1. Eaa ta Manoa i rave te akarongo anga e ka riro mai aia ei metua tane?

KUA papu ia Manoa raua ko tana vaine e kare raua e tu i te tamariki. Inara i tetai rā, kua akakite te angera a Iehova ki te vaine a Manoa e ka anau aia i tetai tama. Mei teaa atura tona mataora! Te akakite anga aia i te nuti kia Manoa, kua rekareka tikai aia. Inara kua akamanako meitaki katoa a Manoa i ta Iehova i tapapa mai iaia ei metua tane. Akapeea raua ko tana vaine te tereni anga i ta raua tamaiti kia inangaro ia Iehova e kia tavini iaia i te tuatau e manganui te tangata Iseraela e rave ra i te kino? Kua pati akatenga a Manoa kia Iehova kia tono akaou mai i tana angera i te na ko anga: “E tuku akaou mai koe kia maua nei i taua tangata no te Atua taau i tono maira, e akakite mai kia maua i ta maua e rave i taua tamaiti te ka anau ra.”​—Te Au Akava 13:1-8.

2. Eaa taau ka anoanoia kia apii i taau tamariki, e akapeea koe me rave i te reira? (Akara katoa i te pia “ Taau Aronga Apii Pipiria Puapinga Roa Atu.”)

² Me e metua koe, penei ka mārama koe i to Manoa manako. E apainga taau kia tauturu i taau tamariki kia kite e kia inangaro ia Iehova. (Maseli 1:8) I te tuatau o te akamorianga a te ngutuare, ka tauturu koe ia ratou kia apii tamou no runga ia Iehova e  te Pipiria. E tika, ka anoanoia koe kia rave maata atu i te apii tamou ua i te Pipiria ki taau tamariki i te au epetoma ravarai. (E tatau ia Deuteronomi 6:6-9.) Eaa atu tetai ka tauturu ia koe kia tereni ia ratou kia inangaro e kia tavini ia Iehova? I roto i teia atikara, ka uriuri tatou i te akaraanga o Iesu. Noatu kare aia i te metua tane, ka apii rai tatou mei tana i apii e i tereni i tana au pipi. Kua aroa a Iesu ia ratou e e tu akaaka tona. Tei iaia katoa te kite oonu, koia oki kua mārama aia i to ratou manako e kua kite akapeea i te tauturu ia ratou. Ka akara ana tatou i teianei akapeea me aru ia Iesu.

3. Akapeea te au pipi a Iesu i kite ei e kua akaperepere aia ia ratou?

³ I akakite ua ana a Iesu ki tana au pipi e kua akaperepere aia ia ratou. (E tatau ia Ioane 15:9.) Kua akapou katoa aia i tona taime kia ratou. (Mareko 6:31, 32; Ioane 2:2; 21:12, 13) E puapii a Iesu no ratou; e e oa katoa no ratou. No reira kare ratou i ekoko ana e kua akaperepere aia ia ratou. Eaa taau ka tamou mai mei ia Iesu?

4. Akapeea koe me akaari ki taau tamariki e te inangaro ra koe ia ratou? (Akara i te tutu mua o teia atikara.)

⁴ E akakite ki taau tamariki e te inangaro ra koe ia ratou e e akaari mei teaa to ratou puapinga kia koe. (Maseli 4:3; Tito 2:4) Karanga a Samuel tei noo i Autireria e: “Mei toku meangiti anga, e tatau ua ana a Papa i Taku Puka Tua Pipiria kiaku i te au aiai ravarai. Ka pau aia i taku au uianga, ka takave mai iaku, e ka ongi mai iaku i mua ake ka moe ei au. Poitirere tikai au i toku kite anga i muri mai e kare a Papa i utuutuia mai i roto i tetai ngutuare e mea matau i te takave e te ongi! Noatu ra, kua tauta tikai aia i te akaari i tona inangaro noku. Tei tupu mai, kua akatupu au i tetai pirianga vaitata kiaia e kua kite au i te  rekareka e te tinamou.” E tauturu i taau tamariki kia manako akapera na te akakite putuputu kia ratou e “akaperepere au ia koe.” E takave e e ongi ia ratou. E akapou i te taime no te tuatua kia ratou, te kaikai kapiti, e te kanga aere kia ratou.

