1. Ihi ia bhange Manoua kioso kiévu kuila ueji kala tata?

MANOUA ni muhatu’ê ejidile kuila, keji vuala an’a. Maji saí kizuua, o anju ia Jihova ia tangela o muhatu ua Manoua kuila, ueji vuala mon’a ua diiala. Kiki kiexile madiuanu! Kioso kia tangela o njimbu kua Manoua, muéne ua sanguluka kiavulu. Kuma ueji kala tata, muéne ua banze mu ima ieji kingila Jihova kokué. Kiebhi Manoua ni muhatu’ê kieji longa o mon’a ku zola Jihova, se o athu mu Izalaiele, akexile mu bhanga ima ia iibha? Manoua ua bhingi kua Jihova phala kutumikisa dingi o anju iê. Muéne uambe: ‘Nga ku dióndo, muthu ua Nzambi ió uoso ua mu katuile, eze dingi bhu tuala, a tu longese kioso ki tu sasa o mon’a uoso hinu tu mu vuala.’—Afundixi 13:1-8.

2. Ihi i ua bhingi phala ku longa o tuana tuê, ni kiebhi ki u tena kubhanga kiki? (Tala o kaxa “ O Maxibulu mê a Bibidia a Beta-o-Kota.”)

² Se u tata, nange eie uejiia kiebhi kia divu Manoua. Eie uala ué ni kikalakalu kia kukuatekesa o tuana tuê kuijiia ni kuzola Jihova. (Jisabhu 1:8) Bhu kaxi ka ubhezelu ku muiji, u tena ku a kuatekesa kukolokota ku di longa ia lungu ni Jihova ni Bibidia. Mu kidi, eie ku tokala ngó ku di longa o  Bibidia ni tuana tuê mu semana joso, ua tokala kubhanga dingi ima ia mukuá. (Tanga Matendelelu 6:6-9.) Ihi dingi ia-nda kukuatekesa ku a longa kuzola ni kusidivila Jihova? Mu milongi íii, tua-nda zuela ia lungu ni phangu ia Jezú. Sumbala muéne kexile tata, u tena ku di longa disá mu ukexilu ua longo o maxibulu mê. Jezú ua zolele o maxibulu mê, muéne ua lendukile. Muéne uexile mukua kutongoloka, mukonda uejidile kiambote kiebhi kia kexile mu divua o maxibulu mê, ni kiebhi kia tokalele ku a kuatekesa. Tu mone kiebhi ki tu tena kukaiela o phangu ia Jezú.

3. Kiebhi o maxibulu a Jezú ejidile kuila, muéne ua a zolele?

³ Ithangana ioso Jezú ua kexile mu tangela o maxibulu mê kuila, ua a zolele. (Tanga Nzuá 15:9.) Muéne ua kexile ué mu kala nau mu ithangana iavulu. (Marku 6:31, 32; Nzuá 2:2; 21:12, 13) Jezú kexile ngó mesene iâ, maji uexile uê kamba diâ. Mu kiki, o maxibulu ka kexile ni phata kuila, muéne ua a zolele. Ihi i u tena ku di longa ku phangu ia Jezú?

4. Kiebhi ki u tena kulondekesa ku tuana tuê kuila, ua a zolo? (Tala o foto ia dianga.)

⁴ Tangela an’ê kuila, ua a zolo, ni ku a londekesa kuila, ene ala ni valolo iavulu. (Jisabhu 4:3; Tito 2:4) Samuele, ua tungu ku ixi ia Austrália, uambe: “Kioso ki ng’exile ngi mon’a ndenge, Tat’etu ua kexile mu ngi tangela o milongi mu Divulu Diami Dia Misoso ia Bibidia, mu mausuku oso. Muéne ua kexile mu tambuijila o ibhuidisu iami, ni ku ngi bhabha, ni ku ngi bhana nzobole ande dia kuzeka. Nga sasumuka mu kuijiia kuila, kioso kia sase Tat’etu, o jitata jê ka kexile ku mu bhabha ni ku mu bhana nzobole!  Maji né kiki, muéne ua bhange nguzu phala ku ngi londekesa o henda. Mukonda dia kiki, tua kituka tu makamba ambote, nga sanguluka, nga divu ué kala nga kondama.” Kuatekesa mon’ê ku divua kiki, mu ku mu tangela ni henda ioso kuila “nga ku zolo.” Sota o ku a bhabha ni kua bhana jinzóbole. Sota kithangana phala kuzuela, kúdia, ni kubhanga nau itonokenu.

