1, 2. ¿Tlenon temachtia Biblia itech tlasojtlalistli?

TLASOJTLALISTLI yejon tlen melak ueyi ikualneskayo Jehová (1 Juan 4:16). Niman Jesucristo ijkon ken iTaj. Yejua akin kachtopa okichijchiujkej itech nochi tlemach tlen onka, niman melak miyek xiuitl onen iuan toTajtsin ipan iluikak. Yejon okipaleui manomachti itech Jehová akin melak tetlasojtlani (Colosenses 1:15). Jesús yokiteititi yejon tetlasojtlalistli ipan nochi inemilis, ipan iluikak niman ipan tlaltikpaktli. Kuakon kuajli tikmatstokej ika Jehová niman Jesús nochipa techyekanaskej ika tlasojtlalistli.

² Se tonajli, se tlakatl okitlajtolti Jesús katlejua melak ueyi tlanauatijli. Jesús okinankili: “‘Xtlajsojtla on moTeko Dios ikan nochi moyojlo, ikan nochi moalma niman ikan nochi motlamachilis.’ Yejua in yejua más ueyixtikaj niman yejua yekatstikaj de nochimej on tlanauatiltin. Niman on ika ome tlanauatijli yejuan no ijki ueyi kijtosneki ken on achtoj tlanauatijli ijkin kijtoua: ‘Xkintlajsojtla oksekimej no ijki ken tejua timotlajsojtla’” (Mateo 22:37-39).

3. ¿Akinon totlaltikpakchanejkauj?

 ³ ¿Tleka melak noneki matikteititikan ika tikintlasojtlaj tlaltikpakchanejkej? Jesús okijto ika noneki tiktlasojtlaskej Jehová niman totlaltikpakchanejkauj. ¿Akinon totlaltikpakchanejkauj? Maski san akinon nemi nisiuj totech. Se neskayotl, tla yotonamiktijkej, toueuentsin noso tosiuauj yejua akin totlaltikpakchanejkauj. Totlaltikpakchanejkauj noijki tokniuan ipan tlanechikojli niman akin tikinnojnotsaj. Ipan yejuin tlamachtijli tikitaskej kenon tikimititiskej ika tikintlasojtlaj.

4. ¿Tleka tikmatstokej ika akin yononamiktijkej uelis yolpakiskej maski tlajtlakolejkej?

⁴ Jehová okinnamikti kachtopa tlaltikpakchanejkej. Kuakon yejua okichijchiuj namiktilistli. ToTajtsin kinekiya ika Adán niman Eva mayolpakikan niman makitemiltikan tlaltikpaktli ika inkoneuan (Génesis 1:27, 28). San ika, ijkuak yejuamej xokitlakamatkej Jehová xok oyolpakej. Niman otechpanoltilijkej tlajtlakojli niman mikilistli (Romanos 5:12). Pampa nochimej akin yononamiktijkej tlajtlakolejkej, ¿kijtosneki ika xuelis yolpakiskej? Kema, uelis yolpakiskej. ¿Tleka ijkon tikijtouaj? Pampa Jehová kinmaka tlajtolpaleuilistin ipan Biblia (xpoua 2 Timoteo 3:16, 17).

5. ¿Tleka melak noneki manotlasojtlakan akin yononamiktijkej?

