1. ¿Tuku likatsiyaw pi Jesús lu xlakaskinka xʼakxilha nalichuwinan Dios?

JESÚS lu xlakgati kalitachuwinan latamanin xlakata xTamapakgsin Dios. Wa tuku tlakg xlakaskinka xʼakxilha. Liwaka 100 xlimakglhuwa talichuwinan akxni xlichuwinama Dios kKatiyatni. Wa xTamapakgsin Dios nema tlakg lichuwinalh (kalikgalhtawakga Mateo 12:34).

2. ¿Niku kgalhlit latamanin kgaxmatkgolh xtachuwin Jesús nema likgalhtawakgayaw kMateo 28:19, 20?

² Akxni nina lhuwa kilhtamaku xmalakastakwanikanit, Jesús katasiyanilh liwaka 500 latamanin (1 Cor. 15:6). Max wa uma tiku anta xwilakgo akxni Jesús kalimapakgsilh pi xʼankgolh kalitachuwinankgo Dios «Xlipaks akgmakat» kachikinin * (kalikgalhtawakga nota). Pero kalitachuwinankan Dios putum latamanin, tuwa  xʼama wan. Jesús wa pi lhuwa kilhtamaku xʼama lin. Chuntiya xtalichuwinalh asta akxni ksputli uma xalixkajni kakilhtamaku. Akxni lichuwinanaw Dios, makgtayanamaw xlakata nakgantaxtu tuku wa Jesús (Mat. 28:19, 20).

3. ¿Tuku pulaktutu kinkamakgtayanitan nalichuwinanaw Dios?

³ Akxni Jesús kalimapakgsilh kstalaninanin nalichuwinankgo Dios, kawanilh pi ni xʼama kamakgxtakga (Mat. 28:20). Uma tachuwin xwamputun pi xʼama kamakgtaya xlakata xlichuwinankgolh Dios xliputum katiyatni. Jehová na kinkamakgtayayan la uku. Hebreos 13:20, 21 wan pi xla nakinkamaxkiyan «nkaxatu kawaj tlan tatlaw» xlakata tlan nalichuwinanaw Dios. Kʼuma artículo naʼakxilhaw pi xla kinkamaxkinitan tuku nalimaklakaskinaw, la atanu lichuwinanitaw Dios chu la kinkamasiyaninitan akxni nalichuwinanaw Dios. Pulana, kalichuwinaw tuku maklakaskinitaw uma akgtum ciento kata nema titaxtunit.

4. ¿Tuku tlan kitaxtunit xlakata lhuwa tuku limaklakaskinitaw akxni lichuwinanaw Dios?

⁴ Jesús lichuwinalh pi tamakatsin xla xTamapakgsin Dios xtachuna la talhtsi nema chankan (Mat. 13:18, 19). Chanana, lhuwa tuku limaklakaskin akxni lakkaxtlawa tiyat niku nachan talhtsi. Akinin nachuna tlawayaw, xlakata nakamakgtayayaw latamanin namakgamakglhtinankgo tamakatsinin nema kaliniyaw, limaklakaskinaw tuku kinkamaxkinitan kiMapakgsinakan Jesucristo. Makgapitsi ni lhuwa kata limaklakaskinitaw, pero makgapitsi chuntiya maklakaskimaw la uku. Putum tuku limaklakaskinitaw kinkamakgtayanitan tlakg tlan nalichuwinanaw Dios.

5. 1) ¿Tuku xwanit tarjeta de testimonio? 2) ¿La xlimaklakaskinkan umakgolh tarjetas?

⁵ Kata 1933, natalan wi tuku tsukukgolh limaklakaskinkgo nema kamakgtayalh tiku kajku xlimakgtumku xʼamakgolh lichuwinankgo Dios. Xwanikan tarjeta de testimonio. Uma tarjeta aktsu xwanit, chu ni lhuwa tuku xtatsokgnit xlakata Biblia. Xmin kilhtamaku xtaxtupara atanu tarjeta nema atanu tamakatsin xlimin. ¿La xtamaklakaskin umakgolh tarjetas? Chatum tala tiku tsukulh maklakaskin akxni akgkaw kata xkgalhi wan pi xkawani latamanin pi xlikgalhtawakgakgolh tarjeta. Alistalh xmaxkikgo maktum likgalhtawakga chu xʼankgo.

6. ¿Tuku xlakata lu makgtayanalh tarjetas de testimonio?

