သိၣ်လိနဲၣ်လိနဖိသးစၢ်လၢ ကမၤယဟိဝၤယွၤ အတၢ်မၤန့ၣ်တက့ၢ်
“ယ့ၣ်ၡူးဒိၣ်ထီၣ်လၢတၢ်ကူၣ်သ့, ဒီးလၢအနီၢ်ခိ, ဒီးလၢတၢ်ဘၣ်ယွၤအသးဒီးပှၤကညီအသးလီၤ.”—လူၤကၣ် ၂:၅၂.
၁, ၂. (က) မိၢ်ပၢ်တနီၤ လၢအအိၣ်ဒီး အဖိသးစၢ်န့ၣ် အဝဲသ့ၣ်သူၣ်ကိၢ်သးဂီၤတၢ် ဘၣ်ဃးဒီးတၢ်ဂ့ၢ်မနုၤလဲၣ်. (ခ) ပှၤသးစၢ်သ့ၣ်တဖၣ် ဒိးန့ၢ်ဘၣ် တၢ်ဘျုးတၢ်ဖှိၣ်လၢ အဒိၣ်ထီၣ်သီအဆၢကတီၢ်ဒ်လဲၣ်.
တၢ်ဆၢကတီၢ်လၢ မိၢ်ပၢ်ကသးခုအဒိၣ်ကတၢၢ်န့ၣ် မ့ၢ်ဝဲဖဲအဖိတဖၣ် ဒိးဘျၢထံအခါန့ၣ်လီၤ. ဒီပုၢ်ဝဲၢ်မုၣ် ဘဲရနံၣ် အဖိလွံၢ်ဂၤလၢာ် ဘျၢထံဖဲတချုးအဝဲသ့ၣ် အသးအနံၣ်ပှဲၤထီၣ် ၁၄ နံၣ်န့ၣ်လီၤ. အဝဲစံးဝဲလၢ– “တၢ်အံၤမ့ၢ်ဝဲ တၢ်သူၣ်ခုသးခုဖးဒိၣ် လၢပလဲၤခီဖျိဘၣ်န့ၣ်လီၤ. ပသူၣ်မံသးမုာ်ဒိၣ်မး မ့ၢ်လၢပဖိသ့ၣ်တဖၣ် အဲၣ်ဒိးမၤ ယဟိဝၤယွၤအတၢ်မၤန့ၣ်လီၤ. ဘၣ်ဆၣ် ပသ့ၣ်ညါလၢ ဒ်အဝဲသ့ၣ် မ့ၢ်ပှၤသးစၢ်တဖၣ်အသိး အဝဲသ့ၣ်ကကွၢ်ဆၢၣ်မဲာ်ဘၣ်ဝဲ တၢ်မၤကွၢ်အါမံၤလီၤ.” ဘၣ်သ့ၣ်သ့ၣ် နၤစ့ၢ်ကီး နကဘၣ်ယိၣ်တၢ်လၢ နဖိသးစၢ်တဖၣ်အဂီၢ်လီၤ.
၂ ဖိသၣ် အကသံၣ်သရၣ်တဂၤ တဲဝဲလၢ ဖဲပှၤဒိၣ်ထီၣ်သီအခါန့ၣ် မ့ၢ်တၢ်ဆၢကတီၢ်ကီခဲဝဲလၢ အဝဲသ့ၣ်အဂီၢ် တကးဒံးဘၣ် လၢမိၢ်ပၢ်အဂီၢ်စ့ၢ်ကီးလီၤ. ဘၣ်ဆၣ် မိၢ်ပၢ်တဖၣ် တကြၢးဆိကမိၣ်အဖိဒ် အမ့ၢ်ပှၤတကျၢတကျံ ဒီးပှၤလံကျိဘၣ်. လၢတၢ်န့ၣ်အလီၢ် ကသံၣ်သရၣ်တဂၤ စံးဝဲလၢ ပှၤသးစၢ်သ့ၣ်တဖၣ် မ့ၢ်ပှၤလၢအိၣ်ဒီး တၢ်သ့တၢ်ဘၣ်, အသးဆီတလဲညီ ဒီးအါတက့ၢ်န့ၣ် အဝဲသ့ၣ် အဲၣ်ဒိးသူအတၢ်ဆၢကတီၢ်ဒီး အတံၤသကိးတဖၣ်လီၤ. ဒ်ယ့ၣ်ၡူးမၤဝဲအသိး နဖိသ့ၣ်တဖၣ်စ့ၢ်ကီး ဖဲအဝဲသ့ၣ်မ့ၢ် ပှၤသးစၢ်အဆၢကတီၢ်ဒၣ်လဲာ် ဒုးအိၣ်ထီၣ်ဝဲ အတၢ်ရ့လိာ်သးဒီးယဟိဝၤယွၤ ဘူးဘူးတံၢ်တံၢ် သ့ဝဲလီၤ. (ဖး လူၤကၣ် ၂:၅၂ တက့ၢ်.) အဝဲသ့ၣ် မၤဒိၣ်ထီၣ်ထီထီၣ် အတၢ်သ့တၢ်ဘၣ်လၢ တၢ်စံၣ်တဲၤတဲလီၤတၢ် တကပၤ ဒီးမၤဆူၣ်ထီၣ် အတၢ်သးအိၣ်မၤ ယဟိဝၤယွၤ အတၢ်မၤသ့ဝဲလီၤ. အဝဲသ့ၣ် ကမၤတၢ်ဆၢတဲာ်တဖၣ် လၢအနီၢ်ကစၢ် ဒ်သိးဒီး တၢ်ဟ့ၣ်လုၢ်ထီၣ်သး ဆူယဟိဝၤယွၤအအိၣ် ဒီးဒိကနၣ် အကလုၢ်ကထါန့ၣ်လီၤ. ဒ်သိးနဖိသးစၢ်တဖၣ် ကမၤယဟိဝၤယွၤ အတၢ်မၤအဂီၢ် ဒ်နမ့ၢ်မိၢ်ပၢ်အသိး နမၤစၢၤအဝဲသ့ၣ် ကသ့ဒ်လဲၣ်. ဖဲယ့ၣ်ၡူးသိၣ်လိ အပျဲၢ်အဘီၣ်တဖၣ်အခါ အဝဲအိၣ်ဒီး တၢ်အဲၣ်တၢ်ကွံ, တၢ်ဆီၣ်လီၤသး, ဒီးတၢ်သ့ၣ်ညါနၢ်ပၢၢ်အဝဲသ့ၣ်အဃိ နဟံးန့ၢ်တၢ်မၤလိလၢ အအိၣ်သ့ဝဲလီၤ.
အဲၣ်နဖိသးစၢ်တက့ၢ်
၃. ယ့ၣ်ၡူးမ့ၢ် အဝဲသ့ၣ်အတံၤသကိးန့ၣ် တၢ်မၢဖိသ့ၣ်တဖၣ် သ့ၣ်ညါဝဲဒ်လဲၣ်.
