1, 2. 1) ¿Toni kintekipachoua miakej tetatmej akin kipiaj telpochmej? 2) ¿Toni tein kuali ueli kichiuaj telpochmej?

SE TAMAN tein okachi kinyolpaktia tokniuan akin tetatmej, yejua keman ininkoneuan moauiaj. Se tokniuj siuat akin motokaytia Berenice, kipia naui konemej akin moauijkej achto ke kiajxitiskiaj 14 xiujmej. Kijtoua ke yejua uan inamik semi kinyolpaktiaya kiitaskej ke nochin ininkoneuan kiixtaliayaj kitekitiliskej Jiova. Sayoj ke no kintekipachouaya keman kinemiliayaj ke seki xiujmej satepan ininkoneuan yeskiaj telpochmej uan kipanoskiaj miak ouijkayomej. * Komo tejuatsin tikonpia konemej akin telpochmej oso amo uejkaua yeskij, xa no ijkon tionmonemilia kemej nejin namikuanij.

² Se tapajtijkej kijtoua ke keman konemej mochiuaj telpochmej, semi kinouijmaka miak taman yejuan uan inintatuan. Seki tetatmej xa kinemiliaj ke ininkoneuan amo kinemiliaj tein kichiuaj uan ke kichiuaj seki taman kemej yeskia konemejok. Sayoj ke nejin tapajtijkej kimelaua ke itech xiujmej keman mochiuaj telpochmej,  miak taman kinemiliaj keniuj kichiuaskej, mopapata kemej momachiliaj uan kinekij yetoskej iniuan inintasojikniuan. Tein melauj, telpochmej ueli kichiuaj miak taman tein kuali. Kemej neskayot, uelis kuali mouikaskej iuan Jiova, ijkon kemej kichiuak Jesús keman katka telpochok (xikonixtajtolti Lucas 2:52). No uelis okachi kuali momachtiskej tanojnotsaskej uan kichikauaskej inintanemilil tein kinpaleuis maj kinekikan okachi kuali kitekitiliskej Jiova. Uan uelij ininselti taixpejpenaj, kemej kitekitiliskej Jiova uan kitakamatiskej. Komo tejuatsin tikonpia telpochmej, ¿keniuj uelis tikonpaleuis maj kitekitilikan Jiova? Xikonchiua kemej Jesús. Maj tikitakan keniuj uelis tikonnextilis mokoneuan ke tikontasojta, ke tionyolyemanik uan ke tikonajsikamati.

3. ¿Keyej kimatiaj tatitanilmej ke Jesús katka inintasojikniuj?

³ Ne uejkauj, akin kipiaya takeualmej amo iniuan tajtouaya ika tein kinemiliaya uan tein kimachiliaya. Sayoj ke Jesús amo keman ijkon kichiuak iniuan itatitaniluan. Yejua kiniluij ke amo kinitaya kemej itakeualuan, ta kemej itasojikniuan (xikonixtajtolti Juan 15:15). Yejua semi kintasojtaya uan kinnextiliaya keman kiixtaliaya iniuan yetos uan keman ika yolpakilis kiniluiaya tein kinemiliaya uan tein kimachiliaya. Uan no, kinkakia ika nejmachkayot keman yejuan kiluiayaj tein kinemiliayaj uan tein kimachiliayaj (Mar. 6:30-32). Nochi nejin kinpaleuij tatitanilmej maj kuali mouikakan iuan Jesús uan maj kimatikan keniuj kichiuaskiaj tekit tein satepan kipiaskiaj itech inechikol Dios.

4. ¿Keniuj uelis tetatmej mochiuaskej inintasojikniuan ininkoneuan? (Xikonita taixkopin ipeujyan tamachtilis.)