⁶ Tarjeta de testimonio lu makgtayanalh akxni tamaklakaskilh. ¿Tuku xlakata? Akxni nina xʼanan umakgolh tarjetas, makgapitsi natalan xlichuwinamputunkgo Dios, pero xmaxanankgo chu ni xkatsikgo tuku nawankgo. Pero, makgapitsin ni xpekuankgo chu kaj tsinu kilhtamaku xwanikgo latamanin putum tuku xkatsikgo. Pero lakgachunin ni tlan xkamamakgkatsinikgo latamanin. Tarjetas lu kamakgtayalh natalan xlakata ni tuwa xmastakgolh tamakatsin chu xtaʼakgatekgsli.

7. ¿Tuku xlakata xmin kilhtamaku tuwa xtamakgkatsi namaklakaskinkan tarjeta de testimonio?

 ⁷ Pero, xmin kilhtamaku tuwa xtamakgkatsi nalimaklakaskinkan tarjetas. Chatum tala puskat wan: «Lakgachunin xkinkakgalhskinkgoyan: “¿Tuku wan targeta? ¿Tlan xkiwani?”». Makgapitsin nila xlikgalhtawakgakgo chu makgapitsi xmakglhtinankgo chu xmalakchuwakgo. Makgapitsi xlakxtitkgo xlakata ni xkatsiputunkgo tuku xaklichuwinamaw. Maski chuna xkaʼakgspula, umakgolh tarjetas kamakgtayalh natalan xlakata xlichuwinankgolh Dios, chu kalilakgapaska xlichuwinanin xTamapakgsin Dios.

8. ¿La xlimaklakaskinkan gramófono portátil? (Kaʼakxilhti xapulana dibujo.)

⁸ Akxni xtitaxtunita kata 1930 atanu tuku tamaklakaskilh. Wa gramófono portátil, uma xmatlakgni discos niku xtakgaxmata taʼakgchuwin. Makgapitsin xwanikgo Aarón xlakata wa «xchuwinan» chu ni wa natalan, chuna la Aarón xpalakachuwinan Moisés (kalikgalhtawakga Éxodo 4:14-16). Komo tiku xlakgchan xkgaxmatputun taʼakgchuwin, xmakgaxmata chu alistalh xmaxki maktum likgalhtawakga. Lakgachunin, putuminika familia xkgaxmatkgo. Kata 1934 ktsukuw tlawayaw gramófonos xlakata xaklimaklakaskiw akxni xaklichuwinanaw Dios. Titaxtulh kilhtamaku, natalan grabarlikgolh 92 taʼakgchuwin.

9. ¿Tuku tlan kitaxtulh xlakata maklakaskinka gramófono portátil?

⁹ Akgtum kilhtamaku, chatum chixku makgaxmataka akgtum taʼakgchuwin chu lu lakgatilh. Skilh pi xmasakuanika akgtum semana gramófono xlakata tiku xtalakatsu na xkgaxmatkgolh, xlakata chuna tlawalh, lhuwa tiku na tsukukgolh kgalhtawakgakgo chu na tamunukgolh. Uma chixku na tamunulh, chu chatiy xlaktsuman misioneras litaxtukgolh. Chuna la tarjetas de testimonio chu gramófono portatil lu kamakgtayalh lhuwa natalan nalichuwinankgo Dios tiku nikxni xʼalichuwinankgo. Pero titaxtulh kilhtamaku, mapakgsina Jesucristo tsukulh maklakaskin Niku Masiyakan xlakata la Lichuwinankan Dios xlakata xkamasiyanilh kstalaninanin tlakg tlan makgalhtawakgenanin xwankgolh.

10, 11. ¿La kinkamakgtayakgon periódicos chu radio xlakata nakaliniyaw tamakatsinin latamanin?

¹⁰ Xlakata kinkamakgtayanitan kiMapakgsinakan, tipalhuwa la atanu kalitachuwinanitaw Dios latamanin tiku katekgsaw. Umakgolh lu kinkamakgtayan akxni ni lhuwa xTatayananin Jehová xʼanan xlikalanka kkatiyatni (kalikgalhtawakga Mateo 9:37). Akglhuwata kata na talimaklakaskilh periódicos. Putum semanas tala Russell xmalakgacha xtaʼakgchuwin kʼakgtum agencia de noticias. Chu umakgolh xmalakgachakgo niku xtlawakan periódicos xalak Canadá, Estados Unidos chu Europa. Kkata 1913, xtaʼakgchuwin tala Russell xtamakgpitsi kʼ2,000 periódicos chu xlikgalhtawakgakgo max 15 millones latamanin.