၃ ယ့ၣ်ၡူးတမ့ၢ်ထဲဒၣ် ကစၢ်တဂၤလၢ အတၢ်မၢဖိတဖၣ်အဂီၢ်ဘၣ်. ကစၢ်မ့ၢ်စ့ၢ်ကီး အဝဲသ့ၣ် အတံၤသကိးလီၤ. (ဖး ယိၤဟၣ် ၁၅:၁၅ တက့ၢ်.) လၢပျၢၤန့ၣ် ကစၢ်တဖၣ် တညီနုၢ်တဲဖျါထီၣ် အတၢ်ဆိကမိၣ် ဒီးအတၢ်တူၢ်ဘၣ်လၢ အကုၢ်တဖၣ်အအိၣ်ဘၣ်. ဘၣ်ဆၣ် မ့မ့ၢ်ယ့ၣ်ၡူးန့ၣ် တရ့ဒီးအတၢ်မၢဖိတဖၣ် ဒ်ကုၢ်အသိးဘၣ်. ယ့ၣ်ၡူးအဲၣ်အဝဲသ့ၣ် ဒီးသူဝဲ အတၢ်ဆၢကတီၢ်အါမးလၢ ကရ့လိာ်သးဒီး အဝဲသ့ၣ်အဂီၢ်လီၤ. ယ့ၣ်ၡူးပာ်ဖျါထီၣ် အတၢ်ထံၣ်ဒီးအတၢ်တူၢ်ဘၣ်သ့ၣ်တဖၣ် ဆူအတၢ်မၢဖိတဖၣ်အအိၣ်န့ၣ်လီၤ. တကးဒံးဘၣ် ဖဲအတၢ်မၢဖိတဖၣ် တဲဖျါထီၣ် အတၢ်ဆိကမိၣ်ဒီး အတၢ်တူၢ်ဘၣ်အခါ ယ့ၣ်ၡူးဒိကနၣ်အဝဲသ့ၣ်ဂ့ၤဂ့ၤလီၤ. (မၢ်ကူး ၆:၃၀-၃၂) ခီဖျိလၢ အဝဲသ့ၣ်အတၢ်ရ့လိာ်သး ဘူးဘူးတံၢ်တံၢ်အဃိ တၢ်အံၤမၤစၢၤ တၢ်မၢဖိတဖၣ်လၢ ကမၤတၢ်လၢ ခါဆူညါအဂီၢ်န့ၣ်လီၤ.
၄. မိၢ်ပၢ်သ့ၣ်ဧၢ နကဲထီၣ် နဖိအတံၤသကိးကသ့ဒ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်).
၄ နအိၣ်ဒီး တၢ်စိတၢ်ကမီၤလၢ နဖိသ့ၣ်တဖၣ် အဖီခိၣ်သနာ်က့ နကဲထီၣ် အဝဲသ့ၣ် အတံၤသကိးသ့ဝဲန့ၣ်လီၤ. တံၤသကိးသ့ၣ်တဖၣ်န့ၣ် ရ့လိာ်အသး ဒီးဟ့ၣ်လိာ်အသး တၢ်ဆၢကတီၢ် တဂၤဒီးတဂၤလီၤ. ဒ်န့ၣ်အသိး နဃုအါထီၣ် တၢ်ဆၢကတီၢ်လၢနဖိတဖၣ်အဂီၢ်သ့ ခီဖျိလၢနမၤစှၤလီၤ နတၢ်မၤ မ့တမ့ၢ် သူစှၤလီၤနတၢ်ဆၢကတီၢ်လၢ တၢ်အဂုၤအဂၤတဖၣ်အဂီၢ်န့ၣ်လီၤ. နကဘၣ်ဃ့ဘါထုကဖၣ်တၢ် ဘၣ်ဃးဒီး တၢ်ဂ့ၢ်သ့ၣ်တဖၣ်အံၤ ဒီးဆိကမိၣ်အီၤ လီၤတံၢ်လီၤဆဲးန့ၣ်လီၤ. ဒ်တံၤသကိးသ့ၣ်တဖၣ် အတၢ်ပာ်သး လီၤဂာ်လိာ်သးအသိး နဲစ့ၢ်ကီး နကဘၣ်ဃုသ့ၣ်ညါ နဖိသးစၢ်သ့ၣ်တဖၣ် အတၢ်ဘၣ်သး ဒ်သိးဒီး တၢ်သူၣ်ဝံၣ်သးဆၢ, တၢ်ဂီၤမူ မ့တမ့ၢ် တၢ်လိၣ်ခိၣ်လိၣ်ကွဲ လၢအဝဲသ့ၣ် ဘၣ်သူၣ်ဘၣ်သးဝဲတဖၣ်န့ၣ်လီၤ. ဒီးနဃုထၢ တၢ်လၢအဝဲသ့ၣ် ဘၣ်သူၣ်ဘၣ်သးဝဲတဖၣ်သ့ဝဲလီၤ. အံၣ်လါရံယါ အိၣ်လၢ ကီၢ်အံးထလံၣ် စံးဝဲလၢ– “ယမိယပါ သ့ၣ်တဖၣ် သးအိၣ်ဒိကနၣ် တၢ်သးဝံၣ်လၢ ယကနၣ်မုာ်တဖၣ်န့ၣ်လီၤ. မ့မ့ၢ်ယပၢ်န့ၣ် ကဲထီၣ်ယတံၤသကိးလၢ အဂ့ၤကတၢၢ်တဂၤအဃိ ယတဲသကိး ယတၢ်ဂ့ၢ်တၢ်ကျိၤဒီးအီၤ ဘူၣ်ခဲလၢာ်လီၤ.” နမ့ၢ်ကဲနဖိ အတံၤသကိးဒီး မၤစၢၤအဝဲသ့ၣ်လၢ အကကဲထီၣ် ယဟိဝၤယွၤ အတံၤသကိးဒၣ်လဲာ် ဒ်နမ့ၢ် မိၢ်ပၢ်တဖၣ်အသိး နတၢ်စိတၢ်ကမီၤ တဟါမၢ်လၢ အဝဲသ့ၣ်အဖီခိၣ်ဘၣ်. (စံးထီၣ်ပတြၢၤ၂၅:၁၄) နမ့ၢ်မၤဒ်န့ၣ်န့ၣ် နဖိသ့ၣ်တဖၣ် ကထံၣ်ဝဲလၢ နအဲၣ်အဝဲသ့ၣ်ဒီး ကဟုကယာ်အီၤအဃိ တၢ်ဂ့ၢ်မ့ၢ်အိၣ် တမံၤဂ့ၤတမံၤဂ့ၤန့ၣ် ညီဝဲလၢ အဝဲသ့ၣ်ကတဲဖျါထီၣ်ဝဲလီၤ.
၅. ယ့ၣ်ၡူးခရံာ် အပျဲၢ်အဘီၣ်သ့ၣ်တဖၣ် သူၣ်ဖှံသးညီလၢ ယဟိဝၤယွၤ အတၢ်မၤအပူၤကသ့ဒ်လဲၣ်.
