1, 2. (a) Yumanyi yakamañawu anvwali akweti atumpululu? (b) Anyana anateli kuhetelamu ñahi muyaaka yawu yawukampululu?

 ANYANA chapapatishewawu, anvwali azañalalaña nankashi. Anyana kamuhela Berenice ejima awana apapatisheweli henohu kanda ashikiji yaaka 14. Wahosheli nindi: “Twatiyili kuwaha nankashi nawa twadilili. Twatiyili kuwaha muloña anyanetu akeñeleña kumuzatila Yehova. Ilaña twelukili netu anyanetu akamonaña kweseka chekalawu atumpululu.” Ninenu munateli kudakamena neyi anyanenu hiyatumpululu hela keña ekali atumpululu.

² Muntu wumu wadiza nankashi chatoñojokañawu antu wahosheli nindi yaaka yawukampululu yinateli kwikala yakala kudi anvwali nianyana, ilaña anvwali bayi atoñojoka nawu anyanawu atiyaña wanyi hela nawu achidi atwansi mumaana. Wahosheli cheñi nindi anyana ekala namaana, ahilaña nawa akeñaña kuhema nawakwawu. Hela achidi atumpululu, anyanenu anateli kwikala nawubwambu wakola naYehova, neyi cheliliyi Yesu hadiñayi kansi. (Tañenu  Luka 2:52.) Niwena anateli kuwahisha njila jakushimwinamu nikufwila kuzata chikupu mumudimu waNzambi. Nawa anateli kudifuukwilahu aweni, chidi neyi kudihana kudi Yehova nikumwovwahila. Hanu munateli kwila ñahi enu anvwali hakudizisha anyanenu atumpululu kumuzatila Yehova? Munateli kudizila kudi Yesu chadizishiliyi atumbanji twindi mukukeña, kudizoza ninakashinshi.

3. Apostolu elukili ñahi nawu Yesu wadiña ibwambu dawu?

³ Yesu hadiña hohu Ntañishi yawapostoluku. Wadiña cheñi ibwambu dawu. (Tañenu Yowanu 15:15.) Mpinji yakunyima, muntu walejeleña wanyi anduñu jindi chinakutoñojokayi. Ilaña Yesu wamweneña wanyi atumbanji twindi neyi anduñu. Wayikeñeli nawa wahanjekeleña nawu. Wayilejeleña chatoñojokeleñayi nawa watiyilileña nakanañachima neyi anakuhosha chinakutoñojokawu. (Maku 6:30-32) Iku kuhanjeka kwadiña hakachi kaYesu nawapostolu indi kwayiletesheli ekali amabwambu nawa kwakwashili apostolu kudiloñesha kuzata mudimu kumbidi.

4. Anvwali, munateli kwikala ñahi amabwambu nawanyanenu? (Talenu mwevulu wakutachikilahu.)

⁴ Hela chakwila mukweti ñovu hadi anyanenu, munateli kwikala amabwambu jawu. Amabwambu ahanjekaña. Bayi mumanishila mpinji yejima kukuzata nyidimu yakumujimbaku, ilaña ikalenu nampinji yakuhanjeka nawanyanenu. Dichi mwatela kulombelahu nikutoñojokahu. Amabwambu akeñaña yuma yoyimu. Dichi ilukenu yuma yakeñayi mwanenu, chidi neyi tumina, mafwilimu hela yisela. Esekenu kwila yuma yakeñañayi. Ilaria wakuItaly, wahosheli nindi: “Anvwali jami akeñeli tumina tunadiña nakutiyilila. Atata ekalili ebwambu dami, dichi nadiña wakasunuka kuyileja nsañu yidi yejima.” Neyi mwikala amabwambu nawanyanenu nikuyikwasha kwikala amabwambu jaYehova, anyanenu akayidiwula wanyi. (Masamu 25:14) Anyanenu akeluka nawu mwayikeña nawa mwayilemesha, dichi chikuyipelela kuhanjeka nenu nsañu yidi yejima.

5. Atumbanji twaYesu adi kwikala ñahi namuzañalu hakuzata mudimu waYehova?

⁵ Yesu welukili nindi atumbanji twindi akwikala namuzañalu neyi atwalekahu kumuzatila Yehova neyena nikushimwinaña nsañu yayiwahi. Dichi wayikolesheli kuzata nañovu mumudimu wakushimwina nawa wayikanini nindi wukayikwashaña.—Matewu 28:19, 20.

