1. ¿Keniuj tikmatij ke Jesús kitayekanaltiaya tanojnotsas ika iTekiuajyo Dios?

JESÚS semi kiuelitaya kinnojnotsas taltikpakneminij ika iTekiuajyo Dios. Nochipa kitayekanaltij ika tajtos. Keman tanojnotstoya nikan taltikpak, ika tajtoj iTekiuajyo Dios itech panoua 100 tamachtilis. ITekiuajyo Dios yejua tamachtilis tein okachi ika tajtoj (xikonixtajtolti Mateo 12:34).

2. ¿Kanachimej kikakkej itajtoluan Jesús tein moajsi itech Mateo 28:19, 20?

² Tepitsin satepan ke moajokuik, Jesús monextij ininixpan panoua 500 taltikpakneminij (1 Cor. 15:6). Xa yejuan nejin taltikpakneminij akin Jesús kinnauatij maj kinnojnotsakan “nochi in taltikpakuani”. * Sayoj ke kinnojnotsaskej nochin taltikpakneminij ouij yeskia. Jesús kijtoj ke uejkaua kichiujtoskiaj nejin tekit. Mosentokaskia hasta keman ixpoliuiskia nochi tein amo kuali. Keman tejuan titanojnotsaj itech nejin tonalmej, titapaleuijtokej maj mochiua tein Jesús tanauatij (Mat. 28:19, 20).

3. ¿Toni eyi taman techpaleuiani maj titanojnotsakan?

 ³ Keman Jesús kinnauatij imomachtijkauan maj tanojnotsakan, kiniluij: “Niyetos nachipa namouan” (Mat. 28:20). Ika nejin tajtolmej, Jesús motenkauak ke kinixyekanaskia uan kinpaleuiskia maj tanojnotsakan itech nochi taltikpak. Jiova no techpaleuia itech nejin tonalmej. Hebreos 13:20, 21 kijtoua ke yejuatsin techmaka “nochi ten kuali” uan ika techpaleuia maj titanojnotsakan. Itech nejin tamachtilis tikitaskej ke yejuatsin techmakani manamikmej, seki taman tein tiktekitiltianij keman tikteixmatiltiaj kuali tanauatilmej uan tamachtilis tein techpaleuia maj titanojnotsakan. Maj yekinika tikitakan seki manamikmej tein tikuinij itech cien xiujmej tein panouanij.

4. ¿Keniuj techpaleuiani tataman manamikmej tein tiktekitiltianij?

⁴ Jesús kijtoj ke tamachtilis ika iTekiuajyo Dios tamati kemej se xinach tein kitokaj (Mat. 13:18, 19). Akin tatoka kitekitiltia tataman manamikmej tein kipaleuia maj kichiua tein moneki itech tal kampa tatokas. No ijkon, tejuan tiktekitiltianij tataman manamikmej tein techmakani totekiuaj Jesucristo tein techpaleuiani maj taltikpakneminij kiselikan tamachtilis tein tikinuikiliaj. Seki tikuikej sayoj seki xiujmej, sayoj ke okseki tikuitokejok hasta itech nejin tonalmej. Nochi tataman manamikmej techpaleuianij maj okachi kuali titanojnotsakan.

5. 1) ¿Toni katka amatsin tein ika motanojnotsaya? 2) ¿Keniuj motekitiltiayaj nejon amatsitsin?

⁵ Itech xiuit 1933, tokniuan peujkej kitekitiltiaj se manamik tein kinpaleuij miakej keman yekin peuayaj tanojnotsayaj. Motokaytiaya amatsin tein ika motanojnotsa. Katka se amatsin kampa ijkuiliujtoya ika amo miak tajtolmej se tamachtilis tein ualeua itech Biblia. Kemansa kisaya se yankuik amatsin ika okse tamachtilis. ¿Keniuj motekitiltiayaj? Se tokniuj akin peuak kitekitiltia keman kipiaya 10 xiujmej kijtoua ke kiluiayaj taltikpaknenkej maj kiixtajtolti amatsin. Satepan kikauiliayaj se amaix uan yayaj okseko.

6. ¿Keyej semi tapaleuijkej amatsitsin tein ika motanojnotsaya?

⁶ Amatsitsin tein ika motanojnotsaya semi tapaleuijkej. ¿Keyej? Achto ke peuaskiaj mokuiskiaj, seki tokniuan kinekiaj tanojnotsaskej, sayoj ke semi pinauayaj uan amo kimatiaj toni kijtoskej. Sayoj ke oksekin katkaj semi yolchikaujkej uan kiluiayaj taltikpaknenkej nochi tein kimatiaj itech sayoj seki minutos. Sayoj ke kemansa kinpolouaya tajtoskej ika taixejekolis. Amatsitsin tein ika motanojnotsaya semi tapaleuijkej porin ijkon nochin ueliaj kuali kiteixmatiltiayaj kuali tanauatilmej uan ijsiujka moajsikamatia.

