1. ¿Chuqui tsiʼ mele Manoa cheʼ bʌ tsaʼ subenti chaʼan mi caj i taj i yalobil?

JUMPʼEJL xñujpuñel chʼoyoloʼ bʌ ti Israel ti wajali, Manoa (Manóah) yicʼot i yijñam, tsiʼ ñaʼtayob chaʼan maʼañic baqui ora mi caj i tajob i yalobil. Pero jumpʼejl bʌ qʼuin, juntiquil ángel tsiʼ sube wem bʌ tʼan i yijñam Manoa. Tsiʼ sube chaʼan mi caj i tilel i yalobil. Cheʼ bʌ tsiʼ sube i ñoxiʼal, wen tijicña tsiʼ yubi. Pero tsaʼ caji i ñaʼtan jaʼel bajcheʼ mi caj i cosan come ti jiñi bʌ ora cabʌl israelob miʼ melob jontolil. Chaʼan Manoa yicʼot i yijñam miʼ mejlel i cʌntesañob i yalobil chaʼan miʼ cʼuxbin Jehová yicʼot miʼ melben i yeʼtel (troñel), Manoa tsiʼ sube Jehová chaʼan miʼ chaʼ choc majlel jiñi ángel chaʼan miʼ subentelob bajcheʼ yom miʼ cosañob (Jueces 13:1-8).

2. ¿Chuqui añob tiʼ wenta jiñi tatʌlob, i chuqui mi caj i coltañob i tsʼʌctesan? (Qʼuele jaʼel jiñi recuadro « ¿Majqui ñaxan yom maʼ wʌcʼ ti ñuc chaʼan maʼ wʌqʼuen estudio?».)

² Mi an a walobilob, tajol maʼ chʼʌmben isujm bajcheʼ tsiʼ yubi Manoa. An ti a wenta jaʼel chaʼan maʼ cʌntesan a walobilob chaʼan miʼ melbeñob i yeʼtel Jehová yicʼot miʼ cʼuxbiñob (Proverbios 1:8). ¿Chuqui mi caj i coltañet a tsʼʌctesan? Wen ñuc i cʼʌjñibal cheʼ maʼ mel ti jujumpʼejl semana jiñi a Chʼujutesaya ti Familia. Jiñʌch mi caj i coltañet a cʌntesan a walobilob tiʼ chaʼan bʌ Jehová yicʼot jiñi Biblia  (pejcan Deuteronomio 6:6-9). ¿Chuqui yambʌ mi caj i coltañet? Jiñʌch bajcheʼ tsiʼ mele Jesús. Cabʌl chuqui miʼ mejlel i cʌn jiñi tatʌlob chaʼan bajcheʼ tsiʼ cʌntesa jiñi xcʌntʼañob i chaʼan, anquese maʼañic i yalobil. Ti ili temaj mi caj laj qʼuel bajcheʼ tsiʼ pʌsʌ Jesús chaʼan miʼ cʼuxbiñob yicʼot chaʼan an i pecʼlel. Tsiʼ chʼʌmbe isujm bajcheʼ yubil tsiʼ yubiyob yicʼot tsiʼ ñaʼta bajcheʼ yom miʼ coltañob. Mi caj laj qʼuel jaʼel bajcheʼ miʼ mejlel lac tsajcan.

3. ¿Bajcheʼ yujilob jiñi xcʌntʼañob i chaʼan Jesús chaʼan mucʼʌch i cʼuxbintelob?

³ Jesús ñʌmʌl i suben chaʼan miʼ cʼuxbin jiñi xcʌntʼañob i chaʼan (pejcan Juan 15:9). Cabʌl ora tsiʼ ñusa yicʼotob (Marcos 6:31, 32; Juan 2:2; 21:12, 13). Mach cojach juntiquil xcʌntesa i chaʼañob. I yamigojobʌch jaʼel. Jin chaʼan, yujilob chaʼan Jesús mucʼʌch i cʼuxbiñob. ¿Bajcheʼ maʼ mejlel a lajin Jesús?

4. ¿Bajcheʼ miʼ mejlel a pʌsbeñob a walobil chaʼan maʼ cʼuxbiñob? (Qʼuele jiñi foto am bʌ tiʼ tejchibal.)

