiko vaze vanafumu muluyando lwalunene, kaha vanakoso lyehi vikuto vyavo nakuvitomesa mumanyinga aMwanamukoko” hakufwelela muwana wandando yakusokola yaYesu. Ava vatu ‘vamuliyongomena lyalinene’ vazanga Yehova naMwanenyi, kaha veji kulemesanga Yehova “musana naufuku.”—Kusoloka 7:9, 14, 15.

¹³ Kalinwomu Kalunga anongese kano kaye  kakapi “[ha]luyando lwalunene.” (Mateu 24:21; tangenu Yelemiya 25:32, 33.) Oloze Yehova mwakakinga vangamba jenyi nakuvatwaminyina mukaye kakahya mwomwo avazanga. Ngana muze ashikile myaka kafwe 2,000 kunyima, Kalunga “mwakahunda masoji osena kumeso avo, kufwa kacheshi kukapwako chekako, kaha nawa kakweshi kukapwa cheka kulishona, chipwe miteto, chipwe kukolako.” Uno mwatalilila kukayoya muPalachise omu upi, nakuyanda, nakufwa navakavifumisako nyi?—Kusoloka 21:4.

14. Liyongomena lyalinene linatoho ngachilihi?

¹⁴ Kumaputukilo amakumbi akukuminyina mu 1914, kwapwile vangamba jaKalunga vavandende kaha. Mwomwo yakuzanga vakwavo nakuvakafwa kushipilitu yajila yaKalunga, ava vandumbwetu vawavisa vahashile kwambulula mujimbu wamwaza waWangana chamokomoko naukalu. Vyuma muka vinafumumo? Makumbi ano, vanakungulula liyongomena lyalinene lyavatu vaze vatalilila kukayoyela hano hamavu haya myaka yosena. Ava vatu vamuliyongomena lyalinene vanahete kafwe 8,000,000 muvikungulwilo vyakuhambakana 115,400 mukaye kosena, kaha vali nakuvulilako lika. Chakutalilaho, Vinjiho vakuhambakana 275,500 vavambapachisanga mumwaka wamulimo wa 2014. Kulumbununa nge chalumingo hichalumingo vali nakumbapachisa vatu kafwe 5,300.

15. Vatu vavavulu vanevu ngachilihi mujimbu wamwaza makumbi ano?

¹⁵ Twalikomokela chikuma hakwijiva nge vatu vavavulu vanevu mujimbu wamwaza waWangana. Makumbi ano mikanda yetu vali nakuyisoneka mumalimi akuhambakana 700. Mangazini yaKaposhi Kakutalila vali nakuyipangila chikuma mukaye kosena. Jikope jakuhambakana 52,000,000 vali nakujipulita kakweji hikakweji mumalimi 247. Kaha mukanda waUno Chikupu Mbimbiliya Yanangula Vyuma Muka? uze tweji kuzachisanga hakunangula vatu Mbimbiliya vanawalumuna mumalimi akuhambakana 250. Oholyapwa vanapulita jikope jakuhambakana 200,000,000.

16. Mwomwo ika liuka lyaYehova lili nakutohwelako lika?

¹⁶ Liuka lyetu lili nakutohwelako lika mwomwo twafwelela chikuma Kalunga nakwitavila Mbimbiliya kupwa hiMazu vahwima kuli ikiye. (Wavaka-Tesolonyika 1, 2:13) Yehova mwatukisulanga lika chamokomoko nakutufumbukila kuli Satana.—Wavaka-Kolinde 2, 4:4.

17, 18. Uno Yehova asaka tumone ngachilihi vatu vaze kavamulemesako?