7. ¿Keyej kemansa ouij katka se tanojnotsas ika amatsitsin?

⁷ Sayoj ke kemansa ouij katka se tanojnotsas ika nejon amatsitsin. Se tokniuj siuat kijtoua: “Kemansa techiluiayaj: ‘¿Uan toni kijtoua nejon amatsin? ¿Amo ueli tinechoniluia tejuatsin?’”. Seki taltikpakneminij amo ueliaj kiixtajtoltiayaj oso kikuiaj nejon amatsin  uan tatsakuayaj. Oksekin kitsayanayaj porin amo kinekiaj kimatiskej toni kijtouaya. Maski ijkon, nejon amatsitsin kinpaleuij tokniuan maj tanojnotsanij uan maj taltikpakneminij kinixmatinij kemej akin kiteixmatiltiayaj iTekiuajyo Dios.

8. ¿Keniuj kitekitiltiayaj gramófono? (Xikonita taixkopin ipeujyan tamachtilis.)

⁸ Satepan ke panok xiuit 1930 peuak tikuij okse manamik. Katka gramófono, tein uelia se kiuikatinemia. Nejin katka se tepos kampa mokakia tanojnotsmej tein moajsiaj itech discos. Sekin kitokaytiayaj Aarón porin kemej yeskia tajtouaya inintenkopa, ijkon kemej Aarón tajtouaya itenkopa Moisés (xikonixtajtolti Éxodo 4:14-16). Komo taltikpaknenkej kinekia, tokniuj kitaliliaya tanojnots uan kikauiliaya se amaix. Kemansa, nochin kalyetouanij itech se kali kikakiaj nejon tanojnotsmej. Itech xiuit 1934 peuak tikchijchiuaj gramófonos tein chijchiujtoyaj kemej ika ueliskia titanojnotsaskej. Ijkon kemej panotiyajkej tonalmej, tokniuan kipiayajya 92 tanojnotsmej.

9. ¿Toni tein kuali mochiuak keman kitekitiltijkej gramófono?

⁹ Se tonal, se takat kikakik se tanojnots tein kiteluelkakik. Tajtanik maj kitaneujtianij gramófono se semana uan ijkon akin nemiaj ompakauin maj no kikakinij. Nejin tapaleuij porin miakej taltikpakneminij momachtijkej Biblia uan moauijkej. Nejon takat no moauij, uan satepan nochin ome iichpochuan mochiujkej misioneras. Ijkon kemej amatsitsin tein ika motanojnotsaya, gramófono kinpaleuij miakej tokniuan keman yekin peuayaj tanojnotsayaj. Sayoj ke ijkon kemej panotiyajkej xiujmej, tekiuaj Jesucristo peuak kinmachtia itatojtokakauan keniuj okachi kuali tamachtiskej ika Escuela tein Techmachtia iTekiyo Dios.

10, 11. ¿Keniuj tapaleuijkej periódicos uan radio itech tanojnotsalis?

¹⁰ Ika inepaleuil toTekiuaj, tiitekitikauan Dios tiktekitiltianij miak taman tein ika tikinixmatiltiaj kuali tanauatilmej nochin taltikpakneminij tein tiueliskej. Nochi nejin okachi tapaleuijkej keman amo semi miakej itaixpantijkauan Jiova onkayaj itech nochi taltikpak (xikonixtajtolti Mateo 9:37). Se taman tein mokuik seki xiujmej achtoya yejua periódicos kampa moteixmatiltiaya seki tamachtilis. Nochi semanas, tokniuj Russell kititania se tanojnots kampa kiteixmatiltiayaj tanauatilmej. Uan yejuan kititaniaj maj moteixmatilti itech periódicos ompa Canadá, Estados Unidos uan Europa. Itech xiuit 1913, tanojnotsmej tein kitemakaya tokniuj Russell moteixmatiltiayaj itech 2,000 periódicos uan kiixtajtoltiayaj kemej 15 millones taltikpakneminij.

