1. Yika Manoa alingile muze evwile ngwo kumapwa chisemi?

MANOA ni mukwo-pwo kapwile ni shindakenyo ngwo keshi keza kasema. Ha tangwa limwe, mungelo wa Yehova, yalweza pwo lia Manoa ngwo te makapwa ni mwana. Chino chapwile chimwe chikomokeso! Muze alwezele sango jacho kuli Manoa, aye yawahilila chinji. Alioze iye nawa kanyongene chinji hakutwala ku yize Yehova te anashimbwila kuli iye ngwe chisemi. Kuchi te iye ni mukwo-pwo mafumba kanawa mwano, hanga azange Yehova ni kumuwayila, ha shimbu lize te A-Izalele akulinga yuma yipi kumeso ja Yehova? Manoa ketele kuli Yehova hanga atume nawa mungelo hakwamba ngwenyi: “Mwene, ngunalembe, mutu wa Zambi yoze watumine eze nawa kuli yetu atulongese chize chatutamba kulinga ni mwana-lunga yono meza kusemuka.”—Akwa Kuyula 13:1-8.

2. Yika watamba kulinga hanga ufumbe ana je, nawa kuchi muhasa kuchilinga? (Tala nawa mu kasha “Alongi je Alemu a Mbimbiliya.”)

² Nyi uli chisemi, kota unanyingika chize Manoa evwile. Ni yena uli ni chiteli cha kukwasa ana je hanga anyingike ni kuwayila Yehova. (Yishima 1:8) Ha mashimbu a uwayilo wa mu usoko, yena muhasa kukwasa ana je hanga anunge ni kulilongesa hakutwala kuli Yehova ni ku Mbimbiliya. Chochene, watamba kukalakala chinji kuhiana kulilongesa Mbimbiliya ni ana je ha poso jeswe. (Tanga Shimbi Yamuchiali 6:6-9.)  Yika nawa muyikukwasa hanga ufumbe ana azange Yehova ni kumuwayila? Ha mutwe uno, mutulilongesa chilweza cha Yesu. Chipwe ngwe Yesu kakapwile chisemi, nihindu munuhasa kulilongesa chize iye alongesele ni kufumba tumbaji twenyi. Yesu kazangile chinji tumbaji twenyi nawa kapwile mukwa-kulikehesa. Nawa aye kapwile ni malinjekela, waze amukwashile kunyingika chize ayo te akwivwa ni kunyingika chize maakwasa. Tuhengulenu haliapwila chize mutuhasa kwimbulula chilweza cha Yesu.

3. Kuchi tumbaji twa Yesu anyingikine ngwo iye te kakwazanga?

³ Yesu kanji-kanji te kakulweza tumbaji twenyi ngwo kakwazanga. (Tanga Yoano 15:9.) Iye nawa kapalikishile mashimbu ni tumbaji twenyi. (Marku 6:31, 32; Yoano 2:2; 21:12, 13) Yesu te hi wika ko longeshi wo; iye nawa te sepa lio. Ha chino o kakapwile ni kuhamika mu mbunge yo ha zango lize Yesu apwile nalio hali ayo. Yika mutuhasa kulilongesa kuli Yesu?

4. Kuchi munuhasa kusolola kuli ana jenu ngwo nwakwaazanga? (Tala chizulie chili hauputukilo)

⁴ Lweza kuli ana je ngwo, yena waazanga chinji, nawa asolwele chize ayo ali ni ulemu unji kumeso je. (Yishima 4:3; Titu 2:4) Samuel umwe ndumbu yoze watwama mu Australia, yamba ngwenyi: “Muze te nguchili kanuke Tata te kakungutangila Mukanda Wami wa Yishima ya Mbimbiliya ha ufuku weswe. Aye te kakukumbulula yihula yami, ni kungukangayika mu kondo, ni kungumbejala ni kungwamba ngwo ufuku upema. Nakomokene chinji muze nanyingikine ngwami Tata kamulelele mu usoko uze te yisemi keshi kukangayika ni kumbejala ana jo! Alioze, iye yasa tachi jinji hanga angusolwele zango. Ha chino, yami yingupwa ni usepa upema ni iye, yingupwa ni chiseke ni ujikijilo.” Kwasa ana je hanga anyingikine mumu liaka wakwamba ngwo “wakwazanga.” Akangayike nawa ambejale. Palikisa no mashimbu, liako no, heha no.

