1. Yesu walemesheli ñahi mudimu wakushimwina? Lumbululenu.

 YESU wakeñeli kuhosha nankashi haWanta waNzambi. Yesu hadiñayi hamaseki, wahosheleña nankashi haWanta kubadika yuma yikwawu. Mumudimu windi wakushimwina wateneni Wanta kubadika mapampa 100. Wanta wadiña walema chikupu kudi Yesu.—Tañenu Matewu 12:34.

2. Añahi atiyili lushimbi lwasonekawu haMatewu 28:19, 20, nawa muloñadi wutukuhoshela mwenomu?

² Hanyima yakwila Yesu anamusañuli, wadimweni nezaza dawatumbanji 500. (1 Akorinda 15:6) Iyi diyi mpinji Yesu yayinkeliyi atumbanji twindi lushimbi lwakushimwina “munyuza yejima.” Iwu mudimu wadiña wapela wanyi. * (Talenu tumazu twaheshina.) Wayilejeli nindi akatwalekahu kuzata  iwu mudimu wakushimwina, kushika ‘nikwakakumina nyaka.’ Neyi muzatañaku mudimu wakushimwina makonu, mukushikijaña iwu wuprofwetu.—Matewu 28:19, 20.

3. Yumanyi yisatu yinatukwashi kushimwina nsañu yayiwahi?

³ Chelili Yesu nahani dehi lushimbi lwakushimwina, wahosheli nindi: “Ami nidi nenu.” (Matewu 28:20) Dichi Yesu wakanini atumbanji nindi wakalombolaña mudimu wakushimwina nawa nindi wakayikwasha kushimwina mukaayi kejima. Yehova wudi nanetu nawa. Watwinka ‘yuma yayiwahi yejima’ kulonda tuzati mudimu wakushimwina. (Aheberu 13:20, 21) Muchinu chibaaba, tukudiza haniyi yuma yayiwahi yisatu: (1) yitwa yatwinkawu, (2) njila yitunazatishi ni (3) chanatudizishuwu. Chatachi, tuhanjekenu hayitwa yitunazatishi hayaaka 100 yinahituhu.

4. Yitwa yinatukwashi ñahi mumudimu wetu wakushimwina?

⁴ Yesu wesekejeli nsañu yaWanta nambutu yatumbawu hamaseki amboka. (Matewu 13:18, 19) Hakuwahisha iseki, ndimi wazatishaña yitwa yashiyashana. Munjila yoyimu, Mwanta wetu watwinka yitwa yitwatela kuzatisha kulonda tukwashi antu kutambwila nsañu yayiwahi. Yitwa yikwawu yazatikili hakapinji kanti, yikwawu yinakuzatika nimakonu. Ilaña yitwa yejima yinatukwashi kushimwina chiwahi.

5. Indi kaadi yadiña ñahi, nawa ayizatishileña ñahi?

⁵ Mu 1933, akwakushimwina atachikili kuzatisha makaadi, chitwa chakwashili antu amavulu kutachika kushimwina. Kaadi yadiña yanyanya hadiña nsañu yamu Bayibolu muwihi. Mpinji yikwawu asonekeleña kaadi yayiha. Manakwetu Erlenmeyer wadiña nayaaka kwakwihi na 10 hazatishiliyi katachi iyi kaadi. Wahosheli nindi: “Mazu akutachikilahu adiña nawu, ‘Mwani tañenu iyi kaadi.’ Neyi mwiniitala natañi dehi kaadi, twamwinkeleña mukanda kunahu hitukuya.”

6. Makaadi akwashileña ñahi akwakushimwina?

⁶ Kaadi yakwashili akwakushimwina munjila jashiyashana. Chakutalilahu, akwakushimwina amakwawu atiyileña nsonyi, hela chakwila akeñeleña kushimwina, elukili wanyi chakushimwina. Akwakushimwina amakwawu adiña ahamuka. Alejeleña eni matala yuma yejima yelukiluwu mujiminiti jantesha, ilaña alumbulwileña chatiyakana wanyi. Itu tumakaadi twakwashili akwakushimwina ejima kushimwina munjila yatiyakana nawa yapela.