5, 6. (a) No to Iesu akaperepere i tana au pipi, eaa tana i rave? (e) Ka akapeea koe me ako i taau tamariki?

⁵ Karanga a Iesu e: “Ko taku katoa e akaperepere ra, ko taku ïa e ako e e pāpā oki.” * (Akara i te tataanga rikiriki i raro.) (Apokalupo 3:19) Ei akaraanga, e maata te au atianga kua tauetono tana au pipi e koai tei maata ia ratou. Kare a Iesu i kopae ana i teia manamanata. Mari ra, kua ako putuputu aia ia ratou ma te akakoromaki. Inara e tu takinga meitaki tona i te au taime ravarai, e kua tiaki aia no te taime tau e te ngai meitaki kia akatikatika ia ratou.​—Mareko 9:33-37.

⁶ No te mea te akaperepere ra koe i taau tamariki, kua kite koe e ka anoanoia kia ako koe ia ratou. I tetai taime ka rava ua i te akamārama kia ratou te tumu e tika ai me kore e tarevake ei tetai apinga. Akapeea ra me kare rai ratou e akarongo? (Maseli 22:15) E aru i to Iesu tu. E ako ua rai ia ratou ma te akakoromaki na roto i te aratakianga, te terenianga e te akatikatikaanga ia ratou. E iki i te taime tau e te ngai meitaki i te ako ia ratou, e e rave i te reira na roto i te tu takinga meitaki. Kua maara i tetai tuaine i Aperika Tonga ko Elaine tona ingoa i te tu i ako ei tona nga metua iaia. Kua akamārama ua rai raua i ta raua i tapapa mai iaia. Me akakite raua e ka pāpā raua iaia no te akarongo kore, ka pera rai raua. Inara karanga aia e: “Kare rava raua i ako iaku na roto i te riri ma te kore e akamārama mai i te tumu i akoia ai au.” No teia, kua kite ua rai aia e te akaperepere ra tona nga metua iaia.

7, 8. (a) Eaa ta te au pipi a Iesu i tamou mai mei tana pure? (e) Akapeea taau pure te apii anga i taau tamariki kia irinaki ki runga i te Atua?

⁷ I mua ake ka tapekaia e ka tamateia a Iesu, kua pati akatenga aia ki tona Metua: “E Aba, e taku Metua, e tika te au mea katoa ia koe; e taoi ke atu i teianei kapu; kia tupu ra toou anoano; auraka toku.” * (Akara i te tataanga rikiriki i raro.) (Mareko 14:36) E tamanako atu i ta te au pipi a Iesu i manako i te rongo anga ratou me kore i te kite anga ratou i tana pure i muri mai. Kua kite mai ratou e noatu e tu apa kore tona, kua pati rai aia i te tauturu a tona Metua. No reira kua apii mai ratou e ka anoano katoaia ratou kia akaaka e kia irinaki ki runga ia Iehova.

⁸ E maata te au mea ka tamou mai taau tamariki mei taau pure. E tika, kare koe e pure anake ua ei apii i taau tamariki. Mari ra  me akarongo mai ratou i taau pure, ka apii ratou i te irinaki ki runga ia Iehova. I roto i taau pure, auraka e pati ua ia Iehova kia tauturu i taau tamariki, mari ra e pati iaia kia tauturu katoa ia koe. Karanga a Ana tei noo i Brazil e: “Te tupu anga te au manamanata, mei te maki anga toku nga tupuna, kua pati toku nga metua ia Iehova kia oronga mai i te maroiroi kia raua kia autu i te reira turanga e kia rauka te pakari kia rave i te au tukuanga meitaki. Noatu i raro ake i te au taomianga kino, kua tuku raua i to raua au manamanata ki roto i to Iehova rima. Tei tupu mai, kua apii au i te irinaki ki runga ia Iehova.” Me rongo taau tamariki ia koe e pati ra ia Iehova kia oronga mai i te maroiroi kia tutu aere ki tetai tangata tupu me kore kia pati i te pu angaanga no te tuatau kia tae ki te uruoaanga, ka kite mai ratou e te irinaki ra koe kia Iehova no te tauturu, e ka pera katoa ratou.