5, 6. (a) Amu Yesu te akuzanga chinji tumbaji twenyi, yika iye te akulinga? (b) Kuchi watamba kufumba ana je?

⁵ Yesu ngwenyi: ‘Waze eswe ngunaazange nakuambila, ni kwaafumba.’ * (Usolwelo 3:19) Chakutalilaho, tumbaji twenyi kazwelele ha mashimbu anji ha kufupa kunyingika yoze te munene hakachi ko. Yesu kakalengulwile mulonga wacho. Iye ni uhomboloji weswe yaakwasa ha mashimbu anji. Alioze aye te kakusolola umbovu ha mashimbu eswe nawa te kakushimbwila mashimbu waze alita ni chihela hanga akwaashileho kanawa.—Marku 9:33-37.

⁶ Amu yena wakuzanga ana je, unanyingika ngwe watamba kwaafumba. Ha mashimbu amwe muchilita kwaalumbunwina mumu liaka chimwe chuma chili chipema hanji chipi. Alioze yika mulinga ni ayo mahona kukwononokena mashimbu eswe? (Yishima 22:15) Lilongese kuli Yesu. Ni uhomboloji weswe nunga ni kwaafumba ha kwaasongwela, kwaalongesa. Fupa mashimbu waze alita ni chihela cha kwaafumbila, nawa chilinge ni zango lieswe. Umwe pangi yoze avuluka ngwo Elaine wa mu África do Sul kanewuluka chize yisemi jenyi te akumufumba. Ayo ha mashimbu eswe te kakulumbununa yize te akushimbwila hali iye. Nyi ayo mamwamba ngwo mamulamba ha mukunda wa kuhona kwononoka, ayo te kakulinga chochene amba. Alioze aye yamba ngwenyi: “Yisemi jami kanda achingufumba kama muze o ali ni uli hanji chakuhona kungulumbunwina mumu liaka anangufumbu.” Ha mukunda wa yitanga yino, aye mashimbu eswe te kakunyingika ngwo yisemi jenyi te kakumuzanga chinji.

7, 8. (a) Yika tumbaji twa Yesu alilongesele ha yilemba yize iye alingile? (b) Kuchi kulemba che muchilongesa ana je kujikijila muli Zambi?

⁷ Muze te hikwasala hakehe hanga Yesu  amukwate ni kumushiha, aye yeta kuli Tato ngwenyi: Abba, “Tata, yena unahase yuma yeswe; chiza kama musenge uno kuli yami: hindu kanda chipwa chize ngunapale yami, alioze chize yena unapale.” * (Marku 14:36) Achinyonga chize tumbaji twa Yesu evwile muze apanjikile, hanji anyingikine hakutwala ku kulemba chino. Ayo yanyingika ngwo chipwe ngwe iye te mutu mungunu, nihindu te kakwita ukwaso kuli Tato. Ha chino, ni no yalilongesa ngwo katamba kulikehesa ni kujikijila kuli Yehova.

⁸ Ana je mahasa kulilongesa chinji hakutwala ku kulemba che. Chochene, yena kuuchi kulemba wika hanga ulongese ana je. Alioze muze mevwa kulemba che, o mahasa kulilongesa kujikijila muli Yehova. Mu yilemba ye, kuwatambile wika kwita kuli Yehova hanga akwase ana je, alioze mwite hanga akukwase. Ana ja umwe pangi mu Brazil, yamba ngwenyi: “Muze twapwile ni yipikalo, ngwe kuyiza cha akaka, yisemi jami te kakwita kuli Yehova hanga apwe ni tachi ja kulimika ni yipikalo yacho ni kupwa ni mana hanga akwate yiyulo yipema. Chipwe muze twakupwa ni milonga yinji, ayo kakuyihana mu moko ja Yehova. Ha chino yami, yingulilongesa kujikijila muli Yehova.” Muze ana je mevwa chize yena unete kuli Yehova hanga akwehe utakamiso wambujola kuli enyembo je, hanji wite kuli mwata we wa mulimo matangwa hanga ukaye ku kukunguluka cha mambunge, ayo manyingika ngwo ena wakujikijila muli Yehova ni kwita ukwaso, ha chino, ni ayo malilongesa kujikijila muli Yehova.