၅ ယ့ၣ်ၡူးသ့ၣ်ညါဝဲလၢ အပျဲၢ်အဘီၣ်သ့ၣ်တဖၣ် မ့ၢ်အိၣ်ဒီး တၢ်သူၣ်ဆူၣ်သးဆူၣ် လၢကစၢ်ယွၤအတၢ်မၤအပူၤန့ၣ် အဝဲသ့ၣ်တဖၣ် ကအိၣ်ဒီး တၢ်သူၣ်ဖှံသးညီနီၢ်ကီၢ်လီၤ. လၢတၢ်န့ၣ်အဃိ ယ့ၣ်ၡူးဟ့ၣ်ဂံၢ်ဟ့ၣ်ဘါ အဝဲသ့ၣ် ဒ်သိးကမၤဝဲ တၢ်စံၣ်တဲၤတဲလီၤတၢ်သးခုကစီၣ် အတၢ်မၤဆူၣ်ဆူၣ်န့ၣ်လီၤ. တကးဒံးဘၣ် အဝဲအၢၣ်လီၤဝဲလၢ အကဆီၣ်ထွဲ မၤစၢၤအဝဲသ့ၣ်လီၤ.—မးသဲ ၂၈:၁၉, ၂၀
၆, ၇. နကြၢးမၤစၢၤနဖိလၢ အဝဲသ့ၣ်ကမၤတၢ်မနုၤလဲၣ်.
၆ နအဲၣ်ဒိးလၢ နဖိတဖၣ် ကသုးဘူးအသးဆူ ယဟိဝၤယွၤအအိၣ်န့ၣ်လီၤ. ဒီးယဟိဝၤယွၤ အဲၣ်ဒိးဝဲလၢ နကသိၣ်လိနဲၣ်လိနဖိ ဒီးသိၣ်က့ၤသီက့ၤအဝဲသ့ၣ်န့ၣ်လီၤ. ယဟိဝၤယွၤ ဟ့ၣ်နၤမူဒါလၢ နကမၤဒ်န့ၣ်လီၤ. (အ့းဖ့းစူး ၆:၄) လၢတၢ်န့ၣ်အဃိ နကဘၣ် ပာ်လီၤတၢ်ဆၢကတီၢ် လီၤတံၢ်လီၤဆဲး ဒ်သိးနဖိသ့ၣ်တဖၣ် ကဒိးန့ၢ်ဘၣ်ဝဲ တၢ်သိၣ်လိနဲၣ်လိ ထီဘိန့ၣ်လီၤ. ဆိကမိၣ်ကွၢ်တၢ်အံၤတက့ၢ်– နအဲၣ်ဒိးလၢ နဖိသ့ၣ်တဖၣ်ထီၣ်ကၠိ မ့ၢ်လၢနသ့ၣ်ညါလၢ တၢ်ကူၣ်ဘၣ်ကူၣ်သ့ မ့ၢ်တၢ်လၢအရ့ဒိၣ် ဒီးနအဲၣ်ဒိးလၢ အဝဲသ့ၣ် ကမၤလိဘၣ်တၢ်လၢအသီန့ၣ်လီၤ. ဒ်န့ၣ်အသိး နအဲၣ်ဒိးလၢနဖိသ့ၣ်တဖၣ် ကထီၣ်တၢ်အိၣ်ဖှိၣ်ရိဖှိၣ်, တၢ်အိၣ်ဖှိၣ်ဖးဒိၣ်တဖၣ် ဒီးမၤဟံၣ်ဖိဃီဖိ တၢ်မၤလိလံာ်စီဆှံန့ၣ်လီၤ. နသ့ၣ်ညါလၢ တၢ်ကူၣ်ဘၣ်ကူၣ်သ့ လၢအဟဲလၢယဟိဝၤယွၤအအိၣ်န့ၣ် ကမၤပူၤဖျဲး အဝဲသ့ၣ်အသးသမူန့ၣ်လီၤ. လၢတၢ်န့ၣ်အဃိ မၤစၢၤအဝဲသ့ၣ် ဒ်သိးကအဲၣ်ဒိးမၤလိအါထီၣ် ယဟိဝၤယွၤအဂ့ၢ် တကးဒံးဘၣ် ဒုးသ့ၣ်ညါအီၤလၢ တၢ်အံၤကမၤစၢၤ အဝဲသ့ၣ်လၢ အကကဲထီၣ် ပှၤလၢအကူၣ်တၢ်သ့န့ၣ်တက့ၢ်. (ကတိၤဒိ ၂၄:၁၄) ဒီးသိၣ်လိစ့ၢ်ကီး နဖိတဖၣ်လၢ အဝဲသ့ၣ်ကလဲၤစံၣ်တဲၤတဲလီၤတၢ် ထီဘိန့ၣ်တက့ၢ်. ကွၢ်လိမၤဒိး ယ့ၣ်ၡူးအဒိအတဲာ် ဒီးမၤစၢၤအဝဲသ့ၣ် ဒ်သိးအကသးအိၣ် သိၣ်လိပှၤအဂၤလၢ ကစၢ်ယွၤအကလုၢ်ကထါန့ၣ်တက့ၢ်.
၇ တၢ်မၤလိလံာ်စီဆှံ, တၢ်ထီၣ်တၢ်အိၣ်ဖှိၣ် ဒီးတၢ်ဟးစံၣ်တဲၤတဲလီၤတၢ်တဖၣ်န့ၣ် ကမၤစၢၤဝဲ ပှၤသးစၢ်သ့ၣ်တဖၣ်ဒ်လဲၣ်. အဲရၢအိၣ်လၢ ကီၢ်အၤဖြံၤကၤ ကလံၤထံး စံးဝဲလၢ– “ပဝဲဖိသၣ်သ့ၣ်တဖၣ်န့ၣ် ပကအံၣ်ကအူး ဒီးကဒူးကဒ့ၣ်တၢ် ဘၣ်ဃးဒီး တၢ်မၤလိလံာ်စီဆှံ, တၢ်ထီၣ်တၢ်အိၣ်ဖှိၣ် ဒီးတၢ်ဟးစံၣ်တဲၤတဲလီၤတၢ်အဃိလီၤ. တဘျီတခီၣ် ပမၤတံာ်တာ်တၢ် ဒ်သိးဟံၣ်ဖိဃီဖိ တၢ်မၤလိလံာ်စီဆှံ သုတကဲထီၣ် တဂ့ၤအဂီၢ်န့ၣ်လီၤ. ဘၣ်ဆၣ် ပမိၢ်ပပၢ်န့ၣ် တဟ့ၣ်အၡူနီတဘျီဘၣ်.” အဝဲစံးဘျုးဘၣ် အမိၢ်အပၢ်ဒိၣ်မး မ့ၢ်လၢအဝဲသ့ၣ် မၤစၢၤအီၤဒ်သိး အဝဲကသ့ၣ်ညါထီၣ်ဘၣ်ဝဲလၢ တၢ်သ့ၣ်တဖၣ်အံၤ မ့ၢ်တၢ်လၢအရ့ဒိၣ်ဝဲအဃိန့ၣ်လီၤ. တဘျီတခီၣ် အဝဲလဲၤထီၣ်တၢ်အိၣ်ဖှိၣ်ရိဖှိၣ် မ့တမ့ၢ် ဟးစံၣ်တဲၤတဲလီၤတၢ် တသ့ဘၣ်. ဘၣ်ဆၣ် တၢ်မ့ၢ်ကဲထီၣ်အသးဒ်န့ၣ်န့ၣ် အဝဲဂုာ်ကျဲးစၢးလူၤက့ၤဝဲ အတၢ်ရဲၣ်တၢ်ကျဲၤ ဒ်အမၤညီနုၢ်ဝဲ အသိးန့ၣ်လီၤ.