9. (a) Akapeea a Iesu te apii anga i tana au pipi kia akaaka e kia noinoi kore? (e) Me e tu akaaka toou e te noinoi kore, eaa ta te tamariki ka apii mai?

⁹ Kua akakite a Iesu ki tana au pipi kia vai akaaka, kia noinoi kore, e kua akanoo katoa aia i te akaraanga. (E tatau ia Luka 22:27.) Kua kite tana au apotetoro i tana au akaatinga kia tavini ia Iehova e kia tauturu i tetai ke, e kua pera katoa ratou. Ka rauka katoa ia koe i te apii i taau tamariki na roto i toou akaraanga. Karanga a Debbie e rua ana nga tamariki e: “Kare rava au i vareae ana i taku tane ei tangata pakari no tei akapou aia i te tuatau ki tetai ke. Kua kite au me anoano to matou ngutuare tangata i te taime ki taku tane, ka oronga mai aia i te reira.” (1 Timoteo 3:4, 5) Akapeea te akaraanga o Debbie raua ko tana tane ko Pranas, te akakeu anga  i to raua ngutuare tangata? Karanga te tane e e puareinga ua tana nga tamariki i te tauturu i ko i te au akaputuputuanga. E mataora to raua i te au oa memeitaki, e kua inangaro i te kapiti atu ki te au taeake e te au tuaine. I teianei, te tavini ra te ngutuare tangata ia Iehova i roto i te angaanga orometua tamou. Me akaaka ua koe e te noinoi kore, ka apii koe i taau tamariki kia puareinga ua i te tauturu i tetai ke.

10. Akapeea a Iesu te taangaanga anga i tona kite oonu te aere mai anga tetai aronga mei Galilea i te kimi iaia?

¹⁰ E kite oonu to Iesu ma te apa kore. Kare aia i akamou ua ki runga i ta te tangata i rave mari ra ki runga i te tumu i rave ei ratou i te reira. Kua rauka iaia i te tatau i to ratou ngakau. Ei akaraanga, i tetai atianga kua aere mai tetai aronga mei Galilea i te kimi iaia. (Ioane 6:22-24) Kua kite mai aia ko te tumu tikai i tae mai ratou ki reira kare no to ratou inangaro i te akarongo ki tana apii, mari ra no to ratou inangaro i te kai. (Ioane 2:25) Kua kite meitaki a Iesu i to ratou manako. I reira kua akatikatika aia ia ratou ma te akakoromaki e kua akamārama i te au tauianga ka anoanoia kia rave.​—E tatau ia Ioane 6:25-27.

11. (a) Akapeea koe e mārama ai i te manako o taau tamariki no te angaanga tutu aere? (e) Akapeea koe te tauturu anga i taau tamariki kia rekareka i te angaanga tutu aere?

¹¹ Noatu e kare e rauka ia koe i te tatau i te au ngakau, ka rauka rai ia koe te kite oonu. Ei akaraanga, ka tauta koe i te mārama eaa te manako o taau tamariki no te angaanga tutu aere. Penei e ui kia koe uaorai, ‘Ka rave ua ainei ratou i te angaanga tutu aere no te mea ka akamutu tatou no te akangaroi e te katikati me kore i te inu vai?’ Me kite mai koe e kare taau tamariki e reka roa ana i te angaanga tutu aere, e tauta kia rave i te reira ma te reka. E oronga i te au angaanga rikiriki na ratou kia manako puapingaia ratou.

12. (a) Eaa ta Iesu i akamatakite i tana au pipi? (e) No teaa ra te au pipi a Iesu i anoano tikai ei i tana akamatakiteanga?

