1. Nkinyi kibakitshiine Manowa pabapushiishe’shi akyebe kwikala nshee mwana?

MANOWA na mukash’aye babaadi bashinkamishe’shi ta be bya kutanda mwana nya. Dingi efuku, mwikeeyilu a Yehowa balungwile mukashi a Manowa’shi baadi na kya kutanda mwana. Ubaadi mwanda wa kukaanya! Mukashi pabalungwile Manowa wawa mwanda, baadi musankye bikata. Kadi baadi mwele binangu ngofu pabitale bibaadi abikumiina Yehowa bwadya kukita bu nshee mwana. Aye na mukash’aye babaadya kulongyesha mwan’abo naminyi bwa kufula na kufubila Yehowa aku namu bantu bebungi mu Isaleele babaadi na bikitshiino bibubi? Manowa batekyele Yehowa bwadya kutuma dingi mwikeeyilu aye pa kwakula’shi: “Muntw’Efile obootumu, afikye dimo kwatudi, bwa’shi eetulambukishe kilombeene twakitshiina uno mwana paatandjika.”​—Bansushi 13:1-8.

2. We na lukalo na kinyi bwa kulongyesha bana boobe na we kwibikita naminyi? (Tala kashibo akamba’shi: “ Balongi boobe ba Bible ba kumpala.”)

² Su we nambutwile, oshinguula kalolo bibapushiishe Manowa. We na bushito bwa kukwasha bana boobe bwabwadya kuuka na kufula Yehowa. (Myeele 1:8) Mu nsaa ya lulangwilo lwa mu kifuko, we kwibakwasha bwabadya kutunguka na kulonga pabitale Yehowa na Bible. Nyi bwakinyi abitungu kwitatshisha bikata bwa kulonga Bible lubingo  looso na bana boobe. (Badika Miiya Ikituulwe 6:6-9.) Nkinyi dingi kilombeene nkukwasha bwa kulongyesha mwan’obe bwadya kufula na kufubila Yehowa? Mu uno mwisambo, atukyebe kwisambila kileshesho kya Yesu. Sunga byekala’shi tabaadi nshe bana, we kulonga mushindo ubaadi mulongyeshe na kukitshiina balongi baaye myanda. Yesu baadi mwibafule, akupu baadi mwiyishe. Baadi dingi na kapatupatu kabaadi akamukwasha bwa kupusha kyabadi nakyo lukalo na kuuka bya kwibakwasha. Tubande kutala byatudi balombeene kwambula Yesu.

3. Balongi ba Yesu babaadi bashinkamishe’shi mmwibafule naminyi?

³ Misusa ibungi Yesu baadi alungula balongi baaye’shi mmwibafule. (Badika Yowano 15:9.) Na dingi baadi akisha nabo nsaa ibungi. (Maako 6:31, 32; Yowano 2:2; 21:12, 13) Yesu tabaadi nka penda mulongyeshi aabo nya; baadi kuku’abo. Nyi bwakinyi tababaadi na mpaka mu mashimba aabo’shi mmwibafule nya. Ndilongyesha kinyi dyoodi mulombeene kupeta mu kileshesho kya Yesu?

4. We kuleesha bana boobe’shi we mwibafule naminyi? (Tala kifwatulo ki kumbangilo.)

⁴ Lungula bana boobe’shi we mwibafule, na kwibaleesha’shi okwete kwibaata na muulo. (Myeele 4:3; Tite 2:4) Samuel, mushaale mu Australie, akula’shi: “Panaadi nki mwana mukinga, Papa baadi ambadikila efuku dyoso ku kyoolwa Mukanda awitulondela myanda i mu Bible. Baadi aaluula nkonko yande yooso, kunkwata biipa, kunfifya ku milomo, na ku ndaadika. Naadi mukaanye ngofu panaukile’shi Papa baadi mukule mu kifuko mwabashii na kyubishi kya kwikwateena biipa na kwififyena ku milomo nya! Na dingi baadi mwitatshishe ngofu bwa kundeesha kifulo kyaaye. Pa mwanda wa byabya, tubaadi batamishe kipwano kyeetu naaye, dingi naadi na muloo na kwipusha mu bulungantu.” Kwasha bana boobe bwa’shi bapushe byabya p’obe kwibalungulanga misango ibungi’shi “ne mwinufule.” Ebatwale na kwibafifya ku milomo. Kisha nsaa ibungi mu kwisamba naabo, kudya na kwasha nabo pamune.