⁵ Biblia temachtia ika akin yononamiktijkej noneki manotlasojtlakan niman ijkon pakiskej. Pablo, itlatitlankauj Cristo, okijto tlen kijtosneki melauak tlasojtlalistli: “On yejuan tetlajsojtla kimijyouia oksekimej niman yolyemanki. [...] Xnexikolej, niman xnoueyiteneua nion noueyimati. [...] Xkeman xompayejyeua niman xkitejtemoua on tlen kuajli san para yejua. [...] Xsan kuajkualani, niman xsa konelnamiktikaj on tlen oksekimej xkuajli kichiuiliaj. [...] Xpaki  ika on tlen xkuajli kichiuaj oksekimej, yej paki ijkuak kita tetlani on tlen kuajli. [...] Kixikoua nochi tlajtlamach tlen xkuajli, para kineltoka on tlen kuajli intech oksekimej, para kinnekilia nochi kuajli ma uajla impan oksekimej, niman para kimijyouis oksekimej. On yejuan tetlajsojtla xkeman tlamis itetlajsojtlalis” (1 Corintios 13:4-8). Tla titlanemiliaj itech itlajtoluan Pablo niman tikchiuaj itlajtolpaleuilisuan, uelis tiyolpakiskej ipan tonamiktilis.

6, 7. a) ¿Tlenon kijtoua ipan 1 Corintios 11:3 itech tlanauatijkayotl? b) ¿Tlenon noneki kititis se teueuentsin isiuauj?

⁶ Jehová yokijto akinon kipiya tlanauatijkayotl ipan se familia. Pablo okijto: “Tlakatl yejua tlayekanki itechika isiuau, niman Cristo yejua tlayekanki ipan cada tlakatl niman Dios tlayekanki itech Cristo” (1 Corintios 11:3). Ken tikitaj, teueuentsin kipiya tlanauatijkayotl. San ika, yejon xkijtosneki ika yejua uelis kintlajyouiltis inchanejkauan. Ka, Jehová kichia makintlasojtla. Noijki, toTajtsin kimititia teueuentsitsinuan ika yejua nochipa okititi Jesús tlasojtlalistli niman xnexikole. Kuakon, Jesús xouijtika kita kitlakamatis Jehová. Yejua okijto: “Nejua niktlajsojtla noTajtsin” (Juan 14:31). Tla Jehová kitlajyouiltiskia Jesús, xkeman kijtoskia yejon.

⁷ Biblia kijtoua ika teueuentsin kipiya tlanauatijkayotl itech isiuauj. San ika, noijki kijtoua ika noneki kitlakaitas (1 Pedro 3:7). ¿Kenon uelis teueuentsin kitlakaitas isiuauj? Ijkuak kita tlen kipoloua niman kimaka tlen kineki ijkuak uelis. Biblia kijtoua ika teueuentsin noneki “ma kitlajsojtla isiuau ijkon ken Cristo okintlajsojtlak on yejuan kineltokaj niman impampa onotemakak” (Efesios 5:25). Ken tikitaj, Jesús melak kintlasojtlaya inomachtijkauan hasta okinek kitemakas inemilis inpampa. Tla teueuentsin kichiua ken Jesús niman kitlasojtla isiuauj, yejua noijki xouijtika kitlasojtlas niman kitlakaitas niman kipaleuis itech tlen kinemilis kichiuas (xpoua Tito 2:3-5).

8. ¿Tlenon noneki tikmachiliskej itech tokniuan?

⁸ Nochiuiyan ipan tlaltikpaktli melak miyekej nemij akin kitekichiuiliaj Jehová. ¿Tlenon noneki tikmachiliskej itech yejon tokniuan? Biblia techijlia: “Nochimej ma tikinchiuilikan on tlen kuajli, niman más on yejuan kineltokaj  Jesucristo” (Gálatas 6:10; xpoua Romanos 12:10). Pedro okijkuilo ika tla tiktlakamatij toTajtsin, tikintlasojtlaskej tokniuan ika nochi toyojlo. Niman noijki okimijli: “Sanoyej xmotlajsojtla[kan] iuan oksekimej” (1 Pedro 1:22; 4:8).

9, 10. ¿Tleka melak san sekan nemij itekipanojkauan toTajtsin?

⁹ Itekipanojkauan Jehová titlamantikej noso tisejnekamej. ¿Tleka? Pampa tikintlasojtlaj tokniuan ika nochi toyojlo. Noijki, tiktlasojtlaj Jehová niman tikintlakamatij itlanauatiluan. Ika yejon yejua techmaka iespíritu santo. Yejuin iespíritu melak ueyi kojtilistli niman techpaleuiya san sekan matinemikan iuan tokniuan ipan nochiuiyan tlaltikpaktli (xpoua 1 Juan 4:20, 21).