¹² Eaa atu tetai ravenga ta Iesu taangaanga anga i te kite oonu? Kua kite aia e ka taki atu okotai tarevake ki tetai e ka tupu atu te ara kino, no reira kua akamatakite aia i tana au pipi no teia. Ei akaraanga, kua kite te au pipi e mea tarevake te ainga tau kore. Inara kua akamatakite a Iesu ia ratou i te ka taki atu ki te tu tau kore. Karanga aia e: “Ko tei akara ua atu i te vaine ei akatupu i te inangaro, kua akaturi takere ïa aia i taua vaine ra i tona uaorai ngakau. E te pekapeka na koe i toou mata katau, e koiti, e akaruke ke atu.” (Mataio 5:27-29) Kua noo ana te au pipi a Iesu i rotopu i te iti tangata tau kore o Roma tei reka i te akarakara i te au nuku tei akaariari i te ainga e te tuatua viivii. No reira kua akamatakite aroa ua a Iesu i tana au pipi kia kopae i tetai ua atu apinga te ka akangata i te rave i te mea tika.

13, 14. Akapeea koe me tauturu i taau tamariki kia kopae i te tamataoraanga tau kore?

¹³ Ei metua, ka rauka ia koe i te taangaanga i te kite oonu kia paruru i taau tamariki kia kore ratou e rave i tetai mea te ka akamareka kore ia Iehova. Ma te maromaroa, i teia tuatau te o ra te au tamariki rikiriki i roto i te kino o te akara anga i te au tutu ainga e tetai au apinga tau kore. E tika, ka tau koe kia akakite ki taau tamariki e e mea tarevake i te akara i te au mea tau kore. Inara e maata atu taau ka anoanoia kia paruru ia ratou. E ui kia  koe uaorai: ‘Kua kite ainei taku tamariki i te kino kia akara i te au tutu ainga viivii? Eaa te akakeu ra ia ratou kia inangaro i te akara i teia au tutu? Te riro ra ainei ei mea māmā ia ratou kia tuatua mai kiaku no runga i tetai ua atu apinga, kia pati mai iaku no te tauturu me timataia ratou kia akara i te au tutu ainga viivii?’ Noatu e te rikiriki ra te tamariki, penei ka karanga koe kia ratou e: “Me kite koe i tetai apinga i runga i te Initaneti e ka inangaro koe i te akara ua i te ainga, e aere mai e tuatua kiaku. Eiaa e mataku me kore e emiemi i te pati mai no te tauturu. Ka inangaro au i te tauturu ia koe.”

¹⁴ Me iki koe i te tamataoraanga noou uaorai, e akamanako meitaki e akapeea koe te riro anga ei akaraanga meitaki no taau tamariki. Karanga a Pranas tei taikuia i mua ake na e: “E maata te au apinga ka rauka ia koe i te tuatua no runga i tetai au mea, inara ka akara taau tamariki i taau e rave ra e ka aru ia koe.” Me matakite ua rai koe me iki i taau au imene, au puka, e te au teata ei tamataoraanga meitaki, ka tauturu koe i taau tamariki kia pera katoa.​—Roma 2:21-24.

15, 16. (a) Eaa koe i papu e ka tauturu a Iehova ia koe kia tereni i taau tamariki? (e) Eaa ta tatou ka uriuri i roto i te atikara ka aru mai?

¹⁵ Eaa tei tupu te patianga a Manoa kia Iehova no te tauturu kia riro mai ei metua meitaki? “Kua akarongo maira te Atua i te reo o Manoa ra.” (Te Au Akava 13:9) E te au metua, ka akarongo katoa a Iehova i ta kotou pure. Ka tauturu aia ia kotou kia tereni i ta kotou tamariki. E ka tauturu katoa aia ia kotou kia akaari i te aroa, kia vai akaaka, e kia rauka te kite oonu.

¹⁶ I te mea e ka tauturu a Iehova ia kotou kia tereni i ta kotou tamariki i te tuatau e rikiriki ra ratou, ka tauturu katoa aia kia tereni i te tamariki me riro mai ei mapu ou. I roto i te atikara ka aru mai, ka uriuri tatou e akapeea to Iesu akaraanga aroa, akaaka, e te kite oonu i te tauturu anga ia kotou kia tereni i ta kotou mapu ou kia tavini ia Iehova.