1. Manoak okwa ningi po shike, sho u uvu kutya omukulukadhi gwe ota ka mona okanona?

MANOAK nomukulukadhi gwe, oya li ya kanitha etegameno kutya kaye na siku naya ka mone uunona. Esiku limwe omuyengeli gwaJehova okwa lombwele omukulukadhi gwaManoak kutya ota ka mona okamati. Ndjika oya li onkundana ombwanawa lela! Manoak naye sho e yi uvu, okwa li ta nyata evi. Ihe okwa li wo ti ipula kutya Jehova okwa tegelela e ka putudhe ngiini. Okwa li ti ipula nkene ye nomukulukadhi gwe ye na oku ka longa ka kale ke hole Jehova noku mu longela, unene tuu sho aantu oyendji muIsraeli ya li taya yono. Manoak okwi indile Jehova a tumunune omuyengeli a ti: “Tumununa omuntu gwaKalunga kutse, opo e tu lombwele kutya okamati otatu ka ningi ngiini, nge ka valwa.” — Aatokolihapu 13:1-8.

2. Oshike wu na okulonga aamwoye, nowu na oku shi enda ngiini? (Lesha wo oshimpungu “ Olye omukonakonimbiimbeli gwoye a simanenena?”)

² Ngele nangoye omuvali, otashi vulika wu uvite ko Manoak.  Nangoye owu na oshinakugwanithwa shokukwatha aamwoye ya tseye Jehova noya kale ye mu hole. (Omayeletumbulo 1:8) Oto vulu oku ya kwatha yi ilonge Ombiimbeli nokombinga yaJehova pelongelokalunga lyuukwanegumbo. Kakele kokukonakona Ombiimbeli naamwoye, opu na wo iinima yilwe to vulu okuninga nayo oshiwike kehe. (Lesha Deuteronomium 6:6-9.) Oshike ishewe to vulu okuninga, opo wu ya longe ya kale ye hole Jehova noku mu longela? Moshileshwa shika otatu ka kundathana oshiholelwa shaJesus. Nonando ka li e na uunona, ota vulu oku tu longa sha momukalo moka a li ha longo aalongwa ye nohe ya dheula. Jesus okwa li e ya hole nokwa li i ishonopeka. Okwa li wo e na euvoko, ano a li u uvite ko shoka shi li momitima dhawo nokwa li e shi nkene e na oku ya kwatha. Natu ka taleni nkene tatu vulu okuholela Jesus.

3. Aalongwa yaJesus oye shi mono mo ngiini kutya oku ya hole?

³ Jesus okwa li ha lombwele aalongwa ye olundji kutya oku ya hole. (Lesha Johannes 15:9.) Okwa li wo ha kala nayo olundji. (Markus 6:31, 32; Johannes 2:2; 21:12, 13) Kaya li owala aalongwa ye, ihe oya li wo ookuume ke. Onkene kaya li ye na omalimbililo kutya oku ya hole. Shoka otashi tu longo shike?

4. Ongiini to vulu okuulukila aamwoye kutya owu ya hole? (Tala kethano lyopetameko.)

⁴ Lombwela aamwoye kutya owu ya hole. Yu ulukila wo kutya oya simana kungoye. (Omayeletumbulo 4:3; Titus 2:4) Samuel, gwokuAustralia, ota ti: “Sho te putuka, tate okwa li ha leshele ndje mEmbo Lyandje Lyomahokololo Gombiimbeli ongulohi kehe. Okwa li ha yamukula omapulo gandje. Okwa li ha papatele ndje e ta hupita ndje,  manga inaandi ka lala. Osha li sha kumitha ndje okutseya kutya nani tate ina putuka ha ningilwa iinima mbyoka. Ihe okwa kala ha kambadhala oku yi ningila ndje, opo u ulike kutya oku hole ndje. Shika osha ningitha ndje ndi kale nekwatathano ewanawa naye, nonda li ndi uvite nda gwanenwa nonda gamenwa.” Kwathela aamwoye ya kale wo yu uvite ngaaka. Lombwela kehe gumwe gwomuyo to ti: “Ondi ku hole.” Kala ho ya papatele noku ya hupita. Popya nayo aluhe, lya pamwe nayo nokudhana pamwe nayo.

5, 6. (a) Jesus okwa li ha ningi shike u ulukile aalongwa ye kutya oku ya hole? (b) Aamwoye owu na oku ya pukulula ngiini?

⁵ Jesus okwa ti: “Ayehe mboka ndi ya hole, ohandi ya geele nohandi ya dhenge.” * (Ehololo 3:19) Pashiholelwa, aalongwa ye oya li haya patana olundji kutya olye omunene mokati kawo. Ihe ine etha ya kale nuupyakadhi mboka. Pehala lyaashono, okwe ya pukulula neidhidhimiko lwiikando. Ka li he shi ningi nonyanya. Okwa li nokuli ha tegelele e shi ninge pethimbo nopehala tali opalele. — Markus 9:33-37.