7. Kukalanyi kwadiñaku hakuzatisha makaadi?

⁷ Hela chochu chadiña chapela wanyi. Muhela Grace Estep wahosheli nindi: “mpinji yikwawu atwihwileña nawu,  ‘nsañwinyi yiduhu? Nleji hohu nsañu yiduhu.’” Eni matala amakwawu atañileña wanyi nsañu yadiña hakaadi. Amakwawu atambwileña hohu kaadi nikushinka kuchinsu. Amakwawu aheleli nsañu yetu, dichi atabwileña makaadi. Hela chakwila kwadiña kukala kwamuchidiwu, makaadi akwashili akwakushimwina kushimwina kudi antu nikuyiluka nawu hiyakwakushimwina aWanta.

8. Chisanji achizatishileña ñahi? (Talenu mwevulu wakutachikilahu.)

⁸ Kufuma mu 1930 azatishili cheñi chitwa chikwawu chachisanji. A Yinsahu amakwawu achiteneneña nawu Aroni muloña chisanji chayihosheleleñaku. (Tañenu Kwidika 4:14-16.) Neyi mwiniitala yeteja kutiyilila, mukwakushimwina wavumishileña mpanji yaBayibolu yadiña najiminiti 4 nachikunku, kuhiñahu wahanineña nyikanda. Mpinji yikwawu, yisaka yakuñulukileña nakutiyilila kumpanji. Mu 1934, aWatch Tower Society atachikili kutuña yisanji yakuzatisha mumudimu wakushimwina. Dichi, amanakwetu akwatili jimpanji 92.

9. Chisanji chakwashili ñahi akwakushimwina?

⁹ Hillary Goslin chatiyiliyi mpanji yimu, watambwiluku chisanji hadi mulungu wumu kulonda yaleji antuñi nindi nsañu yamuBayibolu. Chafuminumu, antu amavulu etejeli chalala nawa apapatisheweli. Nawa, anyana kamanakwetu Goslin awambanda ayedi ayili kuShikola yaGileyadi nawa ekalili amishonali. Neyi chochadiña kaadi, chisanji nichena chakwashili akwakushimwina kutachika kushimwina. Kuhitila muShikola yawaKwakushimwina, Mwanta nadizishi antu jindi kwikala antañishi ashikahu.

10, 11. Yipapilu yansañu nichikunzulemba ayizatishileña ñahi kushimwina nsañu yayiwahi, nawa muloñadi chiyazatikilili chiwahi?

¹⁰ Chineli Mwanta nakuyilombola, antu jaNzambi anazatishi njila jashiyashana hakushimwina antu amavulu. Iji njila jatukwashili nankashi chineli kwadiña akwakushimwina antesha. (Tañenu Matewu 9:37.) Chakutalilahu, yaaka yakunyima azatishili yipapilu yansañu kushimwina nsañu yayiwahi. Mulungu nimulungu Manakwetu Russell watemesheleña Mpanji yaBayibolu kudi akwakusoneka nsañu. Kuhiñahu, akwakusoneka nsañu atemesheleña mpanji yindi kuCanada, Europe, nikuUnited States. Kushika mu 1913, mpanji jaManakwetu Russell ajisonekeli muyipapilu yansañu 2,000 nawa ajitañili kudi antu 15,000,000.

