1. Yini uManowarhi ayenzako nakayelela bona uzokuba ngubaba?

UMANOWARHI nonakwakhe besebaphethe ngokobana angeze babanabantwana. Langelinye ingilozi kaJehova yatjela umkaManowarhi bona bazokubeletha indodana. Kwaba ziindaba ezimnandi khulu lezo kibo! Uthe nakatjela uManowarhi iindabezo, wathaba khulu. Wacabangisisa ngalokho uJehova ebakakulindele kuye njengombana azokuba ngubaba nje. Alo-ke bebazoyibandula njani indodanabo bona ithande beyilotjhe uJehova? Phela ngesikhatheso bebabanengi abantu kwa-Israyeli ebebenza izinto ezikhohlakeleko. Yeke uManowarhi warabhela uJehova bona athumele ingilozakhe godu, wathi, “Awu [Jehova], ngiyarabhela. Bengithi umuntu kaZimu, [uJehova] ebegade amthume kithi loya, akasikhambele godu ukuze asifundise bonyana senzeni ngomsana ozokubelethwa lo.”—AbaKhokheli 13:1-8.

2. Yini okufuze uyifundise abantwabakho, yini engakusiza nawubafundisako? (Qala ibhoksi elithi “ Abantu Ofunda Nabo IBhayibheli Abaqakatheke Khulu.”)

² Nawungumbelethi, kungenzeka uyayizwisisa indlela uManowarhi azizwa ngayo. Nawe njengombelethi kufuze urhelebhe  abantwabakho bazi bebathande uJehova. (IzAga 1:8) Nanenza ukukhulekela komndeni, basize bathande ukufunda ngoJehova nangeBhayibheli. Akukafuzi ugqine ngokufundisa abantwabakho iBhayibheli kanye ngeveke kwaphela. (Funda uDuteronomi 6:6-9.) Khuyini okhunye okungakusiza ubandule abantwabakho bona bathande bebalotjhe uJehova? Esihlokwenesi sizokhe sicoce ngesibonelo sakaJesu. Ngitjho nanyana bekanganabantwana nje, kodwana ungafunda okunengi endleleni abandula ngayo abafundi bakhe. Bekabathanda begodu azithobile. UJesu bekanelemuko, bekayazi kuhle indlela ebebazizwa ngayo ngikho bekazi bona abasize njani. Okwanje akhesibone-ke ukuthi singamlingisa njani.

3. Abafundi bakaJesu bebazi njani bona uJesu uyabathanda?

³ UJesu bekanande abatjela abafundi bakhe bona uyabathanda. (Funda uJwanisi 15:9.) Bekaba nesikhathi esinengi nabo. (Markosi 6:31, 32; Jwanisi 2:2; 21:12, 13) Bekangasimfundisabo nje kwaphela kodwana bekamnganabo. Bebangasoli nakancani bona uJesu uyabathanda. Yini-ke wena ongayifunda kuJesu?

4. Ungabatjengisa njani abantwabakho bona uyabathanda? (Qala isithombe esisekuthomeni.)

⁴ Tjela abantwabakho bona uyabathanda, batjengise indlela abaqakatheke ngayo kuwe. (IzAga 4:3; Titosi 2:4) USamuel, ohlala e-Australia uthi, “Nangisesemncani uBabami gade angifundela Incwadami Yeendaba ZeBhayibhili qobe entambama. Nangimbuza imibuzo bekangiphendula, angisingathe bekangimange angitjele bona ngilale kamnandi. Ngarareka khulu ngokukhamba kwesikhathi nangilemuka bona uBaba akakakhuliswa ngendlela yena angikhulusa ngayo yokwangana nokumangana! Walinga ngamandla ukungitjengisa  bona ungithanda kangangani. Ngebangelo-ke satjhidelana khulu sinaye, nanginaye bengizizwa nganelisekile begodu ngiphephile.” Yenza abantwabakho bazizwe ngendlela efanako, batjele qobe uthi “ngiyanithanda.” Basingathe ubamange. Ziphe isikhathi sabo, idlani ndawonye, dlala nabo.