6, 7. Mwamwekeshaña ñahi nenu mwayikeña anyanenu neyi muyidizisha kumuzatila Yehova?

⁶ Mwakeñaña anyanenu kwikala nawubwambu naYehova. Nawa Yehova nakukeña nindi mudizishi anyanenu nikuyifumba. Wayinka iwu mudimu. (Aefwesesa 6:4) Dichi mwatela kushaku maana chikupu kudizisha anyanenu mpinji yejima. Toñojokenu hachumiche: Mwatwalaña anyanenu kushikola muloña mweluka nenu shikola yalema nawa munakukeña nenu akatañi. Munjila yoyimu, mwatela kuleja anyanenu ayeña nakupompa, kupompa kwañinza nikudifukula kwachisaka. Muloña yuma yayidizishañayi Yehova yikayikwasha kupuluka. Dichi yikwashenu amwiluki Yehova nikwiluka nawu nateli kuyidizisha kwikala namaana.  (Yishimu 24:14) Dizishenu cheñi anyanenu kushimwinaña mpinji yejima. Imbujolenu Yesu kuhitila mukukwasha anyanenu kudizisha antu Izu daNzambi.

⁷ Yuma yitwelaña hakumuzatila Yehova yidi neyi kudiza, kupompa nikushimwina yinateli kukwasha ñahi atumpululu? Erin, wakuSouth Africa, wahosheli nindi: “Etu anyana kakavulu twakeñaña wanyi kudiza Bayibolu, kupompa nikushimwina. Mpinji yikwawu twelileña yuma yakuluwañesha kudifukula kwachisaka kulonda tubuli kutwalekahu. Ilaña anvwali jetu etejeleña wanyi.” Erin wasakililaña anvwali jindi muloña amukwashili kulemesha iyi yuma yakuspiritu. Neyi yabula kuya nakupompa hela kushimwina, wanukaña yuma yelileñayi kunyima.

8. (a) Yesu wamwekesheli ñahi nindi wadiña wadizoza? (b) Kudizoza kwaYesu kwayikwashili ñahi atumbanji twindi?

⁸ Hela chakwila Yesu wadiña wawanina, wadiña wadizoza nawa wamwekesheli kudi atumbanji twindi nindi wakeñeleña wukwashu waYehova. (Tañenu Yowanu 5:19.) Komana chumichi chaletesheli atumbanji kumudiwula Yesu? Inehi. Chamwenuwu nawu washindameneni hadi Yehova, amukuhweleleli chikupu. Dichi chimwahitili mpinji, atachikili kwimbujola kudizoza kwindi.—Yililu 3:12, 13, 16.

9. Anyanenu atumpululu akudizila kwodi chimweteja neyi munaluwañeshi nawa mudanakena?

⁹ Kwambukaku naYesu, twawanina wanyi nawa twaluwañeshaña. Dichi ikalenu adizoza. Ilukenu nenu kwekala yuma yayivulu yimunateli kukañanya kwila nawa itejenu neyi munaluwañeshi. (1 Yowanu 1:8) Mwanenu niyena wukwitejaña neyi naluwañeshi nawa wukuyilemeshaña. Hinyi imwalemeshaña? Mukulumpi wamudimu walombaña kwanakena neyi naluwañeshi tahindi wabulaña kudanakena? A Rosemary adi nawanyana asatu ahosheli nawu wena nawanfumwawu etejeleña neyi analuwañeshi. Alumbulwili nawu: “Chumichi chakwashili anyanetu kwikala akasunuka kutwileja neyi adi nakukala.” Ahosheli cheñi nawu: “Twayilejeli kwakuwana wukwashu neyi adi nakukala. Neyi anakukeña wukwashu, twayilejaña nsañu yekala munyikanda yashindamena haBayibolu, nawa twalombeleña nawu hamu.”