⁴ Ñʌntesan a bʌ a suben chaʼan maʼ cʼuxbin a walobilob. Pʌsbeñob chaʼan maʼ wen qʼuelob ti ñuc (Proverbios 4:3; Tito 2:3). Ti Australia, juntiquil Testigo i cʼabaʼ Samuel miʼ yʌl chaʼan ti jujumpʼejl acʼʌlel jiñi i tat miʼ pejcʌben jiñi libro Cʌntesʌntel am bʌ ti Biblia yicʼot miʼ jacʼben i cʼajtiya tac. Ti wiʼil miʼ mecʼ yicʼot miʼ tsʼujtsʼun cheʼ muqʼuix i cajel ti wʌyel. Jumpʼejl bʌ qʼuin, toj sajtel i pusicʼal Samuel cheʼ tsiʼ ñaʼta chaʼan mach cheʼic miʼ mejlel baqui tsaʼ coli i tat. Pero tsiʼ chaʼle wersa i tat chaʼan miʼ pʌsben chaʼan miʼ wen cʼuxbin. Jin chaʼan Samuel tiʼ pejtelel ora tijicña tsiʼ yubi i bʌ. I tsaʼ sujtiyob ti wem bʌ i yamigojob i bʌ. Mi mucʼʌch a ñʌntesan a suben a walobilob chaʼan maʼ cʼuxbiñob, cheʼ mi caj i yubiñob i bʌ bajcheʼ Samuel. Jin chaʼan, meqʼueyob yicʼot tsʼujtsʼuñob, aqʼuen i yorajlel chaʼan mi laʼ chaʼlen tʼan, temel uchʼel yicʼot alas a wicʼotob.

5, 6. a) ¿Chuqui tsiʼ mele Jesús tiʼ tojlel xñoptʼañob i chaʼan? b) ¿Bajcheʼ yom miʼ ticʼob i yalobil jiñi tatʌlob?

⁵ Jesús tsiʼ yʌlʌ: «Jini muʼ bʌ j cʼuxbin mic ticʼ. Mic juʼsʌben i pusicʼal» (Apocalipsis 3:19). * Jumpʼejl ejemplo, tsiʼ qʼuele chaʼan jiñi xcʌntʼañob i chaʼan miʼ chʌn letojiñob (cajatañob) majqui jiñi ñumen ñuc bʌ, jin chaʼan mach junyajl jach tsiʼ tiqʼuiyob. Pero tsiʼ chʌn sʌcla baqui yicʼot bajcheʼ ora miʼ ticʼob yicʼot cʼuxbiya (Marcos 9:33-37).

⁶ A wujil chaʼan yom maʼ tic a walobil come maʼ cʼuxbin. An i tajol jasʌl jach maʼ tsictesʌbeñob chucoch mach weñic jiñi tsaʼ bʌ i meleyob. Pero ¿ixcu mi maʼañic tsiʼ jacʼʌyob? (Proverbios 22:15.) Mele cheʼ bajcheʼ Jesús. Mach a cʌy a tojʼesañob yicʼot a ticʼob ti a wutslel. Chaʼan maʼ ticʼob yicʼot cʼuxbiya yom maʼ qʼuel baqui yicʼot jala mi caj a mel. Ti Sudáfrica, juntiquil Testigo i cʼabaʼ Elaine cʼajal i chaʼan bajcheʼ tsaʼ tijqʼui tiʼ tat i ñaʼ. Tiʼ pejtelel ora tiʼ tsictesʌbeyob chuqui yomob miʼ mel. Jumpʼejl ejemplo, miʼ wʌn subeñob chaʼan mi caj i jatsʼob mi maʼañic miʼ jacʼ tʼan, i mucʼʌch i tsʼʌctesañob. Pero cheʼ bʌ miʼ melob miʼ chʌn tsictesʌbeñob chucoch, i mach yicʼotobic i michʼajel. Jiñʌch tsaʼ bʌ i yʌqʼue i ñaʼtan Elaine chaʼan mucʼʌch i cʼuxbintel tiʼ tat i ñaʼ.

7, 8. a) ¿Chuqui tsiʼ cʌñʌ jiñi xcʌntʼañob cheʼ tsiʼ yubibeyob i yoración tac Jesús? b) Cheʼ bʌ maʼ chaʼlen oración a wicʼot a walobilob, ¿bajcheʼ miʼ mejlel a cʌntesañob i ñumen ñopob ti Jehová?