 ¹¹ Atanu tuku na lu tlan kitaxtulh wa xlakata tamaklakaskilh radio akxni xtalichuwinan Dios. Papaʼ 16 xla abril Kata 1922, tala Rutherford tsukulh masta xtaʼakgchuwin ama kilhtamaku chu chuntiya mastalh kradio alistalh. Kgaxmatkgolh max 50,000 latamanin. Ni lhuwa kilhtamaku titaxtulh wilika akgtum estación xla radio nema kilakan xwanit. Xapulana programa tamatitaxtilh 24 xla febrero kata 1924. Akxni ksputma uma kata, uma revista xaʼinglés lichuwinalh: «Klakpuwanaw pi radio wa tuku tlakg tlan chu ni tapalaxla nema kmaklakaskinitaw xlakata natalichuwinan xaxlikana». Periódicos chu radio lu makgtayanalh xlakata natalichuwinan Dios niku ni lhuwa xʼanankgo natalan.

12. 1) ¿Niku tlakg lakgatiya lichuwinana Dios niku titaxtukgo lhuwa latamanin? 2) ¿Tuku tlan natlawaya komo pekuana nalichuwinana Dios niku titaxtukgo lhuwa latamanin?

¹² Atanu nema lu makgtayanan la uku xlakata tlakg lhuwa latamanin nakalitachuwinanaw Dios wa niku lhuwa latamanin titaxtukgo. Liskujaw nalichuwinanaw Dios niku kgalhkgalhikan autobuses, niku kgalhkgalhikan tren, estacionamientos, kplazas chu kmercados. ¿Tuku tlan natlawaya komo pekuana nalichuwinana Dios niku titaxtukgo lhuwa latamanin? Katlawani oración Jehová chu kalakpuwanti tuku wa chatum superintendente viajante. Wa pi akxni lakputsayaw xasasti la nalichuwinanaw Dios uma limasiya pi kanajlaniyaw  Jehová chu ni makgxtakgaw. Xla lakpuwan pi chuna nalimasiyani Dios pi tlawaputun putum tuku naskini. Akxni nialh pekuanaw chu putsayaw xalaksasti la nalichuwinanaw Dios, tlakg tlan kskujnin Dios litaxtuyaw chu tlakg katsiniyaw lipawanaw (kalikgalhtawakga 2 Corintios 12:9, 10).

13. 1) ¿Tuku xlakata lu tlan kitaxtu nalichuwinanaw kisitiojkan nema wi kʼInternet akxni lichuwinanaw Dios? 2) ¿La limaklakaskina uma sitio akxni lichuwinana Dios?

¹³ Lhuwa natalan lu lakgatikgo kalitachuwinankgo amakgapitsin kisitiojkan kʼInternet. Chali chali akxilhkgo jw.org liwaka 1,600,000 latamanin. Anta tlan nalikgalhtawakgakgo chu namaktikgo likgalhtawakga kliwaka 700 tanu tanu tachuwin. Makgasa maklakaskinka radio xlakata nakalitachuwinankan Dios latamanin tiku makgat xwilakgolh. La uku kisitiojkan kalakgchan latamanin maski makgat niku wilakgolh.

14. 1) ¿Tuku xlakaskinkgo xkamasiyanika natalan? 2) ¿Tuku escuela kinkamakgtayanitan xlakata tlakg tlan makgalhtawakgenanin nawanaw?

¹⁴ Lichuwinanitawa la Jehová kinkamaxkinitan tuku nalimaklakaskinaw chu la atanu limaklakaskinitaw akxni lichuwinanaw Dios. Pero na kinkamasiyaninitan. ¿Tuku xlakata xtalakaskin? Akgtum liʼakxilhtit, akxni natalan xlimaklakaskinkgo gramófono, makgapitsi latamanin ni xlakgatikgo tuku xkgaxmatkgo. Pero makgapitsin tlakg xkatsiputunkgo xlakata Biblia. Xtalakaskin pi natalan tlakg xkatsinikgolh la nalichuwinankgo Dios chu tuku xwankgolh akxni latamanin ni xkgaxmatputunkgo tamakatsinin. Espíritu santo tlawalh pi tala Knorr xkatsilh pi natalan xlakaskinkgo nakatsinikgo tlan makgalhtawakgenanin nalitaxtukgo xla Biblia. Wa xlakata, kata 1943 tlawaka Niku Masiyakan xlakata la Lichuwinankan Dios.

15. 1) ¿La kakitaxtunikgonit makgapitsin tiku titaxtukgonit Niku Masiyakan xlakata la Lichuwinankan Dios? 2) ¿La makgantaxtinit Jehová tuku tatsokgnit kSalmo 32:8?

