1. Yisinke ga rugene Manowa apa ga zuvhire asi nga kara guhya?

MANOWA namukadendi kapi va kere nehuguvaro asi ngava kara novanona. Nye ezuva limwe, muengeli gwaJehova kwa tanterere mukadaManowa asi nga kara nomunona gomumati. Aso kwa kere sitetu sosinene! Apa mukadaManowa ga tanterere yendi mbudi ezi, age kwa mu hafesere. Manowa kwa gazadarere ko unene eyi Jehova ga ndindilire ko kwendi mokukara guhya. Mokumona asi vantu womoIsraeli ngava rugana yininke yoyidona, ngapi Manowa namukadendi va vhulire kudeura munawo a hare Jehova ntani nokumukarera? Manowa kwa likwamberere kwaJehova a mu tumine hena muengeli pokuuyunga asi: “Na kanderere HOMPA, muntu gwaKarunga ogu wa tumine ngano to mu ninki hena a tengure kwetu, a ya tu tantere omu ngatu mu rugana ogo mumati ngava hampuruka.”—Vapanguli 13:1-8.

2. Yisinke wa hepa mokuronga vana woge, ntani ngapi no yi rugana? (Tara hena kakende “ Varongwa woge wovanene po.”)

² Nsene ove mukurona, kuvhura o kwate egano omu ga  lizuvhire Manowa. Nove wa kara nositumbukira sokuvatera vana woge va dive Jehova nokumuhara. (Yisewe 1:8) Posiruwo soukareli wepata, kuvhura o va vatere va twikire kulironga kuhamena Jehova ntani Bibeli. Nye, yinzi ya hamena mo kupitakana tupu kulironga Bibeli novana woge nkenye sivike. (Resa Deuteronomium 6:6-9.) Yisinke hena ngayi ku vatera o deure vana woge va hare Jehova nokumukarera? Mosirongwa esi, tatu ka zogera sihonena saJesus. Nampili ngomu ga dilire kukara guhya, kuvhura o lirongere ko monkedi omu ga rongere nokudeura varongwa vendi. Jesus kwa va here ntani kwa linunupikire. Ntani ga kere nounongo, ou wa mu ninkisire a kwate egano omu va lizuvhire nokudiva omu na va vatera. Ngesi tatu ka konakona omu natu honena Jesus.

3. Ngapi varongwa vaJesus va divire asi ga va here?

³ Yikando yoyinzi Jesus nga tantere varongwa vendi asi ga va hara. (Resa Johanesa 15:9.) Age hena nga kara kumwe nawo. (Marukusa 6:31, 32; Johanesa 2:2; 21:12, 13) Age kapi tupu ga kere murongi gwawo nye hena kaume kawo. Awo va yi divire asi ga va here. Yisinke no lirongera ko kwaJesus?

4. Ngapi no likida asi wa hara vana woge? (Tara efano pepenuno 3.)

⁴ Tantera vana woge asi wa va hara, ntani va likida asi awo mulyo koge. (Yisewe 4:3; Titusa 2:4) Samuel, gomoAustralia, kwa tanta asi: “Apa na kere munona, otate ngava resere nge nkenye ngurova buke Masimwititi gange goBibeli. Ngava limburura mapuro gange, nokulidingira nge ntani nokuncumita nge komeho zokurara. Ee, omu tupu ya tetukisire  nge apa na dimbwilire asi otate kapi va kulilire mepata omu vantu va yika kulidingira nokulincumita! Nye simpe, va litulire mo mokulikida nge eharo. Ngoyitundwamo, na ya kere nelikwatakano lyenene kumwe nawo ntani na lizuvhire ehafo nepopero.” Vatera vana woge va lizuvhe ngoso ntani va tantera nkenye apa asi “Na mu hara.” Va lidingira nokuvancumita. Litulira po siruwo sokuuyunga kumwe nawo nokulya kumwe nawo ntani nokudanauka kumwe nawo.

5, 6. (a) Yisinke ga rugene Jesus morwa ga here varongwa vendi? (b) Ngapi no pisura vana woge?

⁵ Jesus kwa tente asi: “Navenye ava na hara, kuvatugumukira, tani va rungurura.” * (Ehororo 3:19) Pasihonena, yikando yoyinzi varongwa vaJesus ngava litatana asi yilye gomunene po mokatji kawo. Jesus kapi ga ncenwinine udigu owo. Nye, ga lididimikilire pokuvapukurura. Ga kere nonkenda ntani ga litulilire po siruwo sosiwa nokugwana evango lyewa mokuvapukurura.—Marukusa 9:33-37.