¹⁰ Pablo okijto ika melak noneki ika akin tikchiuaj ken Cristo matikteititikan ika totlasojtlaj. Yejua okijkuilo: “Xmopantlantikan ikan teiknelilistli, ikan kuajlilistli, ikan yolyemanilistli, ikan kuajli tenotsalistli itlaj ika, niman ikan ijyouilistli. On yejuan más ueyi kijtosneki, xmotlajsojtlakan iuan oksekimej, pampa on tetlajsojtlalistli kajxitia nochi in tlajtlamach” (Colosenses 3:12, 14). Niman Pablo okijkuilo: “Nemejuamej xtenotsakan, niman xmoyolyemanilikan iuan oksekimej, niman xmotlapojpoluikan iuan oksekimej ijkon ken Dios omechtlapojpoluij itechkopa Cristo (Efesios 4:32).

11. ¿Kenon nesi ika tikpiyaj tlaneltokijli melauak?

¹¹ Iteixpantijkauan Jehová melak totlasojtlaj niman san sekan tinemij. Yejon teititia ika san tejuamej tikueyichiuaj toTajtsin ken noneki. Jesús okijto: “Tla nemotlajsojtlaj semej iuan oksekimej, nochi tlakatl kitas ika nennotemachtijkauan” (Juan 13:34, 35). Niman Juan, itlatitlankauj Cristo, okijkuilo: “Ijkin uelis nenkimatiskej akinomej tekoneuan itech on diablo. Tla yakaj xkichiua tlen kuajli noso xkitlajsojtla ikniu, yejua xtekoneu itech Dios. Desde ijkuak onenkineltokakej Cristo, onenkakkej ika noneki titotlajsojtlaskej inuan oksekimej” (1 Juan 3:10, 11). Pampa iteixpantijkauan Jehová totlasojtlaj, tikteititiaj ika tejuamej yemelak tikchiuaj ken Cristo. Noijki noteititia ika toTajtsin techtekitiltitijkaj matikteijlikan  kuajli tlajtoltin itech Tekiuajyotl ipan nochi tlaltikpaktli (Mateo 24:14).

12, 13. a) ¿Tlenon kichiujtokej melak miyek tlaltikpakchanejkej? b) ¿Tlenon kitaskej tlaltikpakchanejkej nochiuas xok uejkaujtipan?

¹² Ipan yejuin tonajli, melak miyekej iteixpantijkauan Jehová teuan nopouaj itech melak miyekej tlaltikpakchanejkej. Yejuin tlaltikpakchanejkej akin nemij ipan nochiuiyan tlaltikpaktli, kipaleuiyaj iTekiuajyo toTajtsin. Biblia kijtoua ika yejuin tlaltikpakchanejkej “yejuamej on yejuan youajkiskej ipan on temojtij tlajyouilistli. Niman yejuamej okimpakkej intlaken niman okimistalijkej ikan iyesyo on Borreguito”. Yejon melak miyekej tlaltikpakchanejkej kitlasojtlaj Jehová niman iKoneuj, niman kiueyichiuaj toTajtsin ika “tonajli niman yeuajli” (Apocalipsis [Revelación] 7:9, 14, 15).

¹³ Xok uejkauis toTajtsin kipopolos tlen xkuajli nochiua. Yejuin kichiuas ipan ueyi tlajyouilistli (Mateo 24:21; xpoua Jeremías 25:32, 33). * San ika, Jehová melak kintlasojtla itekipanojkauan, ika yejon kintlajpiyas niman kinkauilis manemikan ipan Xochitlalpan. Ijkon ken yokijto ikipiya 2,000 xiuitl, “Dios kimpopolouilis nochi ajmantli, niman xok onyas mikilistli, nion chokistli, nion ajmantli, nion kokolistli, pampa nochi tlen achtoj onkatka yopanok”. ¡Xnemili kenon yes nemilistli ijkuak xok onias tlen xkuajli, tlajyouilistli nion mikilistli! (Apocalipsis 21:4.)