¹⁷ Vatu veji kwakulanga kumujimbu tweji kwambulula mujijila jakulisezaseza. Vamwe veji kutwivwililanga, oloze veka veji kukananga. Uno Yehova asaka tumone ngachilihi vatu vaze kavamulemesako? Etu natutwalaho lika kukavangiza jindongi jamuMbimbiliya chamokomoko namujila navakwilamo vatu kumujimbu wetu. Mbimbiliya yamba ngwayo: “Mazu enu apwenganga akukokweza shimbu yosena, akutova mungwa, mangana mutachikize omu mwatela kukumbulula mutu himutu.” (Wavaka-Kolose 4:6) Kala lwola natuhakwila vyuma twafwelela, natulinganga ngocho “namuchima wauvwovu nakalemesa chikuma” mwomwo twazanga vakwetu.—WaPetulu 1, 3:15.

¹⁸ Numba nge vatu navapihilila nakukana mujimbu wetu, oloze etu twatela kuzanga lika vakwetu nakulondezeza chakutalilaho chaYesu. Omu “vapwile nakumutukana, ikiye kavahilwishililenga matukako. Omu apwile  nakuyanda, ikiye kavakinjilileko.” Yesu afwelelele Yehova. (WaPetulu 1, 2:23) Ngocho, twatela kupwa vakulinyisa lwola lwosena nakukavangiza mazu akwamba ngwavo: “Kanda namuhilwisa upi kumutu namilingi mwamupiko, chipwe matuka kumutu namitukanako. Olozenyi vakisulenunga.”—WaPetulu 1, 3:8, 9.

19. Twatela kumona ngachilihi vaka-kole jetu?

¹⁹ Kulinyisa cheji kutukafwa twononoke jindongi jize ahanyine Yesu. Ambile ngwenyi: “Mwevwa lyehi muze vambile ngwavo: ‘Zangenunga vakwenu nakuhunga vaka-kole jenu.’ Oloze aminyi nangwamba kuli enu ngwami: Zangenunga lika vaka-kole jenu nakulombelako vaze vali nakumiyanjisa mangana mupwenga muvana vaSenu uze ali mwilu, mwomwo eji kututwisanga likumbi lyenyi hali vaka-kuhuka nahali vatu vamwaza, nakunokesa vula hali vaka-kwoloka nahali vaka-kuhenga.” (Mateu 5:43-45) Hakupwa tuvangamba jaKalunga, ngocho twatela kuzanga vaka-kole jetu chamokomoko najila navatumwenamo.

20. Uno twatachikiza ngachilihi ngwetu vatu vosena hano hamavu navakazanga Kalunga navakwavo? (Talenu muvwimbimbi wakulivanga.)

²⁰ Lwola lwosena twatela kusolola nge twazanga Yehova navakwetu. Numba tuhu vatu navatufumbukila nakuhunga mujimbu tweji kuvambulilanga, oloze twatela kuvakafwa nge vali muukalu. Kaposetolo Paulu asonekele ngwenyi: “Kanda namukatwama namukuli wamutu numba umweko, shina ou kaha wakulizanga navakwenu, mwomwo ou azanga mukwavo natesamo lyehi jishimbi. Mwomwo jishimbi jakwamba ngwavo, ‘Kanda mukalinga ukojiko, kanda mukajiha mutuko, kanda mukevako, kanda mukevwa lwisoko,’ nalwesholwo lushimbi lweka luliko nawa, josena vanajiwanyisa hamwe mumazu ano ngwavo: ‘Zangenunga vakwenu nganomu mwalizanga enu vavene.’ Zangi kayeshi kulinga vyuma vyavipi kumutuko, shikaho zangi yikiko yatesamo jishimbi.” (Wavaka-Loma 13:8-10) Vangamba jaKalunga veji kuzanganga lika vakwavo mukaye kano kakapi, kaulyanyi, kaze vali nakuyula kuli Satana. (WaYowano 1, 5:19) Omu Yehova mwakanongesa Satana navandemone jenyi, nakaye kano kakapi, vatu vosena hamavu navakalizanga chikuma. Ocho kuwaha kana natukevwa hakumona vatu vosena hano hamavu navazanga Yehova navakwavo!