1, 2. (a) Sinka musinke va kara naso vakurona vamwe kovadinkantu vawo? (b) Ngapi vanona nava gwanena mo uwa monomvhura dawo doudinkantu?

APA vanona ava gwana ekuho aso kukara siruwo soruhafo kovakurona vawo. Vana vane vaBerenice navenye kwa gwene ekuho komeho va kare nonomvhura 14. Age kwa tanta asi: “Aso kwa kere siruwo soruhafo kwetu. Ose kwa hefe asi vana vetu vana hara kukarera Jehova. Nye ose twa yi divire asi ngovadinkantu vana vetu ngava ligwanekera nomaudigu.” Ove kuvhura kukara nosinka nsene munoge mudinkantu ndi kuna vyuka koudinkantu.

² Gumwe ogu ga lironga omu ava gazara vanona kwa tanta asi nomvhura doudinkantu kuvhura kudigopera vakurona novanona, nye vakurona va ha gazara asi mudinkantu gwawo ana piyagana ndi mugova. Age kwa tanta hena asi vadinkantu kwa kara noudivi nomalizuvho ntani va hepa siruwo sokukara novakaume. Paapa vana woge vana kara simpe vadinkantu, awo kuvhura va tulise po ukaume wounene naJehova, ngamoomu ga yi rugene Jesus pounona. (Resa Rukasa 2:52.) Awo kuvhura kuwapukurura nkedi zawo zokuzuvhisa  nokutunga po eharo lyenene mokuruganena Karunga. Ntani kuvhura kutura po matokoro gavene, ngwendi kuligava kwaJehova nokumulimburukwa. Nye yisinke wa hepa kurugana ngomukurona mokudeura mudinkantu goge a karere Jehova? Kuvhura o lirongere ko kwaJesus monkedi omu ga dewire varongwa vendi neharo nelinunupiko ntani nounongo.

3. Ngapi vapositoli va yi divire asi Jesus kwa kere kaume kawo?

³ Jesus kapi tupu ga kere ngaHekuru kovapositoli vendi. Nye hena ga kere kaume kawo. (Resa Johanesa 15:15.) Mosiruwo sanare, hekuru kapi nga pwagesere vakareli vendi magazaro nomalizuvho gendi. Nye Jesus kapi nga tekura vapositoli vendi ngwendi vakareli. Age kwa va here ntani nga kara kumwe nawo. Age kwa hefe pokuvatantera omu nga gazara nomu nga lizuvhu, ntani nga va purakene apa ngava mu pwagesere magazaro nomalizuvho gawo. (Marukusa 6:30-32) Nzogera ezi za kere pokatji kaJesus novapositoli vendi za va ninkisire va kare vakaume wovanene ntani kwa va wapaikilire kosirugana esi sa va ndindilire komeho.

4. Vakurona, ngapi nomu kara vakaume novana veni? (Tara efano pepenuno 9.)

⁴ Nampili ngomu wa kara nononkondo kovana woge, kuvhura hena o kare kaume kawo. Vakaume kulitulira po siruwo sokukara kumwe. Nampo kuvhura o sesupike siruwo soyirugana yoge ndi soyininke yapeke yipo o gwane siruwo sokukara novana woge. Esi kuna kara sininke esi wa hepa kugazadara ko unene nokukanderera ko. Vakaume kuhafera yininke yokulifana. Hetekera ko kudiva nomusika edi ga hara mudinkantu goge ndi nomuvi nomaudano. Ntani hafera eyi a hafere. Ilaria, gomoItalia, kwa tanta asi: “Vakurona vange kwa here nomusika edi ngani purakene. Otate kwa ya kere kaume kange gomuwa, ntani na kere nemanguruko lyokuuyunga nawo nampili yininke yonomuga.” Pokukara kaume kovana woge ntani nokuvavatera va kare vakaume vaJehova, kapi ngo zumbanesa nonkondo doge ngomukurona. (Episarome 25:14) Vana woge ngava yi dimburura asi wa va hara nokuvafumadeka, ntani ngayi va mangurukira mokuuyunga nove nkenye eyi.

