1. Fa Yesesi be e si a peleikiwooko?

YESESI be lobi taki fu Gadu Kownukondee. Di a be de a goontapu, a be lobi taki fu a Kownukondee. A moo enke 100 leisi a taki fu a Kownukondee di a be e peleiki. A Kownukondee be pelensipali gi Yesesi.​—Leisi Mateyesi 12:34.

2. Omen sama yee a sani di Yesesi taki aini Mateyesi 28:19, 20? Fa u du sabi?

² Di Yesesi opobaka, neen a kon makandaa anga moo enke 500 sama (1 Korentesama 15:6). Kande na a okasi ya Yesesi be taigi den taki den mu peleiki gi „sama fu ala kondee”. A sani ya á be o makiliki. * (Luku a maiki a ondoo.) A taigi den taki a peleikiwooko be o go doo „te enke a kaba fu a goontapu doo”. Yu e meke a sani di Yesesi be taki kon tuu te yu e paati a bun nyunsu.​—Mateyesi 28:19, 20.

3. San a den dii sani di yeepi u fu paati a bun nyunsu?

 ³ Baka di Yesesi sende den disipel go peleiki, a paamisi den taki: „Mi o de anga u” (Mateyesi 28:20). Yesesi be paamisi den bakaman fi en taki a be o tii a peleikiwooko. A be o yeepi den fu peleiki na ala se fu goontapu. Yehofa de anga u tu. A gi wi „ala bun sani” fu u sa du a peleikiwooko (Hebrewsama 13:20, 21). Aini a artikel ya, wi o taki fu dii sani di Yehofa gi u. Wi o luku (1) den sani di u be e koboloiki, (2) den somen fasi fa wi e peleiki, anga (3) den sikoo di e leli u fa u mu paati a bun nyunsu. Meke u luku fosi san a wantu fu den sani di u koboloiki aini den 100 yali di pasa.

4. Fa den sani di Yehofa gi u yeepi wi aini a peleikiwooko?

⁴ Yesesi be taki a Kownukondee bosikopu de enke sii di sama e paandi a omen sowtu doti (Mateyesi 13:18, 19). Wan sama di e paandi goon e koboloiki omen sowtu wookosani fu tuubu a doti. A so a Kownu fu u gi wi omen sani di e meke en moo makiliki gi sama fu aliki a bosikopu di wi e paati. U nai wooko anga son wan fu den sani ya moo, ma wi e wooko anga wantu fu den ete. Tokuso ala den sani ya yeepi u fu peleiki moo bun.

5. Sowtu kaita den baala be e koboloiki? Fa den be e wooko anga a kaita ya?

⁵ Aini 1933, den Kotoigi be e koboloiki wan sowtu kaita te den be e peleiki. A kaita ya yeepi omen sama fu bigin anga a peleikiwooko. Den baala be e sikiifi wan bosikopu fu Beibel na a kaita ya . Te a langa den be e meke nyun kaita di be abi wan taa bosikopu fu Beibel. Wan baala di den e kai Erlenmeyer be abi tin yali di a wooko anga a kaita ya a fosi leisi. A taki: „A fosi sani di u be e taki na: ’I be sa wani leisi a kaita ya?’ Te a sama be leisi a kaita, u be e fika wan sani gi en fu a leisi da u gwe.”

6. Fa a kaita yeepi den peleikiman?

⁶ A kaita ya yeepi peleikiman a omen sowtu fasi. Son wan fu den peleikiman be wani peleiki, ma den á be sabi san fu taki. Neen meke sen be e kisi den. Taawan di á be e feele fu peleiki, be e taigi den sama ala san den be sabi aini wantu miniti namo. Ma a ná ala yuu den be e taki bun anga den sama. A kaita be e yeepi den peleikiman fu paati a bosikopu a wan makiliki fasi.

7. San be e miti den peleikiman te den be e wooko anga a kaita?

⁷ Ma a ná ala yuu sani be e waka bun. Wan sisa di den e kai Grace Estep taki: „Son leisi sama be e akisi u taki: ’San sikiifi na a kaita? Taigi mi san a taki noh?’” Son sama á be sabi leisi. Taawan be e teke a kaita, da den tapu den doo. Den sama di á be lobi a bosikopu di wi e paati be e piiti a kaita. Ma tokuso a kaita be yeepi den peleikiman fu peleiki gi taa sama. Sama be sabi den tu enke peleikiman fu a Kownukondee.