အိၣ်ဒီးတၢ်ဆီၣ်လီၤသးတက့ၢ်
၈. (က) ယ့ၣ်ၡူး မ့ၢ်ပှၤလၢ အဆီၣ်လီၤသးတဂၤန့ၣ် အဝဲပာ်ဖျါထီၣ်ဝဲဒ်လဲၣ်. (ခ) ယ့ၣ်ၡူး အတၢ်ဆီၣ်လီၤသးန့ၣ် မၤစၢၤအပျဲၢ်အဘီၣ် တဖၣ်ဒ်လဲၣ်.
၈ ယ့ၣ်ၡူး မ့ၢ်ပှၤလၢအလၢအပှဲၤ သနာ်က့ အဝဲဆီၣ်လီၤအသးဒီး တဲဘၣ် အပျဲၢ်အဘီၣ်တဖၣ်လၢ အဝဲလိၣ်ဘၣ် တၢ်မၤစၢၤလၢ ယဟိဝၤယွၤ အအိၣ်န့ၣ်လီၤ. (ဖး ယိၤဟၣ် ၅:၁၉ တက့ၢ်.) လၢတၢ်န့ၣ်အဃိ အပျဲၢ်အဘီၣ်တဖၣ် အတၢ်ပာ်ကဲအီၤ လီၤစှၤဝဲစ့ၢ်ကီးဧါ. တလီၤစှၤဘၣ်. အဝဲသ့ၣ် ထံၣ်ဘၣ်ဝဲလၢ ယ့ၣ်ၡူး သန့ၤအသးလၢ ယဟိဝၤယွၤအဃိ အဝဲသ့ၣ် နာ်အီၤဒိၣ်ထီၣ်ဝဲ စ့ၢ်ကီးလီၤ. လၢခံန့ၣ် အဝဲသ့ၣ်တဖၣ် ကွၢ်လိဝဲ ယ့ၣ်ၡူးအတၢ်ဆီၣ်လီၤသးလီၤ.—မၤတၢ် ၃:၁၂, ၁၃, ၁၆.
၉. ဖဲနအၢၣ်လီၤ နတၢ်ကမၣ်ဒီး ဃ့ဝံသးစူၤတၢ်အခါန့ၣ် တၢ်အံၤကမၤစၢၤ နဖိသးစၢ်တဖၣ်ဒ်လဲၣ်.
၉ ပဝဲဒၣ်န့ၣ် ပတလီၤဂာ်ဒီးယ့ၣ်ၡူးဘၣ်, မ့ၢ်လၢပတလၢတပှဲၤ ဒီးပမၤကမၣ်ဘၣ်တၢ်သ့အဃိန့ၣ်လီၤ. လၢတၢ်န့ၣ်အဃိ ပကဘၣ်အိၣ်ဒီး တၢ်ဆီၣ်လီၤသးလီၤ. နကဘၣ်သ့ၣ်ညါလီၤနသးလၢ တၢ်လၢနမၤတသ့ဘၣ်န့ၣ် အိၣ်ဝဲအါမံၤဒီး အၢၣ်လီၤနတၢ်ကမၣ်တက့ၢ်. (၁ ယိၤဟၣ် ၁:၈) နမ့ၢ်မၤဒ်န့ၣ်န့ၣ် နဖိသးစၢ်သ့ၣ်တဖၣ် ကနၢ်ပၢၢ်ဝဲလၢ အဝဲသ့ၣ်ကြၢးအၢၣ်လီၤအတၢ်ကမၣ်ဒီး ကပာ်ကဲနၤအါထီၣ်ဝဲလီၤ. တၢ်မၤခိၣ်တဂၤလၢ အၢၣ်လီၤအတၢ်ကမၣ်ဖဲ အမၤကမၣ်တၢ်အခါ မ့တမ့ၢ် တၢ်မၤခိၣ်အဂၤတဂၤလၢ အတအၢၣ်လီၤအတၢ်ကမၣ်နီတဘျီဘၣ်န့ၣ် နကပာ်ကဲအီၤ ဖဲလဲၣ်တဂၤလဲၣ်. ရိးစ်မ့ၣ်ရံၣ်လၢ အိၣ်ဒီးအဖိသၢဂၤ စံးဝဲလၢ အဝဲသ့ၣ် ဒီမါဝၤခံဂၤလၢာ် သးအိၣ်အၢၣ်လီၤ အတၢ်ကမၣ်န့ၣ်လီၤ. အဝဲတဲဖျါထီၣ်ဝဲလၢ– “ခီဖျိလၢ ပမၤဒ်န့ၣ်အဃိ ပဖိတဖၣ်သးအိၣ်တဲဘၣ်ပှၤလၢ အတၢ်ကီတၢ်ခဲန့ၣ်လီၤ. ဒီးပဖိတဖၣ်အတၢ်ကီတၢ်ခဲ မ့ၢ်အိၣ်ထီၣ်န့ၣ် ပသိၣ်လိအဝဲသ့ၣ် ဒ်သိးအကဃုထံၣ်န့ၢ် တၢ်မၤစၢၤလၢ အဂ့ၤကတၢၢ်ကသ့အဂီၢ်န့ၣ်လီၤ. ဖဲပဖိလိၣ်ဘၣ် တၢ်မၤစၢၤအခါ ပဟ့ၣ်ကူၣ်ဟ့ၣ်ဖး အဝဲသ့ၣ်လၢ ပတၢ်ကရၢကရိအလံာ်လဲၢ်တဖၣ်အပူၤဒီး ပဃ့ဘါထုကဖၣ်တၢ် ဒီးအဝဲသ့ၣ်န့ၣ်လီၤ.”
၁၀. ဖဲယ့ၣ်ၡူးတဲဘၣ် အပျဲၢ်အဘီၣ်တဖၣ်လၢ ကဘၣ်မၤတၢ်တမံၤမံၤအခါန့ၣ် အဝဲပာ်ဖျါထီၣ် အတၢ်ဆီၣ်လီၤသးဒ်လဲၣ်.