⁴ Melauak ke tejuatsin tikonixyekana mokoneuan. Sayoj ke no uelis nanmochiuaskej nantasojiknimej. ¿Keniuj? Yekinika, xikonixtali iniuan tionyetos. Melauak ke nejon kijtosneki ke amo tikontayekanaltis tekit oso okseki taman. Nejin taman motelneki se kichiuas, yejua ika xikontataujti Jiova uan xikonnemili keniuj uelis tikonchiuas. Uan ojpatika, xikontemo tikonmatis toni kiuelitaj mokoneuan. Kemej neskayot, ¿katiyejua nekuikatilmej, películas oso neauiltilis okachi kiuelitaj? Xionmochikaua tikonuelitas tein yejuan kiuelitaj. Ompa Italia, se tokniuj siuat akin motokaytia Ilaria kijtoua ke itatuan no peujkej kikakij nekuikatilmej tein yejua kiuelitaya. Yejua ika, yejua peuak kiita ipopaj kemej akin okachi kuali itasojikniuj. Uan nejon kipaleuij maj iuan tajtouani ika tein yeski taman. Yejua ika amo xikonnemili ke amo mitsonpoujkaitaskej mokoneuan komo nanmochiuaj nantasojiknimej oso komo tikonpaleuia maj mochiuakan itasojikniuan Jiova (Sal. 25:14). Okachi kuali, mokoneuan kiitaskej ke tejuatsin tikontasojta uan tikonpoujkaita. Uan nejon tapaleuis maj amo mouikan mitsontapouiskej tein yeski taman.

5. ¿Keniuj ueliskiaj yolpakiskej itatitaniluan Jesús?

⁵ Jesús kimatia ke itatitaniluan yolpakiskiaj komo kitekitiliayaj Jiova uan nochipa tanojnotsayaj. Yejua ika kinyolmajxitij maj kitayekanaltikan tanojnotsalis uan motenkauak kinpaleuis maj kichiuanij nejon tekit (Mat. 28:19, 20).

6, 7. ¿Keyej tetatmej kinextiaj netasojtalis keman kinpaleuiaj ininkoneuan maj nochipa kichikauakan inintakuaujtamatilis?

⁶ Melauak ke tejuatsin tikonneki maj mokoneuan kuali mouikakan iuan Jiova. Uan yejuatsin mitsonmakatok tanauatil xikonmachti uan xikonmelaua mokoneuan (Efes. 6:4). Yejua ika moneki tikonmachtis nochipa ika Biblia. Xiontanemili itech nejin. ¿Keyej tejuatsin tikontitani mokoneuan maj yakan kaltamachtiloyan? Porin tikonmati ke tein ompa kinmachtiskej kinpaleuis satepan.  Yejua ika okachi moneki nochipa tikonuikas mokoneuan nechikolmej, uejueyi nechikolmej uan nantaueyichiuaskej kemej kalyetouanij. Xikonelnamiki ke komo kiixmatij Jiova uelis makisaskej. Yejua ika xikonpaleui maj kinyolpakti kiixmatiskej Jiova uan maj kiajsikamatikan ke yejuatsin uelis kinnextilis maj kuali taixpejpenakan (Prov. 24:14). Uan xikonmachti ke motelneki maj tanojnotsakan. Xikonchiua kemej Jesús uan xikonpaleui mokoneuan maj kinyolpakti kiniluiskej taltikpakneminij tein kijtoua Biblia.

⁷ ¿Keyej semi kuali maj telpochmej momachtikan Biblia, maj yakan nechikolmej uan maj tanojnotsakan? Itech ueyi altepet Sudáfrica, se tokniuj siuat kijtoua ke yejua uan iikniuan amo kiuelitayaj momachtiskej Biblia, yaskej nechikolmej nion tanojnotsaskej. Kemansa keman momachtijtoyaj kemej kalyetouanij kichiuayaj seki taman tein ika kitemouayaj maj amo mosentokaok. Sayoj ke itatuan amo keman mosenkaujkej. Yejua kijtoua ke semi kintasojkamatilia itatuan porin kimachtijkej maj kiita ke motelneki maj se kichiua tein kichikauas se itakuaujtamatilis. Itech nejin tonalmej, keman amo ueli youi se nechikol oso amo ueli tanojnotsati, mochikaua nimantsin oksepa kichiuas.

8. 1) ¿Keniuj kinextij Jesús ke katka yolyemanik? 2) ¿Keniuj kinpaleuij tatitanilmej yolyemanilis tein kinextij Jesús?