5, 6. (a) Kuma Jezú ua zolele o maxibulu mê, ihi ia bhangele? (b) Kiebhi ki ua tokala kubazela o tuana tuê?

⁵ Jezú uambe: “Oso u nga zola, ng’a bazela ng’a beta.” * (Tala ku luiji.) (Dijingunuinu 3:19) Mu kifika, o maxibulu mê akexile mu zoka veji javulu se nanhi uexile o dikota bhu kaxi kâ. Jezú ka a ehela ngó. Ni muanhu uoso, muéne ua a bazela mu veji javulu. Maji muéne ua londekesa o henda, mu ku a bazela mu kithangana ni bhu kididi kia tokala.—Marku 9:33-37.

⁶ Kuma ua zolo o tuana tuê, eie uejiia kuila, ua tokala ku a bazela. Saí bhabha, ku bhinga ngó kua jimbuluila kiambote se mukonda diahi o kima kia mu bhanga, kima kiambote mba kia iibha. Maji ihi i tuamba se ene ka xikina kubelesela? (Jisabhu 22:15) Kaiela o phangu ia Jezú. Ni muanhu uoso, kolokota ku a bazela mu ku a endesa, ku a longa, ni ku a kuatekesa kuiudika o ima ia bhengalala. Ni henda ioso, sota ku a bazela mu kithangana ni bhu kididi kia tokala. Phange Elaine, ua tokala ku ixi ia África do Sul, u lembalala o ukexilu ua kexile ku mu bazela ku jitata jê. Ithangana ioso, ene akexile ku mu tangela o ima ia tokalele kubhanga. Se a mu tangela kuila, a-nda mu bhana kaxtiku mukonda dia kuxibhaka, ene a kumbidila o izuelu iâ. Muéne uambe: “Maji ene nuka a ngi bazele sé ku ngi jimbuluila o kima kia a bhangesa ku ngi bazela.” Mukonda dia kiki, ithangana ioso muéne uejidile kuila, o jitata jê ja mu zolele.

7, 8. (a) Ihi ia di longo o maxibulu a Jezú mu misambu iê? (b) Kiebhi o misambu iê i tena ku longa o tuana tuê kudielela kua Nzambi?

⁷ Kioso kia kexile polondo phala ku mu kasa ni ku mu jibha, Jezú ua bhingi kua Tat’ê: “Abha Tata! Eie ima ioso ua i tena. Dikáu didi dia phaxi, ngi katule-diu. Maji-phe ki ng’inda eme kana, inda ki uinda eie.” * (Tala ku luiji.) (Marku 14:36) Xinganeka kiebhi kia divu o maxibulu a Jezú kioso kiévu, mba kioso kia di longo ia lungu ni musambu uê. Ene a mono kuila, sumbala uexile muthu ua iuka, muéne ua bhingi o kikuatekesu kia Tat’ê. Mu kiki, ene a di longo kuila, a tokalele ué kulondekesa o kulenduka, ni kudielela kua Jihova.

⁸ Kioso ki u samba, o an’ê a tena ku di  longa ima iavulu. Mu kidi, ku tokala ngó kusamba phala ku longa o tuana tuê. Maji kioso kiévua o misambu iê, ene a tena ku di longa kudielela kua Jihova. Kioso ki u samba, kana kubhinga ngó kua Jihova phala kukuatekesa o tuana tuê, ua tokala ku mu bhinga ué phala ku kukuatekesa. Ana, ua tungu mu ixi ia Brasil, u zuela: “Kioso ki tua kexile mu bhita ni maka, kala o uhaxi ua jikuku jami, o jitata jami akexile mu bhinga kua Jihova phala ku a bhana nguzu phala ku dibhana ni maka enhá, ni unjimu phala kubatula kiambote o maka. Né muene se akexile mu dibhana ni kijijidiku kia dikota, ene akexile mu bhakula o maka oso kua Jihova. Mukonda dia kiki, eme nga di longo kudielela kua Jihova.” Se o tuana tuê a mona kuila, ua mu bhinga kua Jihova phala ku kusuínisa kubhana umbangi ku muthu, mba kubhinga kua xefe iê phala ku kuehela kuia mu kiônge kia dikota, ene a-nda mona kuila, ua dielela kua Jihova. Mu kiki, ene a-nda di longa ku mu dielela ué.