¹⁵ Lhuwa natalan na ni xkatsinikgo chuwinankgo kxlakatin latamanin. Chatum tala lakapastaka tuku lanilh akxni mastalh xapulana xtaʼakgchuwin kata 1944. Xʼama lichuwinan chatum lataman xwanikan Doeg, tiku talichuwinan kBiblia. Tala wan pi lu putum klhpipima akxni matsukilh, maski chuna tlan masputulh. Pero kʼuma escuela na titaxtukgo laktsu kamanan. Superintendente viajante tiku lichuwinaw kpárrafo 12 lakapastaka tuku lanilh aktsu kgawasa akxni xapulanajku titaxtulh kʼescuela. Lu xpekuama chu xtasiya pi xtasaputun. Pero makgalhsputulh xtaʼakgchuwin. Makgapitsi natalan lu pekuankgo xlakata maxanankgo chu lakpuwankgo pi  nila katimastakgolh xtakgalhtinkan ktamakxtumit chu tuwa makgkatsikgo natawakakgo kplataforma. ¿Nachuna makgkatsiya? Kaskini tamakgtay Jehová. Namakgtayayan chuna la kamakgtayalh xapulana tiku titaxtukgolh Niku Masiyakan xlakata la Lichuwinankan Dios (kalikgalhtawakga Salmo 32:8).

16. ¿Tuku xlakata tlawaka Escuela de Galaad?

¹⁶ Dios na kamasiyaninit kskujnin kʼEscuela de Galaad. Uma escuela tlawaka xlakata nakamakgtaya tiku ankgo tlakg nalichuwinamputunkgo Dios. Kata 1943 mastaka xapulana takgalhtawakga kʼuma escuela. Lata ama kilhtamaku, max 8,500 tiku kilakgonit kʼuma escuela, chu lichuwinankgonit Dios max k170 países. Kata 2011 kajwatiya katasanika tiku precursores especiales, superintendentes viajantes, betelitas o misioneros tiku nina kilakgo kʼuma escuela.

17. ¿Tuku lu tlan kitaxtunit xlakata tlawaka Escuela de Galaad?

¹⁷ ¿La kitaxtunit xlakata tlawaka Escuela de Galaad? Kalakpuwaw xlakata Japón. Agosto kata 1949 nipara kgalhakaw xtatayananin Jehová xwilakgolh kxliputum Japón. Pero tsukukgolh chankgo tiku xkamasiyanikanit kʼGalaad. Akxni ksputma ama kata kgalhkututu misioneros xkamakgtayamakgolh natalan tiku anta xalanin nalichuwinankgo Dios. La uku kJapón wilakgolh max 216,000 xtatayananin Jehová. ¡Chu atsinu ni putum precursores regulares o auxiliares!

18. ¿Tuku atanu escuela kgalhiyaw xtatayananin Jehová?

¹⁸ ¿Tuku atanu escuela kgalhiyaw xtatayananin Jehová? Kgalhiyaw Escuela niku ankgo putum lakgkgolotsin chu siervos ministeriales, Escuela xla Precursores, Escuela xla Tiku lichuwinankgo xTamapakgsin Dios, Escuela xla superintendentes viajantes chu xlakpuskatinkan chu Escuela niku ankgo comité de sucursal chu xlakpuskatinkan. Uma escuela lu tlan tuku kamasiyaninit natalan, chu kamatliwakglhninit xtakanajlakan. Liwana tasiya pi Jesús chuntiya kinkamasiyaniman la uku.

19. 1) ¿Tuku wa tala Russell xlakata la xʼama talichuwinan Dios? 2) ¿Kgantaxtulh tuku xlichuwinanit tala Russell?

¹⁹ Liwakaya 100 kata lata xTamapakgsin Dios tsukulh mapakgsinan. Lata ama kilhtamaku kimapakgsinakan Jesucristo pulalima la lichuwinanaw Dios. Kata 1916, tala Russell wa: «Lu lakapala talakgatumima la talichuwinama Dios, chu chuntiya natalakgatumi, xlakata lakgayaw nalichuwinanaw «Evangelio xla Tamapakgsin xliputum katiyatni» (La fe en marcha, de A. H. Macmillan, página 69). Chuna la akxilhaw tala Russell liwana xkatsi pi xʼama talichuwinan xtachuwin Dios xlikalanka katiyatni. Chu xlikana tuku wa, la uku kaniwa lichuwinamaw Dios. Lu paxtikatsiniyaw Jehová pi kinkamaxkinitan putum tuku lakaskinaw xlakata natlawayaw xtaskujut.