⁷ Cheʼ bʌ muʼto caj i chujquel Jesús yicʼot i tsʌnsʌntel, tsiʼ mele ili oración: «Papá, c Tat, tiʼ pejtelel miʼ mejlel a mel. Locʼsʌbeñon ili wocol, pero mach maʼ mel chuqui com mele chuqui yom a pusicʼal» (Marcos 14:36, Jiñi tsijiʼ bʌ wen tʼañ chaʼañ estudio). Ti  oración tac bajcheʼ ili, ¿chuqui tsiʼ cʌñʌ jiñi xcʌntʼañob i chaʼan Jesús? Tsiʼ cʌñʌyob chaʼan Jesús miʼ cʼajtiben i coltaya i Tat anquese mach xmulilic. Tsiʼ cʌñʌyob jaʼel chaʼan yom miʼ pʌsob i pecʼlel yicʼot miʼ cʼajtibeñob i coltaya Jehová.

⁸ Ti jiñi oración muʼ bʌ a mel, cabʌl chuqui miʼ mejlel i cʌn a walobilob. Anquese mach yom i yʌl chaʼan woli (choncol) a mel oración chaʼan cojach maʼ cʌntesañob, pero cheʼ maʼ mel a wicʼotob, woli (yʌquel) a cʌntesañob i ñop ti Jehová. ¿Bajcheʼ? Mach a cʼajtin cojach i coltʌntel a walobilob, cʼajtin a coltʌntel jaʼel. Ana, juntiquil hermana ti Brasil, miʼ yʌl chaʼan jiñi i tat i ñaʼ tiʼ pejtelel ora miʼ cʼajtibeñob i coltaya Dios cheʼ bʌ añob i wocol. Jumpʼejl ejemplo, cheʼ bʌ tsaʼ cʼamʼa i ñoxyum yicʼot i coʼ, jiñi i tat i ñaʼ tsiʼ cʼajtiyob i pʼʌtʌlel ti Jehová yicʼot i ñaʼtʌbal chaʼan chuqui yom miʼ melob. Tiʼ pejtelelob i wocol tsiʼ chʌn cʌybeyob tiʼ cʼʌb Dios, jinto jiñi ñumen tsʌts tac bʌ. Ili tsiʼ colta chaʼan Ana miʼ ñumen ñop ti Jehová. Cheʼʌch miʼ mejlel a mel jaʼel tiʼ tojlel a walobilob cheʼ bʌ maʼ mel oración. Cʼajtiben a chʼejlel Jehová chaʼan maʼ suben jiñi wen tʼan lʌcʼʌl bʌ chumulob a wicʼot o chaʼan maʼ cʼajtiben a yum ti eʼtel chaʼan miʼ yʌqʼueñet i yorajlel chaʼan maʼ majlel ti a colem tempa bʌ. Cheʼʌch mi caj i qʼuel a walobilob chaʼan mucʼʌch a ñop ti Jehová, i lajal mi caj i melob jeʼel.

9. a) ¿Bajcheʼ tsiʼ cʌntesa Jesús chaʼan yom pecʼob yicʼot miʼ coltañob yañoʼ bʌ jiñi xcʌntʼañob i chaʼan? b) Mi añʌch a pecʼlel yicʼot a womʌch a coltan yañoʼ bʌ, ¿chuqui mi caj i mel a walobilob?

⁹ Jesús tsiʼ cʌntesa chaʼan yom pecʼob jiñi xcʌntʼañob i chaʼan yicʼot chaʼan yom miʼ coltan yañoʼ bʌ. ¿Bajcheʼ tsiʼ pʌsbeyob? Come cheʼʌch tsiʼ mele jaʼel (pejcan Lucas 22:27). Chaʼan i cʼuxbiya ti Jehová yicʼot yañoʼ bʌ tsiʼ yʌcʼʌ i cuxtʌlel. I lajal tsaʼ caji i melob jiñi xcʌntʼañob i chaʼan. Cheʼʌch yom maʼ mel jaʼel chaʼan maʼ cʌntesan a walobilob. Qʼuele tiʼ tojlel juntiquil hermana i cʼabaʼ Debbie yicʼot i ñoxiʼal, Pranas. Añob chaʼtiquil i yalobil i jiñi hermano anciano ti congregación. Debbie  miʼ yʌl chaʼan maʼañic tsaʼ wis michʼa cheʼ bʌ jiñi i ñoxiʼal tsiʼ yʌqʼue i yorajlel chaʼan miʼ qʼuel jiñi congregación. Wen yujil chaʼan yaʼʌch mi caj i yajñel cheʼ bʌ yom coltʌntel i familia (1 Timoteo 3:4, 5). ¿Bajcheʼ yilal tsiʼ yubi i yalobilob? Pranas miʼ yʌl chaʼan wen tijicñayob yicʼot yambʌ hermanojob. Yaʼ ti colem tempa bʌ tac, tiʼ pejtelel ora miʼ chaʼleñob eʼtel. Ili ora, tiʼ pejtelel i familia woli (yʌquel) i melbeñob i yeʼtel Dios. Mi añʌch a pecʼlel yicʼot a wom a coltan yañoʼ bʌ, lajal mi caj i mel a walobilob.

