1, 2. (a) San e gi mma anga dda booko-ede? (b) San den pikin di pasa 12 yali man du?

TE WAN pikin dopu, ná pikin piisii en mma anga en dda e piisii. Ala den fo pikin fu Berenice dopu fosi den doo 14 yali. A sisa ya taki: „Ná pikin piisii u be e piisii. Wi e gi Yehofa daa taki den pikin fu u be wani dini en. Ma u be sabi taki a omen tesi be o miti den.” Kande iseefi e booko yu ede anga den pikin fi i di e kon bigi. * (Luku a maiki a ondoo.)

² Wan man di e ondoosuku fa pikin e tyai denseefi, taki den moo muliki yali gi a pikin anga en mma anga en dda, a te a pikin pasa 12 yali. A man ya taki mma anga dda á mu denki taki a fusutan den pikin ná abi te den abi den yali de. Den á mu denki tu taki den e du enke pikinengee di á sabi sani. Boiti dati, a taki te den pikin abi den yali de, den e wani du sani di den á be du ete, den e kisi taa sowtu fii, den abi mati fanowdu tu. A sani ya e soi taki den pikin di abi den yali de, poi toon Yehofa mati, leti enke di Yesesi be yonkuu. (Leisi Lukasi 2:52.) Den poi leli peleiki moo bun efuso meke moiti fu du moo gi Yehofa. Boiti dati, den e sabi san den wani aini a libi. Den poi paamisi Yehofa  taki den o dini en tu. Den poi du san Yehofa wani. Ma fa i sa yeepi i pikin fu a dini Yehofa? I sa leli wantu sani fu Yesesi te i luku a fasi fa a be yeepi den disipel fi en fu dini Yehofa. Yesesi be lobi den. A be abi sakafasi. Boiti dati, a be sabi fa den e denki anga fa den e fii.

3. Fa den apostel be sabi taki den anga Yesesi a be mati?

³ Boiti taki Yesesi a be a Masaa fu den apostel fi en, den anga en a be mati. (Leisi Yohanisi 15:15.) Aini Beibel ten, wan masaa á be gwenti taigi en saafu fa ai fii efuso fa ai denki. Ma Yesesi á be e libi anga den apostel fi en enke den a be saafu. A be lobi den, a be e meke ten fu de anga den tu. A be e taigi den fa a be e fii anga fa ai denki. A be e aliki den tu te den be e taigi en fa den be e denki anga fa den be e fii (Malikisi 6:30-32). Fu di Yesesi anga den apostel fi en be gwenti taki anga denseefi, meke en anga den a be bun mati. A sani ya be seeka den apostel gi a wooko di den be o du aini a ten di be de a den fesi.

4. San o yeepi i fu toon mati anga den pikin fi i? (Luku a fowtow na a bigin.)

⁴ Winsi fa a yu e taki gi den pikin fi i, tokuso yu anga den poi de mati tu. Mati e meke ten gi denseefi. Kande yu á mu wooko so fuu moo, da yu o abi moo ten gi den pikin fi i. A be o bun fu begi Yehofa fu a sani ya. Boiti dati, i mu pakisei bun fa i sa meke ten gi den. Mati lobi aseefi sani. Neen meke i mu meke moiti fu sabi san den pikin fi i lobi. Puubei fu sabi sowtu poku a lobi aliki, sowtu felon a lobi luku anga san a lobi pee. Ilaria di e tan a Italiyakondee, taki: „Mi mma anga nda be e aliki den poku di mi be lobi tu. Mi anga nda toon mati. Na ala sani mi anga en e taki.” Te yu anga i pikin toon mati, te i yeepi en fu a toon Yehofa mati, da a sani de á wani taki i ná abi taki gi en moo (Psalm 25:14). Den pikin fi i o si taki i lobi den. Den o si tu taki yu e lesipeki den. A sani de o meke a moo makiliki gi den fu taigi i den booko-ede fu den.

5. Fa den bakaman fu Yesesi be mu du a peleikiwooko efu den be wani de koloku?

⁵ Yesesi be sabi taki den bakaman fi en be o de koloku efu den dini Yehofa anga den hii ati, anga efu den du a peleikiwooko anga den hii ati. Neen meke a gi den taanga-sikin fu du ala san den man aini a peleikiwooko. A paamisi den tu taki a be o yeepi den.​—Mateyesi 28:19, 20.