¹¹ Azatishili cheñi chikunzulemba hakushimwina nsañu yayiwahi. HaApril 16, 1922, Manakwetu Rutherford wahanini mpanji yindi yatachi hachikunzulemba, nawa ayitiyili kudi antu 50,000. Dichi, twatachikili kuzatisha chikunzulemba chetu chaWBBR,  nawa progilamu yatachi ayishili hampepela haFebruary 24, 1924. Kaposhi Kakutalila kaDecember 1, 1924 kahosheli nawu: “Tunakuhweleli netu kuzatisha chikunzulemba kukutumanishila wanyi mali amavulu nawa kukuzatika chiwahi kutandisha nsañu yalala.” Neyi chazatikili yipapilu yansañu, chikunzulemba nichena chatukwashili kushimwina antu amavulu mumaluña mwadiña akwakushimwina antesha.

12. (a) Njilanyi yakushimwina hatooka yimwakeña? (b) Munateli kuleka ñahi kutiya woma wakushimwina hatooka?

¹² Kushimwina hatooka hinjila jikwawu yinakuzatika chiwahi kushimwina antu. Tunakuzata nañovu kulonda tushimwineña antu awanikaña kuchitesheni, kuyitesheni yamasuwa, maluña akwimikila nyotoka, kudi antu amavulu nikuyisankanu. Mwachinaña kushimwina hatooka? Neyi mwachinaña, lombenu wukwashu nawa toñojokenu mazu ahosheliyi Manakwetu Manera, nkoñi wendeña, nindi: “Twamweneña njila yayiha yakushimwinamu netu hinjila yakumuzatilamu Yehova, netu hinjila yakumwekeshelamu kwovwahila, njila yakumwekeshelamu kashinshi nawa twakeñeleña kumuzatila munjila yidi yejima yinakukeñayi.” Neyi tuleka kutiya woma nawa tutachika kuzatisha  njila jajiha jakushimwinamu, twakoleshaña wubwambu wetu naYehova nawa twekalaña akwakushimwina amawahi.—Tañenu 2 Akorinda 12:9, 10.

13. Muloñadi webu sayiti yetu chiyinakuzatikila chiwahi hakushimwina, nawa yumanyi yamwekeni chimwayizatishili?

¹³ Akwakushimwina amavulu alejaña antu webu sayiti yetu ya jw.org/lun, hiyatela kutaña nikuloñolola nyikanda yashindamena haBayibolu mumadimi akubadika ha 700. Ifuku nifuku antu akushika ku 1.6 miliyoni ayaña hawebu sayiti yetu. Kunyima, chikunzulemba chashikileña kudi antu ashakamineña kumaluña amalehi. Makonu, webu sayiti yetu niyena yinakushika kwejima.

14. Akwakushimwina akeñekeleña kuyidizishadi, nawa shikolanyi yinayikwashi kwikala akwakushimwina amawahi?

¹⁴ Yitwa ninjila jitunahanjekuhu jinakwashi mudimu wakushimwina kuya hambidi. Hela chochu, hayina mpinji akwakushimwina akeñekeleña kuyidizisha kulonda eluki chakushimwina chiwahi. Chakutalilahu, mpinji yikwawu mwiniitala wetejeleña wanyi nsañu yatiyileñayi hachisanji. Mpinji yikwawu mwiniitala watiyileña kuwaha nawa wakeñeleña kudiza. Akwakushimwina ateleli kwiluka chakwila neyi muntu yakaana nikwikala antañishi amawahi. Nzambi wamukwashili Manakwetu Knorr naspiritu yindi yajila kumona kulema kwakudizisha akwakushimwina kwiluka chakushimwina. Dichi kutachika mu 1943, yipompelu yatachikili Shikola Yawakwakushimwina. Iyi shikola yakwashili ejima kwikala akwakushimwina.

15. (a) Antu amakwawu atiyileña ñahi hakuhana mpanji yatachi muShikola Yawakwakushimwina? (b) Kukana kwaYehova kwekala haMasamu 32:8 kunayikwashi ñahi?