⁸ Maski Jesús amo tajtakolej katka, kinextij yolyemanilis uan kiniluij itatitaniluan ke monekia maj Jiova kipaleui (xikonixtajtolti Juan 5:19). Nejin amo kichiuak maj itatitaniluan amo semi kipoujkaitanijok. Ijkon kemej okachi kiitayaj ke Jesús kitajtaniaya Jiova maj kipaleui, okachi iuan takuaujtamatiaj Jesús. Satepan, yejuan no ijkon kichiujkej uan kinextijkej yolyemanilis kemej yejua (Hech. 3:12, 13, 16).

9. ¿Keyej tapaleuia komo tikonnextia yolyemanilis uan tikonijtoua ke tionmopoloj?

⁹ Melauak ke tejuatsin tiontajtakolej, amo kemej Jesús. Amo nochi ueli kuali tikonchiua. Yejua ika, keman tionmopolos, xikonnexti yolyemanilis uan xikonijto ke tionmopoloj (1 Juan 1:8). Neskayot tein tikonkauilis tapaleuis maj mokoneuan no ijkon kichiuakan keman mopoloskej uan okachi mitsonpoujkaitaskej. Porin ¿akoni tejuatsin okachi tikonpoujkaita? ¿Se moteko akin kijtoua ke mopoloj, oso se akin amo keman kijtoua uan amo tajtani maj kitapojpoluikan? Se tokniuj siuat akin motokaytia Rosemary kijtoua ke yejua uan inamik nochipa mochikauayaj kijtoskej ininixpan eyi ininkoneuan ke mopolojkej keman amo kuali kichiuayaj teisa. Yejua kijtoua ke nejon tapaleuij maj ininkoneuan amo mouinij kintapouiskej kuejmolmej tein kipiayaj. Rosemary uan inamik nochipa kinnextilijkej ke komo kipiayaj kuejmolmej, okachi kinpaleuiskia komo kitataujtiayaj Jiova uan kitemouayaj tamachtilis tein kinpaleuiskia itech amaixmej tein motemaka itech inechikol Dios.

10. ¿Keniuj kinextiaya Jesús ke katka yolyemanik hasta keman kiniluiaya imomachtijkauan toni monekia kichiuaskej?

¹⁰ Jesús kipiaya tanauatil kiniluis imomachtijkauan  toni monekia kichiuaskej. Sayoj ke kemej yolyemanik katka, miakpa kinmelauiliaya keyej monekia kichiuaskej teisa. Kemej neskayot, kinnauatij maj achto kitemouanij iTekiuajyo Dios uan “yekchipaukanemilis ten Dios kuelita”. Sayoj ke no kinmelauilij keniuj kinpaleuiskia komo kichiuayaj, keman kiniluij: “Uan nankiseliske nochi ten monekis”. Okse tonal kinnauatij: “Amo xikinixkomaktinemikan [...] aksame”. Sayoj ke kinmelauilij keyej monekia kichiuaskej: “Porin Dios namechixkomakas [...] ika ne tamachiu tenika namejuan nankikuij para nankixkomakaj [...] aksame” (Mat. 6:31–7:2).

11. ¿Keyej semi tapaleuis komo tikonmelauilia mokoneuan keyej tikonixpejpena seki taman?

¹¹ Nochipa keman tejuatsin tikonixpejpenas teisa tein mokoneuan amo kiajsikamatiskej, xikontemo kemanian uelis tikonmelauilis keyej tikonixpejpenak nejon. Ijkon xa okachi kinekiskej tatakamatiskej. Se tokniuj takat akin kipia naui ikoneuan kijtoua ke ijkuak konemej moskaltijtokej okachi takuaujtamatij iniuan inintatuan keman yejuan kinmelauiliaj keyej kiixtaliaj seki taman. Nejin kinpaleuia maj kiajsikamatikan ke inintatuan kitemouaj tein okachi tapaleuis keman kiixpejpenaj seki taman. Xikonelnamiki ke mokoneuan amo nojnelmejok. Yejuan momachtijtokej kuali taixejekoskej uan ininselti taixpejpenaskej (Rom. 12:1). Nejin tepopaj akin ika titajtojtokej no kimelaua ke telpochmej moneki kimatiskej ke amo moneki taixpejpenaskej sayoj ika tein kimachiliaj (Sal. 119:34). Yejua ika, xikonnexti yolyemanilis uan xikonmelauili motelpoch keyej tikonixpejpenak seki taman. Nejon tapaleuis maj no ijkon kichiuakan. Uan no kiitaskej ke tejuatsin tikonpoujkaita uan ke tikonita kemej akin uejueykejya.