6, 7. Fa yu e soi i pikin taki i lobi en te yu e yeepi en fu du den sani di Yehofa wani a du?

⁶ I wani i pikin tan koosube a Yehofa. Yehofa seefi wani i leli i pikin. A wani i kiya den tu. Neen gi yu a faantiwowtu de (Efeisesama 6:4). Neen meke i mu meke moiti fu leli i pikin ala yuu. Pakisei a sani ya: Yu e sende i pikin go a sikoo fu di i sabi taki a de fanowdu. I wani den leli nyun sani tu. A leti so yu e meke moiti fu den de a den komakandaa, den gaan komakandaa anga a osufamii anbegi, bika den sani di Yehofa e leli den, o meke den tan a libi. Neen meke i mu yeepi den fu si den sani di den e leli fu Yehofa enke wan piisii sani. Yeepi den tu fu fusutan taki den sani di Yehofa e leli den o meke den koni tuutuu (Odo 24:14). Boiti dati, i mu yeepi den fu lobi a peleikiwooko. Efu yu e yeepi i pikin fu den lobi a peleikiwooko, da a Yesesi baka yu e waka.

⁷ Fa den pikin o fende wini te den gwenti sutudeli, go a komakandaa anga peleikiwooko? Erin, wan sisa di e tan a Zuid-Afiikan taki: „U be lobi langa u mofu efuso kuutu te u be mu sutudeli a Beibel, go a komakandaa  anga te u be mu go a peleikiwooko. Son leisi u be e du sani fu seefi fu a Osufamii Anbegi á be sa go doo. Ma winsi san u be e du mi mma anga nda be e holi a Osufamii Anbegi.” Erin taki ai bigi gi en taki en mma anga en dda yeepi en fu fusutan taki den sani ya pelensipali. Nownow a nai wani misi komakandaa efuso peleikiwooko.

8. (a) Fa Yesesi soi taki a be abi sakafasi? (b) Fa a sakafasi fu Yesesi yeepi den bakaman fi en?

⁸ Winsi fa Yesesi á be e meke fowtu, tokuso a be abi sakafasi. A be taigi den bakaman fi en taki a abi Yehofa fanowdu. (Leisi Yohanisi 5:19.) I si enke a sani ya be meke den bakaman fu Yesesi á lesipeki en moo? Noiti. Te den be e si fa Yesesi be e fitoow Yehofa, o moo den be e fitoow Yesesi. Bakaten denseefi be abi sakafasi tu, fu di den be waka a Yesesi baka.​—Toli 3:12, 13, 16.

9. Fa a akisi di yu e akisi paadon te i meke wan fowtu o yeepi den pikin fi i?

⁹ Wi enke libisama á de enke Yesesi. Wi e meke fowtu fu di wi abi sondu, neen meke u mu abi sakafasi. I mu holi a pakisei taki a omen sani yu á poi du. Te i meke wan fowtu ná kibii en gi a pikin (1 Yohanisi 1:8). Da te den pikin fi i meke wan fowtu, na aseefi sani den o du tu. Boiti dati den o moo lesipeki i. Kon u taki yu abi tu basi. Wan fu den e akisi paadon te a meke wan fowtu, ma a taawan noiti e si en fowtu. Yu o moo lesipeki a basi di e akisi paadon, ná so noh? Rosemary di abi dii pikin taki, en anga en man be gwenti taki fu den fowtu di den be e meke. A taki: „Neen meke den pikin á be e feele fu taki anga wi te den be abi wan polobelema. U leli den pikin fu u tu san na a moo bun sani di den mu du te den abi wan polobelema. Te den be abi yeepi fanowdu, u be e soi den san den buku fu a olikanisâsi e taki. Boiti dati u be e begi anga den.”