10. Yesu wamwekesheleña ñahi kudizoza nihampinji yalejeleñayi atumbanji twindi mwakwilila?

¹⁰ Yesu wadiña nañovu yakuyileja atumbanji twindi yuma yakwila. Ilaña chineli wadiña wadizoza, wayilumbulwilileña muloña wuyatela kwilila chumochu. Chakutalilahu, wayilejeli hohu wanyi kutwamijaku Wanta waNzambi nikuloña kwindi. Ilaña wayilejeli cheñi nindi: “Niyuma yejimiyi akayishilaku.” Yesu chayilejeliyi kuleka kusompesha akwawu, wahosheli nindi: “Kulonda  abuli kuyisompesha ninenu. Muloña kusompesha kumukusompesha akwenu diku kwakayisompeshawu nachu ninenu.”—Matewu 6:31–7:2.

11. Munateli kukwasha ñahi mwanenu wakampululu neyi mumulumbulwila chimunakasili lushimbi hela chimunafuukwili mwenomu?

¹¹ Mulumbulwilenu mwanenu chimunenkeluku olu lushimbi hela chimunafuukwili mwenomu. Neyi yeluka, wukwovwahila. A Barry akulishili anyana awana ahosheli nawu: “Anyana akuyikuhwelela neyi muyilumbulwila chimunafuukwili mwenomu.” Anyanenu atumpululu akwiluka nawu munakasi hohu wanyi lushimbi muloña wañovu yimukweti, ilaña kudi chinaleteshi mwili mwenomu. Mwatela kwiluka cheñi nenu atumpululu hiyatwansi wanyi. Anakudiza chakuditoñojokela nawa anakukeña adifuukwileña awenawu. (Aroma 12:1) A Barry alumbulwili nawu: “Atumpululu atela kufuukula chiwahi kushindamena hachinakutoñojokawu bayi chinakutiyawuku.” (Masamu 119:34) Dichi ikalenu adizoza nawa yilumbulwilenu anyanenu chimunafuukwili mwenomu. Neyi mwila mwenimu, mwana wukudiza kudifuukwila yomweni nawa wukwiluka nindi mwamulemesha nawa nindi muneluki nenu hakukula.

12. Chineli Yesu wadiña nakashinshi, wamukwashili ñahi Petulu?

¹² Yesu wadiña nakashinshi nawa welukileña chakukwasha atumbanji twindi. Chakutalilahu, chelili Yesu yaleji atumbanji twindi nindi akumujaha, Petulu wamulejeli Yesu nindi watela kuditiyila luwi. Yesu welukili nindi Petulu wadiña wamukeña, ilaña welukili cheñi nindi watoñojokeli mwaluwa. Yesu wamukwashili ñahi Petulu niatumbanji amakwawu? Chatachi, wamufumbili Petulu. Kuhiñahu, Yesu walumbulwili yuma yikamwekena antu abulaña kwila nkeñelu yaYehova mumpinji yakala. Wahosheli cheñi nindi Yehova wakakiswila antu ahanaña. (Matewu 16:21-27) Petulu wadizililuku.—1 Petulu 2:20, 21.

13, 14. (a) Yumanyi yikumwekesha nawu mwanenu nakukeñeka kukolesha chikuhwelelu chindi? (b) Munateli kwiluka ñahi chakukwasha mwanenu weyala hela wamumbanda?

¹³ Lombenu Yehova yayikwashi mwikali nakashinshi kulonda mwiluka chakukwasha mwanenu wakampululu. (Masamu 32:8) Hadaha mwanenu nakumwekana kuneña hela natachiki kuhosha chatama hadi amanakwetu. Indi kwiji munakutoñojoka nenu kudi nsañu yinakuyijindayi. Bayi mutachika kutoñojoka nenu mwanenu nakwila yuma yatama kumbaduku. * (Talenu tumazu twaheshina.) Ilaña bayi mudiwulaku hohuku hela nenu kukala kukamana kwakweni. Hadaha mwatela kumukwasha kwikala nachikuhwelelu chakola.

¹⁴ Hakwila mwiluki chakukwasha mwanenu wakampululu, mwihulenu mumesu awunda nawa nakalemesha. Chidi neyi kutaha menji mwishima dakunama. Neyi mukutaha lufuchi, menji ejima akusumpokamu. Munjila yoyimu, neyi mwahilaña swayi chimwehula lwihu hela kumukanjikija kuhosha, mukwiluka wanyi yuma yinakutoñojokayi hela chinakutiyayi.  (Tañenu Yishimu 20:5.) Ilaria wanukaña hampinji yadiñayi kansi nindi wakeñeleña kuhema nawakwawu akashikola mpinji yeneni henohu welukili nindi chatama. Anvwali jindi elukili nawu kudi chuma chinakumukabisha. Ilaria wahosheli nindi: “Ifuku dimu namelela, ansolomokeli nakuñihula kukala kunadiñi naku. Nashikeneni dakudila nawa nayilumbulwilili kukala kunadiñi naku, dichi nalombeli nami ankwashi. Ankumbatili nakunleja nawu anachitiyi nawa anlejeli nawu akunkwasha.” Avwali jaIlaria atachikili kumukwasha kulonda yekali nawamabwambu amawahi muchipompelu.