⁶ Nsene asi wa hara vana woge, ngo va pisura. Poyiruwo yimwe, ayo ya wapa kuvafatwilira eyi yininke ya karera epuko ndi uhunga. Nye ngapi nsene simpe kapi vana kulimburukwa? (Yisewe 22:15) Lirongera ko kwaJesus. Jesus kwa twikilire kuvapisura pokuvavyukisa nokuvapukurura. Horowora siruwo nevango lyouhunga mokuvapisura, ntani yi rugana monkedi zongwa. Munazinyetukadi gomoAfrika Mbindakano gedina Elaine kudiworoka monkedi omu va mu piswire vakurona vendi. Awo ngava mu fatwilire eyi va here a rugane. Apa ngava mu tantere asi tava mu tengeke kweyi nga dili kulimburukwa, awo ngava yi sikisa mo. Nye age kwa tanta asi: “Awo kapi ngava pisura nge nsene vana handuka ndi va hana kufatwilira nge eyi nava piswira nge.” Eyi kwa mu ninkisire a lizuvhe asi vakurona vendi kwa mu hara.

7, 8. (a) Yisinke varongwa vaJesus va lirongerere ko kekanderero lyendi? (b) Ngapi makanderero goge naga ronga vana woge va huguvare mwaKarunga?

⁷ Apa Jesus va here kumukwata nokumudipaga, age ga likwamberere koGuhwe pokutanta asi: “Tate, yininke nayinye koge ove kuvhura. Gusa nge nkinda ezi, zi tunde nge. Nye kapisi moomu nina panga ame, hawe, moomu ono panga ove.” (Marukusa 14:36) Gazara tupu omu varongwa vaJesus va lizuvhire apa va zuvhire ndi va kwete egano ekanderero lyendi. Awo va yi dimbwilire asi nampili ngomu ga kere gokusikilira mo, simpe ga pulire evatero koGuhwe. Awo va lirongerere ko asi nawo va hepere kulinunupika nokuhuguvara mwaJehova.

⁸ Vana woge ngava lirongera ko yoyinzi komakanderero goge. Yimo, kapi tupu o kanderere mokuronga vana woge. Nye apa ava ku zuvhu kuna kukanderera, kuvhura va  lirongere ko kuhuguvara mwaJehova. Momakanderero goge, kapisi o hundire tupu Jehova a vatere vana woge, nye mu hundira a ku vatere nove. Ana, gomoBrazil, kwa tanta asi: “Apa twa kere moudigu, ngwendi apa va verere omama, vakurona vange kwa hundilire Jehova a va pe nonkondo dokulididimikira maukaro ogo nokuvapa ko unongo va ture po matokoro gomawa. Nampili momakwama-kwamo, awo kwa geve yinka yawo momawoko gaJehova. Ngoyitundwamo, na lirongerere ko kuhuguvara Jehova.” Apa vana woge ava kuzuvhu kuna kuhundira Jehova a ku pe ko uradi wokuzuvhisira vamusinda ndi kuhundira muhona a ku pulisire o ka kare kosigongi, awo kudimburura asi wa huguvara mwaJehova, ntani nawo ngava rugana yokulifana.

9. (a) Ngapi Jesus ga rongere varongwa vendi va linunupike nokukara ugavi? (b) Nsene wa linunupika ntani ugavi, yisinke ngava lirongera ko vana woge?

⁹ Jesus kwa tanterere varongwa vendi va linunupike nokukara ugavi, ntani nage ga va tulilire po sihonena. (Resa Rukasa 22:27.) Varongwa vendi va yi dimbwilire asi ga tulire po malizambero mokukarera Jehova ntani nokuvatera wopeke, makura nawo va lirongerere ko. Nove kuvhura o ronge vana woge kupitira mosihonena soge. Debbie, ogu ga kara novanona vavali kwa tanta asi: “Ame kapi ngani fire mfudu mugara gwange kweyi nga ruganesa siruwo simwe mokukara nomapongo novakuronambunga vakwawo. Na yi divire asi nkenye apa ngali mu hepa epata lyetu, nga litulire po siruwo sokukara kumwe nose.” (1 Timoteusa 3:4, 5) Ngapi omu sihonena  saDebbie namugara gwendi, Pranas, sa kundamene epata lyawo? Pranas kwa tanta asi vana vawo nkenye apa ngava vatere koyigongi. Awo kwa hefe nokutulisa po vakaume wovawa ntani kwa here kukara novanavazinyetu. Navenye vemepata ngesi kuna kukarera Jehova mosirugana sosiruwo nasinye. Nsene wa linunupika ntani ugavi, ngo ronga vana woge va kare neharo lyokuvatera wopeke.

10. Ngapi omu Jesus ga ruganesere unongo apa vantu womoGalireya va mu paparere?

¹⁰ Jesus kwa kere nounongo wokusikilira mo. Age kapi tupu nga demenene kweyi ngava rugana vantu nye hena kweyi ngava yi ruganene. Age ga divire eyi ya kere monomutjima dawo. Pasihonena, sikando simwe vantu womoGalireya kwa mu paparere. (Johanesa 6:22-24) Age ga yi divire asi konda zeyi va mu paparere, kapisi asi morwa kwa here va purakene kweyi ga rongere, nye kwa here nondya. (Johanesa 2:25) Jesus ga divire omu va lizuvhire. Nelididimiko, age ga va vyukisire nokuvafatwilira marunduruko aga va hepere kutura po.—Resa Johanesa 6:25-27.