10. Fa Yesesi soi taki a abi sakafasi winsi fa a be abi makiti fu taigi den bakaman fi en san den mu du?

¹⁰ Yesesi be abi a makiti fu taigi den bakaman fi en san den be mu du. Ma fu di a be abi sakafasi meke a be gwenti taigi den saide den be mu du son sani. A á taigi den namo taki den mu tan poti a Kownukondee fu Gadu anga en leti-du a fesi. Ma a taigi den tu taki: „Da wi o fende ala den taa sani tu.” Di a taigi den taki den á mu kuutu sama moo, a taigi den saide. A taki: „Da Gadu ná o kuutu u. Bika a leti enke fa wi e kuutu sama Gadu o kuutu u.”​—Mateyesi 6:31–7:2.

11. Sowtu wini den pikin o fende te yu e taigi den saide yu e tapu den fu du son sani?

 ¹¹ Te i taigi a pikin taki a á mu du wan sani, taigi en saide a á mu du en. Di a o fusutan saide a á mu du en, a o aliki i. Barry kiya fo pikin. A taki: „Te i gwenti taigi den pikin saide den á mu du wan sani den e moo fitoow i.” Den o si taki a ná fu di yu a den mma efuso den dda meke i wani pee basi gi den, ma i sabi fu saide yu e taigi den fu den á du a sani. Holi a pakisei taki te a pikin pasa 13 yali a bigi ai bigi. Den e kon sabi san bun anga san fowtu. Den e wani du sani sondee fu den mma anga den dda taigi den san den mu du (Romesama 12:1). Barry taki: „Te a pikin pasa 13 yali den mu leli fu e denki fosi den du wan sani. Den á mu e du sani fu di den e fii taki a bun, ma den mu sabi saide den e du en” (Psalm 119:34). Neen meke i mu abi sakafasi. Taigi den pikin fi i saide i du wan sani. A so a o leli tu fu denki fosi a du wan sani. Boiti dati a o si taki yu e lesipeki en. A o si taki yu e fusutan taki ai bigi.

12. Fa Yesesi yeepi Peitilisi fu di a be sabi fa ai denki?

¹² Yesesi be sabi fa sama e denki. A be sabi fa den e fii tu. Neen meke a be sabi san den disipel fi en be abi fanowdu. Di Yesesi taigi den disipel fi en taki sama be o kii en, neen Peitilisi taigi en taki a á mu meke a sani de miti en. Yesesi be sabi taki Peitilisi lobi en, ma a be sabi tu taki a fasi fa Peitilisi be e denki á be bun. Fa Yesesi yeepi Peitilisi anga den taa disipel fi en? A soi Peitilisi taki a fasi fa a be e denki á be bun. Bakadati Yesesi taigi den san o pasa anga den sama di nai holidoo te tesi miti den. A taigi den tu taki Yehofa o pai den sama di e dini en anga den hii ati (Mateyesi 16:21-27). A so a yeepi Peitilisi fu fusutan a toli.​—1 Peitilisi 2:20, 21.

13, 14. (a) Fa yu o sabi efu den pikin fi i biibi e swaki? (b) San o yeepi i fu sabi san den pikin fi i abi fanowdu?

¹³ Begi Yehofa fu a gi i koni, fu sabi fa i mu yeepi i pikin (Psalm 32:8). Kande yu e si taki a nai piisii moo enke fosi. Kande ai kuutu den baala anga sisa aini a kemeente, efuso yu e si enke a nai taigi i ala sani moo enke fosi. Ná bigin denki taki ai kiibi sani gi i. * (Luku a maiki a ondoo.) Ma yu á mu fika en tu, efuso denki taki a o kisi enseefi. Kande den sani ya e soi taki i mu yeepi en fi en biibi kon moo taanga.