5, 6. (a) Nkinyi kibakitshiine Yesu pa mwanda wa kifulo kya balongi baaye? (b) We kunyooka mwan’obe naminyi?

⁵ Yesu bambile’shi: “Ami nasâshilâ na kunyôka baba boso bandji mufule.” * (Bifumbulwe 3:19) Bu kileshesho, balongi baaye babaadi abekutwena misango ibungi pa mwanda wa kuuka mukile bukata munkatshi mwabo. Yesu tabaadi mulube uno mwanda nya. Anka, baadi mwibalangye na lwishinko looso misusa na misusa. Misango yooso baadi nka na kalolo, na kukimba nsaa na mbalo ilombane bwa kwibaludika.​—Maako 9:33-37.

⁶ Bu byoodi mufule bana boobe, oshinguula’shi abitungu webanyookye. Ingi nsaa abitungu webalungule bwakinyi mwanda kampanda wibuwa sunga wibubi. We kukita naminyi su tabakookyela dingi? (Myeele 22:15) Londa kileshesho kya Yesu. Tungunuka na lwishinko looso na kwibanyooka pa kwibakunkusha, kwibalongyesha, na kwibaludika. Kimba nsaa na mbalo ibuwa ya kwibanyooka, na webikite na kalolo kooso. Ungi mukwetu mukashi a mu Afrique du Sud abetanyina bu Elaine atentekyesha bibaadi abimunyooko baledi baaye. Babaadi abamulungula misango yooso byabakumiina’shi ekale. Su bamulungula’shi abakyebe kumunyooka mwanda wa kukutwa kukookyela, nyi byabakitshi kushi kushintuula. Elaine akula’shi: “Tababaadi abampa dinyooka na nsungu sunga kushi kundungula kaaso.” Pa mwanda wa byabya, baadi auku misango yooso’shi baledi baaye babaadi bamufule.

7, 8. (a) Balongi ba Yesu babalongyele kinyi ku nteko yaaye? (b) Nteko yoobe i kulongyesha bana boobe bwa kukulupila mwi Yehowa naminyi?

⁷ Pabaadi Yesu peepi na kukwatshiibwa bwa kwipayibwa, baadi mwidile kwi Nshaye’shi: “Yaaya [abba] we na matalwa a kukita byooso;  nkumbile naamu kino kipulu! Anka, kushii buu byankyebe anka byookyebe obe.” * (Maako 14:36) Banda kupwandikisha bibapushiishe balondji ba Yesu p’abo kutemeesha sunga kulongyela ku lwalwa luteko. Babamwene’shi, sunga bibaadi Yesu mupwidikye, baadi’nka atekye bukwashi kwi Nshaye. Abapetele dilongyesha dyabadya kwikala na kwiyisha na kukulupila kwi Yehowa.

⁸ Bana boobe be kulonga myanda ibungi ku nteko yoobe. Nta kwamba’shi okwete kuteka penda bwa kulongyesha bana boobe nya. Kadi pabakupusha otekye, be kulonga bya kukulupila mwi Yehowa. Mu nteko yoobe, totekanga penda Yehowa bwadya kukwasha bana boobe nya, teka dingi Yehowa bwadya nkukwasha. Ana ungi mukwetu mushale mu Brézil akula’shi: “Pabaatudi na nkalakasho, bu pabaadi apakumbu nshami sunga nyinaami kulu, baledi bande babaadi abakumiina kuteka Yehowa bwadya kwibapa bukome bwa kunyingiila lwalwa lukalakasho na binangu bya kwata bitshibilo bibuwa. Sunga pabaabadi abakalakashwa bikata, abaadi abatuulu myanda yaabo yooso mu maasa a Yehowa. Pa mwanda wa byabya, naalongyele bya kukulupila mwi Yehowa.” Apapusha bana boobe p’otekye Yehowa bwa’shi akunyingishe bwa kulungula bantu mukandu wibuwa sunga kotekye bwa’shi mukata oobe a mudimo akulekyele nsaa ya kutwela mu kikongeno, abamono’shi okwete kukulupila bukwashi bwa Yehowa, akupu, abalongo bya kukita namu byabya.

