1, 2. ¿Tlake kiijtoua Biblia tlen nopa tlaiknelijkayotl?

TOTEOTSIJ Jehová nelia tlauel teiknelia (1 Juan 4:16). Kema ayamo tleno kichijchiuayaya, kichijchijki Jesús, uan ya itstoya iuaya iTata tlauel miak xiuitl, yeka nojkia tlauel teiknelia kej Jehová (Col. 1:15). Ne iluikak Jesús nochipa kinextijtok tlaiknelili, uan nojkia kinextik kema ualajki ipan Tlaltipaktli. Yeka temachtli tijmatij Jehová uan Jesús nochipa technauatisej ika tlaiknelijkayotl.

² Se tonali se tlakatl kitlajtlanik Jesús tlake tlanauatili eliyaya tlauel ipati, uan ya kiiljuik: “‘Xikikneli toTeko Dios ika nochi moyolo, uan ika nochi moalma, uan ika nochi motlalnamikilis’. Ya ni nopa tlanauatili tlen más ueyi uan tlen más moneki tijchiuasej. Uan nopa ompa tlanauatili no iuikal elisneki: ‘Xikinikneli sekinok keja timoiknelia moselti’” (Mat. 22:37-39).

3. ¿Ajkia inijuantij nopa “sekinok” katli moneki tikiniknelisej?

³ Tlauel moneki tijnextisej nochi tikinikneliaj. Jesús kiijtok moneki tikiknelisej Jehová uan nojkia sekinok maseualmej. Uan, ¿ajkia  inijuantij nopa “sekinok”? Tlaj timosenkajtokej, nopa “sekinok” kiijtosneki tosiua o toueue, uan inijuantij katli achtoui moneki tikiniknelisej. Nojkia kiijtosneki toikniuaj katli itstokej ipan tlanechikoli uan maseualmej katli tikinkamanaljuiaj. Ipan ni tlamachtili tikitasej kenijkatsa uelis tijnextisej tikinikneliaj sekinok.

4. ¿Kenke tijmatij katli mosenkajtokej kena uelis kuali itstosej uan yolpakisej maske tlajtlakolejkej?

⁴ Jehová kichijki Adán uan Eva ma itstokaj sansejko. Inijuantij elkej katli achtoui mosenkajkej. ToTeotsij kinekiyaya ma itstokaj ika pakilistli uan ma kipiakaj ininkoneuaj (Gén. 1:27, 28). Uan kema inijuantij tlajtlakolchijkej, ayokmo yolpajkej uan techpanoltilijkej tlajtlakoli uan mikilistli (Rom. 5:12). Maske tlajtlakolejkej, katli mosenkajtokej kena uelis kuali itstosej uan yolpakisej. ¿Kenke tikijtouaj nopa? Pampa Jehová, katli kichijki ma itstokaj sansejko, kuali kintlajtolmaka ika iTlajtol (xijpoua 2 Timoteo 3:16 uan 17).

5. ¿Kenke tlauel moneki moiknelisej katli mosenkajtokej?

⁵ Biblia kiijtoua tlaj katli mosenkajtokej kinekij kuali itstosej moneki tlauel moiknelisej. Apóstol Pablo kiijtok kenijkatsa uelis tijnextisej nelia titeikneliaj: “Se tlen teiknelia kipia iyolo ininuaya sekinok uan kinchiuilia tlen kuali. Yajaya axkineki tlen sekinok kipiaj. Axmoueyimati, niyon axmomachilia achi kuali kej sekinok. Se tlen teiknelia moyoliljuia achtoui kema tlanankilia. Axkamati san kej ueli. Axitskuinti uan axyolkentsi. Niyon axkichiuilia cuenta kema seyok kichiuilia tlen axkuali. Tlen teiknelia axkema paki ika tlen axkuali, san paki ika tlen melauak. Se tlen teiknelia kiijiyouia nochi tlamantli tlen uala uan motemachia para asis tlen kuali. Nochipa kichia para sekinok ma kichiuakaj tlen kuali uan mokaua temachtli yonke tlen ueli kipanotiuala. Teiknelijkayotl nochipa eltos uan axkema tlamis” (1 Cor. 13:4-8). Tlaj timoyoliljuisej ipan tlen Pablo kiijtok uan tijchiuasej, uelis tiitstosej ika pakilistli iuaya tosiua o toueue.

6, 7. 1) Kej kiijtoua Biblia, ¿ajkia kinamiki kinyakanas ininchampoyouaj? 2) ¿Kenijkatsa se tlakatl moneki kiyakanas isiua?