5, 6. (a) Yini uJesu ayenzako ngebanga lokuthi uthanda abafundi bakhe? (b) Kufuze ubakhalime njani abantwabakho?

⁵ UJesu wathi, “Labo engibathandako ngiyabasola bengibakhalimele.” * (Qala ikwekwezi engenzasi.) (IsAmbulo 3:19) Ngokwesibonelo, zinengi iinkhathi lapho abafundi bakhe baphikisana ngokuthi ngubani omkhulu kibo. UJesu akhenge enze ngasuthi akawuboni umraro loyo. Bekasolo abakhalimela kanengi. Wahlala anomusa njalo, walinda bekwaba sikhathi esihle nendaweni ehle bona akhulume nabo.—Markosi 9:33-37.

⁶ Ngebanga lokuthi uyabathanda abantwabakho, okufuze ukwazi kukuthi batlhoga ukukhalinywa. Ngezinye iinkhathi kwanele ukumane ubahlathululele bona kubayini into ethileko ilungile namkha ingakalungi. Kodwana kuthiwani nangabe nalapho solo abalaleli? (IzAga 22:15) Funda kuJesu. Iba nesineke uragele phambili ubakhalime, ubabandule, bewubalungise. Khetha isikhathi nendawo ehle ongakhuluma nabo kiyo, ube nesineke nawubakhalimako. Kunodade weSewula Afrika ibizo lakhe ngu-Elaine, ukhumbula indlela ababelethi bakhe ebebamkhalimela ngayo. Ngaso soke isikhathi bebamtjela abakulindele kuye. Bekuthi nabathe bazomjezisela ukungalaleli, bekungikho lokho okuzokwenzeka. Uthi: “Bebangekhe bangikhalima bakwatile namkha ngaphandle kokuthi bangihlathululele bona kubayini.” Ngebanga lalokho, bekazi bona ababelethi bakhe bayamthanda.

7, 8. (a) Khuyini abafundi bakaJesu abayifunda emthandazwenakhe? (b) Imithandazwakho ingabafundisa njani abantwabakho ukuthi bathembele kuZimu?

⁷ Ngaphambi kobana uJesu abotjhwe be abulawe wancenga uBabakhe, “Aba! Baba! Zoke izinto ziyenzeka kuwe. Susa ikapho le kimapha, nokho akungabi ngokwentandwami kodwana kube ngeyakho.” * (Qala ikwekwezi engenzasi.) (Markosi 14:36) Akhucabange indlela abafundi bakhe abazizwa ngayo nabamuzwa athandaza. Batjheja bona nanyana amumuntu onganasono naye ubawa kuBabakhe bona amrhelebhe. Yeke nabo bafunda ukuthi kufuze bathobeke basame kuJehova.

⁸ Abantwabakho bangafunda izinto ezinengi khulu emithandazwenakho. Khona vele, angekhe umane uthandaze nje ngebanga lokuthi ufuna ukufundisa abantwabakho. Kodwana nabakuzwa uthandaza,  kulapho-ke bangafunda khona ukuthembela kuJehova. Yeke nawuthandazako, ungagqini ngokubawela abantwabakho kuJehova kwaphela, zibawele nawe ukuthi akusize. U-Ana ohlala e-Brazil uthi: “Bekuthi nasinemiraro ekhaya, mhlamunye sigulelwa ngugogo nobamkhulu, ababelethi bami bebabawa uJehova bona abaphe amandla bakghone ukuqalana nobujamobo, bebakwazi nokwenza iinqunto ezihlakaniphileko. Ngitjho nanyana ubujamo bebungaba maphorodlha kangangani, bebaphosela imirarwabo kuJehova. Nami-ke ngafunda ukuthi kufuze ngithembele kuJehova.” Abantwabakho navane bakuzwa ubawa uJehova ukuthi akuphe isibindi sokutjhumayeza umakhelwanakho nofana ufuna ukubawa umqatjhakho amalangana wokuya emhlanganweni, kulapho bakghona ukubona khona ukuthi uthembele kuJehova, nabo bafunda ukwenza njalo.