9. (a) Kiebhi Jezú kia longo o maxibulu mê kukamba luímbi ni kulondekesa o kulenduka? (b) Se u kamba luímbi, anga u londekesa o kulenduka, ihi ia-nda di longa o tuana tuê?

⁹ Jezú ua tendelesa o maxibulu mê kukala athu a lenduka, a kambe o luímbi, maji ua xisa ué phangu iambote. (Tanga Luka 22:27.) O jipoxolo jê a mono kuila, muéne ua xisa ima iavulu phala kusidivila Jihova ni akuâ. Mu kiki, ene a di longo ué kubhanga o ima ia bhangele. U tena ué ku longa o tuana tuê bhu kaxi ka phangu iê. Debbie, uala ni tuana tuiadi, uambe: “Ki ngene mu kala ni difuba dia muadi uami, kioso kia kuatekesa akuetu, mukonda muéne kafunga. Ngejiia kuila, se o muiji uetu u bhindamena kima, muéne ua-nda tu kuatekesa.”  (1 Timote 3:4, 5) Kiebhi o phangu ia Debbie ni muadi uê Pranas, ia kuatekesa o muiji uâ? Pranas ua zuela kuila, ithangana ioso, o tuana tuâ, akexile polondo phala kukuatekesa o ikalakalu mu iônge ia makota. Ene akexile mu sanguluka, ni kusanga makamba ambote, a mesenene ué kukala ni jiphange jâ. O muiji uoso ua dibhakula mu sidivisu ia thembu ioso. Se u londekesa o kulenduka, anga u kamba o luímbi, ua-nda longa o tuana tuê kukala polondo phala kukuatekesa akuâ.

10. Kiebhi Jezú kia londekesa o kutongoloka kioso o athu mu Ngalileia eza mu mu sota?

¹⁰ Jezú ua iukile mu kutongoloka. Muéne ka kexile mu mona ngó o ima ia kexile mu bhanga o athu, maji ua kexile ué mu banza se ihi ia kexile mu bhangesa o athu kubhanga o ima ienioió. Muéne ua kexile ni kutena kua kuijiia o ima ia kexile ku mixima iâ. Mu kifika, saí kizuua, o athu mu Ngalileia eza ku mu sota. (Nzuá 6:22-24) Muéne ua mono kuila, ene ka kexile mu mu sota phala kuívua o milongi iê, maji akexile ku mu sota phala ku a bhana kúdia. (Nzuá 2:25) Jezú uejidile kiebhi kia kexile mu divua. Mu kiki, ni muanhu uoso, muéne ua a bazela, ni ku a jimbulula o ima ia tokalele o kubhanga.—Tanga Nzuá 6:25-27.

11. (a) Kiebhi ki u tena kuijiia se o tuana tuê a uabhela o kuboka mba kana? (b) Kiebhi ki u tena kukuatekesa o tuana tuê kuuabhela o sidivisu ia kuboka?

¹¹ Sumbala eie kuala ni kutena kua kuijiia o ima i bhita ku mixima ia athu, né kiki, u tena ué kukala ni kutongoloka. Mu kifika, u tena kusota kuijiia se o tuana tuê a uabhela o ukunji mba kana. U tena ku dibhuidisa: ‘O kuila ene aia ngó mu ukunji, mukonda ejiia kuila a-nda zumbuka phala kudia ni kúnua?’ Se u mona kuila o tuana tuê ka uabhela kiavulu kuboka, sota kubhanga ima ia-nda ku a kuatekesa kuuabhela o sidivisu ia kuboka. A tumine kubhanga ima iofele, n’a mone kuila a mu kalakala uâ.

12. (a) Jezú ua dimuna o maxibulu mê ku ihi? (b) Mukonda diahi o maxibulu a Jezú a bhingile o kitendelesu kiê?

