1, 2. Nsona jamwekeshaña ñahi kulema kwachililu chakukeña?

 KUKEÑA dichililu chaYehova Nzambi chabadika. (1 Yowanu 4:16) Chileñaleña chindi chatachi, Yesu Kristu, washakamini yaaka yayivulu nankashi mwiwulu naTata yindi, dichi welukili nindi Yehova hiNzambi wukweti kukeña. (Akolose 1:15) Yesu wamwekesheli kukeña kokumu hadiñayi mwiwulu nihamaseki. Dichi tunateli kukuhwelela netu Yehova niYesu akayuulaña chiwahi.

² Muntu wumu chamwihwiliyi Yesu lushimbi lwabadika, Yesu wakwili nindi: “Keñaku Yehova Nzambi yeyi namuchima weyi wejima, nawumi weyi wejima, namaaneyi ejima. Dilu lushimbi lwabadika lwakusambila. Kudi nawa lwamuchiyedi lwafwana neyi ilu nawu, Keñaku mukwenu neyi chiwadikeña eyi aweni.”—Matewu 22:37-39.

3. ‘Akwetu’ hiyanyi?

 ³ Twatela kukeña akwetu. Yesu wahosheli nindi twatela kukeña Yehova niakwetu. Hanu dinu ‘akwetu’ hiyanyi? Neyi twasumbula, anfumwetu hela añodetu diwu akwetu nankashi. Amanakwetu niahela muchipompelu niwena hiyakwetu, kushilahu tuhu niantu itwawanaña mumudimu wakushimwina. Muchinu chibaaba, tukudiza chitunateli kumwekesha netu twakeña akwetu.

4. Hela chakwila antu awanina wanyi, anateli kwikala ñahi namuzañalu muwuluwi?

⁴ Yehova waleñeli Adama naEvu nawa wayileteli hamu. Iwu diwadiña wuluwi watachi. Nzambi wakeñeleña ekali amuzañalu muwuluwi wawu nikwinzesha iseki nawanyana. (Kutachika 1:27, 28) Ilaña chiyafumpiluwu lushimbi lwaYehova, muwuluwi wawu mweñilili kukala, dichi nshidi nikufwa kwatandili kudi etu ejima. (Aroma 5:12) Hela chochu, munateli kwikala namuzañalu muwuluwi. Yehova, watachikili wuluwi, wahana nshimbi muBayibolu jinateli kukwasha adisumbula.—Tañenu 2 Timotewu 3:16, 17.

5. Muloñadi muwuluwi chimwatela kwikalila kukeña?

⁵ Bayibolu yamwekeshaña nawu tunateli kudiluñisha wubwambu nawakwetu neyi twikala nakukeña. Muwuluwi nimwena mwatela kwikala kukeña. Kapostolu Pawulu wahosheli hakukeña kwalala nindi: “Kukeña kwadiwunjikaña, kukweti niluwi; kukeña hikwahetaña ichimaku, kukeña hikwadinkaña wantaku; hikwaditoheshañaku; hikwelaña chuma chabula kutelaku; hikwakokwelaña kwindi hohuku; hikwanyakalaña kuzuwaku; hikwafuukwilaña mukwawu chuma chatamaku; hikwazañalalaña nayuma yabula kuloñaku, kwazañalalaña nansañu yalala. Kwovwahilaña yuma yejima, kwetejaña yuma yejima, kwachiñejaña yuma yejima, kwatatakenaña mwahita yuma yejima. Kukeña hikwakañanyañaku.” (1 Akorinda 13:4-8) Neyi tutoñojoka hamazu aPawulu nikuyizatisha, tukwikala namuzañalu muwuluwi.

6, 7. (a) Bayibolu yahosha nawudi hamutu wachisaka? (b) MukwaKristu wasumbula watela kuhemba ñahi ñodindi?