9. (a) Yesu baadi mulongyeshe balongi baaye kwiyisha na kukimba buwa bwa bangi naminyi? (b) Su we mwiyishe na okimbi buwa bwa bangi, bana boobe be kupeta dilongyesha kinyi?

⁹ Yesu balungwile balongi baaye bwabadya kwikala beeyishe na kukimba buwa bwa bangi, akupu, aye nabeene baadi mwibalekyele kileshesho. (Badika Luuka 22:27.) Balongi baaye babamwene’shi baadi mwipaane mu kufubila Yehowa na kukwasha bangi, abo nkupeta dilongyesha dya kukita namu nka byabya. We kulongyesha namu bana boobe ku kileshesho kyobe. Debbie, e na bana babidi akula’shi: “Bu bi mulume ande mmukulu, tampushaa mukao su ngupeela bwa  nsaa yakishaa na bangi bantu. Naadi nauku’shi misusa yooso yatudi na lukalo kampanda mu kifuko, mulume ande afiki kwitupwila lwanka.” (1 Timotee 3:4, 5) Kileshesho kya Debbie na mulum’aye Pranas, nkikwashe kifuko kyabo naminyi? Akula’shi bana baaye babaadi abakumiina kukwasha misusa yooso ku bikongeno. Babaadi na muloo, abo nkupeta ba kuuku bebuwa, na babaadi abakumiina kwikala pamune na bakwabo balume na bakashi. Kifuko kyabo kyooso bakwete kufubila Yehowa mu mudimo wa nsaa yooso. Su we na kwiyisha na kwituula pa mbalo ya bangi, olongyesha bana boobe bwa’shi bekale abakumiina kukwasha bangi.

10. Pabafikile bantu ba mu Ngalileeya mu kumukimba, Yesu baadi muleeshe kapatupatu naminyi ?

¹⁰ Yesu baadi na binangu bipwidikye. Pamutwe pa kwimeena penda pa bikitshiino bya bantu aye baadi atala bwakinyi babakitshi byabya. Baadi na mushindo wa kumona bi mu mashimba. Kileshesho, ungi musango bantu ba mu Ngalileeya babafikile mu kumukimba. (Yowano 6:22-24) Batundwile’shi kepatshila kaabo kakata, ta nka kupusha malongyesha aaye nya, kadi mpa mwanda babaadi na lukalo lwa bya kudya. (Yowano 2:25) Yesu baadi auku bibaabadi abapusha mu mashimba. Baadi mwibalangye na lwishinko na kwibaleesha kushintuluka kubaadi akutungu’shi bakite.​—Badika Yowano 6:25-27.

11. (a) We kushinguula abipushaa bana boobe pabitale mudimo wa bulungudi naminyi? (b) We kukwasha bana boobe bwa’shi basankile mudimo wa bulungudi naminyi?

¹¹ Sunga twe bya kubadika bi mu mashimba, n’obe namu we kwikala na kapatupatu. Bu kileshesho, we kumona abipusha bana boobe pabitale bulungudi. We kwiyipusha’shi: ‘Abakumiinaa kwenda mu bulungudi nka pa mwanda abauku’shi atukemana mbalo kampanda bwa kwikisha na kutoma sunga kudya kintu su? Su botundula’shi bana boobe tabakambaa kukumiina mudimo wa bulungudi, kimba bya’shi banyiishe kwiusankila. Ebape tu midimo tupeela bwabadya kumona’shi be na kineemo mu bulungudi.

12. (a) Yesu baadi mudimushe balongi baaye ku kinyi? (b) Bwakinyi kudimusha kwa Yesu kubaadi na muulo kwi balongi baaye?