8. Fa den peleikiman be e wooko anga a gaanmanfon? (Luku a fowtow na a bigin.)

⁸ Wan taa sani di den baala koboloiki baka 1930 a wan gaanmanfon. Wantu Kotoigi be e kai en Aron, bika te den be e daai a gaanmanfon gi sama aini a peleikiwooko, den á be e taki nawan sani. (Leisi Ekisodesi 4:14-16.) Te a sama be wani aliki, da a peleikiman be e daai wan satu lezing gi en. Baka dati a be e gi en wan sani fu a leisi. Son leisi na a hii osufamii be e kon sidon aliki den lezing! Aini  1934, a olikanisâsi seefi bigin meke gaanmanfon gi a peleikiwooko. A 92 lezing den baala be fanga poti a den sani ya.

9. Sowtu wini sama be fende fu a gaanmanfon?

⁹ Di wan man den e kai Hillary Goslin yee wan fu den lezing, neen a leni a gaanmanfon wan hii wiki fu daai a Beibel bosikopu gi den biitisama fi en. A sani ya tyai omen sama kon a waaleiti. Tu umanpikin fu baala Goslin be go na a Gileyad-sikoo, neen den toon zendeling. Leti enke a kaita, a gaanmanfon yeepi omen peleikiman fu bigin peleiki. Bakaten, a Kownu fu u koboloiki a Teyokalasiya Diniwooko-sikoo fu leli en foluku peleiki moo bun.

10, 11. Fa den baala be e koboloiki kolanti anga laadiyow fu paati a bun nyunsu? Saide den sani ya be abi bun bakapisi?

¹⁰ Fu di u Kownu e tii a peleikiwooko, meke u be e koboloiki omen sowtu sani fu paati a bun nyunsu gi sama na ala se. Den sani ya be de taanga fanowdu, bika peleikiman á be ipi a ten de. (Leisi Mateyesi 9:37.) Wan fu den sani di u be e koboloiki fu paati a bun nyunsu, a kolanti. Ala wiki Baala Russell be e sende wan Beibel lezing gi wan kantoo di e paati nyunsu. Da den be e sende a lezing fi en go a Kanada, Europa anga Ameekankondee fu den poti a kolanti. Na a ten fu 1913, den be poti den lezing fu Baala Russell aini 2000 kolanti. A wan sani fu 15.000.000 sama be leisi den lezing ya aini den kolanti!

¹¹ A laadiyow a wan taa sani di den baala be koboloiki fu paati a bun nyunsu. Baala Rutherford be holi wan fu den fosi lezing fi en a laadiyow a 16 april 1922. A wan sani fu 50.000 sama aliki a lezing de. Bakaten den baala opo wan laadiyow stasiyon di den be e kai WBBR. Den be daai a fosi programa a 24 februari 1924. Den baala be sikiifi aini a Ingiisitongo Wakititolen fu 1 december 1924 taki: „Te enke now a laadiyow na a moo bun fasi fa u paati a bun nyunsu gi sama, bika a bunkopu.” Leti enke den kolanti, a laadiyow yeepi u fu paati a bun nyunsu gi sama a den peesi pe peleikiman ná ipi.

12. (a) A omen peesi de pe tyaipi sama e pasa. On du fu den peesi ya i moo lobi peleiki? (b) San o yeepi u fu abi deki-ati te wi e feele fu peleiki a den peesi pe tyaipi sama e pasa?

¹² Wan fasi fa den baala e paati a bun nyunsu aini a ten ya, na a peleiki di den e peleiki a den peesi pe tyaipi sama e pasa. Den baala e du ala san den man fu peleiki a den peesi pe sama e taampu wakiti wagi efuso loko. Den e peleiki a wowoyo efuso taa peesi pe sama ipi. Yu e feele fu peleiki a den sowtu peesi ya? Begi Yehofa fu a yeepi i. Wan kelen-owluman di den e kai Manera taki: „Te den baala soi u wan nyun fasi fu du a peleikiwooko, da wi e meke moiti fu du en. Bika u wani soi Yehofa taki wi e dini en anga u hii ati. Neen meke u de kabakaba fu du ala san Yehofa wani u du.” Te wi e puubei fu peleiki na ala sowtu fasi, wi e taanga a biibi di wi e biibi Yehofa. Wi e toon moo bun peleikiman tu.​—Leisi 2 Korentesama 12:9, 10.

13. Saide a website a wan fu den bun sani di u sa koboloiki fu paati a bun nyunsu? Sowtu ondoofenitoli yu abi di i be koboloiki a website fu peleiki gi sama?

¹³ A omen peleikiman e gi sama taanga-sikin fu go na a website fu u, jw.org. Den sa leisi efuso download buku di e taki fu  Beibel aini moo enke 700 tongo na a website ya. A moo enke 1.600.000 sama e go na a website ya ala dei. Aini a ten di pasa, u be e koboloiki laadiyow fu peleiki gi sama di be e tan a den peesi pe wi á be poi doo. Na aseefi sani a website e du tu.

