1. Ki Manoa ti fer kan li ti aprann ki li ti pou vinn papa?

MANOA ek so madam ti sir ki zame zot ti pou kapav gagn zanfan. Me enn zour, Zeova ti dir Manoa so madam ki li ti pou gagn enn garson. Sa ti enn zoli sirpriz! Kan Manoa ti aprann sa nouvel-la ar so madam, li ti bien kontan. Me li ti bien reflesi osi lor seki Zeova ti anvi ki li fer kan li pou vinn papa. Dan enn lepok kot boukou Izraelit ti pe fer seki move, kouma li ek so madam ti pou kapav form zot garson pou kontan Zeova ek servi Li? Manoa ti sipliy Zeova pou re-avoy so anz ek ti dir: “To serviter, ki to finn fek avoye la, silteple, fer li revinn get nou, pou li donn nou bann instriksion, pou nou kone ki bizin fer konsernan sa zanfan ki pou ne la.”—Ziz 13:1-8.

2. Ki kitsoz to bizin ansegn to zanfan, ek kouma to kapav fer sa? (Get osi lankadre “ To Bann Etidian Labib ki Pli Inportan.”)

² Si to enn paran, sirman to konpran seki Manoa ti resanti. Twa osi to ena responsabilite pou ed to zanfan konn  Zeova ek pou kontan Li. (Proverb 1:8) Pandan to ladorasion an fami, to kapav ed li pou aprann konn Zeova ek Labib. Biensir, to bizin fer plis ki etidie Labib avek to zanfan sak semenn. (Lir Deteronom 6:6-9. *) Ki kitsoz ankor to kapav fer pou form to zanfan pou kontan Zeova ek pou servi Li? Dan sa lartik-la nou pou examinn lexanp Zezi. Mem si li pa ti enn papa, to kapav aprann bann leson ar fason ki li ti ansegn so bann disip ek form zot. Zezi ti kontan zot ek ti ena limilite. Li ti ena disernman, setadir, li ti konpran seki zot ti resanti ek li ti kone kouma li kapav ed zot. Anou gete kouma nou kapav imit Zezi.

3. Kouma bann disip Zezi ti kone li kontan zot?

³ Souvan Zezi ti dir so bann disip ki li kontan zot. (Lir Zan 15:9.) Li ti osi pas boukou letan avek zot. (Mark 6:31, 32; Zan 2:2; 21:12, 13) Zezi pa ti zis zot ansegnan, me li ti osi zot kamarad. Alor, zot pa ti ena okenn dout ki li ti kontan zot. Ki to kapav aprann ar lexanp Zezi?

4. Kouma to kapav montre to zanfan ki to kontan li? (Get zimaz dan koumansman lartik.)

⁴ Dir to zanfan ki to kontan li, ek montre li ki kantite li inportan pou twa. (Proverb 4:3; Tit 2:4) Samuel, enn frer ki res l’Australie, dir: “Kan mo ti tipti, mo papa ti abitie lir Mo Liv Zistwar Labib ar mwa toule aswar. Li ti reponn tou mo bann kestion, li ti may mwa, ek ti anbras mwa pou dir mwa bonn nwi. Mo ti bien etone kan plitar  mo ti aprann ki mo papa ti elve dan enn fami kot zot pa ti ena labitid anbrase ni maye. Kanmem sa, li ti fer enn gran zefor pou montre ki li kontan mwa. Sa ti fer mwa ena enn bon relasion avek li. Mo ti kontan ek mo ti santi mwa an sekirite.” Ed to zanfan pou ena mem santiman kan souvan to dir li: “Mo kontan twa mo garson,” ouswa, “mo kontan twa mo tifi.” May zot ek anbras zot. Pran letan pou koz avek zot, pou manze avek zot, ek pou zwe avek zot.

5, 6. (a) Ki Zezi ti fer ki montre ki li ti kontan so bann disip? (b) Kouma to bizin disiplinn to zanfan?

⁵ Zezi ti dir: “Mo koriz e reprimann tou dimoun ki mo kontan.” * (Get not.) (Revelasion 3:19) Par exanp, plizir fwa so bann disip ti diskite pou kone kisannla ki pli gran parmi zot. Zezi pa ti inior sa problem-la. Okontrer, plizir fwa li ti konsey zot avek pasians. Me touletan li ti fer sa avek bonte, ek li ti atann pli bon moman ek pli bon plas pou koriz zot.—Mark 9:33-37.