⁶ Owu na okupukulula aamwoye, oshoka owu ya hole. Omathimbo gamwe otashi vulika sha gwana oku ya yelithila kutya omolwashike oshinima shontumba sha puka. Ihe ongiini ngele natango itaya vulika? (Omayeletumbulo 22:15) Landula oshiholelwa shaJesus. Tsikila oku ya pukulula, oku ya wilika noku ya dheula. Shi ninga aluhe nolukeno, pethimbo nopehala tali opalele. Omumwameme Elaine, gwokoSouth Africa, ota dhimbulukwa nkene aavali ye ya li haye mu pukulula. Oya li aluhe haye mu lombwele shoka ya tegelela a ninge. Ngele oye mu lombwele kutya otaye ke mu geela uuna a ningi epuko, oya li shili haye shi ningi. Ihe ota ti: “Kaya li haya geele ndje nonyanya, noya li haya yelithile ndje shoka taya geelele ndje.” Shika oshe mu kwathele a mone kutya aavali ye oye mu hole.

7, 8. (a) Sho Jesus a li ta galikana, aalongwa ye oyi ilongo mo shike? (b) Ongiini omagalikano goye taga vulu okukwathela aamwoye ya kale yi inekela Kalunga?

⁷ Sho Jesus a li pokukwatwa po nokudhipagwa, okwi indile He a ti: “Tate, Tate, kaku na shoka tashi ku nyenge. Kutha ndje oshitenga shika. Hamolwehalo lyandje, ihe ongaashi wa hala.” (Markus 14:36) Dhiladhila owala nkene aalongwa yaJesus ya li yu uvite sho yu uvu egalikano ndyoka nenge sho ye ke li lombwelwa. Oya mono kutya nonando okwa li a gwanenena, okwa li natango ha pula ekwatho kuHe. Shika oshe ya longo eishonopeko nokwiinekela Jehova.

 ⁸ Omagalikano goye otaga vulu okulonga aamwoye oshindji. Elalakano lyoye lyokugalikana kali shi owala oku ya longa. Ihe sho yu uvite to galikana, ohashi ya longo okwiinekela Jehova. Ino galikana owala Jehova a kwathe aamwoye, ihe galikana wo e ku kwathe. Ana, gwokoBrasilia, ota ti: “Uuna pwa holoka uupyakadhi, pashiholelwa ngaashi sho ookuku ya li taya ehama, aavali yandje oya li ya pula Jehova e ya pe oonkondo yi idhidhimike, noku ya pe owino yokuninga omatokolo omawanawa. Nonando oya kale muupyakadhi wu thike peni, oya li haye wu ethele momake gaJehova. Shika osha kwatha ndje ndi kale ndi inekela Jehova.” Uuna aanona ye ku uvite to pula Jehova e ku pe uulaadhi wu uvithile aashiinda shoye nenge wu pule omuhona gwoye e ku pe efudho wu ye koshigongi, ohaye shi dhimbulula kutya owi inekela Jehova. Naashika ohashi ya kwathele ya ninge sha faathana.

9. (a) Jesus okwa longo ngiini aalongwa ye ya kale ye na ombepo yokwaaihola mwene neishonopeko? (b) Ngele ku na ombepo yokwiihola mwene nowi ishonopeka, oto longo aamwoye shike?

⁹ Jesus okwa lombwele aalongwa ye ya kale aaifupipiki noyaa na ohole yokwiihola mwene, nokwe ya tulile po wo oshiholelwa. (Lesha Lukas 22:27.) Aayapostoli ye oye shi mono kutya okwa ninga omayambo, opo a longele Jehova noku kwathele yalwe, noyi ilongo okuninga sha faathana. Nangoye oto vulu okulonga aamwoye okupitila moshiholelwa shoye. Debbie, ngoka e na aanona yaali, okwa ti: “Kandi na mpoka nda sile efupa, sho omusamane gwandje ta kwathele yalwe megongalo. Uuna twa pumbwa ekwatho lye, ohe li tu pe.”  (1 Timoteus 3:4, 5) Oshiholelwa shaDebbie nomusamane gwe, Pranas, osha kwathele ngiini aanona yawo? Pranas ota ti kutya aanona yawo oya li haya kala aluhe ya hala okukwathela piigongi noya li haye shi nyanyukilwa. Oya li aluhe ya hala okukala nooitaali ooyakwawo noyi imonene ookuume kashili. Aanegumbo lye ayehe ngashingeyi otaya longele Jehova miilonga yethimbo lyu udha. Ngele ku na ombepo yokwiihola mwene nowi ishonopeka, oto longo aamwoye ya kale ye hole okukwatha aantu.

10. Jesus okwa longitha ngiini oondunge a kwathele Aagalilea mboka ya li taye mu kongo?

¹⁰ Jesus okwa li e shi nawa aantu. Ka li owala ha tala kwaashoka taya ningi, ihe okwa li wo ha tala kutya ohaye shi ningile shike, oshoka okwa li ha mono shoka shi li momitima. Pashiholelwa, aantu yamwe muGalilea oya li taye mu kongo. (Johannes 6:22-24) Okwa koneke kutya itaye mu kongo andola ya hala e ya longe, ihe oya li ya hala iikulya. (Johannes 2:25) Jesus okwa li e shi shi lela shoka shi li momitima dhawo. Onkene okwe ya pukulula, e te ya yelithile shoka ye na okuninga. —  Lesha Johannes 6:25-27.