၁၀ ယ့ၣ်ၡူးအိၣ်ဒီး အစိကမီၤလၢ ကမၢလီၤအပျဲၢ်အဘီၣ်တဖၣ်န့ၣ်လီၤ. ဘၣ်ဆၣ် မ့ၢ်လၢအဝဲအိၣ်ဒီး တၢ်ဆီၣ်လီၤသးအဃိ အဝဲတဲနၢ်ပၢၢ် အပျဲၢ်အဘီၣ်လၢ ဘၣ်မနုၤအဃိ အဝဲသ့ၣ်ဘၣ်မၤဝဲဒ်အံၤဒ်နုၤလဲၣ်. အဒိ ယ့ၣ်ၡူးတတဲဝဲထဲလၢ အဝဲသ့ၣ်ကဘၣ်ဃုဆိ ယွၤအဘီအမုၢ်ဒီး အတၢ်တီတၢ်လိၤဧိၤဘၣ်. အစံးစ့ၢ်ကီးဝဲလၢ– “ဒီးတၢ်ကပာ်ဖှိၣ် တၢ်န့ၣ်တဖၣ်ခဲလၢာ်လၢသုလီၤ.” ဖဲယ့ၣ်ၡူးတဲ အဝဲသ့ၣ်လၢ တဘၣ်စံၣ်ညီၣ်တၢ်တဂ့ၤအခါ အဝဲတဲနၢ်ပၢၢ်အဝဲသ့ၣ်လၢ– “ဒ်သိး သုသုတဘၣ် တၢ်စံၣ်ညီၣ်တဂ့ၤဒီး, စံၣ်ညီၣ်တၢ်သုဝဲတဂ့ၤ. အဂ့ၢ်ဒ်အံၤ, သုကဘၣ်တၢ်စံၣ်ညီၣ်သုလၢ တၢ်စံၣ်ညီၣ်လၢ သုစံၣ်ညီၣ်တၢ်န့ၣ်လီၤ.”—မးသဲ ၆:၃၁–၇:၂
၁၁. နမ့ၢ်တဲနၢ်ပၢၢ်နဖိလၢ ဘၣ်မနုၤအဃိ နထုးထီၣ်တၢ်သိၣ်တၢ်သီ ဒီးနဆၢတဲာ်တၢ်ဒ်အံၤဒ်နုၤအဂ့ၢ်န့ၣ် တၢ်အံၤကမၤစၢၤအီၤဒ်လဲၣ်.
၁၁ ဖဲနထုးထီၣ်တၢ်သိၣ်တၢ်သီမ့ၢ်ဂ့ၤ, စံၣ်ညီၣ်တဲာ်တၢ်တခါခါမ့ၢ်ဂ့ၤ, ဃုထၢတၢ်ဆၢကတီၢ်လၢ အကြၢးဝဲဘၣ်ဝဲဒ်သိး နကဒုးသ့ၣ်ညါနဖိတဖၣ်လၢ ဘၣ်မနုၤအဃိနမၤ ဒ်န့ၣ်လဲၣ်န့ၣ် တက့ၢ်. အဝဲသ့ၣ် မ့ၢ်နၢ်ပၢၢ်ထီၣ်ဝဲန့ၣ် တကီလၢအဝဲသ့ၣ် ကလူၤပိာ်ထွဲဝဲဘၣ်. ဘဲရံၤ လၢအဖိအိၣ်လွံၢ်ဂၤ စံးဝဲလၢ– “နမ့ၢ် တဲနၢ်ပၢၢ်အဝဲသ့ၣ် လၢတၢ်ဂ့ၢ်တၢ်ကျိၤလီၤတံၢ်လီၤဆဲးန့ၣ် ညီလၢအဝဲသ့ၣ် ကနာ်အီၣ်နၤလီၤ.” နမ့ၢ်မၤဒ်န့ၣ်န့ၣ် နဖိသ့ၣ်တဖၣ် ကနၢ်ပၢၢ်ထီၣ်ဝဲလၢ နဒုးအိၣ်ထီၣ် တၢ်သိၣ်တၢ်သီ မ့တမ့ၢ် နစံၣ်ညီၣ်တဲာ်တၢ်ဂ့ၢ်တခါခါန့ၣ် တမ့ၢ်ထဲလၢ နအိၣ်ဒီး တၢ်စိတၢ်ကမီၤအဃိဘၣ် မ့ၢ်လၢတၢ်ဂ့ၢ်အဂ့ၤအိၣ်ဝဲအဃိလီၤ. နကဘၣ်သ့ၣ်နီၣ်ထီၣ်က့ၤလၢ နဖိသးစၢ်တဖၣ်အံၤန့ၣ် တမ့ၢ်ဖိသၣ်ဆံးလၢၤဘၣ်. အဝဲသ့ၣ် မၤလိဘၣ်ဝဲလၢ ကဘၣ်ဆိကမိၣ်တၢ်လၢ အနီၢ်ကစၢ်ဒၣ်ဝဲဒီး အဝဲသ့ၣ် အဲၣ်ဒိးဆၢတဲာ်တၢ်လၢ အနီၢ်ကစၢ်ဒၣ်ဝဲလီၤ. (ရိမ့ၤ ၁၂:၁) ဘဲရံၤ တဲဖျါထီၣ်ဝဲလၢ– “ပှၤသးစၢ်တဖၣ်န့ၣ် အဝဲသ့ၣ်ကဘၣ်မၤလိထီၣ်အသး လၢတၢ်စံၣ်ညီၣ်ဆၢတဲာ်တၢ် တကပၤန့ၣ်လီၤ. ဖဲအဝဲသ့ၣ် ဆၢတဲာ်တၢ်တမံၤမံၤအခါ အဝဲသ့ၣ်ကဘၣ်ဆိကမိၣ်တယာ်ထံဝဲ ဒီးတဘၣ်စံၣ်ညီၣ်ဆၢတဲာ်တၢ်နါစိၤဘၣ်.” (စံးထီၣ်ပတြၢၤ ၁၁၉:၃၄) လၢတၢ်န့ၣ်အဃိ နမ့ၢ်အိၣ်ဒီးနဖိသးစၢ်တဂၤန့ၣ် နဘၣ်အိၣ်ဒီးတၢ်ဆီၣ်လီၤသးဒီး တဲနၢ်ပၢၢ်အီၤလၢ ဘၣ်မနုၤအဃိ နဆၢတဲာ်တၢ်ဒ်အံၤဒ်နုၤလဲၣ်န့ၣ်တက့ၢ်. နမ့ၢ်မၤဒ်န့ၣ်န့ၣ် အဝဲကမၤလိန့ၢ် တၢ်မၤလိလၢ အကဘၣ်ဆၢတဲာ်တၢ်လၢ အနီၢ်ကစၢ်လီၤ. ဒီးအဝဲကသ့ၣ်ညါဝဲလၢ နကဟုကယာ်အီၤ ဒီးနထံၣ်အီၤဒ် ပှၤနီၢ်ဒိၣ်တဂၤန့ၣ်လီၤ.
အိၣ်ဒီးတၢ်သ့ၣ်ညါနၢ်ပၢၢ်တက့ၢ်
၁၂. ခီဖျိလၢ ယ့ၣ်ၡူးအိၣ်ဒီး တၢ်သ့ၣ်ညါနၢ်ပၢၢ်အဃိ အဝဲမၤစၢၤ စီၤပ့းတရူးဒ်လဲၣ်.
