1. Isua tân thu hrilh rawngbâwlna chu eng angin nge a pawimawh? Hrilhfiah rawh.

ISUA chuan Pathian Ram chanchin sawi nuam a ti hle a. Leia a awm lai khân, Pathian Ram, a nih loh leh Lalram chanchin chu thil dang zawng aia a sawi tam ber a ni. A rawngbâwl chhûng khân, chu Lalram chu vawi 100 aia tam a sawi a. Chu chu Isua tân a pawimawh tak zet a ni.—Matthaia 12:34 chhiar rawh.

2. Matthaia 28:19, 20-a chhinchhiah thupêk chu mi eng zât in nge hre mai thei a, engvângin nge chu chu kan sawi theih?

² Isua chu a thawhleh hnu lawk khân, a zirtîr lo ni tûr mi 500-te hmaah a inlan a. (1 Korinth 15:6) Chu chu Isua’n ‘hnam tina mite’ hnêna thu hril tûra a hrilh ṭum kha a ni thei ang. Chu hna chu thil awlsam a ni lo vang. * (Footnote en rawh.) Hun rei tak chhûng, “khawvêl tâwp” hma loh thawh chhunzawm zêl tûr a ni tih a hrilh  a. Tûn laia chanchin ṭha hrilhnaah i tel chuan, chu hrilh lâwkna thleng famkim tûrin i ṭanpui a ni.—Matthaia 28:19, 20.

3. Eng thil pathumin nge chanchin ṭha hril tûra min ṭanpui?

³ Isua’n thu hril tûra thu a pêk hnu chuan: “In hnênah ka awm zêl ang,” a ti a. (Matthaia 28:20) Chuvângin, Isua’n a hnungzuite chu thu hrilhnaah a kaihruaiin, khawvêl puma thu hrilhnaah a ṭanpui ang tih a tiam a ni. Jehova pawhin min awmpui bawk a. Ani chuan thu hril tûra min ṭanpui nân “thil ṭha tinrêng” min pe a ni. (Hebrai 13:20, 21) He thuziakah hian chûng thil ṭha zînga pathum: (1) kan hmanrua neihte, (2) kan thu hrilh dânte leh (3) zirtîrna kan dawnte chu kan ngaihtuah ang. A hmasain, kum 100 kal ta chhûnga kan hman tâk hmanraw ṭhenkhat chu i lo ngaihtuah ang u.

4. Engtin nge hmanraw chi hrang hrangte chuan kan thu hrilh rawngbâwlnaah min ṭanpui?

⁴ Isua chuan Lalram thuchah chu lei chi hrang hranga theh buh chi nên a tehkhin a. (Matthaia 13:18, 19) Huan siamtu chuan lei buatsaih nân hmanraw chi hrang hrang a hmang a. Chutiang bawkin, kan Lal chuan kan thuchah ken pawm tûra mite ṭanpui nâna kan hman theih tûr hmanruate min pe a ni. Hmanrua ṭhenkhat chu hun rei lotê chhûng atâna ṭangkai a nih laiin a dangte chu vawiin thlenga hman a la ni. Mahse, hmanrua zawng zawngte chuan thu hril tûra kan thiamna tihmasâwn tûrin min ṭanpui a ni.

5. Thu hrilhna card chu eng nge ni a, engtin nge an hman?

⁵ Kum 1933-ah khân thuchhuahtute chuan mi tam takte thu hril tûra ṭanpuitu hmanrua thu hrilhna card chu an hmang ṭan a. Chutah chuan Bible thuchah tawi leh tluangtlam tak a chuang a ni. Thu thar chuanna card thar tihchhuah châng a awm bawk a. Unau Erlenmeyer-a chu thu hrilhna card a hman ṭan hmasak ber chuan kum sâwm mi vêl a ni a. Ani chuan: “An hmêl hriattîr ṭan dân chu, ‘Khawngaihin he card hi i chhiar thei ang em?’ tih a ni a. In neituin card a chhiar hnu chuan thu leh hla chhuah chu pein kan chhuahsan ta ṭhîn a ni,” tiin a sawi a ni.