5. Ngapi varongwa vaJesus va vhulire kuhafa mosirugana saJehova?

⁵ Jesus ga yi divire asi nsene varongwa vendi va litura mo unene mokukarera Jehova nomokuzuvhisa mbudi zongwa, awo ngava hafa. Yipo ga va korangedere va rugane unene mosirugana sokuzuvhisa, ntani ga va tumbwidilire asi nga kara nawo.—Mateusa 28:19, 20.

6, 7. Ngapi no likida eharo kovana woge nsene to va rongo va karere Jehova nkenye apa?

⁶ Ove ono hara vana woge va kare pepi naJehova. Ntani Jehova kuna ku harere o va deure nokuvapisura. Age ga ku pa nonkondo mokuyirugana oyo. (Vaefeso 6:4) Yiyo nye wa hepera kudivilisa asi vana woge va gwane edeuro olyo nkenye apa. Gazadara ko kweyi: Ove wa yi diva asi vana woge kudimba sure morwa erongo lyawo mulyo ntani ono hara va hafere mokulironga yininke yoyipe. Mokulifana, divilisa asi awo kukara komapongo  nokoyigongi nopoukareli wepata. Nye unene po, erongo lyaJehova kuvhura kuvaparura. Yipo nye, va vatera va hafere kulironga kuhamena Jehova ntani va dimburure asi age kuvhura kuvaronga va kare nounongo. (Yisewe 24:14) Ntani deura vana woge mokuza nkenye apa mokuzuvhisa. Kwama sihonena saJesus pokuvavatera va hafere kuronga wopeke Nonkango daKarunga.

⁷ Ngapi omu kukarera Jehova nkenye apa, ngwendi elirongo lyoBibeli nomapongo ntani nokuzuvhisa nayi vatera vadinkantu? Erin, gomoAfrika Mbindakano, kwa tanta asi: “Ose ngatu sivana kuhamena elirongo lyetu lyoBibeli nomapongo ntani nosirugana sokuzuvhisa. Poyiruwo yimwe ngatu yi ruganene wina mokudonganesa elirongo lyetu lyepata yipo li hage. Nye kapi ya dompesere vakurona vetu.” Age kupandura vakurona vendi kweyi va mu vaterere a dimburure omu yininke oyo ya kere nomulyo. Ngesi apa a faura pamwe kepongo ndi mokuzuvhisa, age kulitura mo unene yipo a dire hena kufaura.

8. (a) Ngapi Jesus ga yi likidire asi kwa linunupika? (b) Ngapi elinunupiko lyaJesus lya vaterere varongwa vendi?

⁸ Nampili Jesus gokusikilira mo, age kwa linunupikire ntani kwa tanterere varongwa vendi asi ga hepere evatero lyaJehova. (Resa Johanesa 5:19.) Eyi ya ninkisire varongwa va dire kumufumadeka ndi? Hawe. Moomu va mu mwene asi kwa huguvarere mwaJehova, nawo yimo va huguvarere mwendi. Awo kwa ya kweme sihonena sendi selinunupiko.—Yirugana 3:12, 13, 16.

9. Nsene o tambura mapuko goge nokuhundira egusiropo, ngapi ngayi vatera mudinkantu goge?

⁹ Mokulisiga naJesus, ose kapi twa sikilira mo ntani kulipuka. Eyi yiyo natu linunupikira. Diworoka asi pwa kara yoyinzi eyi no dira kuvhura kurugana, ntani tambura mapuko goge. (1 Johanesa 1:8) Makura mudinkantu goge nga lirongera ko mokutambura mapuko gendi ntani nga ku fumadeka. Nye yilye wa hepa kufumadeka po unene? Muhona ogu a tambura mapuko gendi ndi googu a dili kuhundira egusiropo? Rosemary, ogu ga kara novana vatatu kwa tanta asi nage namugara gwendi ngava tambura mapuko gawo. Age kwa faturura asi: “Eyi ya tumangedere vana vetu va tu mangurukire apa ngava kara nomaudigu.” Age kwa gweda ko asi: “Ose ngatu va rongo omu nava kohonona po maudigu gawo. Apa ngava hepa evatero, ngatu va tantere va ka rese moyimbapiratjangwa yoBibeli, ntani ngatu kanderere kumwe nawo.”