⁶ Jehová kiijtojtok se tlakatl kinamiki kinyakanas ichampoyouaj. Pablo kiixtonki: “Se tlakatl kipia tekiuejkayotl ika isiua pampa itstok keja itsonteko, keja Cristo kipia tekiuejkayotl ika nochi tlakamej, uan keja toTeko Dios kipia tekiuejkayotl ika Cristo” (1 Cor. 11:3). Jehová kineki se tlakatl ma kinyakana ichampoyouaj ika tlaiknelili uan amo ma kintlaijiyouilti. Jehová kuali kinnextilia tlakamej kenijkatsa kichiuasej, pampa ya nochipa kiyakana Jesús ika tlaiknelili, uan yeka Jesús tlauel kitlepanita, yeka kiijtok: “Nikiknelia noTata” (Juan 14:31). Jesús amo kitlepanitaskia Jehová tlaj ya kitlaijiyouiltiskia.

⁷ Maske se tlakatl “kipia tekiuejkayotl ika isiua”, Biblia nojkia kiijtoua moneki kitlepanitas (1 Ped. 3:7). ¿Kenijkatsa se tlakatl uelis kinextis kitlepanita isiua? Moneki kuali kiitas tlake kipoloua o tlake kineki isiua, uan tlaj uelis, ma kimaka tlen kipoloua. Biblia kiijtoua: “Xitlakakikaj intlakamej tlen inkipiaj inmosiua. Xikikneli mosiua keja Cristo kiiknelijtok iteopa [o tlanechikoli] uan mijki para kimakixtis” (Efes. 5:25). Jesús tlauel kiniknelik itokilijkauaj, uan yeka motemaktilik. Tlaj se tlakatl kichiuas kej Jesús uan kiiknelis isiua, uajka ya nochipa kitlepanitas, kiiknelis uan kichiuas tlen kiijtos (xijpoua Tito 2:3-5).

8. ¿Kenijkatsa moneki tikinitasej toikniuaj?

⁸ Ipan ni tonali tlauel miakej maseualmej kitekipanouaj Jehová. ¿Kenijkatsa moneki tikinitasej toikniuaj? Biblia kiijtoua: “Ma tikinchiuilikaj tlen kuali nochi tlakamej. Uan achi más moneki ma tikinchiuilikaj tlen kuali toikniuaj ipan Cristo” (Gál. 6:10; xijpoua Romanos 12:10). Apóstol Pedro kiijtok  tlaj tijneltokasej tlen toTeotsij technauatia, uajka tikiniknelisej toikniuaj ika nochi toyolo. Pedro kiniljuik se keskij Cristo itokilijkauaj: “Moneki ximoiknelikaj miak se ika seyok” (1 Ped. 1:22; 4:8).

9, 10. ¿Kenke kuali timouikaj toTeotsij itekipanojkauaj?

⁹ Amo onka seyok tlanechikoli kej Jehová itlanechikol. ¿Kenke? Pampa nelia tikinikneliaj toikniuaj ika nochi toyolo uan nojkia pampa tlauel tikikneliaj Jehová uan tijneltokaj itlanauatiljuaj. Yeka techmaka itonal. ToTeotsij itonal techpaleuia kuali ma timouikakaj ininuaya toikniuaj ipan nochi Tlaltipaktli (xijpoua 1 Juan 4:20 uan 21).

¹⁰ Pablo kiijtok Cristo itokilijkauaj tlauel moneki moiknelisej, yeka kiijkuilok: “Moneki xikintlasojtlakaj uan xikinchiuilikaj sekinok tlen kuali. Sejse inmojuantij ximoiknonekikaj uan xitekamauikaj ika yamanik. Xijpiakaj inmoyolo ika nochimej. Uajka xijpiakaj inmoyolo ika tlen inmechchiuiliaj tlen axkuali uan xikintlapojpoljuikaj. Intla se kiteiljuiaj seyok ika se tlenijki, ma kitlapojpoljui keja Cristo inmechtlapojpoljuijtok. Uan tlen más ipati para inkichiuasej, moneki ximoiknelikaj uan keja nopa initstosej kuali, pampa tlaiknelijkayotl techilpia sansejko para ma tijpiakaj sanse toyolo” (Col. 3:12-14). ¡Nochi tojuantij tlauel kuali timouikaj pampa nelia timoikneliaj maske kampa ueli tieuaj!

11. ¿Tlake kinextia nelia tiitstokej ipan religión katli melauak?