⁶ Yehova watondeli watela kwikala mutu wachisaka. Pawulu wasonekeli nindi: “Nakeñi mwiluki, mutu weyala diyi Kristu; mutu wamumbanda diyi iyala; mutu waKristu diyi Nzambi.” (1 Akorinda 11:3) Dichi Yehova wakeñaña iyala kwikala nakukeña, bayi nalukambuku. Yehova yomweni wahembaña chiwahi chisaka chindi. Chafumamu, Yesu wamulemeshaña Nzambi. Wahosheli nindi: “nakeña Tata.” (Yowanu 14:31) Yesu wadi kuhosha awa mazu wanyi neyi Yehova wadiña nalukambu.

⁷ Hela chakwila iyala diyi mutu wamumbanda, Bayibolu yalejaña iyala kulemesha ñodindi. (1 Petulu 3:7) Iyala nateli kulemesha ñahi ñodindi? Nateli kutoñojoka hayuma yinakukeña ñodindi nikulemesha chinakukeñayi. Bayibolu  yahosha nawu: “Enu amayala, keñenu añodi jenu neyi chakeñeliyi Kristu chipompelu, hakudihanahu yomweni kuchikoola.” (Aefwesesa 5:25) Mwamweni, Yesu wahanini wumi kukoola atumbanji twindi. Neyi iyala wukweti kukeña neyi Yesu, mumbanda wukumukeña nikumulemesha nawa wukulondelaña munafuukuliyi.—Tañenu Titusa 2:3-5.

8. Twatela kwila ñahi nawamanakwetu niahela?

⁸ Makonu, mamiliyoni awantu mukaayi kejima anakudifukula kudi Yehova. Hiyamanakwetu niahela. Mwayimwekeshelaña kukeña? Bayibolu yahosha nawu: “Twilenuña antu ejima chachiwahi; tubadiki kwilila akwetala dakwitiya kwakukuhwelela.” (Aŋalija 6:10; tañenu Aroma 12:10.) Kapostolu Petulu wahosheli nindi “kwovwahila nsañu yalala” kwaleteshaña ‘tukeñi ana kwetu.’ Petulu walejeli cheñi akwawu akwaKristu nindi: “Chasweja kulema yowu kukeñañana chacheni mukachi kenu.”—1 Petulu 1:22; 4:8.

9, 10. Muloñadi antu jaNzambi chekalilawu anuñañana?

⁹ Kuloñesha kwetu kwamukaayi kejima kwadimena. Muloñadi? Muloña twekala  nakukeña kwalala nawamanakwetu niahela. Ilaña chikuma chacheni chakwila nawu twamukeña Yehova nawa twamwovwahilaña, dichi watukwashaña nañovu jindi jabadika, spiritu yindi yajila. Spiritu yaNzambi yajila yatukwashaña kwikala anuñañana nawamanakwetu mukaayi kejima—Tañenu 1 Yowanu 4:20, 21.

¹⁰ Pawulu wakonkomweneni akwaKristu kwikala nakukeña, wasonekeli nindi: “Vwalenu muchima wawushona, niluwi, nikudizoza, nikwovwaha, nikudiwunjika; nakudovwahila nikudanakena muntu namukwawu. Neyi kudi muntu wukweti muloña namukwawu amwanakeni; chayanakenenuwu enu kudi Mwanta, ninenu nawa ilenu chochimu. Hayuma yejimiyi alunjikuhu kukeña, diyi mpanda yasweja kunuña antu hamu.” (Akolose 3:12-14) Twatiyaña kuwaha chineli kukeña, “mpanda yasweja kunuña,” yekala hakachi ketu hela chakwila yitachi yetu yashiyashana.