6. Engtin nge thu hrilhna card chu ṭangkai tak a nih?

⁶ Thu hrilhna card chuan kawng chi hrang hrangin thuchhuahtute chu a ṭanpui a. Entîr nân, thuchhuahtu ṭhenkhat chu an zak a, thu hril duh hle mah se, sawi dân an hre lo a ni. Thuchhuahtu dangte chu an huaisen hle a. In neitu hnênah hun rei lotê chhûngin an thil hriat zawng zawng chu an hrilh vek a, mahse, remhre taka sawi an ni chuang lo. Thu hrilhna card chuan thuchhuahtu zawng zawng chu fiah tak leh tluangtlam taka thu hril tûrin a ṭanpui a ni.

7. Card hmannaa harsatna ṭhenkhat chu eng nge?

⁷ Harsatna dang pawh a awm a. Unau Grace Estep-i chuan: “‘Ah, hei hian eng nge a sawi? He mi chungchâng hi min hrilh mai thei lo em ni?’ tia min zawh châng a awm,” tiin a sawi a. In neitu ṭhenkhat chuan card-a thuziakte chu an chhiar thei lo bawk. Mi dangte chuan card chu lain kawngkâ an khâr daih a. Mi ṭhenkhat chuan kan thuchah ken an duh loh avângin card chu an pawtsawm a ni. Mahse, harsatna tâwk chung pawhin thu hrilhna card chuan thuchhuahtute chu an vêngte hnêna thu hrilh tûr leh Lalram thu hriltu angin a târ lang bawk a ni.

8. Engtin nge ken theih chi thingremzaithei chu hman a nih? (A thupui chunga milem en rawh.)

⁸ Hmanraw dang leh chu kum 1930 hnua hman thingremzaithei a ni a. Chu chu thuhretu ṭhenkhat chuan an aia thu a sawi avângin Arona tiin an ko a ni. (Exodus 4:14-16 chhiar rawh.) In neituin ngaihthlâk a duh chuan, thuchhuahtu chuan Bible ṭanchhan thusawi tâwi chu a play sak a, thu leh hla chhuah ṭhenkhat a  pe ṭhîn a ni. A châng chuan, chhûngkuain thusawi chu an ngaithla ṭhîn! Kum 1934 khân, the Watch Tower Society chuan rawngbâwlna atâna ruahman ken theih chi thingremzaithei chu a siam ṭan a. A tâwpah, unaute chuan thusawi hrang hrang 92 lai an record a ni.

9. Engtiang kawngin nge ken theih chi thingremzaithei chu a hlawhtlin?

⁹ Chûng thusawi zînga pakhat chu Hillary Goslin-a’n a han ngaihthlâk chuan a ṭhenawmte hnêna Bible thuchah hrilh nân thingremzaithei chu chawlhkâr khat chhûng a hawh hial a ni. Chumi avâng chuan mi tam takin thutak an ngaihven a, baptisma an chan phah a. A tâwpah chuan unau Brother Goslin-a fanu pahnihte chu Gilead School an kal a, missionary niin rawng an bâwl a ni. Thu hrilhna card ang bawkin, ken theih chi thingremzaithei chuan thuchhuahtu tam tak chu thu hril ṭan thei tûrin a ṭanpui a. A hnuah, Lal chuan Theocratic Rawngbâwlna School hmangin a mite chu zirtîrtu thiam tak ni tûrin a a zirtîr a ni.

10, 11. Engtin nge chanchin ṭha hrilh nân chanchinbute leh radio chu hman a nih a, engvângin nge chûng tih dânte chu a ṭangkai?

¹⁰ Kan Lal, Krista kaihhruaina hnuaiah Pathian mite chuan mi a tam thei ang berte hnêna thu hril thei tûrin tih dân chi hrang hrang an hmang a. Chûng tih dânte chu hnathawktu an tlêm lai khân a pawimawh hle a ni. (Matthaia 9:37 chhiar rawh.) Entîr nân, kum tam tak kal ta khân chanchinbute chu chanchin ṭha theh darh nân hman a ni a. Unau Russell-a chuan Bible ṭanchhan thusawi chu chanchin ṭha tihchhuahnaah chawlhkâr tin a thawn ṭhîn a. Tichuan, a thusawite chu Canada, Europe, leh United States-a chanchinbua chhuah tûrin an thawn leh ṭhîn a ni. Kum 1913 khân, Unau Russell-a thusawite chu chanchinbu 2,000-ah chhuah a ni a, mi 15,000,000 laiin an chhiar!