၁၂ ယ့ၣ်ၡူးသ့ၣ်ညါနၢ်ပၢၢ်ဝဲ အတၢ်မၢဖိသ့ၣ်တဖၣ် အတၢ်လိၣ်ဘၣ်န့ၣ်လီၤ. အဒိ ဖဲအဝဲစံးဘၣ် အတၢ်မၢဖိသ့ၣ်တဖၣ်လၢ အကဘၣ်တၢ်မၤသံအီၤအခါန့ၣ် စီၤပ့းတရူး တဲကစၢ်ခရံာ်လၢ သးကညီၤလီၤနသးတက့ၢ်. ယ့ၣ်ၡူးသ့ၣ်ညါဝဲလၢ စီၤပ့းတရူးအဲၣ်အီၤဘၣ်ဆၣ် အဝဲသ့ၣ်ညါဝဲလၢ စီၤပ့းတရူး အတၢ်ထံၣ်အံၤ ကမၣ်ဝဲလီၤ. ယ့ၣ်ၡူး မၤစၢၤစီၤပ့းတရူးဒီး အပျဲၢ်အဘီၣ်လၢအဂၤသ့ၣ်တဖၣ်ဒ်လဲၣ်. အဆိကတၢၢ်န့ၣ် အဝဲဘှီဘၣ်ထီၣ်က့ၤ စီၤပ့းတရူးလီၤ. လၢခံ အဝဲတဲနၢ်ပၢၢ်ဝဲ အပျဲၢ်အဘီၣ်သ့ၣ်တဖၣ်လၢ ပှၤလၢတမၤ တၢ်ဘၣ်ယဟိဝၤယွၤအသးလၢၤ ဖဲဘၣ်ကွၢ်ဆၢၣ်မဲာ်ဒီး တၢ်ကီတၢ်ခဲအခါန့ၣ် တၢ်ကကဲထီၣ်အသးဒီး အဝဲသ့ၣ်ဒ်လဲၣ်ဒ်လဲၣ်အဂ့ၢ်န့ၣ်လီၤ. ယ့ၣ်ၡူး တဲစ့ၢ်ကီးဝဲလၢ ယဟိဝၤယွၤကဆိၣ်ဂ့ၤ ပှၤလၢအဟ့ၣ်လီၤအသး လၢအဂီၢ်န့ၣ်လီၤ. (မးသဲ ၁၆:၂၁-၂၇) စီၤပ့းတရူး ဒိးန့ၢ်ဘၣ် တၢ်မၤလိဂ့ၤဂ့ၤလီၤ.—၁ ပ့းတရူး ၂:၂၀, ၂၁.
၁၃, ၁၄. (က) နဖိသ့ၣ်တဖၣ် ကဘၣ်မၤဂၢၢ်ကျၢၤထီၣ် အတၢ်နာ်န့ၣ် နကသ့ၣ်ညါဒ်လဲၣ်. (ခ) နဖိတဖၣ် အတၢ်လိၣ်ဘၣ်န့ၣ် နဃုထံၣ်န့ၢ်အီၤ ကသ့ဒ်လဲၣ်.
၁၃ ဒ်သိးနကနၢ်ပၢၢ် နဖိသးစၢ်တဂၤ အတၢ်လိၣ်ဘၣ်အဂီၢ် ဃ့တၢ်ကူၣ်သ့လၢ ယဟိဝၤယွၤအအိၣ်တက့ၢ်. (စံးထီၣ်ပတြၢၤ ၃၂:၈) တဘျီတခီၣ် ဘၣ်သ့ၣ်သ့ၣ် နကထံၣ်ဘၣ်လၢ အဝဲတအိၣ်ဒီးတၢ်သူၣ်ဖှံသးညီဘၣ်. မ့တမ့ၢ် အဝဲကတဲဟးဂီၤဘၣ်ဝဲ ဒီပုၢ်ဝဲၢ်အဂၤတဖၣ်န့ၣ်လီၤ. ဘၣ်သ့ၣ်သ့ၣ် နကတူၢ်ဘၣ်လၢ အဝဲတတဲဘၣ်နၤတၢ်ဂ့ၢ် အိၣ်ဝဲတမံၤမံၤလီၤ. တဘျီဃီ နတဘၣ် ဆိကမိၣ်လၢ အဝဲမၤခူသူၣ်ဘၣ် တၢ်ကမၣ်တမံၤမံၤန့ၣ်တဂ့ၤ. * (ကွၢ်တၢ်ဂ့ၢ်အဘျဲၣ်တက့ၢ်.) ဘၣ်ဆၣ်နတဘၣ် ကွၢ်ကပာ် အတၢ်ကီတၢ်ခဲ ဒီးဆိကမိၣ်လၢ တၢ်ကလဲၤအသးလၢ အဂ့ၢ်အဝီဒၣ်ဝဲန့ၣ်တဂ့ၤ. နကြၢးမၤစၢၤအီၤ ဒ်သိးအတၢ်စူၢ်တၢ်နာ် ကဂၢၢ်ကျၢၤထီၣ်အဂီၢ်န့ၣ်လီၤ.