10. Ngapi Jesus ga linunupikire apa ga tanterere varongwa vendi eyi nava rugana?

¹⁰ Jesus ga kere nononkondo mokutantera varongwa vendi eyi nava rugana. Nye morwa kwa linunupikire, age ngava fatwilire eyi nava yi ruganena. Pasihonena, kapi tupu ga va tanterere va hove kupapara Uhompa waKarunga neyi ga hepa ko kwawo. Age kwa  tente hena asi: “Ano yininke eyi nayinye ngano ngava yi mu gwederera po.” Apa Jesus ga va tanterere va hageke kulipangura, kwa fatwilire asi: “Karunga nage nga dire kumupangura. Yeeyi ngava mu pangwisisa koyipangura yeeyi omu pangwisa.”—Mateusa 6:31–7:2.

11. Ngapi no vatera mudinkantu goge pokumufatwilira eyi ono tulire po veta ndi etokoro?

¹¹ Gwana siruwo souhunga mokufatwilira mudinkantu goge eyi ono tulire po veta ndi etokoro. Apa nayi kwata egano, age nga ku limburukwa. Barry, ogu ga rera vanona vane, kwa tanta asi: “Kugava nokonda kuvatera vadinkantu va ku huguvare.” Vadinkantu ngava yi dimburura asi ove kapi tupu o tura po veta ndi etokoro morwa wa kara nononkondo dokuyirugana nye morwa wa kara nokonda zongwa. Ntani diworoka asi vadinkantu kapisi vanonagona. Awo kuna kulironga kuligazarera po vene, ntani vana hara kutura po matokoro gavene. (Varoma 12:1) Barry kwa faturura asi: “Vadinkantu va hepa kulironga kutura po matokoro gokutundilira kokonda zongwa kapisi morwa malizuvho.” (Episarome 119:34) Yiyo nye wa hepera kulinunupika nokufatwilira mudinkantu goge eyi ono tulire po etokoro. Monkedi zangoso, age nga lironga kutura po matokoro gamwene, ntani nga yi dimburura asi ove kumufumadeka ngomu ana kukura.

12. Morwa Jesus ga kere nounongo, ngapi ga vaterere Peturusa?

¹² Jesus kwa kere nounongo ntani ga kwete egano eyi va hepere varongwa vendi. Pasihonena, apa Jesus ga tanterere varongwa vendi asi tava ka mu dipaga, Peturusa kwa tanterere Jesus asi: ‘Ya ha kuhorokera Hompa.’ Jesus ga yi divire asi Peturusa ga mu here, nye ga yi divire hena asi Peturusa kwa kere nomagazaro gepuko. Ngapi Jesus ga vaterere Peturusa novarongwa vakwawo? Pomuhowo, ga vyukisire Peturusa. Makura, Jesus ga fatwilire eyi ngayi horokera ava ava nyoka mpango zaJehova morwa udigu kuzisikisa mo. Jesus ga tente asi Jehova nga futa ava ava dili kuligazara tupu vene. (Mateusa 16:21-27) Peturusa ga lirongerere ko.—1 Peturusa 2:20, 21.

13, 14. (a) Yisinke nayi likida asi mudinkantu goge ana hepa kunkondopeka epuro lyendi? (b) Ngapi no diva asi munonge ana hepa evatero?

¹³ Kanderera kwaJehova a ku pe ko unongo yipo o kwate egano eyi ana hepa mudinkantu goge. (Episarome 32:8) Nampo to ya dimburura asi kapi ana hafa ngwendi pwanare ndi kuna kuuyunga momudona vanavazinyetu. Walye to lizuvhu asi koyili eyi ana kudira kukutantera. Wa ha genderera kugazara asi mudinkantu goge koyili yoyidona ana kurugana mehoramo. * Nye wa ha ncenuna udigu ndi o gazare asi ngau haga. Kuvhura yi kare asi ana hepa evatero a nkondopeke epuro lyendi.