9. (a) Kuchi Yesu alongesele tumbaji twenyi hanga apwe akwa-kulikehesa ni kuhona kupwa akwa-kuzo? (b) Nyi uli mukwa-kulikehesa ni kuhona kuzo, yika ana je malilongesa?

⁹ Yesu kalwezele tumbaji twenyi hanga apwe ni kulikehesa ni kuhona kupwa akwa-kuzo, nawa yaahichikila chilweza chipema. (Tanga Luka 22:27.) Postolo jenyi kamwene ngwo iye kasele tachi jinji hanga awayile Yehova ni kukwasa akwo, nawa ni ayo kalilongesele kuchilinga. Ni yena nawa muhasa kulongesa ana je, muze ayo  membulula chilweza che. Pangi Debbie, yoze uli ni ana aali yamba ngwenyi: Ami kuchishi kwivwa ukwa ha mukunda wa mashimbu waze mukwetu-lunga akupalikisa hamwe ni makulwana akwo a mu chikungulwila. Te ngunanyingika ngwami ha shimbu lieswalio usoko wami muufupa ukwaso wa mukwetu-lunga, aye matukwasa.” (1 Timoteu 3:4, 5) Kuchi chilweza cha pangi Dabbie ni mukwo-lunga, Pranas chakukwasa usoko wo? Aye yamba ngwenyi ana jenyi ha mashimbu eswe te kakuzanga kukwasa ha ku kukunguluka cha mbonge. O te kakuwahilila, ha kupwa ni masepa apema, nawa te kakuzanga kupwa hamwe ni mandumbu ni mapangi jo. Haliapwila ayo eswe mu usoko kanalingila Yehova mu mulimo wa shimbu lieswe. Nyi uli mukwa-kulikehesa nawa kuushi ni kuzo, yena mulongesa ana je kupwa ni zango lia kukwasa akwo.

10. Kuchi Yesu azachishile malinjekela muze amwe atu amu Ngalileya ayile kuli iye?

¹⁰ Yesu kapwile ni malinjekela angunu. Aye kakalihulikilile wika ha yize atu te akulinga, alioze mumu liaka ayo te akuyilinga. Aye te kakuhasa kunyingika yize yili ku mbunge jo. Chakutalilaho, limwe tangwa amwe atu amu Ngalileya yaya ni kutala Yesu. (Yoano 6:22-24) Aye yanyingika ngwenyi chitela chaatwalileko, hi ko ngwo o te kanazange kupanjika yuma yize te analongesa, alioze kayileko mumu te kanafupu wika kulia. (Yoano 2:25) Yesu kanyingikine kanawa yize ayo te ananyongo. Ha chino, ni uhomboloji weswe aye yaambila nawa yaakwasa hanga alumune yitanga yo.—Tanga Yoano 6:25-27.

11. (a) Kuchi muhasa kunyingika chize ana je akunyonga hakutwala ku mulimo wa kwambujola? (b) Kuchi muhasa kukwasa ana je hanga azange mulimo wa kwambujola?

¹¹ Chipwe ngwe yena kuuchi kuhasa kunyingika yuma yize yili mu mbunge ja ana je, nihindu ena muhasa kupwa ni malinjekela. Chakutalilaho, yena muhasa kweseka kunyingika chize ana je akunyonga hakutwala ku mulimo wa kwambujola sango lipema. Muhasa kulihula ngwe, ‘Shina muze tuli mu munda ayo kakulihulumba chinji hanga tuhwise kawashi mulimo wa kwambujola hanga twiye ni kuhwima hamwe ni kulia nyi? Nyi munyingika ngwe ana je keshi kuzanga chinji kwambujola, eseka kwaakwasa hanga azange mulimo wacho. Ehe chimwe cheseko chize muchihasa kwaalingisa hanga anyonge ngwo kali ni ulemu unji.

12. (a) Yika Yesu atowezele kuli tumbaji twenyi? (b) Mumu liaka tumbaji twa Yesu te afupile utowezo wenyi?