12. ¿Keniuj Jesús kipaleuij Pedro?

¹² Jesús nochipa kimatia keniuj kinpaleuis imomachtijkauan. Kemej neskayot, keman kinmelauilij ke yaya kimiktitij, Pedro kiluij maj moikneliani. Jesús kimatia ke Pedro kiluij nejon porin kitasojtaya. Sayoj ke no kimatia ke mopolojtoya. ¿Keniuj Jesús kipaleuij Pedro uan okseki imomachtijkauan? Yekinika kimelauak Pedro. Satepan kijtoj toni kinpanos akin amo kitakamatijok Jiova keman kipanouaj kuejmolmej. Uan satepan kijtoj ke Jiova kintatiochiuis akin motemakaj maj kintajyouiltikan porin kitekitiliaj (Mat. 16:21-27). Pedro kiajsikamatik toni monekia kichiuas (1 Ped. 2:20, 21).

13, 14. 1) ¿Keniuj uelis tikonmatis ox moneki tikonpaleuis semej mokoneuan maj okachi kichikaua itakuaujtamatilis? 2) ¿Toni moneki tikonchiuas komo tikonneki tikonmatis keniuj tikonpaleuis mokoneuan?

¹³ Xikontajtani Jiova maj mitsonpaleui xikonajsikamati mokoneuan uan xikonmati keniuj tikonpaleuis (Sal. 32:8). Xa tikonitas ke semej mokoneuan tayokoya oso ke amo kuali ininka tajtoua tokniuan. Tejuatsin xa tikonnemilis ke onkak teisa tein mokonetsin amo mitsontapouijtok. Amo ijsiujka xikonnemili ke kiichtakachiujtok teisa tein amo kuali. * Sayoj ke no amo xikonchiua kemej yeskia amo teyi panoua oso xikonchia maj kuejmol iselti moyektali. Xa moneki xikonpaleui mokonetsin maj mochikaua itakuaujtamatilis.

¹⁴ Komo tikonneki tikonmatis keniuj tikonpaleuis mokoneuan, xikonchiuili netajtanilmej ika nejmachkayot uan ika poujkaitalis. Nejin uelis tamatis kemej ijkuak se kikixtia at itech se atekoch. Komo amo tikonchiua  ika nejmachkayot uan tionyolijsiui, tikontoyauas miak at. No ijkon, komo tionyolijsiui keman tikonchiuilia netajtanilmej mokoneuan uan tikonchikaujkauia maj mitsonnankilikan, amo uelis tikonmatis toni kinemiliaj uan toni kimachiliaj (xikonixtajtolti Proverbios 20:5). Itech párrafo 4 ika titajtojkej se tokniuj akin motokaytia Ilaria. Yejua kielnamiki ke keman ichpochok katka, kinekia yetos iniuan akin momachtiaya satepan ke kisayaj kaltamachtiloyan. Sayoj ke yejua kimatia ke nejon amo kuali yetoya, uan yejua ika amo kuali momachiliaya. Itatuan kiitakej ke teisa kitekipachouaya. Se tiotak kiluijkej ke kiitayaj ke tayokoxtoya uan kitajtanijkej ox teisa kipanouaya. Yejua peuak choka, kintapouij toni kipanouaya uan kintajtanij maj kipaleuikan. Yejuan kinauajkej, kiluijkej ke kiajsikamatiaj uan motenkaujkej ke kipaleuiskiaj. Yejuan niman peujkej kipaleuiaj maj kinpiani kuali tasojiknimej itech nechikol.

15. ¿Keniuj kinextij Jesús ke kinajsikamatia oksekin?