¹⁴ I mu taki anga i pikin a wan lesipeki fasi, efi i wani sabi san ai pakisei. I mu soi switifasi tu. A leti enke te yu e kisi wataa a wan peti. Efi i hali a boketi taanga tumisi, da gaanse fu a wataa o kai. I ná o fende a wataa di i wani. A so a de tu te yu e taki anga den pikin fi i. Efi i ná abi pasensi te yu e taki anga den efuso efu yu e dwengi den fu taigi i wan sani, i ná o sabi san den e denki efuso fa den e fii tuutuu. (Leisi Odo 20:5.) Ilaria taki di a be moo yonkuu, a be wani paa anga den sikoo mati fi en, ma a be sabi taki a sani de á bun. En mma anga en dda be si taki ai kusumi. Ilaria taki: „Wan neti mi mma anga nda taigi mi taki den si taki mi e kusumi, neen den akisi mi san du mi. A keekee mi taigi den saide mi e kusumi, neen mi akisi den fu den yeepi mi. Den baasa mi, neen den taigi mi taki den e fusutan fa mi e fii. Den be paamisi mi tu taki den o yeepi mi.” IIaria mma anga en dda á daaidaai. Den yeepi en meke mati aini a kemeente.

15. San e soi taki Yesesi be sabi fa sama e denki?

 ¹⁵ Yesesi be e si den bun manii fu den bakaman fi en tu. Di Nataniyeli yee taki Yesesi a fu Nasaleti, neen a taki: „Bunbun sani de a Nasaleti?” (Yohanisi 1:46) Kon u taki i be de ape, san i be o denki? I be o denki taki Nataniyeli nai denki bun fu Yesesi? I be o denki taki a biibi a nai biibi? Yesesi á be denki so. Yesesi be sabi fa ai denki tuutuu. A be sabi taki en ati kiin. Neen meke Yesesi taki: „I si a man de, a wan Islayelisama di nai bidiigi sama” (Yohanisi 1:47). Yesesi be poi si sama ati, neen meke a be e poti pakisei a den bun manii fu den.

16. Fa i sa yeepi i pikin fu abi bun manii?

¹⁶ Winsi fa yu á poi si sama ati enke Yesesi, tokuso i poi sabi san i pikin e pakisei. Yehofa poi yeepi i fu si den bun manii fi i pikin. Winsi i pikin du wan sani di hati i, noiti i mu taki a abi takuu ati. Noiti i mu taki a soso booko-ede ai gi i. Yu á mu pakisei a sani de seefiseefi. Te a du wan bun sani i mu taigi en. Taigi en tu taki i sabi taki a bun a wani du. Poti pakisei a den moiti di ai meke fu go a fesi, da i gafa en. Efu a de fanowdu, gi en moo faantiwowtu di o yeepi en fu abi bun manii. A dati Yesesi be du anga den bakaman fi en. Baka wan yali anga afu di Nataniyeli (di de e kai Baatimeyesi) anga Yesesi miti, neen Yesesi gi en wan pelensipali wooko. A meke Nataniyeli toon wan apostel. Nataniyeli du a wooko di Yesesi gi en anga en hii ati (Lukasi 6:13, 14; Toli 1:13, 14). Neen meke yu á mu meke i pikin fii enke a nai du nawan bun sani, ma gafa en. Gi en taanga-sikin tu. Meke a fii taki a sa meke yu anga Yehofa piisii. Meke a fii taki Yehofa poi koboloiki en fu du a diniwooko.

17, 18. Sowtu wini yu o fende te yu e yeepi i pikin fu dini Yehofa?

¹⁷ Kande yu e fii enke fa Pawlesi be e fii. A be e booko en ede tuutuu anga den sama di a be e si enke en pikin. A den baala anga den sisa ya a be yeepi fu sabi Yehofa. Ná pikin lobi a be lobi den. Neen meke tyali be e kisi en te a be e denki taki son wan fu den be sa gwe fika Yehofa (1 Korentesama 4:15; 2 Korentesama 2:4). Victor di kiya dii pikin taki: „Di den pikin be pasa 12 yali a á be makiliki. Ma tokuso den bun ten di u be abi meke wi á be e poti pakisei a den booko-ede di u be abi tumisi. Yehofa be yeepi u fu wi anga u pikin toon tuutuu mati.”

¹⁸ Mma anga dda, wi e wooko taanga fu yeepi u pikin fu di u lobi den tuutuu. Tan meke moiti fu yeepi den pikin fi i fu dini Yehofa. A ná pikin piisii yu o piisii te den pikin fi i paamisi Gadu taki den o dini en. Yu o piisii tu te yu e si fa den e dini Yehofa anga den hii ati.​—3 Yohanisi 4.