1. Manowa welili ñahi chelukiliyi nindi keña yekali nvwali?

 MANOWA nañodindi elukili chikupu nawu akekalahu mwana wanyi. Ilaña ifuku dimu, kañelu kaYehova walejeli ñoda Manowa nindi wukavwala mwana weyala. Ñoda Manowa wazañaleli chikupu! Chamulejeliyi nfumwindi iyi nsañu, watiyili kuwaha hama. Hela chochu, watoñojokeli nankashi chatela kukulishayi mwana neyi navwaliki kwesekeja nachakeñeleñayi Yehova. Adikumudizisha ñahi mwanawu kumukeña Yehova nikumuzatila henohu antu amavulu muIsarela elileña yuma yatama? Manowa wamulembeleli Yehova kutuma cheñi kañelu nawa wahosheli nindi: “Ona muntu waNzambi watemesha, enzi cheñi kudetu atuleji mutwakamwila mwana wakavwalika.”—Ansompeshi 13:1-8.

2. Mwatela kudizishadi anyanenu, nawa munateli kwila ñahi mwenimu? (Talenu cheñi chikasha chinakwila nawu “Atudizi aBayibolu Imwatela Kushaku Muchima.”)

² Neyi mudi anvwali, muneluki chatiyiliyi Manowa. Ninenu mukweti mudimu wakukwasha anyanenu kwiluka nikumukeña Yehova. (Yishimu 1:8) Hakudifukula kwachisaka,  yikwashenu kutwalekahu kumwiluka Yehova niBayibolu. Ilaña kudi yuma yikwawu yimwatela kwila kubadika kudiza hohu Bayibolu nawanyanenu mulungu nimulungu. (Tañenu Kuhituluka 6:6-9.) Yumanyi yikwawu yinateli kuyikwasha kudizisha anyanenu kumukeña Yehova nikumuzatila? Muchinu chibaaba, tukuhanjeka yuma yeliliyi Yesu. Hela wadiña nvwali wanyi, munateli kudizila kuchadizishileñayi atumbanji twindi. Yesu wayikeñeli atumbanji twindi nawa wadiña wadizoza. Wadiña nakashinshi, dichi welukili chatiyileñawu nichakuyikwasha. Twayenu tutali dinu chitunateli kumwimbujola Yesu.

3. Atumbanji twaYesu elukili ñahi nawu Yesu wayikeña?

³ Yesu wayilejeleña atumbanji twindi nindi wayikeña. (Tañenu Yowanu 15:9.) Nawa wekalileña nampinji yeneni yakuhanjeka nawu. (Maku 6:31, 32; Yowanu 2:2; 21:12, 13) Bayi neyi Yesu wadiña ntañishi yawu hohuku, ilaña wadiña ibwambu dawu. Dichi elukili chikupu nawu wayikeñeli. Mukudizila kwodi kudi Yesu?

4. Munateli kumwekesha ñahi nenu mwayikeña anyanenu? (Talenu mwevulu wakutachikilahu.)

⁴ Yilejenu anyanenu nenu mwayikeña, nawa mwekeshenu chimwayikeña. (Yishimu 4:3; Titusa 2:4) A Samuel, akuAustralia, ahosheli nawu: “Hinadiña kansi, Atata antañilileña Mukanda Wami waMpanji Jamu Bayibolu mafuku ejima namelela. Akwileña malwihu ami, kunkumbata nikumpwepujola neyi hinukuya nakukama. Nahayamini chinelukili nami Atata akulila muchisaka mwabulileñawu kudikumbata nikudipwepujola! Ilaña esekeli nañovu kummwekeshela kukeña. Chumichi chaletesheli niyikeñi nankashi, nadiña wakasunuka nawa wakiñewa.”  Kwashenu anyanenu kutiya chochimu kuhitila mukuyileja mpinji yejima nenu “nakukeña.” Yikumbatenu nikuyipwepujola. Ikalenu nampinji yakuhanjeka, kudiila hamu nikuhema nawu.

5, 6. (a) Yesu welilidi chineli wakeñeli atumbanji twindi? (b) Munateli kufumba ñahi anyanenu?

⁵ Yesu wahosheli nindi: “Antu ami inakeña nayikonkololaña nakuyifumba.” * (Talenu tumazu twaheshina.) (Chimwekeshu 3:19) Chakutalilahu, atumbanji twindi aditadikishileña kakavulu nawu wabadika hakachi kawu hinyi. Yesu wadiwiluku wanyi kuniku kukala. Ilaña, kakavulu wayifumbileña mumesu awunda. Wadiña naluwi nawa wahembeleleña mpinji niluña dadiwahi kwakuyifumbila.—Maku 9:33-37.