¹² Kuchi nawa Yesu azachishile malinjekela? Aye te kananyingika ngwenyi uhenge umwe muuhasa kutwala mutu ku uhenge ukwo hanji kulinga shili, nawa yatoweza tumbaji twenyi ha chikuma chino. Chakutalilaho, tumbaji twenyi te kananyingika kanawa ngwo kulinga utanji chili chuma chipi chinji. Alioze, Yesu yaatoweza hakutwala ku chuma chize te muchihasa kwatwala kulinga utanji. Aye ngwenyi: “Mweswawo matala pwo mukumuvwila usolo, halinga nenyi utanji kulu mu mbunge yenyi. Alioze kachi liso lie lia chindume mulikutalingisa, litombongonemo, ulimbile.” (Mateu 5:27-29) Tumbaji twa Yesu te katwama ha kachi ka A-Roma waze te akuzanga chinji kutala  yuma ya utanji ni kuhanjika yuma ya sonyi. Kashika Yesu ni zango lieswe yatoweza tumbaji twenyi hanga ehuke kutala yuma yize te muyihasa kwanehena lamba hakulinga yuma yipema.

13, 14. Kuchi muhasa kukwasa ana je hanga ehuke yiheho ya upangala?

¹³ Amu uli chisemi, muhasa kupwa ni malinjekela hanga ufunge ana je hanga achine kulinga yuma yize Yehova keshi kuzanga. Musono chili chashi twanuke akehe-akehe kutala pornografia ni yuma yikwo ya sonyi. Ewa, watamba kulongesa ana je ngwo chili chipi chinji kutala pornografia ni yuma ya upangala. Kuli nawa yuma yikwo yize muhasa kulinga hanga ufunge ana je. Achilihule ngwenyi: ‘Shina ana jami kananyingika ngwo kutala pornografia chili chipi nyi? Yika yakwaalingisa mba azange kutala pornografia? Shina chakupwa chashi kuli ayo kuhanjika ni yami hakutwala ku chuma cheswacho hanga ngwaakwase, chipwe mapalika mu cheseko cha kutala pornografia?’ Chipwe muze ana je achili twanuke chinji, nihindu muhasa kwaalweza ngwenyi: “Nyi nwamona chimwe chuma ha internet hakutwala ku yuma ya utanji nawa munuzanga kuyitala, nwiza kuli yami hanga gunukwase. Kanda nwivwa woma hanji sonyi jakungwita ukwaso. Ami nakuzanga kunukwasa.”

¹⁴ Muze musakula chimwe kuheha, nyonga kanawa hakutwala ha chize yena muhasa kupwa chilweza chipema hali ana je. Pranas, yoze hitwavuluka kulu, yamba ngwenyi: “Yena muhasa kuhanjika chinji hakutwala ku yuma yinji, alioze ana je makatala ni kwimbulula yize wakulinga.” Nyi mashimbu eswe musakula kanawa miaso, mikanda ni yiheho yipema, muhasa kukwasa ana je hanga ni no achilinge.—A-Roma 2:21-24.

15, 16. (a) Mumu liaka munuhasa kupwa ni ushindakenyo ngwenu Yehova manukwasa hanga nulele kanawa ana jenu? (b) Yika mutukashimutwina ha mutwe uze muusulaho?

¹⁵ Yika yalingiwile muze Manoa ahulile Yehova hanga amukwase kupwa chisemi mupema? “Zambi wapanjikile ku liji lia Manoa.” (Akwa Kuyula 13:9) Yisemi, Yehova mapanjika kulemba chenu. Iye manukwasa hanga nulele kanawa ana jenu. Iye nawa manukwasa hanga nusolole zango lienu, kupwa ni umbovu, ni malinjekela.

¹⁶ Amu Yehova mahasa kunukwasa hanga nulele kanawa ana jenu muze achili twanuke, iye mahasa kunukwasa nawa hanga nwaafumbe muze mapwa akweze. Ha mutwe uze muusulaho, mutukashimutwina chilweza cha zango lia Yesu, ni kulikehesa, ni malinjekela waze mahasa kunukwasa hanga nulele kanawa ana jenu waze achili akweze hanga awayile Yehova.