14. San den peleikiman be mu leli? Sowtu sikoo yeepi den fu du a peleikiwooko moo bun?

¹⁴ Den sani di den peleikiman be e koboloiki fu paati a bun nyunsu be abi wini. Ma a be de fanowdu fu leli den peleikiman fa den mu peleiki. Bika a ná ala sama be e biibi den sani di den be yee na a gaanmanfon. Son leisi den sama be e wani fusutan den sani di den be e yee moo bun. Neen meke a be de fanowdu fu den peleikiman leli fa den mu taki te den be miti den sowtu sama ya. Den be mu leli du a peleikiwooko moo bun. Yehofa be yeepi baala Knorr fu si taki a de fanowdu fu leli den peleikiman fa den mu taki anga sama aini a peleikiwooko. Neen meke fanafu 1943, den baala bigin holi a Teyokalasiya Diniwooko-sikoo aini den kemeente. A sikoo ya be yeepi den fu du a peleikiwooko moo bun.

15. (a) San miti son sama di den holi lezing na a Teyokalasiya Diniwooko-sikoo? (b) Fa Yehofa yeepi i enke fa a paamisi aini Psalm 32:8?

¹⁵ A omen baala á be gwenti taki a omen sama fesi. Wan baala di den e kai Ramu sabi ete di a be holi en fosi lezing aini 1944. A lezing be e taki fu Dowek, wan man aini Beibel. A baala taki ala en sikin be e dansi. A taki: „Na a sani de miti mi di mi holi mi fosi lezing, ma mi á gi abaa” Pikinengee seefi be e holi lezing na a sikoo, winsi fa a á be makiliki. Wan baala di den e kai Manera e membee ete san be pasa di  wan pikin boi be holi en fosi lezing. A taki: „Ná pikin feele a be e feele. Di a bigin holi a lezing, neen a bigin kee. Ma fu di a be wani holi en namonamo, meke a á gi abaa. A keekee a holi a hii lezing.” Kande i nai gi piki a komakandaa fu di sen e kisi i efuso fu di yu e si enke yu á poi. Efu a so yu e fii, begi Yehofa fu a gi i deki-ati. A o yeepi i enke fa a be yeepi den fosi peleikiman di be holi lezing na a Teyokalasiya Diniwooko-sikoo.​—Leisi Psalm 32:8.

16. (a) Saide den baala be sete a Gilyead-sikoo aini 1943? (b) San kengi fanafu 2011?

¹⁶ A olikanisâsi fu Yehofa sende peleikiman go na a Gilyead-sikoo tu fu go teke leli. Wan fu den sani di meke den baala sete a sikoo ya, a fu yeepi peleikiman fu du a peleikiwooko anga den hii ati. Den be bigin holi a sikoo ya aini 1943. Fanafu a ten de, a 8500 peleikiman go na a sikoo ya. Baka di den go na a sikoo ya, neen den baala sende den go a 170 kondee a hii goontapu. Fanafu 2011, den sama di sa go na a sikoo ya a spesuutu pionili, kelen-owluman, sama di e wooko a betel, efuso zendeling di á go na a sikoo ya ete.

17. Sowtu wini a Gilyead-sikoo abi?

¹⁷ A Gilead-Sikoo abi wini? Eeye. Luku san be pasa aini Yapan. Aini augustus fu a yali 1949, den á be doo tin peleikiman aini Yapan. Ma na a kaba fu a yali de, 13 zendeling be e peleiki anga den peleikiman fu a kondee de. Nownow a wan sani fu 216.000 peleikiman de a Yapan. Beina afu fu den a pionili!

18. San a wantu taa sikoo di den baala sete?

¹⁸ A omen taa sowtu sikoo den baala sete. Wantu fu den na a Kownukondee diniwooko-sikoo, a pionili-sikoo, a Sikoo gi Kownukondee Peleikiman, a Sikoo gi kelen-owluman anga den uman, anga a Sikoo gi den baala fu a Beikantoo Komte anga den uman. Den sikoo ya yeepi baala anga sisa fu den biibi kon moo taanga. A sani ya e soi kiin taki Yesesi e leli omen sama te enke now.

19. San Baala Russell be taki fu a peleikiwooko? Fa a sani ya kon tuu?

¹⁹ A moo enke 100 yali Gadu Kownukondee e tii kaba. Fanafu di Gadu Kownukondee bigin tii, neen Yesesi e tii a peleikiwooko. Aini 1916, Baala Russell be e biibi taki a peleikiwooko be o du a hii goontapu. A be taki: „A wooko e go a fesi. A o tan go a fesi, bika u mu peleiki ’a nyunsu fu a Kownukondee’ a hii goontapu.” (Faith on the March, di A. H. Macmillan sikiifi, bladzijde 69). Na a wooko de wi e du aini a ten ya. Wi e gi Yehofa, a Gadu fu freide daa, bika neen e gi wi ala den bun sani di wi abi fanowdu fu du san a wani!