⁶ Kan to disiplinn to zanfan, to montre ki to kontan li. Parfwa, to zis bizin dir li kifer enn kitsoz bon ouswa move. Me ki to pou fer si li pa anvi ekoute mem? (Proverb 22:15) Imit Zezi. Avek pasians, kontign disiplinn li kan to konsey li, form li, ek koriz li. Swazir pli bon moman ek pli bon plas pou disiplinn li, ek fer sa avek bonte. Elaine, enn ser ki res l’Afrique du Sud, rapel kouma so bann paran ti disiplinn li. Touletan zot ti explik li seki zot ti anvi li fer. Kan zot ti dir li ki li ti pou gagn pinision si li pa ti ekoute, vremem li ti pou gagn pinision. Me li dir: “Zame zot pa ti disiplinn mwa avek koler, ouswa san ki zot explik mwa kifer zot ti pe disiplinn mwa.” Akoz sa, touletan li ti kone ki so bann paran kontan li.

7, 8. (a) Ki bann disip Zezi ti aprann ar so bann lapriyer? (b) Kouma to bann lapriyer ansegn to zanfan pou kont lor Zeova?

⁷ Kan bannla ti pre pou aret Zezi ek touy li, li ti sipliy so Papa ek ti dir: “Abba! [“Papa!”, NW] Pou twa tou posib; tir sa koup la devan mwa, me fer ki tou arive dapre to volonte, pa dapre mo volonte.” * (Get not.) (Mark 14:36) Esey reflesi ki bann disip ti resanti kan zot ti tann lapriyer Zezi, ouswa kan plitar zot ti tann koz lor sa lapriyer-la. Zot ti trouve ki mem si li ti parfe, li ti demann so Papa led. Alor, zot ti aprann ki zot osi zot ti bizin ena limilite ek kont lor Zeova.

 ⁸ To zanfan kapav aprann boukou kitsoz ar to bann lapriyer. Biensir, fode pa to priye zis pou ansegn to zanfan. Me kan zot tann twa priye, zot pou aprann pou kont lor Zeova. Dan to lapriyer, pa zis demann Zeova pou ed to bann zanfan, me demann Li pou ed twa osi. Ana, ki res Brésil, dir: “Kan ti ena bann problem, kouma par exanp kan mo bann gran-paran ti malad, mo bann paran ti demann Zeova lafors pou ki zot kapav fer fas ar sa sitiasion-la ek osi sazes pou pran bann bon desizion. Mem kan zot ti ena bann gro presion, zot ti les sa dan lame Zeova. Gras-a zot lexanp, mo’si mo finn aprann pou kont lor Zeova.” Kan to zanfan tann twa pe priye pou gagn kouraz pou pres ar enn kikenn dan teritwar ouswa pou demann konze pou lasanble, li pou kone ki to kont lor Zeova pou gagn led, ek li pou aprann fer parey.

9. (a) Kouma Zezi ti ansegn so bann disip pou ena limilite ek pou pa montre zot egois? (b) Si to ena limilite ek to pa egois, ki to zanfan pou aprann?

⁹ Zezi ti ansegn so bann disip pou ena limilite ek pou pa montre zot egois, ek li ti osi donn zot lexanp. (Lir Lik 22:27.) So bann zapot ti trouve kouma Zezi ti fer bann sakrifis pou servi Zeova ek pou ed lezot, ek zot ti aprann pou fer parey. Twa osi to kapav ansegn to zanfan kan to donn zot lexanp. Debbie, ki ena de zanfan, dir: “Zame mo pa ti zalou kan mo misie ti pas letan avek lezot parski li enn ansien. Mo ti kone ki ninport kan nou ti  bizin li, li ti pou donn nou so letan.” (1 Timote 3:4, 5) Kouma lexanp Debbie ek so misie, Pranas, ti ed zot zanfan? Pranas dir ki so bann zanfan touletan ti dispoze pou ede dan bann lasanble. Zot ti bien kontan, zot ti fer bann bon kamarad, ek zot ti anvi pas letan avek bann frer ek ser. Asterla, lafami an-antie pe servi Zeova dan servis aplintan. Kan to montre ki to ena limilite ek ki to pa egois, to zanfan pou aprann kouma pou servi lezot.

10. Kouma Zezi ti servi so disernman kan sertin dimounn dan Galile ti vinn rod li?

¹⁰ Zezi ti ena enn disernman parfe. Li pa ti aret li zis lor seki bann dimounn ti fer, me osi kifer zot ti fer sa. Li ti kapav lir dan zot leker. Par exanp, enn fwa, sertin dimounn dan Galile ti vinn rod li. (Zan 6:22-24) Li ti realize ki si zot ti la, se pa parski zot ti anvi ekout li, me parski zot ti anvi gagn manze. (Zan 2:25) Zezi ti kone ki zot ti pe panse vremem. Apre sa, avek pasians li ti koriz zot ek ti explik zot ki bann sanzman zot ti bizin fer.—Lir Zan 6:25-27.