¹¹ Radio pawh chanchin ṭha hrilhnaah ṭangkai taka hman a ni bawk. April 16, 1922 khân, Unau Rutherford-a chuan a hmasa ber atân radio-ah thu a sawi a, mipui 50,000 vêlin an ngaithla a ni. Kan radio station WBBR, tia koh chu kan hmang ṭan ta thuai a, program hmasa ber chu February 24, 1924 khân kan ngaithla a ni. December 1, 1924, Vênnainsâng chhuak chuan heti hian a sawi a ni: “Radio hi thutak theh darh nâna kan hman tawh azawnga sum sên tlêm ber leh ṭangkai ber a nih kan ring,” tiin. Chanchinbute ang bawkin, radio chuan thuchhuahtu tlêmtê chauh awmna hmuna awm mi tam takte hnêna thu hril tûrin a ṭanpui a ni.

12. (a) Vântlâng hmuna thu hrilhna chi hrang hrangah eng nge nuam i tih ber? (b) Vântlâng hmuna thu hrilh hrehna tireh tûrin engin nge min ṭanpui thei?

¹² Mite hnêna thu hrilh dân ṭangkai tak pakhat chu vântlâng hmuna thu hrilhna hi a ni a. Bus dinna te, rêl chawlhna te, leh lîrthei dahna te, bâkah office-te, kawtthlêr te, leh bazar hmunahte nasa lehzuala mite hnênah thu hrilh a ni. Vântlâng hmuna thu hrilhna chuan a tizâm che em? Chuti a nih chuan, ṭanpuina dîlin ṭawngṭai la, bialkantu Manera thusawi hi ngaihtuah ang che: “Rawngbâwl dân thar apiang chu Jehova rawngbâwlna kawng thar, a laka kan rinawmna târ lanna leh rinawmna fiahna dang angin kan ngai a, min tirh dân ang zêla rawngbâwl kan inhuamzia lantîr chu kan duh a ni,” tih hi. Kan hrehnate tihreh a, thu hrilh dân thar kan hman hian Jehova kan rinna chu tichakin, thu hriltu thiam lehzual kan lo ni ta a ni.—2 Korinth 12:9, 10 chhiar rawh.

13. Engvângin nge kan website chu rawngbâwlnaah thu hrilhna ṭangkai tak a nih a, website hmanna aṭangin eng thiltawn nge i neih?

¹³ Thuchhuahtu tam takte chuan mite hnêna kan website, jw.org. chungchâng hrilh chu nuam an ti hle a, website-ah chuan Bible thu  leh hla chhuahte chu ṭawng 700 aia tamin an chhiarin, an download thei a ni. Nî tin hian, mi maktaduai 1.6-te chuan kan website chu an tlawh ṭhîn. Hun kal tawhahte khân, hmun kilkhâwra mite hnênah radio chuan chanchin ṭha a thlen a. Tûn laiah pawh, kan website chuan chutiang bawk chuan a thlen a ni.

14. Thuchhuahtute chuan eng zirtîrna nge an mamawh a, eng school-in nge zirtîrtu thiam tak ni tûra ṭanpui?

¹⁴ Kan sawi tâk hmanruate leh tih dânte chu a ṭangkai hle a. Mahse, chutih hun laia thuchhuahtute chu rawngbâwltu ni tûra zirtîr an ngai a ni. Entîr nân, in neitute chuan thingremzaithei hmanga thusawi an ngaihthlâk chu pawm loh châng an nei a. Mi dangte chuan ngaihvenin, hriat tam lehzual an duh thung. Thuchhuahtute chuan mite’n an lo hnialna thiam taka chinfel dân leh zirtîrtu thiam zâwk an nih theih dân an hriat a ngai a ni. Unau Knorr-a chuan thuchhuahtute’n rawngbâwlnaa thusawi dân an zir a pawimawhzia a hria a, chu chu Pathian thlarau thianghlim hriattîrna a ni tih rinhlelh rual a ni lo. Chuvângin, kum 1943 aṭangin kohhranahte chuan Theocratic Rawngbâwlna School neih ṭan a ni. He school hian thuchhuahtute chu zirtîrtu thiam tak ni tûrin a ṭanpui vek a ni.

15. (a) Theocratic Rawngbâwlna School-a thu an sawiin ṭhenkhatte’n eng thil nge an tawn? (b) Engtin nge Sâm 32:8-a chhinchhiah Jehova thutiam chu i chungah a thlen dik?