¹¹ Okse taman tein semi tapaleuij keman tikteixmatiltiayaj kuali tanauatilmej katka radio. Itech tonal 16 metsti abril xiuit 1922, tokniuj Rutherford kitemakak semej yekinika tanojnotsmej itech radio. Kikakkej kemej 50,000 taltikpakneminij. Tepitsin satepan tikchijchiujkej se estación itech radio. Yekinika tanojnots motemakak itech tonal 24 metsti  febrero xiuit 1924. Itamiampa nejon xiuit, itech amaix Tanejmachtijkej itech tajtol inglés moijtoj: “Tiknemiliaj ke radio yejua tein okachi amo patiyoj kisa uan okachi uejka ajsi tein hasta axkan tikuinij uan ika tikteixmatiltiaj tamachtilis tein melauak”. Periódicos uan radio semi tapaleuijkej porin ijkon ajsik totanojnotsalis kampa amo onkayaj miakej tokniuan.

12. 1) ¿Toni taman tanojnotsalis tein mochiua kampa miakej panouaj okachi tikonuelita? 2) Komo tejuatsin ayamo tionmoyolchikaua tiontanojnotsas kampa miakej panouaj, ¿toni uelis tikonchiuas?

¹² Okse taman tein axkan tikchiuaj uan ijkon tikinnojnotsaj okachi taltikpakneminij yejua tanojnotsalis kampa miakej panouaj. Timochikauaj titanojnotsaskej kampa ajsij autobuses, kampa ajsi tren, kampa kinketsaj teposmej uan tanamakaloyamej. Komo tejuatsin ayamo tionmoyolchikaua tiontanojnotsas kampa miakej panouaj, ¿toni uelis tikonchiuas? Xikontataujti Jiova uan xiontanemili itech tein kijtoj se tokniuj takalpanojkej. Yejua kijtoj ke ika se yankuik taman kemej titanojnotsaj yejua okse taman kemej tiktekitiliaj Jiova uan tiknextiliaj ke iuan titakuaujtamatij uan tiktakamatij. Yejua kiita ke ijkon se kinextilia Dios ke nochipa tikchiuaskej tein yejuatsin techtajtanis. Keman timoyolchikauaj uan peua tikchiuaj yankuik taman kemej moixtalia motanojnotsas, okachi kuali tiktekitiliaj Dios uan okachi titakuaujtamatij iuan (xikonixtajtolti 2 Corintios 12:9, 10).

13. 1) ¿Keyej semi kuali maj ika titajtokan kampa timoteixmatiltiaj itech Internet keman titanojnotsaj? 2) ¿Keniuj tikontekitiltiani tejuatsin itech tanojnotsalis?

 ¹³ Miakej tokniuan kintelyolpaktia kintapouiskej taltikpakneminij nochi tein uelis kiajsiskej kampa timoteixmatiltiaj itech Internet. Mojmostaj kalakij itech jw.org panoua 1,600,000 taltikpakneminij. Ompa ueli kiixtajtoltiaj uan kitemouiaj miak taman amaixmej itech panoua 700 tataman tajtolmej. Ne uejkauj tikuikej radio uan ika tikinixmatiltijkej kuali tanauatilmej akin nemiaj kampa okachi uejka. Axkan no tikchiuaj nejon kampa timoteixmatiltiaj itech Internet.

14. 1) ¿Toni tamachtilis monekia kiseliskej tokniuan? 2) ¿Toni tamachtilis techpaleuiani maj kuali titamachtikan ika Biblia?

¹⁴ Hasta nikan tikitakejya ke Jiova techmakani manamikmej uan seki taman tein tiktekitiltianij keman tikteixmatiltiaj kuali tanauatilmej. Sayoj ke no techmakani tamachtilis. ¿Keyej monekia? Kemej neskayot, keman tokniuan tanojnotsayaj ika gramófono, seki taltikpakneminij amo kiuelkakiaj. Sayoj ke oksekin kiteluelkakiaj uan kinekiaj okachi kimatiskej tein tamachtia Biblia. Monekia maj tokniuan momachtianij okachi kuali tamachtiskej uan kimatiskej toni kijtoskej keman taltikpakneminij amo kinekiaj kinkakiskej. Yektikatsin espíritu kipaleuij tokniuj Knorr maj kiitani ke tokniuan monekia kimatiskej kuali tamachtiskej ika Biblia. Yejua ika, itech xiuit 1943 mopeualtij Escuela tein Techmachtia iTekiyo Dios.

15. 1) ¿Toni kinpanouani sekin itech Escuela tein Techmachtia iTekiyo Dios? 2) ¿Keniuj mitsonpaleuiani Jiova ijkon kemej motenkaua itech Salmo 32:8?