¹⁵ Jesús kinextij ke kinajsikamatia imomachtijkauan keman kiitaya kualneskayomej tein kipiayaj. Kemej neskayot, keman Natanael kitekakilij ke Jesús katka kayot Nazaret, kijtoj: “¿Xe timoyolilia ke uelis ma aksa kisa yolkuali tech ne pueblo de Nazaret?” (Juan 1:46). Komo tejuatsin ompa tionyetoskia, ¿tikonnemiliskia ke Natanael sayoj kiitaya nepololmej, tachikoitaya uan amo takuaujtamatia? Jesús amo kinemilij nejon. Yejua kiajsikamatia Natanael uan kimatia ke katka se takat akin kijtouaya tein kinemiliaya. Yejua ika kijtoj: “Nikan ualajtok se tagat ten yek melau yolkuali den poui iuan israelitas [...]. Uan yejua ne amo kuikatinemi tech niyolo nion teyi ne takajkayaualis” (Juan 1:47). Jesús uelia kimatia toni kinemiliayaj taltikpakneminij, uan moyekita ke kiitaya ininkualneskayouan.

16. ¿Keniuj uelis tikonpaleuis mokoneuan maj okachi kuali kichiuakan teisa?

¹⁶ Tein melauj, tejuatsin amo ueli tikonmati toni kinemiliaj mokoneuan, sayoj ke uelis tikontemos tikonajsikamatis. Jiova mitsonpaleuis xikonita ininkualneskayouan. Uan komo kemansa mopolouaj, amo keman xikonijto ke amo yolkualmej oso ke amo keman kiyekchiuaskej teisa. Nion xikonnemili nejon. Okachi kuali xikonilui ke tikonita  ininkualneskayouan uan ke tikonmati ke kinekij kuali kichiuaskej teisa. Xikonita keniuj mochikauaj okachi kuali kichiuaskej teisa uan xikonilui ke semi kuali tein kichiuaj. Uan keman uelis, xikonmaka okachi tekimej tein kinpaleuis maj okachi kuali kichiuakan teisa. Yejua nejon kichiuak Jesús iniuan imomachtijkauan. Se xiuit uan tajko satepan ke kiixmatik, Jesús kiixtalij Natanael (akin no motokaytiaya Bartolomé) kemej tatitanil. Uan Natanael kuali kichiuak tekit tein Jesús kimakak (Luc. 6:13, 14; Hech. 1:13, 14). Yejua ika, xikonchiua kemej Jesús. Amo keman xikonchiua maj mokoneuan kimachilikan ke amo teyi kuali kichiuaj. Okachi kuali xikonyolchikaua uan xikonilui ke kuali tein kichiujtokej. Xikonilui ke tejuatsin uan Jiova nanyolpakij nankiitaskej keniuj mochikauaj, uan ke uelis kikuiskej tein ueli kichiuaj uan ijkon kitekitiliskej Jiova.

17, 18. ¿Toni tein kuali panos komo tejuatsin kuali tikonmachtia mokoneuan?

¹⁷ Tatitanil Pablo kinpaleuij miakej maj kiixmatinij Jiova. Yejua katka kemej se tepopaj akin kintasojtaya uan ininka motekipachouaya. Amo kinekia maj nion akin kikauani Jiova (1 Cor. 4:15; 2 Cor. 2:4). Xa kemansa tejuatsin no tionmomachilia kemej momachilij Pablo porin semi ininka tionmotekipachoua mokoneuan. Sayoj ke xikonnemili tein kijtoj se tokniuj akin motokaytia Victor. Satepan ke kiniskaltij eyi ikoneuan, kijtoua ke xiujmej keman mochiujkej telpochmej semi ouijkej katkaj, sayoj ke kijtoua ke okachi kipiakej yolpakilis ke netekipacholis. Ika inepaleuil Jiova, yejua uan inamik uelik mochiujkej kuali inintasojikniuan ininkoneuan.

¹⁸ Tetatmej, tikmatij ke namejuan semi nankintasojtaj nanmokoneuan uan nanmochikauaj kuali nankinmachtiskej. Yejua ika amo ximosenkauakan. Xitanemilikan itech yolpakilis tein nankinpiaskej keman yejuan kiixtaliskej kitekitiliskej Jiova uan amo keman kikauaskej (3 Juan 4).