⁶ Mwatela kufumba anyanenu muloña mwayikeña. Mpinji yikwawu munateli kuyileja hohu munaluwañeshuwu. Indi neyi anyana kwovwahila nehi? (Yishimu 22:15) Imbujolenu Yesu. Twalekenuhu kuyifumba kuhitila mukuyilombola, kudizisha nikuyolola. Tondenu mpinji niluña dadiwahi kwakuyifumbila nawa yifumbenu munjila yaluwi. Muhela Elaine wakuSouth Africa wanukaña chamufumbileñawu kudi anvwali jindi. Amulejeleña yuma yateleleñayi kwila. Neyi amuleja nawu akumubabesha neyi yaluwañesha, amubabesheleña. Ilaña wahosheli nindi: “Ambabesheleña wanyi neyi anahili hela chakadi kunleja chinakumbabeshelawu.” Chumichi chamukwashili muhela kwiluka nindi anvwali jindi adiña amukeña.

7, 8. (a) Atumbanji twaYesu adizilidi kukulomba kwindi? (b) Kulomba kwenu kunateli kudizisha ñahi anyanenu kushindamena hadi Nzambi?

⁷ Chikwashalili mpinji yantesha yakumukwata Yesu kulonda amujahi, walombeli kudi Tata yindi nindi: “Aba, Tata, yuma yejima yinatwesheki kudeyi; nfumishili lupasilu; ilaña dinu bayi chinukukeñamuku, chiña chiwukukeñeyi.” * (Talenu tumazu twaheshina.) (Maku 14:36) Toñojokenu chatiyiluwu atumbanji twaYesu chamutiyiluwu nakulomba hela chelukiluwu chalombeliyi. Elukili nawu hela wadiña wawanina, walombeli wukwashu kudi Tata yindi. Adizili nawu atela kwikala adizoza nikushindamena hadi Yehova.

⁸ Anyanenu anateli kudizilaku kukulomba kwenu. Hela chochu, bayi mulomba hohu kulonda mudizishi anyanenuku. Ilaña neyi atiya munakulomba, akudiza kushindamena hadi Yehova. Neyi munakulomba, bayi mulomba hohu nenu Yehova yakwashi anyanenuku, ilaña yayikwashi ninenu aweni. Ana wakuBrazil, wahosheli nindi: “Anvwali jami neyi  adi nakukala hela neyi ankaka akata, amulombeleña Yehova kulonda yayikwashi kuumika mukukala kwamweneñawu nikuyinka maana akufuukula chiwahi. Hela kukala kusweji ñahi, ashileña yuma yejima mumakasa aYehova. Chafuminumu, nadizili kushindamena hadi Yehova.” Neyi anyanenu atiya munakulomba kudi Yehova kuyikwasha kushimwina kudi antuñi nenu hela munakulomba nenu mukulumpi wamudimu yakayiteji kuya kukupompa, akwiluka nawu mwashindamenaña hadi Yehova nawa niwena akushindamenaña hadi Nzambi.

9. (a) Yesu wadizishili ñahi atumbanji twindi kwikala adizoza nikwilila antu yuma yayiwahi? (b) Anyanenu akudizilaku kwodi neyi mwadizoza nawa himwelaña yuma yakuditiyisha enu aweni kuwahaku?

⁹ Yesu walejeli atumbanji twindi kwikala adizoza nikubula kuditiyisha aweni kuwaha, nawa niyena dicheliliyi. (Tañenu Luka 22:27.) Apostolu indi amweni nawu wadihanini kumuzatila Nzambi nikukwasha antu, dichi niwena adizili nawu atela kudihana. Ninenu munateli kudizisha anyanenu nayuma yimwelaña. A Debbie, adi nawanyana ayedi ahosheli nawu: “Natiyileña kutama wanyi nampinji yamanishileñawu anfumwami kuhanjeka nawantu chineli hiyaeluda. Muloña nelukili nami ekalileña nampinji yakwakamena chisaka.” (1 Timotewu 3:4, 5) Chakutalilahu chawaDebbie nawanfumwawu aPranas chakwashili ñahi chisaka chawu? A Pranas ahosheli nawu anyanawu azatileñaku nyidimu hakupompa kwanyanya. Adiña namuzañalu, akwatili amabwambu amawahi nawa  akeñeleña hohu kwikala nawamanakwetu niahela. Chayinu mpinji ejima muchisaka anakumuzatila Yehova mumudimu wampinji yejima. Neyi mwadizoza nawa himwelaña yuma yakuditiyisha enu aweni kuwahaku, mukudizisha anyanenu kukwasha amakwawu.

10. Yesu wazatishili ñahi kashinshi chenjili antu amakwawu akuÑaliliya nakumukeña-keña?

¹⁰ Yesu wadiña washinshika chikupu. Hashili hohu maana hayuma yelileñawu antuku, ilaña nichaletesheleña eli mwenomu. Welukileña yuma yidi munyichima yawu. Chakutalilahu, mpinji yimu antu amakwawu akuÑaliliya enjili nakumukeña-keña. (Yowanu 6:22-24) Welukili chuma chacheni chenjililuwu, bayi neyi enjili nakutiya chatañishileñayuku, ilaña akeñeleña yakuda. (Yowanu 2:25) Yesu welukili chatoñojokeleñawu. Dichi wayifumbili mumesu awunda nawa wayilumbulwilili yuma yateleleluwu kuhimpa.—Tañenu Yowanu 6:25-27.