14. ¿Kechmej ika miyekej iteixpantijkauan Jehová ipan yejuin tonajli?

¹⁴ Ijkuak opeuj itlamiyan tonajli ipan 1914, san nemiyaj kanaj 5,000 itekipanojkauan toTajtsin. Maski okixnamijkej tlaueltin tlapejpeniltin, ok tenojnotstoyaj pampa kitlasojtlayaj intlaltikpakchanejkauj niman kinpaleuiaya espíritu santo. Ika yejon tekitl, nosentlalijtokej miyekej tlaltikpakchanejkej akin kichiaj nemiskej nochipa ipan tlaltikpaktli. Ipan yejuin tonajli, nemij kanaj ocho millones iteixpantijkauan Jehová akin nosentlaliaj ipan 115,400 tlanechikoltin ipan nochi tlaltikpaktli. ¡Niman ok nomiyekilijtokej! Se neskayotl, itech septiembre 2013 niman hasta agosto 2014 onoapolaktijkej ipantsin 275,500 tlaltikpakchanejkej. Yejuin kijtosneki ika nochi semana onoapolaktijkej 5,300 tlaltikpakchanejkej.

15. ¿Tlenon techpaleuiya ika matitenojnotsakan itech iTekiuajyo toTajtsin?

¹⁵ Temojkatlachialti ika melak miyekej kinkakistiliaj tlajtojli itech Tekiuajyotl. Toamatlajkuiloluan tlen techpaleuiyaj ika matitenojnotsakan, tlen onka ipantsin 700 tlajtoltin. Se neskayotl, revista Amatl Tekakistilijketl nochi metstli nokixtia 52 millones ika 247 tlajtoltin. Niman amoxtli tlen tiktekitiltiaj ika titemachtiaj Biblia ¿Tlenon melauak temachtia Biblia? yonochijchiuj ipantsin 200 millones. Noijki yejuin amoxtli nochijchiua ika ipantsin 250 tlajtoltin.

16. ¿Tleka yonomiyekilijkej itekipanojkauan Jehová?

¹⁶ Itekipanojkauan Jehová nomiyekilijtiuej pampa tlaneltokaj itech toTajtsin niman kineltokaj ika yejua okichijchiuj Biblia (1 Tesalonicenses 2:13). Maski Satanás techtlauelita niman techixnamiki, tiyolpaktokej ika kuajli touikaj iuan Jehová (2 Corintios 4:4).

17, 18. ¿Kenon kichia Jehová matitlanankilikan ijkuak yakaj xkiselia tlen tikijliaj?

¹⁷ Ijkuak titenojnotsaj, tlamantik noso sejneka technankiliaj. Sekimej techkakij, san ika, oksekimej xkiseliaj tlen tikimijliaj. ¿Kenon kichia Jehová matitenankilikan? Maski san tlenon makichiuakan tlaltikpakchanejkej, yejua kineki matikchiuakan tlen kijtoua Biblia.  Yejuin tlen kijtoua: “Nemotlajtol ma yemanki para kuelkakiskej. Niman no noneki nenkimatiskej ken ijki nenkinnankiliskej cada se” (Colosenses 4:6). Ijkuak yakaj tiktomiliskej itech tlen tikneltokaj, matikchiuakan ika “yolyemanilistli niman tetlakaitalistli”. Tikneki ijkon tikchiuaskej pampa tiktlasojtlaj totlaltikpakchaneujkauj (1 Pedro 3:15).