15. Yesu wamwekesheli ñahi cheñi nindi wadiña nakashinshi?

¹⁵ Yesu wazatishili kashinshi hakwiluka yililu yayiwahi yadiña nawatumbanji twindi. Chakutalilahu, Nataneli chatiyiliyi nindi Yesu wafumini kuNazareta wahosheli nindi: “Chuma chachiwahi chitweshi kufuma muNazareta?” (Yowanu 1:46) Neyi mwadiña kwoku, mwadi kutoñojoka nenu Nataneli wahosheli chatama hela wadiwili indi kwiji nenu wadiña nachikuhwelelu wanyi? Yesu dichatoñojokeliyi wanyi. Ilaña wadiña nakashinshi nawa welukili nindi Nataneli wadiña washinshika, dichi wahosheli nindi: “Talenu kaIsarela kakeni wakadi makasu.” (Yowanu 1:47) Yesu welukileña yuma yidi munyichima yawantu nawa wazatishili iwu wuswa hakumona yililu yayiwahi mudi wena.

16. Munateli kukolesha ñahi mwanenu wakampululu kuyilaku hambidi?

¹⁶ Hela chakwila munateli kwiluka wanyi yuma yidi munyichima yawantu neyi chelileñayi Yesu, munateli kwikala nakashinshi. Yehova nateli kuyikwasha kumona yililu yayiwahi mudi anyanenu. Neyi mwanenu nayineñeshi, bayi muhosha nenu watama hela nenu hichiluwañimbi. Bayi mumutoñojokela mwenimuku. Ilaña mulejenu nenu mwamonaña yililu yayiwahi yikwetiyi nawa nenu  munakuhweleli nenu nakufwila kwila mwaloña. Monenu chinakuzatayi chiwahi nawa muhamekenu. Mukwashenu kulonda yatwalekuhu kwikali nayililu yayiwahi kuhitila mukumwinka nyidimu yakuzata. Dicheliliyi Yesu nawatumbanji twindi. Chimwahitili chaaka chimu nachikunku, Yesu wamwinkeli Nataneli (wateneneñawu cheñi nawu Batolomewu) mudimu weneni. Wamwilishili kwikala kapostolu nawa Nataneli wazatili nakashinshi mudimu wamwinkeluwu kudi Yesu. (Luka 6:13, 14; Yililu 1:13, 14) Chatela mwanenu wakampululu yatoñojokeña nindi waluwañeshaña mpinji yejima, muhamekenu nawa mukoleshenu. Mulejenu nenu nateli kuyitisha enu niYehova kuwaha nawa nateli kuzatisha wuswa windi kumuzatila Yehova.

17, 18. Yumanyi yikafumamu neyi mutwalekahu kudizisha anyanenu kumuzatila Yehova?

¹⁷ Munateli kutiya neyi chatiyiliyi kapostolu Pawulu. Wadiña nakwakama nankashi hadi antu adiña neyi anyanindi. Awa adiña antu akwashiliyi kumwiluka Yehova, nawa wayikeñeli nankashi. Dichi chamukatileña chatoñojokayi nindi amakwawu hadaha akaleka kumuzatila Yehova. (1 Akorinda 4:15; 2 Akorinda 2:4) A Victor akulishili anyana asatu, ahosheli nawu: “Yaaka yawukampululu yadiña yakala. Ilaña yuma yayiwahi yabadikili kukala kutwamweneña. Yehova watukwashili nawa twekalili nawubwambu wawuwahi nawanyanetu.”

¹⁸ Anvwali, mwazataña nañovu kudizisha anyanenu muloña mwayikeña nankashi. Bayi muzeyaku. Toñojokenu muzañalu wumwakatiya neyi anyanenu afuukulahu kumuzatila Nzambi nikutwalekahu kwikala ashinshika.—3 Yowanu 4.