10. ¿Chuqui tsiʼ mele Jesús cheʼ bʌ an majqui woliʼ sʌclañob yaʼ ti Galilea?

¹⁰ Jesús mach xmulilic i miʼ mejlel i ñaʼtan chuqui woliʼ ñusan wiñicob xʼixicob (quixtañujob) (Juan 2:25). Jin chaʼan mach cojach tsiʼ qʼuele choncol bʌ i melob, tsiʼ chʼʌmbe isujm chucoch choncol i melob. Jumpʼejl bʌ qʼuin, jiñi quixtañujob yaʼ ti Galilea tsaʼ caji i sʌclañob Jesús (Juan 6:22-24). Pero tsiʼ ñaʼta chaʼan tiʼ cajach bʌlñʌcʼʌl woliʼ melob, mach chaʼañic yomob cʌntesʌntel. Jin chaʼan tsiʼ tojʼesayob ti wem bʌ tʼan, i tiʼ tsictesʌbeyob bajcheʼ miʼ mejlel i qʼuextañob i pensar (pejcan Juan 6:25-27).

11. a) ¿Bajcheʼ miʼ mejlel a ñaʼtan mi mucʼʌch i mulañob subtʼan a walobilob? b) ¿Chuqui miʼ mejlel a mel chaʼan miʼ ñumen mulañob subtʼan?

¹¹ Anquese xmulilet i maʼañic miʼ mejlel a ñaʼtan chuqui an tiʼ pensar a walobilob, pero an chaʼpʼejl uxpʼejl chuqui tac miʼ melob mucʼʌch bʌ mejlel a chʼʌmben isujm. Jumpʼejl ejemplo, tajol miʼ majlelob ti subtʼan a wicʼotob. Pero cʼajtiben a bʌ: «¿Chucoch miʼ loqʼuelob ti subtʼan? ¿Chaʼan ba mucʼʌch i mulañob? ¿O chaʼan jach ba an i tajol mic mʌn chuqui mi lon j cʼux o lon c jap?». Mi tsaʼ qʼuele chaʼan maʼañic miʼ mulañob subtʼan, chaʼlen wersa chaʼan miʼ mulañob. Subeñob chuqui miʼ mejlel i melob chaʼan añobʌch i cʼʌjñibal miʼ yubiñob ti subtʼan.

12. a) ¿Chuqui tiʼ tsictesʌbe Jesús jiñi xcʌntʼañob i chaʼan? b) ¿Chucoch yom miʼ tsictesʌbentelob jiñi xcʌntʼañob tiʼ pejtelel jiñi?

¹² An yambʌ bajcheʼ tsiʼ colta jiñi xcʌntʼañob i chaʼan Jesús. Yujil chaʼan cheʼ bʌ an majqui miʼ taj i sajtemal, miʼ mejlel i mel yambʌ ñumen tsʌts bʌ o tajol jumpʼejl tsʌts bʌ mulil. Jin chaʼan tsiʼ sube i cʌntañob i bʌ jiñi xcʌntʼañob i chaʼan. Jumpʼejl ejemplo, yujilob chaʼan mach yomic miʼ melob tsʼiʼlel. Pero Jesús tiʼ tsictesʌbeyob bajcheʼ miʼ mejlelob ti yajlel ti jiñi mulil. Tsiʼ yʌlʌ chaʼan mi juntiquil wiñic miʼ chʌn qʼuel yambʌ xʼixic chaʼan miʼ piʼlen, woliyix ti mulil «tiʼ pusicʼal». Tsiʼ yʌqʼueyob ili ticʼojel: «Mi woliʼ yʌsañet ti mulil jini a wut am bʌ ti a ñoj, locʼsan. Choco» (Mateo 5:27-29). ¿Chucoch yom miʼ tsictesʌbentelob jiñi xcʌntʼañob tiʼ pejtelel iliyi? Come ti jiñi bʌ ora jiñi quixtañujob miʼ wen chaʼleñob tsʼiʼlel yicʼot miʼ qʼuelob baqui miʼ pʌstʌl chaʼan tac bʌ tsʼiʼlel yicʼot baqui miʼ cʼʌjñel bibiʼ tac bʌ tʼan. Jin chaʼan, Jesús tsiʼ subeyob chaʼan mach yomic miʼ yotsañob i bʌ yaʼi, come tsiʼ wen cʼuxbi jiñi xcʌntʼañob i chaʼan.