¹¹ Katli tijtekipanouaj Jehová nelia timoikneliaj uan kuali timouikaj, ni kinextia tiitstokej ipan religión katli melauak. Jesús kiijtok: “Nochi tlakamej kimachilisej para nelia innomomachtijkauaj intla nelia inmoiknelisej” (Juan 13:34, 35). Uan apóstol Juan kiijkuilok: “Uajka uelis tikinitasej ajkeya yajuantij ikoneuaj toTeko uan ajkeya yajuantij ikoneuaj Axkualtlakatl. Yajaya tlen axkichiua tlen kuali uan axkiniknelia iikniuaj ipan Cristo, yajaya axiaxka toTeko. Uan ya ni nopa tlajtoli tlen inkikaktokej  hasta kema achtoui inkineltokakej Cristo: moneki timoiknelisej se ika seyok” (1 Juan 3:10, 11). Kema Jehová itlajtoltemakauaj timoikneliaj uan kuali timouikaj tijnextiaj nelia tielij Jesús itokilijkauaj. Nojkia kinextia toTeotsij techyakana ma tijmoyauakaj nopa kuali tlamachtili tlen iTlanauatijkayo ipan nochi Tlaltipaktli (Mat. 24:14).

12, 13. ¿Tlake kichiuaj ipan ni tonali nopa “miak tlakamej”, uan tlake nechka kiselisej?

¹² Miakej tlen Jehová itlajtoltemakauaj elij tlen nopa “miak tlakamej” tlen kampa ueli euaj uan kipaleuiaj toTeotsij iTlanauatijkayo. “Yajuantij tlen ualajkej ipan nopa tonali tlen ueyi tlaijiyouilistli uan kichikuenijtokej ininyoyo ika ieso nopa Pilborregojtsi, uan yeka kichijtokej chipauak ininyoyo.” Ni kiijtosneki motemachiaj uelis momakixtisej pampa Jesús motemaktilik. Nojkia kiikneliaj Jehová uan Jesús, uan kiueyichiuaj toTeotsij “youali uan tonali” (Apoc. [Rev.] 7:9, 14, 15).

¹³ ToTeotsij nechka kintsontlamiltis katli amo kualmej ipan nopa “ueyi tlaijiyouilistli” (Mat. 24:21; xijpoua Jeremías 25:32 uan 33). Uan itekipanojkauaj kinmanauis uan kinkauas ma itstokaj ipan Xochimili pampa tlauel kiniknelia. Ipan nopa tonali Jehová “kinuachilis nochi ininixayo. Uan ayok kema aki mikis, niyon mokuesos, niyon chokas, niyon mokokos”. Maske ni kiijtok kipia se 2,000 xiuitl, ya temachtli kichiuas. ¿Timoiljuia kenijkatsa tiitstosej kema ayokmo onkas tlen amo kuali, ayokmo titlaijiyouisej yon timikisej? (Apoc. 21:4.)

14. ¿Keskij Jehová itlajtoltemakauaj itstokej ipan ni tonali?

¹⁴ Kema pejki itlamia tonali ipan xiuitl 1914, san itstoyaj se 5,000 toTeotsij itekipanojkauaj. Uan pampa kiniknelijkej sekinok maseualmej uan toTeotsij kinpaleuik ika itonal, nopa toikniuaj katli motemachiyayaj yasej iluikak nojua tlajtolmoyajkej maske kipixkej miak tlaouijkayotl. Pampa kichijkej nopa, nama nojua kinsentiliaj tlauel miakej maseualmej katli motemachiaj itstosej nochipa ipan Tlaltipaktli. Nama itstokej kipano 8 millones Jehová itlajtoltemakauaj uan mosentiliaj ipan 115,400 tlanechikoli ipan nochi Tlaltipaktli, uan nojua momiakilijtiauij. Ipan septiembre 2013 uan tlanki ipan agosto 2014 moatsonpoliuiltijkej kipano 275,500 maseualmej. Ni kiijtosneki sejse chikueyi moatsonpoliuiltijkej 5,300 maseualmej.

15. ¿Tlake techpaleuia ma titlajtolmoyauakaj?

¹⁵ Nelia tlauel techpakilismaka tikitasej kenijkatsa miakej maseualmej kitlakakiliaj nopa kuali tlamachtili tlen toTeotsij iTlanauatijkayo. Ni ueli mochiua pampa tijpiaj amatlajkuiloli ipan kipano 700 tlajtoli. Pilamochtsi Tlen Tematiltia ya nopa tlen tlauel momoyaua ipan nochi Tlaltipaktli. Sejse mestli kichijchiuaj kipano 52 millones pilamochtsitsij ipan 247 tlajtoli. Nojkia nopa amochtli ¿Tlake nelnelia tlamachtia Biblia? motlajtolkueptok ipan kipano 250 tlajtoli, uan kichijchijtokej 200 millones tlen nopa amochtli.

16. ¿Kenke momiakilijtiauij Jehová itlajtoltemakauaj?

¹⁶ Jehová itekipanojkauaj tlauel momiakilijtiauij pampa tlaneltokaj ipan ya uan pampa kimatij yaya kichijki ma moijkuilo Biblia (1 Tes. 2:13). Maske Satanás techkualankaita uan amo kineki ma tijtekipanokaj Jehová, ya nojua techteochiua (2 Cor. 4:4).