9. (a) UJesu wabafundisa njani abafundi bakhe bona bathobeke begodu bangabi nomrhobholo? (b) Nangabe uthobekile begodu awunamrhobholo, yini abantwabakho abazoyifunda kilokho?

⁹ UJesu wafundisa abafundi bakhe bona bangabi nomrhobholo begodu bathobeke, wabe wababekela nesibonelo. (Funda uLukasi 22:27.) Abapostoli bakhe babona indlela ebekazidela ngayo bona alotjhe uJehova nokobana asize abanye, nabo-ke bafunda ukwenza ngendlelakhe. Nawe ungabafundisa abantwabakho ngokubabekela isibonelo. UDebbie, unabantwana ababili yena-ke uthi, “Solo kwaba ngimi azange khengibe nomona ubabakwami nakanabanye ebandleni, njengombana angumdala. Bengazi kuhle nje bona nasimtlhogako ekhaya bekazipha isikhathi sethu.”  (1 Thimothi 3:4, 5) Isibonelo sakaDebbie nesendodakwakhe uPranas siwuthinte njani umndenabo? Uthi abantwabakhe bebakuthabela ukusiza emihlanganweni. Bebahlala bathabile, banabangani abahle, ngasosoke isikhathi bebakuthabela ukuba nabafowabo nabodadwabo. Umndenami woke usebenzela uJehova isikhathi esinengi. Nawuthobekileko begodu unganamrhobholo, uzokufundisa abantwabakho bona bakuthabele ukusiza abanye.

10. UJesu walisebenzisa njani ilemuko analo ngesikhathi abantu beGalile bamfuna?

¹⁰ UJesu bekanelemuko. Bekangadzimeleli khulu ekutheni umuntu wenzeni kodwana bekaqala nonobangela wesenzo sakheso. Bekakghona ukufunda iinhliziyo zabantu. Ngokwesibonelo, kwathi lokha abantu beGalile nabamfunako. (Jwanisi 6:22-24) Wakghona ukubona ukuthi abakazeli ukuzokufundiswa nguye, bebazifunela okuyangendeni. (Jwanisi 2:25) UJesu bekayazi kuhle indlela ebebazizwa ngayo. Wabakhalimela ngesineke wabahlathulelela bona kufuze benzeni.—Funda uJwanisi 6:25-27.

11. (a) Ungalinga njani ukuzwisisa indlela abantwabakho abazizwa ngayo ngokutjhumayela? (b) Ungabasiza njani abantwabakho bathabele ukutjhumayela?

¹¹ Ngitjho nanyana ungekhe wafunda iinhliziyo zabantu, kodwana ungaba nelemuko. Ngokwesibonelo, ungalinga ukuzwisisa indlela abantwabakho abazizwa ngayo ngokutjhumayela. Ungakhe khewuzibuze, ‘Inga-kghani bathabela ukutjhumayela ngombana sizokuphumula khesidle sisele okuthileko?’ Nakungenzeka bona abantwabakho ase abakuthandisisi ukutjhumayela, linga ukukwenza kuthabise. Banikele imiberego ukwenzela bona babone ukuthi isizo labo liyatlhogeka.

12. (a) Yini uJesu ayala abafundi bakhe ngayo? (b) Kubayini kanti abafundi bakaJesu bebatlhoga ukuyeleliswa?