11. (a) Ngapi no hetekera ko kukwata egano omu vana woge ava lizuvhu kuhamena kuzuvhisa? (b) Ngapi no vatera vana woge va hafere sirugana sokuzuvhisa?

¹¹ Nampili ngomu no dira kudiva yomomutjima, nove kuvhura o kare nounongo. Pasihonena, kuvhura o hetekere ko kukwata egano omu vana woge ava lizuvhu kuhamena kuzuvhisa. Kuvhura o lipure asi: ‘Vana vange kwa hara kuza mokuzuvhisa morwa konyima tatu ka pwizumuka nokulya nokunwa ko yuma ndi?’ Nsene wa dimburura asi vana woge kapi ava hafere unene sirugana sokuzuvhisa, hetekera ko kurugana ko yuma yipo va si hafere. Va pa sirugana esi nava vhura kusikisa mo yipo va lizuvhe asi nawo mulyo.

12. (a) Yisinke ga rondwere Jesus varongwa vendi? (b) Morwasinke varongwa vaJesus va heperere erondoro lyendi?

¹² Ngapi hena Jesus ga ruganesere unongo? Age ga yi divire asi epuko limwe kuvhura kutwaredesa kekwawo ndi konzo zonene, ntani ga rondwere varongwa vendi kuhamena eyi. Pasihonena, varongwa va divire asi epuko kuhondera. Nye Jesus ga va rondwere kuhamena eyi ayi twaredesa koruhonda. Age kwa tente asi: ‘Nkenyogu a tara mukadi, nye a mu dovaukire, nare ana mu honderere momutjima. Nsenesi eho lyoge lyorulyo tali hara kukupukisira konzo, li korora mo o li zugumine kwina.’ (Mateusa 5:27-29) Varongwa vaJesus kwa parukire monkarapamwe zoVaroma wovadona ava va here kutarera yirugana yoruhonda nokuuyunga nonkango dokunyata. Jesus kwa rondwere varongwa vendi va nyokere po nkenye eyi nayi va ninkisa va dire kurugana youhunga.

13, 14. Ngapi no vatera vana woge va nyokere po yilihafeso yokunyata?

¹³ Ngomukurona, kuvhura o ruganese unongo mokupopera vana woge koyininke eyi nayi dira kuhafesa Jehova. Eguwo, naina nampili vanonagona kuna kara mosiponga sokutarera mafano goruhonda ntani noyininke yimwe yoyidona. Yimo, wa hepa kutantera vana woge asi ayo epuko kutarera mafano goruhonda. Nye hena yinzi wa hepa kurugana mokuvapopera. Lipura asi: ‘Vana vange va diva asi kutarera mafano goruhonda siponga ndi? Yisinke nayi va ninkisa va hare  kutarera mafano ogo? Ame kuyivarerupikira yipo va tantere nge nkenye eyi, nokupura nge evatero nsene kuna kuvaheteka mokutara mafano goruhonda ndi?’ Nampili vanonagona kuvhura o va tantere asi: “Nsene nomu mona yimwe koIntaneta yokumuninkisa mu kare neharo lyokuligwanekera panyama, tantereni nge. Mwa ha tjira ndi mu life nomuga kupura nge evatero. Nina hara kumuvatera.”

¹⁴ Nsene kuna kuhorowora yilihafeso, gazadara ko nawa omu no kara sihonena sosiwa kovana woge. Pranas, ogu vana tumbura pomuhowo, kwa tanta asi: “Kuvhura o uyunge yininke yoyinzi, nye vana woge ngava tara eyi o rugana nokukuhonena.” Nsene ove nkenye apa kuhorowora nawa nomusika nonobuke ntani nomuvi edi da kuhuka, ngo vatera vana woge nawo va rugane yokulifana.—Varoma 2:21-24.

15, 16. (a) Morwasinke no karera nehuguvaro asi Jehova nga ku vatera o deure vana woge? (b) Yisinke ngatu ka zogera mosirongwa sokukwama ko?

¹⁵ Yisinke ya horokere apa Manowa ga pulire Jehova a mu vatere a kare mukurona gomuwa? “Karunga ta rugana eyi ga hundilire Manowa.” (Vapanguli 13:9) Vakurona, Jehova nga purakena komakanderero geni. Nga mu vatera mu deure vana veni. Ntani nga mu vatera mu likide eharo nelinunupiko ntani nokukara nounongo.

¹⁶ Moomu tupu Jehova nga mu vatera mu deure vana veni awo simpe vanonagona, yimo hena nga mu vatera mu va deure apa ngava kara vadinkantu. Mosirongwa sokukwama ko, ngatu ka zogera omu sihonena saJesus seharo nelinunupiko ntani nounongo nasi ku vatera o deure mudinkantu goge a karere Jehova.