11. (a) Munateli kwiluka ñahi neyi anyanenu akeña mudimu wakushimwina? (b) Munateli kukwasha ñahi anyanenu kukeña mudimu wakushimwina?

¹¹ Hela chakwila mukutwesha wanyi kwiluka yuma yidi mumuchima wamuntu, munateli kwikala nakashinshi. Chakutalilahu, esekenu kutala neyi anyanenu akeña mudimu wakushimwina. Munateli kudihula nenu, ‘Anyanami akeñaña hohu kuya nakushimwina neyi niyileja nami nikuyinka chuma?’ Neyi mwiluka nenu anyanenu akeña wanyi mudimu wakushimwina, wanenu njila yinateli kuyikwasha kukeña mudimu wakushimwina. Yinkenu tunyidimu tukuyileñela atiyi nawu niwena anakuzataku mudimu wakushimwina.

12. (a) Yesu wayisoñamishili atumbanji twindi kuyumanyi? (b) Muloñadi Yesu chayisoñamishililiyi atumbanji twindi?

¹² Yesu wazatishili ñahi cheñi kashinshi? Welukili nindi chiluwa chimu chinateli kuleta chikwawu nawa chinateli kuletesha muntu kwila nshidi, dichi wasoñamishili atumbanji twindi. Chakutalilahu, atumbanji elukili nawu wuvumbi watama. Dichi Yesu wayisoñamishili kubabala nayuma yikuyiletesha kwila wuvumbi. Wahosheli nindi: “Muntu wukutala mumbanda namesu akumufwila, neli dehi nindi wuvumbi mumuchima windi. Neyi disu deyi dachidiilu dikukudimbwisha, ditubuli wudinati.” (Matewu 5:27-29) Atumbanji twaYesu ashakamineña muRoma mwadiña antu akeñeli kutala yisela yawuvumbi ninhoshelu yatama. Dichi Yesu wayisoñamishili atumbanji twindi kubula kutala yuma yejima yinateli kuyikañesha kwila yuma yaloña.

13, 14. Munateli kukwasha ñahi anyanenu kubula kutala yisela yatama?

¹³ Anvwali munateli kuzatisha kashinshi kulonda mukiñi anyanenu kubula kwila yuma yikumuneñesha Yehova. Chawushona, makonu nianyana anyanya anateli kutala nyevulu yanzekesi nikutaña nyikanda yahosha hawuvumbi. Mwatela kuleja anyanenu nenu chatama kutala yuma yatama. Ilaña kudi yuma yayivulu yimunateli kwila kulonda muyikiñi. Dihulenu nenu: ‘Anyanami eluka nawu nyevulu yanzekesi yatama? Yumanyi yikuyiletesha atali iyi  nyevulu? Nekala wakasunuka kuhosha nawanyanami kutalisha hansañu yidi yejima, chakwila anateli kulomba wukwashu hela anayeseki kutala nyevulu yanzekesi?’ Hela chakwila anyana achidi anyanya, munateli kuyileja nenu: “Neyi mumona yuma haIntaneti yikuyileñela kutiya wuvumbi nawa munakukeña kuyitala, mwatela kunleja. Bayi mutiya woma hela nsonyi kunlomba wukwashu. Inakukeña kuyikwasha.”

¹⁴ Neyi munakukeña yisela yakuhema, toñojokenuhu chiwahi kulonda mwikali chakutalilahu chachiwahi kudi anyanenu. A Pranas, itwatena hatachi ahosheli nawu: “Munateli kuleja anyanenu yuma yayivulu, ilaña akutalaña yuma yimunakwila nawa akuyimbujola.” Neyi mutondaña chiwahi tumina, nyikanda nimavidiyo, anyanenu niwena akutondaña chiwahi.—Aroma 2:21-24.

15, 16. (a) Muloñadi chimukubulila kujinoka nenu Yehova wukuyikwasha kudizisha anyanenu? (b) Tukahanjekadi muchibaaba chinalondeluhu?

¹⁵ Chumanyi chamwekeni chelili Manowa yamulombi Yehova kumukwasha kwikala nvwali wamuwahi? ‘Nzambi walala watiyililili kwizu daManowa.’ (Ansompeshi 13:9) Anvwali, Yehova wukwakula kulomba kwenu. Wukuyikwasha kudizisha anyanenu. Nawa wukuyikwasha kumwekesha kukeña, kwikala adizoza nikwikala nakashinshi.

¹⁶ Neyi chinateli kuyikwashayi Yehova kudizisha anyanenu henohu achidi anyanya, wukayikwasha cheñi neyi anekali dehi atumpululu. Muchibaaba chinalondeluhu, tukahanjeka hachamwekesheliyi Yesu kukeña, kudizoza nikashinshi chikunateli kuyikwasha kudizisha anyanenu atumpululu kumukalakela Yehova.