¹² Ngiyiphi enye indlela uJesu atjengisa ngayo ukuba nelemuko? Bekazi bona umtjhapho omncani ungarholela bona umuntu enze isono esikhulu, yeke wabayelelisa abafundi bakhe ngakho lokho. Ngokwesibonelo, abafundi bakhe bebazi ukuthi ukuziphatha kumbi ngokomseme akukalungi. UJesu wabayelelisa ukuthi yini engababangela bona baziphathe kumbi ngokomseme. Wabe wathi, “Nanyana ngubani oqala umfazi amkhanuke sele ahlobonge naye ngehliziywenakhe. Nakube ilihlo lakho langesigomeni likwenza wone, ligobhodlhe ulilahle.” (Matewu 5:27-29) Abafundi bakaJesu bebaphila ngesikhathi ebekuphila ngaso amaRoma akhohlakeleko, ebewathanda ukubukela amavidiyo anabantu abasemsemeni nabanehlamba. Ngebanga lethando uJesu analo, wayala abafundi bakhe bona babalekele nanyana yini engakwenza kube budisi kibo ukwenza izinto ezilungileko.

13, 14. Ungabasiza njani abantwabakho bona babalekele ukuzithabisa ngezinto ezikhohlakeleko?

¹³ Nawungumbelethi ungaberegisa ukulemuka kwakho bona uvikele abantwabakho ekwenzeni izinto ezingekhe zimthabise uJehova. Kuyadanisa ukwazi ukuthi namhlanjesi, abantwana abancani basengozini yokubukela iinthombe ezisilapheleko zomseme nezinye izinto ezikhohlakeleko. Kufuze ubatjele abantwabakho bona kumbi kangangani ukubukela izinto ezikhohlakeleko. Kodwana kunokhunye ongakwenza bona ubavikele. Akhuzibuze, ‘Abantwabami bayazi na bona kubayini  ukubukela iinthombe zomseme ezisilapheleko kuyingozi? Kubayini baba nelulukelo lokubukela iinthombezo? Ngibenza bakhululeke na ukukhuluma nami ngananyana yini, ukwenzela bona bangibawe ngibarhelebhe nabalingekela ukubukela iinthombe zomseme ezisilapheleko?’ Ngitjho nanyana abantwana bangaba bancani kangangani ungakhuluma nabo uthi, “Nakungenzeka ubona isithombe esisilapheleko ku-inthanethi, esikwenza ululukele ukwazi ngezomseme, ngitjho nanyana singaba njani, ngibawa uze uzokukhuluma nami ngaso. Nawufuna ukungibawa irhelebho, ungasabi namkha ube neenhloni, uze kimi. Ngifuna ukukusiza ngehliziyo yami yoke.”

¹⁴ Nawukhetha zokuzithabisa, cabangisisa ngokobana ungaba njani sibonelo esihle ebantwaneni bakho. UPranas, esikhulume ngaye ekuthomeni uthe, “Zinengi izinto ongazitjho, kodwana abantwabakho bazokuqala izinto ozenzako bona bakulingise.” Nawukhetha kuhle umbhino, iincwadi, namkha amamuvi uzokusiza nabantwabakho bona nabo benze okufanako.—Roma 2:21-24.

15, 16. (a) Yini engakuqinisekisa bona uJehova uzokusiza ubandule abantwabakho? (b) Sizokucoca ngani esihlokweni esilandelako?

¹⁵ Kwenzekani ngesikhathi uManowarhi abawa uJehova bona amsize abe mbelethi ohlakaniphileko? “UZimu wamizwa uManowarhi.” (AbaKhokheli 13:9) Babelethi nani uJehova uzoyiphendula imithandazwenu. Uzonisiza nibandule abantwabenu. Uzonisiza nikghone ukutjengisa abantwabenu ukuthi niyabathanda, nithobeke begodu nibe nelemuko.

¹⁶ UJehova angakghona ukukusiza bona ubandule abantwabakho basese bancani, yeke uzokusiza bona ubabandule ngitjho nanyana sele bababantu abatjha. Esihlokweni esilandelako, sizokucoca ngesibonelo sakaJesu sethando, sokuthobeka, nesokuba nelemuko, sibone ukuthi isibonelo sakhe singakusiza njani bona ubandule umuntu omutjha alotjhe uJehova.