¹⁴ Mokudiva omu no vatera mudinkantu goge, mu pura mapuro monkedi zongwa zefumadeko. Ayo ngwendi kuna kuvheta mema metope. Nsene to genderere kugavheta, kapi no vheta gomanzi moomu ono ga harere. Mokulifana, nsene o dira kulididimika pokupura mapuro ndi o sininike mudinkantu goge  a uyunge, kapi no diva magazaro nomalizuvho gendi. (Resa Yisewe 20:5.) Ilaria ta diworoka apa ga kere mudinkantu, age kwa here kukara siruwo sosire novanasure vakwawo nye ga yi divire asi epuko. Vakurona vendi va yi dimbwilire asi koyili yina mu guvisa. Ilaria kwa tanta asi: “Ezuva limwe, awo kwa tanterere nge asi vana yi dimburura asi nina guwu, ntani va pulire nge asi udigu musinke. Makura tani tameke kulira, nokuvafatwilira ukaro, ntani nokupura evatero. Awo kwa lidingilire nge nokutantera nge asi vana yi kwata egano nokutumbwidira nge asi tava vatere nge.” Vakurona vaIlaria yipo va mu vaterere a tulise po vakaume mombungakriste.

15. Monkedi musinke zimwe Jesus ga likidire asi ga kara nounongo?

¹⁵ Jesus ga kere nounongo apa ga konekere yikara yoyiwa yovarongwa vendi. Pasihonena, apa Natanayera ga zuvhire asi Jesus kwa tunda moNasareta, kwa uyungire asi: “MoNasareta nani kuvhura kutunda mo yoyiwa?” (Johanesa 1:46) Ngano nove yipo wa kere, ngano wa gazarere asi Natanayera kwa kere mepuko ndi kapi ga kere nepuro? Jesus kapisi yimo ga gazarere ngoso. Nye, age kwa kere nounongo ntani ga divire asi Natanayera kwa uyungire usili, yipo ga tente asi: “Muisraeli mwene-mwene ga hana umbudi.” (Johanesa 1:47) Jesus ga divire yomomutjima, ntani ga ruganesere udivi owo mokutara yikara yoyiwa movantu.

16. Ngapi no korangeda mudinkantu goge a wapukurure ukaro wendi?

¹⁶ Nampili ngomu no dira kudiva yomomutjima ngwendi Jesus, nye kuvhura kukara nounongo. Jehova nga ku vatera o dimburure yikara yoyiwa yomudinkantu goge. Nampili mudinkantu goge a ku handukise, kapisi o uyunge asi age muntu gomudona ndi kapi a zuvhu. Wa ha mu gazarera yininke  yangoso. Nye, mu tantera asi ono dimburura yikara yendi yoyiwa ntani asi ana hara kurugana youhunga. Koneka eyi na wapukurura, ntani mu pandadeka. Mu vatera a demenene koyikara yendi yoyiwa pokumupa yitumbukira nsene hepero. Oyo yiyo ga rugene Jesus novarongwa vendi. Konyima zomvhura noharufa zapa ga ligwene naNatanayera (ava tumbura asi Baratoromeusa), Jesus kwa mu pere situmbukira somulyo. Age kwa horowere Natanayera a kare mupositoli, ntani Natanayera ga rugene eyi ga mu pere Jesus. (Rukasa 6:13, 14; Yirugana 1:13, 14) Mevango lyokuninka mudinkantu goge a lizuvhe asi eyi a rugana yidona, mu pandadeka nokumukorangeda. Mu vatera a lizuvhe asi age kuvhura a ku hafese ntani a hafese Jehova. Ntani asi kuvhura a ruganese udivi wendi mokukarera Jehova.

17, 18. Yitundwamo musinke a yi kara nsene to deura mudinkantu goge a karere Jehova?

¹⁷ Ove kuvhura o lizuvhe ngwendi mupositoli Paurusa. Age kwa kere nosinka kowo va kere ngwendi vanona. Age kwa va vaterere kulironga kuhamena Jehova, ntani ga va here unene. Age kwa mu koresere pokugazara asi vamwe mo vawo kapi ngava twikira kukarera Jehova. (1 Vakolinte 4:15; 2 Vakolinte 2:4) Victor, ogu ga rera vanona vatatu, kwa tanta asi: “Nomvhura doudinkantu kapisi ureru. Nye, yiruwo yoyiwa kutuninkisa tu divare maudigu. Nevatero lyaJehova, ose kuhafera ukaume novana vetu.”

¹⁸ Vakurona, one kukondja mokudeura vana veni morwa mwa va hara. Mwa ha roroka. Gazareni ruhafo oru ngomu kara naro apa vana veni ngava tura po etokoro lyokukarera Karunga ntani nokutwikira kumulimburukwa.—3 Johanesa 4.