မၤစၢၤနဖိသးစၢ်တဖၣ် ဒ်သိးအဝဲသ့ၣ် ကအိၣ်ဒီး တံၤသကိးလၢအဂ့ၤ လၢတၢ်အိၣ်ဖှိၣ်အပူၤတက့ၢ် (ကွၢ်လံာ်အဆၢ ၁၄)
၁၄ ဒ်သိးနမၤစၢၤနဖိ ကသ့အဂီၢ် နကဘၣ်သံကွၢ်အီၤ တၢ်သံကွၢ်လၢ တၢ်သူၣ်အိၣ်သးအိၣ်အပူၤလီၤ. တၢ်အံၤလီၤဂာ်ဒ်သိး နထုးထီၣ်ထံလၢ ထံကမျၢ (ထံပူၤ) အပူၤလီၤ. နမ့ၢ်ထုးထီၣ်ထံချ့ချ့န့ၣ် နထုးထီၣ်ထံ တန့ၢ်အါအါဘၣ်. ဒ်န့ၣ်အသိး ဖဲနသံကွၢ်နဖိအခါ နမ့ၢ်တအိၣ်ဒီး တၢ်ဝံသးစူၤ မ့တမ့ၢ် နမ့ၢ်မၢဆူၣ်အီၤ လၢအကစံးဆၢက့ၤနၤ တဘျီဃီန့ၣ် တမ့ၢ်လၢနကသ့ၣ်ညါဘၣ် တၢ်အိၣ်လၢ အသးပူၤနီၢ်ကီၢ်ဘၣ်. (ဖး ကတိၤဒိ ၂၀:၅ တက့ၢ်.) အံၣ်လါရံၣ်ယၤ သ့ၣ်နီၣ်ထီၣ်က့ၤလၢ ဖဲအသးစၢ်အခါ အဝဲအဲၣ်ဒိးရ့လိာ်အသး ဒီးအတံၤသကိးလၢကၠိတဖၣ် ဘူးဘူးတံၢ်တံၢ်လီၤ. ဘၣ်ဆၣ် အဝဲသ့ၣ်ညါဝဲလၢ တၢ်အံၤန့ၣ်ကမၣ်ဝဲလီၤ. ဖဲန့ၣ်အဆၢကတီၢ် အမိၢ်အပၢ်သ့ၣ်တဖၣ် ပာ်သူၣ်ပာ်သးဘၣ်လၢ အဖိမုၣ်န့ၣ် အိၣ်ဒီးတၢ်ဘၣ်ယိၣ်တမံၤမံၤန့ၣ်လီၤ. အံၣ်လါရံၣ်ယၤ တဲဝဲလၢ– “ဘၣ်တဟါန့ၣ် ယမိၢ်ယပၢ် တဲယၤလၢ အဝဲသ့ၣ်ထံၣ်ဘၣ်ဝဲလၢ ယသးတမုာ်ဘၣ်ဒီး အဝဲသ့ၣ် သံကွၢ်ယၤလၢ မ့ၢ်ယတၢ်ကီတၢ်ခဲအိၣ်တမံၤမံၤဧါ. ဖဲန့ၣ်အခါ ယဟီၣ်ဒီးယတဲဖျါထီၣ် ယတၢ်အိၣ်သးဒီး ယဃ့တၢ်မၤစၢၤလၢ ယမိယပါ အအိၣ်လီၤ. အဝဲသ့ၣ် ဖိးဟုယၤ ဒီးတဲဝဲလၢ အဝဲသ့ၣ်နၢ်ပၢၢ်ဝဲယတၢ်တူၢ်ဘၣ် ဒီးကမၤစၢၤယၤန့ၣ်လီၤ.” တဘျီဃီန့ၣ် အံၣ်လါရံၣ်ယၤ အမိၢ်အပၢ် မၤစၢၤအဖိမုၣ်ဒ်သိး အဝဲကအိၣ်ဒီး အတံၤသကိးလၢ တၢ်အိၣ်ဖှိၣ်ပူၤန့ၣ်လီၤ.
၁၅. ယ့ၣ်ၡူး အိၣ်ဒီးတၢ်သ့ၣ်ညါနၢ်ပၢၢ်န့ၣ် အဝဲပာ်ဖျါထီၣ်လၢကျဲဒ်လဲၣ်.
၁၅ ယ့ၣ်ၡူးအိၣ်ဒီးတၢ်သ့ၣ်ညါနၢ်ပၢၢ် ခီဖျိလၢ အဝဲထံၣ်ဘၣ်ဝဲ အပျဲၢ်အဘီၣ်သ့ၣ်တဖၣ် အတၢ်ဂ့ၤတၢ်ဝါန့ၣ်လီၤ. အဒိ ဖဲစီၤနၤသန့လး သ့ၣ်ညါဝဲလၢ ယ့ၣ်ၡူးမ့ၢ် ပှၤနစၤရံးဖိအခါ အဝဲစံးဝဲလၢ– “တၢ်ဂ့ၤတၢ်ဝါ တမံၤမံၤ ဟဲထီၣ်လၢ နစၤရံးအပူၤ ဘၣ်ကသ့ဧါ.” (ယိၤဟၣ် ၁:၄၆) နမ့ၢ်အိၣ်ဘၣ်လၢ တၢ်ဆၢကတီၢ်ဖဲန့ၣ်န့ၣ် မ့ၢ်နကဆိကမိၣ်ဘၣ်လၢ စီၤနၤသန့လး မ့ၢ်ပှၤလၢ အတဲဟးဂီၤတၢ်, ဆိကမိၣ်ဆံးတၢ်, မ့တမ့ၢ် ပှၤလၢအတၢ်နာ်စှၤတဂၤန့ၣ်ဧါ. ယ့ၣ်ၡူး တထံၣ်အီၤဒ်န့ၣ်ဘၣ်. လၢတၢ်န့ၣ်အလီၢ် ယ့ၣ်ၡူးနၢ်ပၢၢ်ဝဲ စီၤနၤသန့လး ဒီးသ့ၣ်ညါဝဲလၢ စီၤနၤသန့လးန့ၣ် မ့ၢ်ပှၤလၢ အတီအလိၤတဂၤန့ၣ်လီၤ. လၢတၢ်န့ၢ်အဃိ ယ့ၣ်ၡူးစံးဝဲလၢအဝဲမ့ၢ်– “ပှၤအံၣ်စရ့လးဖိနီၢ်နီၢ် လၢတၢ်လီတၢ်ဝ့ၤတအိၣ်ဘၣ် လၢအပူၤဘၣ်တဂၤလီၤ.” (ယိၤဟၣ် ၁:၄၇) ယ့ၣ်ၡူး ထံၣ်တၢ်အိၣ်လၢ ပှၤသးပူၤအဃိ အဝဲသူဝဲအတၢ်သ့တၢ်ဘၣ်လၢ အကဃုထံၣ်န့ၢ် ပှၤဂၤအတၢ်ဂ့ၤတၢ်ဝါတဖၣ်လီၤ.
၁၆. ဒ်သိးနဖိသးစၢ်တဂၤ ကဒိၣ်ထီၣ်ထီထီၣ် လၢနီၢ်သးတခီအဂီၢ် နဟ့ၣ်ဂံၢ်ဟ့ၣ်ဘါ အီၤကသ့ဒ်လဲၣ်.