11. Kuloñesha kwaNzambi akwilukilaña kunka?

¹¹ Kukeña kwalala nikunuñañana kwekala nawambuña Yehova kwamwekeshaña nawu diwu ekala munsakililu yalala. Yesu wahosheli nindi: “Neyi mukukeñañana, dihu hakayilukilawu antu ejima nawu mudi atumbanji twami.” (Yowanu 13:34, 35) Kapostolu Yowanu niyena wasonekeli nindi: “Kweniku diku kwamwekenaña anyana kaNzambi nianyana kadiyabolu; muntu wabulaña kwila yaloña, hela wabulaña kukeña mana kwindi, hiwakudi Nzambuku. Diyi nsañu yimwatiyili kufumisha kutachi, nawu tukeñañani.” (1 Yowanu 3:10, 11) Kukeña nikunuñañana kwamwekeshaña nawu aYinsahu jaYehova hiyatumbanji twaKristu alala, antu anakuzatishayi Nzambi kushimwina nsañu yayiwahi yaWanta mukaayi kejima.—Matewu 24:14.

12, 13. Antu ekala ‘mwizaza deneni’ elañadi, nawa keña ahiti muyumanyi?

¹² Ambuña aYehova amavulu makonu afuma kumatuña amboka mboka ekala ‘mwizaza deneni’ nawa akwashaña Wanta. ‘Wenawa anafumi mulukadi lweneni, anakosi dehi mahinawu, anayitookeshi namashi aKana kamukoku to-o’ kuhitila mukukuhwelela mumulambu wefutu danyiloña. Awa ‘amwizaza deneni’ amukeña Yehova nimwanindi, nawa adifukulaña kudi Yehova “mwaana niwufuku.”—Chimwekeshu 7:9, 14, 15.

¹³ Yehova katataka yajilumuni kanu kaayi katama hampinji ‘yalukadi lwasweja.’ (Matewu 24:21; tañenu Yeremiya 25:32, 33.) Ilaña Yehova wakakiña ambuñindi nikuyilombola mwituña  dadiha muloña wayikeña. Neyi chakaniniyi yaaka 2,000 yinahituhu, “wakayikombola madilu ejima kumesu awu; hikwakekala nawa cheñi kufwaku; hikwakekala nawa cheñi hela kuneña hela kudila hela kukataku.” Munakutalila kushakama muParadisa chikela kutama, kukabakana nikufwa kunamani dehi?—Chimwekeshu 21:4.

14. Izaza deneni dinatohi ñahi?

¹⁴ Chatachikili mafuku akukuminina mu 1914, kwadiña ambuña Nzambi awayishewa antesha hohu. Muloña wakukeña akwawu nichayikwashiluwu kudi Nzambi naspiritu yajila, awa amanakwetu niahela awayishewa ashimwinini nsañu yayiwahi yaWanta hela chakwila amweneña makabi. Yumanyi yafumamu? Makonu izaza deneni dawantu akweti kuchiñeja kwakushakama hamaseki haya nyaka anakudipompesha. Ichi aYinsahu tudi 8,000,000 muyipompelu 115,400 mukaayi kejima, nawa naambala yinakutohelaku hohu. Chakutalilahu, aYinsahu 275,500 apapatisheweli muchaaka chamudimu cha 2014. Dikwila nawu antu 5,300 apapatisheweleña mulungu-nimulungu.

15. Munjilanyi munakutambwilawu antu nsañu yayiwahi makonu?

¹⁵ Chatuzañaleshaña hakumona antu amavulu anatiyi nsañu yayiwahi yaWanta. Makonu nyikanda yetu anakuyisoneka mumadimi kubadika ha 700. Kaposhi Kakutalila diyi magazini yinakuhanawu chikupu mukaayi. Kakweji-nikakweji makopi akubadika ha 52,000,000 ayipulintaña mumadimi 247. Nawa mukanda waChumanyi Chacheni Chatañishaña Bayibolu? wutwadizishañamu antu Bayibolu awubalumuna mumadimi kubadika ha 250. Kufuma hatachikiluwu kuwupulinta, anapulinti dehi makopi akubadika ha 200,000,000.

16. Muloñadi kuloñesha kwaYehova chikunakuyilaku hambidi?

¹⁶ Kuloñesha kwetu kunakuyilaku hambidi muloña twamukuhwelela Nzambi nawa tweteja netu Bayibolu hiIzu dindi donenayi. (1 Atesalonika 2:13) Twadiluñishaña nkisu yaYehova hela chakwila Satana watuhela nawa nakutukañesha.—2 Akorinda 4:4.