¹⁸ Niman hasta ijkuak tlaltikpakchanejkej touan kualanij niman xkiseliaj tlen tikimijliaj, tikimititiaj ika tikintlasojtlaj niman tikchiuaj ken Jesús. Ijkuak “okuijuikaltijkej Cristo, yejua xotlanankilij ikan tlauijuikaltilistli. Ijkuak okitlajyouiltijkej, xokijtoj ika kinkojkokos nion kinmiktis”. Jesús otlaneltokak itech Jehová (1 Pedro 2:23). Kuakon, ijkuak texchiuiliskej tlen xkuajli, matiyolyemankej niman matikchiuakan yejuin tlajtolyekanalistli: “Tla yakaj mechteneuilia on tlen xkuajli, ma ka no nenkiteneuiliskej on tlen xkuajli. Yej xkuepilikan ikan tlatiochiualistli” (1 Pedro 3:8, 9).

19. ¿Tlenon noneki tikchiuaskej imiuan akin techtlauelitaj?

¹⁹ Tla tiyolyemankej, tiktlakamatiskej tlen Jesús okijto: “Onenkakkej ika onijtoj: ‘Xtlajsojtla motetlajsojkau niman xtlauelita motlauelikniu.’ Pero nejua nemechijlia: Xkintlajsojtlakan on nemotlauelikniuan. [...] Xchiuakan oración para on yejuan mechchiuiliaj on tlen xkuajli niman yejuan mechtlauelitaj [...,] para nesis ika nentekoneuan itech on nemoTajtsin iluikak chanej. Yejua, tej, kichiua para on tonaltsintli ma kisa impan on yejuan xkuajkualtin tlakamej niman yejuan kuajkualtin. Niman no kichiua para kiaui impan on yolchipajkej niman yejuan xyolchipajkej” (Mateo 5:43-45). Akin tiktekichiuiliaj toTajtsin noneki tikintlasojtlaskej totlauelikniuan maski san tlenon matexchiuilikan.

20. ¿Kenon tikmatij ika yejkos tonajli ijkuak nochimej kitlasojtlaskej Jehová niman intlaltikpakchanejkauj? (Xkita tlaixkopinajli kampa peua tlen tomachtijtokej.)

²⁰ Nochipa noneki tikteititiskej ika tiktlasojtlaj Jehová niman totlaltikpakchanejkauj. Tla sekimej techtlauelitaj noso xkiseliaj tlen tikimijliaj itech Biblia, tikinpaleuiyaj ijkuak noneki. Pablo, itlatitlankauj Cristo, okijkuilo: “Ma ka yakaj itlaj xkuikilikan, yej san yejua on tetlajsojtlalistli yejuan se iuan okse noneki kinopialiskej. Ijkuak se tlakatl tetlajsojtla, on tlen tlanauatia itlanauatil Moisés nochi yokitlakamat. On tlanauatiltin yejuan ijkin kijtouaj: ‘Ma ka tiauilnemis, ma ka titemiktis, ma ka titlachtekis, ma ka tikeleuis on tlen teyaxka’, niman nochimej on oksekimej tlanauatiltin tenkisaj nochi tla nenkitlakamatij in tlanauajtijli yejuan ijkin kitoua: ‘Xtlajsojtla motlaltikpakchanejkau no ijki ken tejua timotlajsojtla.’ Yejuan tetlajsojtla xkitechiuilia on tlen xkuajli. Yejua in kijtosneki ika tla se tlakatl tetlajsojtla, yejua kichiua nochi tlen tlanauatia on tlanauatijli” (Romanos 13:8-10). Satanás kichiua ika tlaltikpakchanejkej manotlauelitakan, san ika, tejuamej melauak titetlasojtlaj (1 Juan 5:19). Ijkuak Jehová kipopolos Satanás, xkuakualtin espíritus niman tlen xkuajli nochiua ipan tlaltikpaktli, kuakon nochimej kitlasojtlaskej Jehová niman intlaltikpakchanejkauj. ¡Se ueyi tlateochiualistli yes!