¹⁵ Miakej tokniuan amo no kimatiaj keniuj tajtoskej ininixpan miakej. Se tokniuj kielnamiki tein kipanok keman kitemakak iyekinika tanojnots itech xiuit 1944. Ika tajtoj Doeg, se takat akin ika motajtoua itech Biblia. Tokniuj kijtoua ke itech nochi itanojnots uiuiyokatoyaj imauan, itankuayuan uan itenoj. Maski ijkon, uelik matamik. Sayoj ke itech nejin tamachtilis no panouaj konemej. Tokniuj takalpanojkej akin ika titajtojkej itech párrafo 12 kielnamiki tein kipanok se okichpil keman kitemakak iyekinika tanojnots. Kemej semi uiuiyokatoya kinekia chokas. Sayoj ke amo mosenkauak uan uelik kitamitemakak itanojnots. Seki tokniuan semi uiuiyokaj porin ipa pinauaj uan kinemiliaj ke amo ueli momaajokuij nion panouaj taixpan. ¿Mitsonpanoua nejon? Komo ijkon, xikontajtani Jiova maj mitsonpaleui amo xionmoui. Yejuatsin mitsonpaleuis ijkon kemej kinpaleuij nejon yekinika tokniuan akin kitemakakej tamachtilismej itech Escuela tein Techmachtia iTekiyo Dios (xikonixtajtolti Salmo 32:8).

16. ¿Keyej motemaka tamachtilis Galaad?

 ¹⁶ Dios no kinmachtiani itekitikauan ika tamachtilis tein motemaka Galaad. Itech nejin tamachtilis kitemouaj kinpaleuiskej akin ompa youij maj okachi kinekikan tanojnotsaskej. Yekinika tamachtilis motemakak itech xiuit 1943. Hasta axkan, kemej 8,500 tokniuan momachtianij ompa uan tapaleuianij kemej itech 170 uejueyi altepemej. Itech xiuit 2011 peuak kinyoleuaj sayoj akin kichiuaj tekit kemej precursor especial, takalpanouanij, akin tekitij Betel oso misioneros akin ayamo kiselianij nejon tamachtilis.

17. ¿Toni tein kuali kiualkuini tamachtilis tein motemaka Galaad?

¹⁷ ¿Toni tein kuali kiualkuini tamachtilis tein motemaka Galaad? Maj tiknemilikan tein mochiuak ompa Japón. Itech metsti agosto xiuit 1949 amo onkayaj nion majtakti itaixpantijkauan Jiova itech nochi ueyi altepet. Sayoj ke peuak ajsij misioneros akin momachtijkej Galaad. Itamiampa nejon xiuit moajsiaj 13 misioneros akin kinpaleuijtoyaj tokniuan itech tanojnotsalis. Itech nejin tonalmej, ompa Japón moajsij kemej 216,000 itaixpantijkauan Jiova. ¡Uan kemej tajko nejin tapoual kichiuaj tekit kemej precursor regular uan auxiliar!

18. ¿Toni okseki taman tamachtilis tikpiaj tiitaixpantijkauan Jiova?

¹⁸ ¿Toni okseki taman tamachtilis tikpiaj tiitaixpantijkauan Jiova? Kemej neskayot, tikpiaj Tamachtilis tein kiseliaj Tayekananij uan Tapaleuianij, Tamachtilis tein kiselia akin Tekiti kemej Precursor, Tamachtilis tein kiseliaj akin kiteixmatiltiaj iTekiuajyo Dios, Tamachtilis tein kiseliaj Tokniuan Takalpanouanij uan Ininnamik, uan Tamachtilis tein kiseliaj Taixyekananij itech Sucursal uan Ininnamik. Nejin tataman tamachtilismej kintelpaleuiani miakej tokniuan takamej uan siuamej, uan okachi kichikauani inintakuaujtamatilis. Moyekita ke Jesús kisentoka techmachtia itech nejin tonalmej.

19. 1) ¿Toni kijtoj tokniuj Russell ika tanojnotsalis? 2) ¿Kuali yetoya tein kijtoj tokniuj Russell?

¹⁹ Panouaya 100 xiujmej keman iTekiuajyo Dios peuak taixyekana. Ijkuak, tekiuaj Jesucristo peuak kiixyekana totanojnotsalis. Itech xiuit 1916, tokniuj Russell kijtoj: “Tanojnotsalis tel ijsiujka momoyaujtok, uan kisentokas okachi momoyauas, porin moneki tikteixmatiltiskej ‘tanauatil ika Tekiuajyotʼ itech nochi taltikpak” (La fe en marcha, tein kijkuiloj A. H. Macmillan, página 69). Kemej tikitaj, tokniuj Russell kiyekmatia ke tanojnotsalis momoyauaskia noyampa taltikpak. Uan melauak tein kijtouaya, porin noyampa titanojnotsaj. Semi tiktasojkamatij maj Jiova techmaka nochi tein techpaleuia maj tikchiuakan tekit tein techkauilijtok.