¹⁵ Unau tam takte chuan mipui hmaa thusawi chu an la tiṭhang lo va. Unau Ramu-a chuan kum 1944-a a thusawi hmasa ber chu a la hre reng a ni. Chu thusawi chu Bible-a chanchin ziah Doega chungchâng a ni. Unau Ramu-a chuan: “Ka khûp chu a inkhâwng nawk nawk a, ka kut a khûr a, ka ha chu ka seh ri bawk,” tiin a sawi a. “Chu chu platform-a ding chunga thu ka sawi vawi khatna a ni a; mahse, ka bânsan chuang lo,” tiin a sawi belh a ni. Awlsam lo mah se, chu school-ah chuan naupangte pawhin thu  an sawi bawk. Unau Manera-a chuan mipa naupang pakhat, a thusawi vawi khatnaa a awm dân chu a la hre reng a ni: “Thu a han sawi ṭan chuan a zâm êm avângin a ṭap aw ta ṭuau mai a. Mahse, sawi a tum ve tlat a, a thusawi zawh thlengin chutiang chuan a ṭap ṭuau a ni,” tiin a sawi. I zah vâng, a nih loh leh ti thei lo nia i inhriat avângin inkhâwmnaah chhânna i pe lo emaw, eng thilah mah i tel lo emaw pawh a ni thei. Chutiang a nih chuan, i hlauhna tireh tûrin Jehova dîl ang che. Ani chuan Theocratic Rawngbâwlna School-a zirlai hmasate a ṭanpui ang bawkin a ṭanpui ang che.—Sâm 32:8 chhiar rawh.

16. (a) Hun kal tawhah leh (b) kum 2011 aṭang khân,Gilead School-in a tum ber chu eng nge ni?

¹⁶ Pathian inawpna pâwl chuan Gilead School hmangin zirtîrna a pe bawk a. Chu school thiltum zînga pakhat chu chanchin ṭha hrilh duhna nei lehzual tûra zirlaite ṭanpui a ni. Gilead School chu kum 1943 khân neih ṭan a ni a, chuta ṭang chuan zirlai 8,500 lai zir chhuakin, ram 170-ah tirh chhuah an ni tawh. Kum 2011 aṭang khân, chu school-a kal tûra sâwmte chu special pioneer te, bial kantute, Bethel-a awm te, a nih loh leh Gilead school la kal lo missionary thawkte an ni.

17. Engtin nge Gilead school-a zirtîrna chu a hlawhtlin?

¹⁷ Gilead School chu a ṭangkai em? Ṭangkai e. Japan rama thil thleng hi han ngaihtuah teh. Kum 1949, August thla khân, chu ramah chuan thuchhuahtu sâwm pawh an tling lo va. Mahse, chu mi kum tâwp lam chuan missionary 13-te chuan tualchhûnga thuchhuahtute nên thu an hril a. Tûnah Japan ramah thuchhuahtu 216,000 vêl an awm tawh a, a chanve deuh thawin pioneer an thawk a ni.

18. Eng school dangte nge kan neih?

¹⁸ School dang tam tak pawh kan nei bawk a, chûng zîngah chuan Lalram Rawngbâwlna School te, Pioneer Rawngbâwlna School te, Lalram Chanchin Ṭha Puangtute School te, Bial Kantute Leh An Nupuite Tâna School te, leh Branch Committee Member-te leh An Nupuite Tâna School pawh a tel a ni. Hêng school-te hian unaute chu hlawhtling takin a zirtîr a, an rinna a tihchaksak a ni. Isua’n mi tam tak chua zirtîr zawm zêl tih a chiang hle.

19. Unau Russell-a chuan thu hrilhna chungchâng eng nge a sawi a, engtin nge chu chu a thlen dik?

¹⁹ Pathian Ram chuan kum 100 aia tam ro a rêl tawh a. Chutih chhûng chuan, kan Lal, Isua Krista chuan thu hrilh rawngbâwlna chu a kaihruai a ni. Kum 1916 khân, Unau Russell-a chuan chanchin ṭha chu khawvêl zawng zawngah hrilh a nih a ring a. “‘Lalram chanchin ṭha’ chu khawvêl pumah hrilh tûr a nih avângin, chu thu hrilh hna chu a darh chak hle a, a darh zawm zêl bawk ang,” tiin a sawi a ni. (Faith on the March, by A. H. Macmillan, phêk 69) Chu hna chu tûnah hian thawh zawh a ni ṭêp tawh! Remna Pathian, Jehova chuan a duhzâwng ti tûra kan mamawh apiang min pêk avângin a chungah kan va lâwm êm! (ws15-E 11/15)