¹⁵ Amanakwetu amakwawu atiyileña woma kuhosha kudi antu amavulu. Manakwetu Ramu wanukaña mpanji yindi yatachi yahaniniyi mu 1944. Mpanji yadiña nakuhosha hadi Dowegi muntu wamuBayibolu. Wahosheli nindi: “Nadiña nakuzala mumanuñu, kumakasa nikumazewu.” Wabombeleluhu nindi: “Dikadiña katachi kuhana mpanji hachinañamu, ilaña nalekeli wanyi.” Hela chakwila antu amavulu atiyileña woma, atwansi niwena ahanineña mpanji mushikola. Manakwetu Manera wanukaña chamwekeni hahanini kansi wumu mpanji yindi yatachi, nindi: “Kansi watiyili woma chatachikiliyi kuhosha mpanji yindi, nawa watachikili kushikumoka. Ilaña wahanini mpanji yejima.” Hadaha  mwakulaña wanyi hela kuhana mpanji hakupompa muloña wansonyi hela mwakeñaña hohu wanyi. Neyi dichimwelaña, lombenu kudi Yehova kulonda yayikwashi. Wukuyikwasha neyi chakwashiliyi atudizi amuShikola Yawakwakushimwina akusambila.—Tañenu Masamu 32:8.

16. Shikola yaGileyadi yakwashileña ñahi akwakushimwina (a) kunyima (b) kutachika mu 2011?

¹⁶ Kuloñesha kwaNzambi kwadizishaña cheñi antu muShikola yaGileyadi. Iyi shikola yakwashaña atudizi kutwalekahu kwikala neyena dakushimwina nsañu yayiwahi. Shikola yaGileyadi yatachikili mu 1943, nawa kufuma hayina mpinji, atudizi 8,500 anayidizishi nawa anayitumi kumatuña 170. Kufuma mu 2011, ejima atambikañawu kuniyi shikola hiyapayiniya adimena, ankoñi endaña, akaBeteli hela amishonali abulahu dehi kuya kushikola yaGileyadi.

17. Shikola yaGileyadi yinakwashani ñahi?

¹⁷ Mwalala Shikola yaGileyadi yinakukwashana? Eña. Talenu chuma chamwekeni muJapan. Mu August 1949, mwadiña akwakushimwina kwakwihi na 10. Ilaña hakumana kwachaaka, amishonali 13 adiña nakuzatila hamu nanawa akwakushimwina. Dalelu, muJapan mudi akwakushimwina 216,000, nawa kwakwihi nachikunku hiyapayiniya akukwasha niampinji yejima.

18. Mashikolanyi amakwawu itukweti?

¹⁸ Twekala namashikola amavulu, adi neyi Shikola yaMudimu waWanta, Shikola yaMudimu wawu Payiniya, Shikola Yawakwakushimwina Nsañu Yayiwahi yaWanta, Shikola yawaNkoñi Endaña niAñodijawu niShikola Yamamembala Amukometi Yamutayi niAñodijawu. Awa mashikola anakwashi amanakwetu niahela kukolesha chikuhwelelu chawu. Chinamwekani chikupu nawu Yesu wuchidi kudizisha antu amavulu.

19. Manakwetu Russell wahosheli nindidi kutalisha hamudimu wakushimwina, nawa chumichi chinashikijewi ñahi?

¹⁹ Wanta waNzambi wunayuuli dehi kubadika hayaaka 100. Haniyi yaaka, Mwanta wetu, Yesu Kristu, nakulombola mudimu wakushimwina. Mu 1916, Manakwetu Russell welukili chikupu nindi nsañu yayiwahi akayishimwina kaayi kejima. Wahosheli nindi: “Mudimu wakushimwina wunakuyilaku hambidi mukunyakashana, nawa wukatwalekahu, muloña kuchidi mudimu weneni wakushimwina ‘nsañu yayiwahi yawanta’ mukaayi kejima.” (Faith on the March, by A. H. Macmillan, ifu 69) Iwu mudimu tunakuwuzata makonu. Tunakumusakilila Yehova, Nzambi wakuwunda, chatwinkañayi yuma yatwikwashaña kwila nkeñelu yindi.