11. (a) Kouma to kapav esey konpran seki to zanfan panse lor predikasion? (b) Kouma to kapav ed to zanfan pou kontan predikasion?

¹¹ Mem si to pa kapav lir dan leker, twa osi to kapav ena disernman. Par exanp, to kapav esey konpran ki to zanfan panse lor predikasion. To kapav demann tomem: ‘Eski li kontan al predikasion zis pou fer bann poz pou repoze ek manze ouswa bwar?’ Si to remarke ki to zanfan pa tro kontan prese, esey fer predikasion vinn pli interesan pou li. Donn li bann ti kitsoz pou fer, koumsa li pou santi li itil.

12. (a) Ki lavertisman Zezi ti donn so bann disip? (b) Kifer bann disip Zezi ti bien bizin so lavertisman?

¹² Dan ki fason ankor Zezi ti servi so disernman? Li ti kone ki enn erer kapav amenn ver enn lot erer ek mem ver enn pese grav, ek li ti averti so bann disip kont sa. Par exanp, so bann disip ti kone ki limoralite sexiel pa bon. Me Zezi ti averti zot konsernan bann kitsoz ki ti kapav fer zot komet limoralite. Li ti dir: “Enn dimounn ki kontign get enn fam ziska ki sa fer li gagn enn dezir pou li, inn fini komet ladilter avek li dan so leker. Alor, si to lizie drwat fer twa tonbe, ras li ek zet li lwin ar twa.” (Matie 5:27-29, NW.) Bann disip Zezi ti viv parmi bann Romin, ki ti kontan get bann spektak ki ranpli ar bann senn imoral ek bann langaz obsenn. Alor, avek amour Zezi ti averti so bann disip pou rezet tou kitsoz ki ti pou anpes zot fer seki bon.

13, 14. Kouma to kapav ed to zanfan pou rezet bann divertisman imoral?

¹³ Antan ki paran, to kapav servi to disernman pou protez to zanfan pou li pa fer bann kitsoz ki pa fer Zeova plezir. Malerezman, azordi, mem bann ti zanfan riske get pornografi ek lezot kitsoz imoral. Biensir, to bizin dir to zanfan ki li pa bon li get sa bann kitsoz-la. Me to bizin fer plis ki sa pou protez li. Demann tomem: ‘Eski mo  zanfan kone kifer pornografi danzere? Ki kapav pous li pou anvi get bann zimaz koumsa? Eski mo azir dan enn fason kot li santi li lib pou vinn koz ar mwa lor ninport ki kitsoz? Eski li pou vinn ver mwa pou rod led kan li tante pou get pornografi?’ Mem kan enn zanfan bien tipti, to kapav dir li: “Si li arive ki to trouv enn zimaz lor Internet ki pous twa pou anvi konn plis lor sex ek ki to anvi get sa, silteple, vinn koz sa avek mwa. Pa bizin to per ouswa onte pou vinn demann mwa led. Mo pou bien kontan pou ed twa.”

¹⁴ Kan to pe swazir bann divertisman pou tomem, reflesi bien kouma to kapav donn enn bon lexanp to zanfan. Pranas, ki nou ti mansione avan, dir: “To kapav dir enn kantite kitsoz lor boukou zafer, me to bann zanfan pou get seki to fer ek zot pou imit twa.” Si touletan to fer bien atansion kan to swazir bann lamizik, liv, ek fim ki korek, to pou kapav ed to zanfan pou fer parey.—Romin 2:21-24.

15, 16. (a) Kouma to kapav sir ki Zeova pou ed twa form to zanfan? (b) Ki nou pou examine dan prosin lartik?

¹⁵ Ki ti ariv Manoa kan li ti demann Zeova pou ed li vinn enn bon paran? “Vre Bondie ti ekout Manoa.” (Ziz 13:9) Paran, Zeova pou ekout zot lapriyer osi. Li pou ed zot form zot zanfan. Ek Li pou ed zot pou manifeste lamour, pou ena limilite ek pou ena disernman.

¹⁶ Zeova pou ed twa pou form to zanfan kan zot ankor zenn. Me Li kapav ed twa osi pou form zot kan zot vinn bann adolesan. Dan prosin lartik, nou pou trouve kouma lexanp ki Zezi inn lese lor lamour, limilite, ek disernman kapav ed twa pou form to adolesan pou servi Zeova.