13, 14. ¿Bajcheʼ miʼ mejlel a coltan chaʼan maʼañic miʼ yajcañob bibiʼ bʌ ñusaqʼuin tac a walobilob?

¹³ Jatet yom maʼ cʌntan chaʼan jiñi a walobilob maʼañic miʼ melob muʼ bʌ i tsʼaʼlen Jehová.  Chʼijiyemtic jax, pero ili ora jinto jiñi xbiʼtalob miʼ mejlel i qʼuelob pornografía yicʼot chuqui bibiʼ tac bʌ. ¿Bajcheʼ miʼ mejlel a cʌntañob? Yom maʼ subeñob chaʼan mach weñic cheʼ miʼ qʼuelob pornografía. Pero mach cojach jiñi. Cʼajtiben a bʌ: «¿Yujiloʼ ba chaʼan cheʼ miʼ qʼuelob pornografía an i wocolel? ¿Chuqui miʼ mejlel i ñijcabeñob i pusicʼal chaʼan miʼ qʼuelob? ¿Wocol ba miʼ yubiñob chaʼan miʼ chaʼleñob tʼan yicʼoton chaʼan chuqui jach yomob? ¿Muʼ ba caj i subeñoñob cheʼ bʌ miʼ tilelob tiʼ pusicʼal i qʼuel pornografía?». Anquese chutob to a walobil, miʼ mejlel a subeñob: «Mi jumpʼejl bʌ qʼuin maʼ taj ti Internet jumpʼejl página baqui miʼ pʌstʌl chaʼan tac bʌ tsʼiʼlel i miʼ tilel ti a pusicʼal a qʼuel, subeñon. Mach a chaʼlen bʌqʼuen yicʼot mach a cʼojoʼtan (pensalin), com j coltañet».

¹⁴ Cheʼ bʌ mi caj a yajcan jumpʼejl alas o ñusaqʼuin, wen ñaʼtan chuqui mi caj a pʌsben a walobilob. Jiñi tatʌl tsaʼ bʌ ajli ti párrafo 9 miʼ yʌl chaʼan jiñi tatʌlob cabʌl chuqui miʼ mejlel i suben i yalobilob, pero cojach mi caj i melob muʼ bʌ i qʼuelob i mel i tat i ñaʼ. Mi tsaʼ yajca wen tac bʌ cʼay, película yicʼot libro tac, tajol cheʼʌch mi caj i melob jaʼel (Romanos 2:21-24).

15, 16. a) ¿Bajcheʼ miʼ mejlel a ñaʼtan chaʼan Jehová mi caj i coltañet a cosan a walobilob? b) ¿Chuqui mi caj laj qʼuel ti yambʌ cʌntesʌntel?

¹⁵ ¿Chuqui tsaʼ ujti cheʼ bʌ Manoa tsiʼ cʼajtibe i coltaya Jehová chaʼan miʼ cosan i yalobil? «Lac Yum [Jehová] tsiʼ yubibe i yoración Manoa.» (Jueces 13:9.) Jin chaʼan, mach a cʼojoʼtan, Jehová mi caj i ñʌchʼtan a woración yicʼot mi caj i coltañet a cosañob. Mi caj i coltañet a pʌs chaʼan maʼ cʼuxbiñob, chaʼan an a pecʼlel yicʼot chaʼan mucʼʌch a chʼʌmbeñob isujm.

¹⁶ Jehová mach cojach mi caj i coltañet a cʌntesan a walobilob cheʼ chutob to. Mi caj i chʌn coltañet jeʼel cheʼ bʌ wolix i tajob majlel i colel. Ti yambʌ temaj mi caj laj qʼuel bajcheʼ miʼ mejlel a tsajcan bajcheʼ tsiʼ mele Jesús yicʼot chaʼan maʼ pʌsben jiñi xcolelobix bʌ chaʼan mucʼʌch a cʼuxbiñob, chaʼan an a pecʼlel yicʼot chaʼan mucʼʌch a chʼʌmbeñob isujm. Cheʼʌch mi caj i mejlel a cʌntesañob i melben i yeʼtel Jehová.