17, 18. ¿Tlake kineki Jehová ma tijchiuakaj kema maseualmej amo techtlakakilisej?

¹⁷ Kema titlajtolmoyauaj sekij kuali techtlakakiliaj uan sekinok amo. ¿Kinamiki ma tikualanikaj kema amo techtlakakilisej? Amo, Jehová kineki ma tijchiuakaj tlen techtlajtolmaka ipan Colosenses 4:6: “Xikinkamauikaj ika yamanik uan ika yejyektsi [...] uan ximoiljuikaj kejatsa moneki inkinankilisej sejse tlakatl kema inmechtlajtlanisej”.  Uan pampa tikinikneliaj maseualmej, moneki tikinmachtisej “ika yamanik uan ika tlatlepanitakayotl” (1 Ped. 3:15).

¹⁸ Maske maseualmej tlauel kualanisej, moneki tijnextisej tikinikneliaj kej Jesús kichijki. Kema Jesús kitlaijiljuijkej ya “axtleno kinnankiliyaya. Kema yajaya tlaijiyouiyaya, axtemajmatiyaya ika tlen kinkuepiliskia teipa”. Ya motemachik ipan Jehová (1 Ped. 2:23). Uajka kema maseualmej techchiuilisej tlen amo kuali, moneki amo timoueyimatisej uan tijchiuasej tlen Biblia techtlajtolmaka: “Amo xikinkuepilikaj tlakamej tlen fiero inmechchiuiliaj. Amo xikintlaijiljuikaj tlen inmechtlaijiljuiaj, pero xikinchiuilikaj tlen kuali uan xijtlajtlanikaj toTeko ma kinteochiua” (1 Ped. 3:8, 9).

19. ¿Kenijkatsa kinamiki tikinitasej katli techkualankaitaj?

¹⁹ Tlaj amo timoueyimatij, tijchiuasej tlen Jesús kiijtok: “Inkikaktokej itlanauatil Moisés uejkajkia kiijtok xikiniknelikaj inmouampoyouaj uan xikinkokolikaj inmokualankaitakauaj. Pero na niinmechiljuia, xikiniknelikaj inmokualankaitakauaj uan xijtlajtlanikaj toTeko ma kinteochiua tlen inmechtlaijiyouiltiaj. Uan keja nopa, nochi kimatisej para melauak initstokej ikoneuaj toTeko inmoTata tlen itstok iluikak. Pampa yajaya kichiua Tonati ma tlaui ipan tlen axkuajkualmej uan ipan tlen kuajkualmej. Uan yajaya kichiua ma uetsi atl ipan ininmil tlen itstokej xitlauakej iixtla uan ipan ininmil tlen axitstokej xitlauakej iixtla” (Mat. 5:43-45). Katli tijtekipanouaj toTeotsij moneki tikiniknelisej katli techkualankaitaj maske techchiuiliaj tlen amo kuali.

20. ¿Kema nochi maseualmej moiknelisej uan kiiknelisej Jehová? (Xikita nopa achtoui tlaixkopinkayotl.)

²⁰ Moneki nochipa tijnextisej tikikneliaj Jehová uan sekinok maseualmej. Uan maske sekij techkualankaitaj uan amo kinekij techtlakakilisej, tikinpaleuiaj kema moneki. Pablo kiijkuilok: “Intla intlauikaj, nimantsi xitlaxtlauakaj para axtleno intlauikatosej iyoka tlen nopa teiknelijkayotl tlen intlauikaj pampa moneki tikiniknelisej nochi sekinok tlakamej. Uan tlen kiniknelia sekinok, nojkia kichijtok nochi tlen itlanauatiljuaj Moisés technauatia ma tijchiuakaj. Pampa nopa tlanauatili tlen kiijtoua amo ximomekatikaj, amo xitemiktikaj, amo xitlachtekikaj, amo xikixtokakaj tlen sekinok kipiaj uan nochi sekinok tlanauatili tlen onka, nochi eltok ipan ni tlanauatili tlen kiijtoua: ‘Xikiniknelikaj sekinok keja inmoikneliaj’. Pampa intla se kiiknelia seyok, axkichiuilis tlen axkuali. Yeka ajkeya nelia kiniknelia sekinok kitlamichiua nochi tlen kiijtoua nopa tlanauatili” (Rom. 13:8-10). Maske Satanás kichiua maseualmej ma mokualankaitakaj, tojuantij nochi tikinikneliaj (1 Juan 5:19). Kema Jehová kitsontlamiltis Satanás uan amo kuali iajakauaj uan nochi katli kichiuaj tlen amo kuali, nochi ipan Tlaltipaktli moiknelisej. ¡Nelia se ueyi tlateochiualistli kema nochi maseualmej moiknelisej uan kiiknelisej Jehová!