၁၆ နထံၣ်ပှၤဂၤအသး ဒ်သိးယ့ၣ်ၡူး တသ့ဘၣ်သနာ်က့ နနၢ်ပၢၢ်ပှၤဂၤအတၢ်အိၣ်သးသ့ဝဲလီၤ. ယဟိဝၤယွၤ ကမၤစၢၤနၤဒ်သိး နဃုထံၣ်န့ၢ် နဖိတဖၣ် အတၢ်ဂ့ၤတၢ်ဝါ ကသ့ဝဲအဂီၢ်န့ၣ်လီၤ. နဖိသးစၢ်တဂၤ မ့ၢ်မၤသးထီၣ်နၤဒၣ်လဲာ် တဘၣ်တဲအီၤလၢ နမ့ၢ်ပှၤလၢအနၢ်က့ၣ်ဒီး ပှၤလၢအဒုးအိၣ်ထီၣ်တၢ်ကီတၢ်ခဲန့ၣ်တဂ့ၤ. ဒီးတဘၣ်ဆိကမိၣ်လၢ အဝဲမ့ၢ် ပှၤလၢအအၢတဂ့ၤ. မ့မ့ၢ် တဲဘၣ်အီၤလၢ နထံၣ်ဘၣ်အတၢ်ဂ့ၤတၢ်ဝါတဖၣ် ဒီးနနာ်လၢအဝဲ အဲၣ်ဒိးမၤတၢ်လၢအဘၣ်န့ၣ်လီၤ. ဖဲနထံၣ်ဘၣ်လၢ အဝဲဆီတလဲအသး လၢအဂ့ၤတကပၤအခါ ပတြၢၤအီၤတက့ၢ်. မ့ၢ်သ့န့ၣ် ဟ့ၣ်အါထီၣ်အီၤ မူဒါတဖၣ်ဒ်သိး အဝဲကမၤဒိၣ်ထီၣ်ထီထီၣ် အတၢ်ဂ့ၤတၢ်ဝါတဖၣ်န့ၣ်တက့ၢ်. ယ့ၣ်ၡူးမၤစၢၤဝဲ အပျဲၢ်အဘီၣ်တဖၣ်ဒ်န့ၣ်လီၤ. တၢ်ဆၢကတီၢ် ပူၤကွံာ်တနံၣ်ဘျဲၣ်ဝံၤအလီၢ်ခံ ဖဲယ့ၣ်ၡူး ထံၣ်လိာ်က့ၤအသးဒီး စီၤနၤသန့လး (ဘၤသလိမဲ) န့ၣ် ကစၢ်ဟ့ၣ်အီၤ မူဒါလၢအရ့ဒိၣ်တခါန့ၣ်လီၤ. ယ့ၣ်ၡူး ဒုးကဲထီၣ်စီၤနၤသန့လး လၢအတၢ်မၢဖိတဂၤ ဒီးဒ်ယ့ၣ်ၡူးမၢအီၤအသိး အဝဲမၤဝဲလၢတၢ်သးတီအပူၤလီၤ. (လူၤကၣ် ၆:၁၃, ၁၄; မၤတၢ် ၁:၁၃, ၁၄) လၢတၢ်န့ၣ်အဃိ တဘၣ်မၤဒ်သိး နဖိသးစၢ်တဂၤ ကတူၢ်ဘၣ်ဝဲလၢ အဝဲမၤတၢ်န့ၣ် အဘျုးတအိၣ် နီတဘျီဘၣ်န့ၣ်တဂ့ၤ. မ့မ့ၢ်ပတြၢၤအီၤဒီး ဟ့ၣ်ဂံၢ်ဟ့ၣ်ဘါအီၤတက့ၢ်. မၤစၢၤအီၤ ဒ်သိး အဝဲကတူၢ်ဘၣ်ဝဲလၢ အမၤသးခုနၤဒီး ယဟိဝၤယွၤအသးသ့ဝဲ ဒီးသူဝဲ အတၢ်သ့တၢ်ဘၣ်လၢ ယဟိဝၤယွၤအတၢ်မၤအဂီၢ်သ့ဝဲန့ၣ်တက့ၢ်.
တၢ်သိၣ်လိနဲၣ်လိ နဖိတဖၣ်န့ၣ် ကဟ့ၣ်နၤ တၢ်သူၣ်ခုသးခု
၁၇, ၁၈. နမ့ၢ်ဆဲးသိၣ်လိနဲၣ်လိ နဖိသးစၢ်သ့ၣ်တဖၣ် ဒ်သိးအဝဲသ့ၣ်ကအဲၣ် ယဟိဝၤယွၤအဂီၢ်န့ၣ် တၢ်မနုၤကမၤအသးလဲၣ်.
၁၇ နကတူၢ်ဘၣ် တၢ်ဒ်သိးဒီးတၢ်မၢဖိ စီၤပီလူးအသိးန့ၣ်လီၤ. အဝဲသးကိၢ်တၢ်လၢ ပှၤဂၤအဂီၢ် ဒ်အဝဲသ့ၣ်မ့ၢ် အဖိအလံၤတဖၣ်အသိးလီၤ. ပှၤသ့ၣ်တဖၣ်အံၤန့ၣ် စီၤပီလူး မၤစၢၤတ့ၢ်အဝဲသ့ၣ်လၢ ကသ့ၣ်ညါထီၣ် ယဟိဝၤယွၤအဂီၢ်လီၤ. ဒီးစီၤပီလူး အဲၣ်ဘၣ်အဝဲသ့ၣ်ဒိၣ်မးလီၤ. လၢတၢ်န့ၣ်အဃိ ဖဲအဝဲဆိကမိၣ်ထီၣ်ဝဲလၢ ပှၤသ့ၣ်တဖၣ်အံၤအကျါတနီၤ မ့ၢ်တဘူၣ်ထီၣ်ဘါထီၣ် ယဟိဝၤယွၤလၢၤဘၣ်အဂ့ၢ်အခါ အဝဲသးအုးဝဲဒိၣ်မးလီၤ. (၁ ကရံၣ်သူး ၄:၁၅; ၂ ကရံၣ်သူး ၂:၄) ဘံးတၢၣ် လၢအဘၣ်ကွၢ်လုၢ်ဒိၣ်ထီၣ် အဖိသၢဂၤန့ၣ် စံးဝဲလၢ– “ဖဲအဝဲသ့ၣ်အသးစၢ်ဒံးအဆၢကတီၢ်န့ၣ် တမ့ၢ်တၢ်လၢအညီဘၣ်. ဘၣ်ဆၣ် ပလဲၤခီဖျိတၢ်ဆၢကတီၢ်လၢ အပှဲၤဒီးတၢ်သူၣ်ဖှံသးညီ အါန့ၢ်ဒံး ပတူၢ်ဘၣ်တၢ်ကီတၢ်ခဲတဖၣ်န့ၣ်လီၤ. ခီဖျိလၢ ယဟိဝၤယွၤ အတၢ်မၤစၢၤအဃိ ပအိၣ်ဒီး တၢ်ရ့လိာ်သးဒီး ပဖိတဖၣ် ဘူးဘူးတံၢ်တံၢ်လီၤ.”
၁၈ မိၢ်ပၢ်သ့ၣ်ဧၢ မ့ၢ်လၢသုအဲၣ်သုဖိတဖၣ်ဒိၣ်မးအဃိ သုဂုာ်ကျဲးစၢးသိၣ်လိနဲၣ်လိ အဝဲသ့ၣ်န့ၣ်လီၤ. တဘၣ်တူၢ်ၡူနသးတဂ့ၤ. ဖဲနဖိသ့ၣ်တဖၣ် ဆၢတဲာ်လီၤအသးလၢ ကမၤကစၢ်ယွၤအတၢ်မၤ ဒီးဆဲးတီဒီးကစၢ်ယွၤအခါန့ၣ် မ့ၢ်နကသးခုထဲလဲၣ်န့ၣ် ထံၣ်တမှံကွၢ်တက့ၢ်.—၃ ယိၤဟၣ် ၄.
^ လံာ်အဆၢ. 13 မိၢ်ပၢ်သ့ၣ်တဖၣ် မ့ၢ်ဃုတၢ်မၤစၢၤလၢ လံာ်လၢအမ့ၢ် Questions Young People Ask—Answers That Work, Volume 1, page 317, and Volume 2, pages 136-141 သ့ဝဲလီၤ.