¹² Mmushindo kinyi ubaadi Yesu mufube na kapatupatu? Baadi auku’shi ka kilema kamune nkalombeene kufwisha kingi mpa na kufwisha ku mulwisho ukata, nyi bwakinyi baadi mudimushe balongi baaye pabitale uno mwanda. Kileshesho, balongi baaye babaadi abauku’shi kutambuka lusandji kwi bubi. Kadi Yesu bebadimwishe pabitale mwanda wi bya kutwala muntu ku lusandji. Bambile’shi: “Ooso atala mukashi na lwabi mmupwe kutambuka naaye mwishimba dyaaye. Su eyiso dyoobe diibalume adikukaka ku bubi, editukule wedisumbule kula noobe.” (Mateo 5:27-29) Balongi ba Yesu babaadi bashaale munkatshi mwa beena Looma babaadi bepaane mu kubandjila myanda i butete na kwakula myanda ya buufu. Byabya Yesu baadi mudimushe balongi baaye na kifulo bwa kusuuka kintu kyooso ki bya kwibakutshishwa kukita myanda ibuwa.

13, 14. We kukwasha bana boobe bwa’shi basuukye kukisha kapapi na myanda ibutete naminyi?

¹³ Obe nambutwile, we mulombeene kufuba na kapatupatu bwa kukalwila bana boobe mu  kukita myanda ishayisankisha Yehowa. Mbya malwa, mwanda lelo uno mpa na bana bakinga be mu masaku a kubandjila pornografi na bingi bintu bya buufu. Byabya, we mulombeene kulungula bana boobe’shi ta bi buwa kubandjila bintu bibubi. Kadi kwi myanda ibungi yoodi mulombeene kukita bwa kwibakalwila. Eyipushe’shi: ‘Bana bande abauku kalolo bwakinyi kutala pornografi kwi masaku su? Nkinyi kilombeene kwibatakula mu kutala byabya bifwatulo? Ne mwibabofwishe bwabadya kundungula bintu byooso, byabadi balombeene kunteka bukwashi su bapona mu muteo wa kutala pornografi su?’ Sunga bana bakii bakinga ngofu, we bya kwibalungula’shi: “Su bomono kintu ku Internet akileesha bantu be muswa kyokumiina kubandjila, banda kufika ondungule. Topushanga moo sunga buufu bukilekile bwa kungipusha. Nakumiina nkukwasha.”

¹⁴ Nsaa yokimbi bya kukisha kapapi obe nabeene, nangusheena ngofu byodya kwikala kileshesho kibuwa bwa bana boobe. Pranas, atudi besambile kunundu, akula’shi: “We mulombeene kwakula myanda ibungi, kadi bana boobe abatala myanda yokitshi na kukimba bya nkwambula.” Su misusa yooso osangulaa kalolo misambo, mikanda, na ma filme ebuwa bwa kukisha kapapi mu mushindo wibuwa, we bya kukwasha bana boobe bwa’shi n’abo namu bakite byabya.​—Beena-Looma 2:21-24.

15, 16. (a) Bwakinyi nwi kushinkamisha’shi Yehowa enukwasha bwa kulongyesha bana beenu? (b) Mu mwisambo aulondo autukyebe kwisambila kinyi?

¹⁵ Nkinyi kibaadi kikitshikye pabaadi Manowa mutekye Yehowa bwa kumukwasha bwa’shi ekale nshe bana ebuwa? “Efile Mukulu baateemeeshe eyi dya Manowa.” (Bansushi 13:9) Ba nambutwile, Yehowa ateemesha nteko yeenu namu. Akyebe kwinukwasha bwa’shi nulongyeshe bana beenu. Akupu enukwasha bwanudya kwikala na kifulo, na kwiyisha, na kapatupatu.

¹⁶ Bu bi Yehowa akumiina kwinukwasha bwa kulongyesha bana beenu pabakii bakinga, e kwinukwasha dingi bwa kwibalambukisha pabafiki mu bipwa ekumi. Mu mwisambo aulondo, atukyebe kwisambila mushindo wi kileshesho kya Yesu kya kifulo, kwiyisha na kapatupatu mbilombeene kwinukwasha bwa kulongyesha bana beenu batabadi mu bipwa ekumi bwa kufubila Yehowa.