11. (a) Ongiini to vulu okukambadhala wu mone nkene aamwoye yu uvitile iilonga yokuuvitha? (b) Ongiini to vulu okukwathela aamwoye ya kale ye hole okuuvitha?

¹¹ Nonando iho mono momutima, oto vulu okuuva ko aantu. Pashiholelwa, oto vulu okukambadhala okumona kutya aamwoye oyu uvitile ngiini okuuvitha. Oto vulu okwiipula to ti: ‘Mbela ohaya kala owala ya hala oku ka uvitha, oshoka ohaya kala ya panda okulya nokunwa sho tatu fudha po?’ Ngele owa koneke kutya kaye hole naanaa okuuvitha, kambadhala oku ya kwathela. Sho tamu uvitha, ya pa sha shokuninga, opo ya kale yu uvite ye na oshilonga.

12. (a) Jesus okwa londodha aalongwa ye kombinga yashike? (b) Omolwashike aalongwa ya li ya pumbwa okulondodhwa?

¹² Jesus okwa li e shi shi kutya okapuko okashona otaka vulu okufala mepuko enene. Oku ulike ngiini kutya oku uvite ko aalongwa ye? Okwe ya londodha kombinga yepuko lyoludhi ndoka. Pashiholelwa, oya li ye shi shi kutya okuhola iipala okwa puka. Onkene Jesus okwe ya londodha ya kotokele iinima mbyoka tayi fala moluhondelo. Okwa ti: “Okehe tuu ngoka ta tala omukiintu e mu haluka, oye okwe mu hondele momwenyo gwe. Eho lyoye lyokolulyo ngele tali ku hongolola, li tsipula mo, ngu u li ekelehi.” (Mateus 5:27-29) MuRoma moka aalongwa yaJesus ya li, aantu oya li ye hole okutala iinyandwa yaantu taya yi momilalo notaya popi oohapu dha nyata. Onkene, Jesus okwe ya londodha ya yande kehe oshinima tashi ya imbi okulonga shoka shu uka.

13, 14. Ongiini to vulu okukwathela aamwoye ya yande omainyanyudho ge na ko nasha niipala?

¹³ Aavali otaya vulu okulongitha oondunge, opo ya kwathele oyana kaaya ninge shoka inaashi hokiwa kuJehova. Mupyamunene, nuunona uushona nena otawu vulu okumona omathano giipala nenge iinima yilwe inaayi yogoka. Onkee ano, lombwela aamwoye kutya osha puka okutala  iinima yi nasha niipala. Ihe opu na oshinima shilwe ishewe to vulu okuninga, opo wu ya gamene. Ipula to ti: ‘Mbela aamwandje oye shi shi ngaa kutya okutala omathano giipala osha nika oshiponga? Oshike tashi vulu oku ya ningitha ya tale omathano ngoka? Mbela oya manguluka ngaa okupula ndje ekwatho uuna taya makelwa ye ga tale?’ Nonando aanona aashona, oto vulu oku ya lombwela to ti: “Uuna wa mono oshinima shontumba kointaneta shi na ko nasha niipala noto dhiladhila oku shi tala, ila tu shi kundathane. Ino kala wa tila nenge wu se ohoni yokupula ndi ku kwathe, oshoka onda halelela oku ku kwatha.”

¹⁴ Uuna to hogolola omainyanyudho, dhiladhila nawa kombinga yankene wu na okukala oshiholelwa oshiwanawa kaamwoye. Pranas, ngoka a tumbulwa metetekelo, okwa ti: “Oto vulu wu ya lombwele oshindji, ihe shoka to ningi, oye shi wete.” Ngele aluhe oho hogolola oongalo, omambo nosho wo ookino ndhoka dho opalela, kungawo, oto kwathele aamwoye ye ku holele. — Aaroma 2:21-24.

15, 16. (a) Owu shi shi ngiini kutya Jehova ote ke ku kwathela wu longe aamwoye? (b) Moshitopolwa tashi landula, otatu ka kundathaneni shike?

¹⁵ Oshike sha li sha ningwa po, sho Manoak a pula Jehova e mu kwathele a putudhe nawa omwana? Ombiimbeli otayi ti: “Kalunga okwa ningi, ngaashi Manoak a pula.” (Aatokolihapu 13:9) Ano aavali, Jehova ota ka pulakena wo komagalikano geni. Ote ke mu kwathela mu longe aanona yeni, nomu ulike ohole, eishonopeko neuvoko.

¹⁶ Ngaashi Jehova he mu kwathele mu longe aanona yeni manga aashona, osho ngaa te ke mu kwathela mu ya longe ngele ya koko. Moshitopolwa tashi landula, otatu ka kundathaneni nkene oshiholelwa shaJesus shohole, sheishonopeko nosheuvoko, tashi vulu oku ku kwathela wu ya longe ya kale haya longele Jehova.