17, 18. Yehova wakeñaña nindi twileña ñahi nawantu abulaña kudifukula kudiyena?

¹⁷ Antu atambwilaña nsañu yitwashimwinaña munjila yamboka-mboka. Antu amakwawu atutiyililaña, amakwawu ahela nsañu yitwashimwinaña. Yehova wakeñaña nindi twileña ñahi nawantu abulaña kudifukula kudiyena? Hela antu akaana hela eteja, twalondelaña kufumba kwamuBayibolu. Kwakwila nawu: “Kuhosha kwenu kwikali naluwi, kwakutoweja namuñwa mafuku ejima, kulonda mwiluki mwakwakwila antu ejima.” (Akolose 4:6) Mpinji yejima yitunakuhakwilaku yuma yitwakuhwelela, twatela kwila mwenomu “nakudizoza nawoma” muloña twakeña akwetu.—1 Petulu 3:15.

¹⁸ Neyi antu ahila hela akaana nsañu yitwashimwinaña, twamwimbujolaña Yesu kuhitila mukuyimwekeshela kukeña. Yesu “chamutukiluwu, hafuntishili cheñi matukaku; chamweniyi yihuñu hazuwiluku.” Ilaña, Yesu wamukuhweleli Yehova. (1 Petulu 2:23) Dichi mpinji yejima twikali adizoza nawa tulondeleña  iku kufumba: “Bayi mutamisha mukwenu nanochu chanakutamishiyuku, hela kumutuka nanochu chanakutukiyuku. Chiña kukiswila nkisu.”—1 Petulu 3:8, 9.

19. Twatela kuyimona ñahi ayilumbu jetu?

¹⁹ Kudizoza kwatukwashaña kwovwahila chishina chaheniyi Yesu. Walumbulwili nindi: “Munatiyi cheliluwu nawu, Keñaku mukwenu, helaku chilumbu cheyi. Ilaña ami nukuyileja nami keñenu ayilumbu jenu, ninawa ayikabishaña, yilombelenu; kulonda mwikali anyana kaTata yenu wudi mwiwulu, muloña yena watuntwishaña itañwa dindi nihadi atama nihadi amawahi, wanokeshaña nvula nihadi aloña nihadi aheña.” (Matewu 5:43-45) Chineli tudi ambuña Yehova, twatela kukeña ayilumbu jetu hela anakutukabisha chamuchidinyi.

20. Tuneluki ñahi netu kukeña Yehova niakwetu kwakawanina iseki dejima? (Talenu mwevulu wakutachikilahu.)

²⁰ Mpinji yejima, twatela kumwekesha netu twamukeña Yehova niakwetu. Hela chakwila antu atuhela nawa akaanaña nsañu yitwashimwinaña, twayikwashaña neyi adi mukukala. Kapostolu Pawulu wasonekeli nindi: “Bayi mwikala namukudi namuntuku, chiña yowu kukeñañana. Muloña muntu wakeñaña mukwawu namanishi nshimbi. Nshimbi jakwila nawu, Kwila wuvumbi chinjila; kujaha muntu chinjila; kwiya chinjila; kwikala nalwisu chinjila; hela neyi kwekala nshimbi jikwawu, jejima jahwila mwizu idi nawu, Keñaku mukwenu neyi chiwadikeña eyi aweni. Kukeña hikwakoñaña mukwawu chatamaku; dichi kukeña kwamanishaña nshimbi.” (Aroma 13:8-10) Ambuña Nzambi amwekeshaña kukeña kwalala kudakwawu, mukanu kaayi katama kanakuyuulayi Satana. (1 Yowanu 5:19) Hanyima yakwila Satana, andemoni jindi nikanu kaayi katama anayijilumuni dehi kudi Yehova, kukeña kwakawanina iseki dejima. Twakadiluñisha chikupu kumbindi chikela antu ejima hamaseki anakeñi dehi Yehova niakwawu!