¹² Kiebhi Jezú kia londekesa dingi o kutongoloka? Muéne uejidile kuila, se o muthu u ta kituxi kiofele, muéne u tena dingi ku ta kituxi kia mukuá kia dikota. Mukonda dia kiki, muéne ua dimuna o maxibulu mê. Mu kifika, o maxibulu ejidile kuila, o undumbu kima kia iibha. Maji Jezú ua a dimuna ku ima i tena ku a bhangesa kubhanga o undumbu. Muéne uambe: “Uoso ngó u tonginina muhatu ni ku mu kuatela luimbi, uate-nê kiá phànda ku muxima uê. Kienhiki, o diesu dié dia kúdia, se diene diala ku ku bhalesa, lokola-diu u di texi dikanga.” (Matesu 5:27-29) O maxibulu a Jezú a tungile bhu kaxi ka athu akua Loma, a uabhele kumona jifilme ja ufusa. Mu kiki, ni henda ioso, Jezú ua dimuna o maxibulu mê, kulenga kima kioso kioso kieji kua fidisa kubhanga o kima kia tokala.

13, 14. Kiebhi ki u tena kukuatekesa o tuana tuê ku di langa mu itonokenu ia lungu ni ufusa?

¹³ Se u tata, u tena kulondekesa o kutongoloka mu kulanga o tuana tuê, mu ima i luualesa Jihova. Lelu, o an’a ndenge a tena ué kumona jifilme ja ufusa. Mu kidi, eie ua tokala kutangela o tuana tuê kuila, kima kia iibha kutala jifilme ja ufusa. Maji saí dingi ima i u tena kubhanga phala ku a langa.  Dibhuidise: ‘O kuila o tuana tuami ejiia se mukonda diahi o kutala o ufusa kiluezu kia dikota? Ihi i tena ku a bhangesa kumesena kutala o jifoto ja ufusa? O kuila ngene mu bhanga ioso phala ka kale ni hele ia ku ngi tangela kima kioso kioso, mba ku ngi bhinga kikuatekesu, né muene se a kala ni vondadi ia kutala o ufusa?’ Né muéne se o tuana tuê tua tolo hanji, u tena ku a tangela: “Se u mona kima mu Internete, ki ku bhangesa kumesena kuijiia dingi ia lungu ni ufusa mba kumona o ima íii, nga ku dióndo ngi tangele. Kana kukala ni uôma mba sonhi ia ku ngi bhinga kikuatekesu. Nga mesena ku kukuatekesa.”

¹⁴ Kioso ki u sola itonokenu, xinganeka ué kiambote mu phangu i ua-nda bhana ku tuana tuê. Pranas, tua mu tange kiá ku dima, uambe: “Né muene se u zuela ima iavulu, o tuana tuê a-nda mona ni kukaiela o ima i u bhanga.” Se u sola kiambote o mimbu, madivulu ni jifilme phala kubhanga itonokenu, ua-nda kuatekesa o tuana tuê kukala ué ni ukexilu iú uambote.—Loma 2:21-24.

15, 16. (a) Kiebhi ki u tena kudielela kuila, Jihova ua-nda ku kuatekesa ku longa o tuana tuê? (b) Ihi i tua-nda di longa mu milongi ia-nda kaiela?

¹⁵ Ihi ia bhiti kioso Manoua kia bhingi kua Jihova phala ku mu kuatekesa kukala tata iambote? “Nzambi anga u ívua dízui dia Manoua.” (Afundixi 13:9) Jitata, Jihova uivua ué o misambu ienu. Muéne ua-nda mi kuatekesa ku longa o tuana tuenu. Muéne ua-nda mi kuatekesa kulondekesa o henda ni kulenduka, ni kukala ni kutongoloka.

¹⁶ Se Jihova u ku kuatekesa ku longa o tuana tuê mu undenge, muéne ua-nda ku kuatekesa ué ku a longa mu unzangala. Mu milongi ia-nda kaiela, tua-nda di longa kiebhi o phangu ia Jezú ia henda, kulenduka ni kutongoloka, i tena ku kukuatekesa ku longa o an’ê ku sidivila Jihova mu unzangala.