1, 2. a) ¿Tlenon kinmajmana tajtin itech inkoneuan akin yotelpochtiakej? b) ¿Tlenon ueli kichiuaj akin yotelpochtiakej?

TAJTIN akin iteixpantijkauan Jehová melak pakij ijkuak inkoneuan noapolaktiaj. Se tokniuj itoka Berenice kipiya naui ikoneuj akin onoapolaktijkej ijkuak xikajxiltiayaj 14 xiuitl. Kijtoua ika yejua niman iueuentsin melak pakiyaj ika kitayaj kenon inkoneuan yokitlapejpenijkaj kitekichiuiliskej Jehová. San ika, kintekipachouaya kinemiliskej ika xok uejkauiskia telpochtiaskiaj inkoneuan niman kixnamikiskiaj tlen ouijtika. Tla tejua tikinpiya mokoneuan akin yotelpochtiakej noso telpochtiaskej, kuajli tikmatstokej ika noijki ijkon timomachilia.

² Se tlakatl akin nomachtia ken tekiti totlamachilis kijtoua ika ijkuak tekoneuan telpochtiaj, melak ouijtika panouaj yejuamej niman intajuan. Sekimej tajtin kanaj kinemiliaj ika inkoneuan kichiuaj kentla xtlamachilisejkej noso kentla ok kokonej yeskiaj. San ika, yejuin tlakatl kijtoua ika telpokamej melak miyek tlemach kinemiliaj, kimachiliaj niman kinekij nemiskej imiuan akin nouikaj. Kuakon, telpokamej uelis kichiuaskej miyek tlemach tlen kuajli. Uelis kuajli iuan nouikaskej Jehová, ijkon ken Jesús okichiuj ijkuak telpochtsintli katka (xpoua Lucas 2:52). Noijki uelis nomachtiskej kuajli tenojnotsaskej niman makinekikan  kichiuaskej okseki itech itekiyo Jehová. Niman yejuamej uelis kitlapejpeniskej tlenon kichiuaskej, ken nosentemakaskej itech toTajtsin niman kitlakamatiskej. Tla tejua tikinpiyaj mokoneuan akin yotelpochtiakej, ¿kenon uelis tikinpaleuis makitekichiuilikan Jehová? Xchiua ken Jesús. Matikitakan kenon uelis tikimititis mokoneuan ika tikintlasojtla, tiyolyemanki niman tikinmasikamati.

3. ¿Kenon kimatiyaj itlatitlankauan Jesús ika imiuan nouikaya?

³ Yeuejkaui, akin kinpiayaj intlakeualuan ximiuan tlajtouayaj itech tlen kinemiliayaj niman itech tlen kimachiliayaj. San ika, Jesús xkeman ijkon okichiuj imiuan itlatitlankauan. Yejua okimijli ika xkimitaya kentla itlakeualuan, kimitaya ken akin iuan nouikaj (xpoua Juan 15:15). Melak kintlasojtlaya niman imiuan nemiya. Yejua kimijliaya tlen kinemiliaya niman tlen kimachiliaya. Noijki, kikakiya tlen kinemiliayaj niman tlen kimachiliayaj itlatitlankauan (Marcos 6:30-32). Nochi yejuin okinpaleui kuajli manouikakan iuan Jesús niman okinpaleui itech tekitl tlen kichiuaskiaj tlayekapan.

4. ¿Kenon tajtin uelis iuan nouikaskej inkoneuan? (Xkita tlaixkopinajli kampa peua tlen tomachtijtokej.)

⁴ Maski tejua tikpiya tlanauatijkayotl itech mokoneuan, uelis imiuan timouikas. ¿Kenon? Kachtopa, imiuan xnemi, yejuin kijtosneki ika noneki maka melak xtekiti noso maka xchiua okseki tlemach. Kuakon xtlanemili itech yejuin niman xchiua teoyotl. Ika ome, xyejyeko tikmatis tlenon kuelitaj mokoneuan. Xnemili, ¿katlejua tlakuikaltin kuelkakij? ¿Tlenon kuelitaj nauiltiskej? Xyejyeko tikuelitas tlen yejuamej kuelitaj. Se tokniuj itoka Ilaria, akin chanej Italia, kijtoua ika itajuan okitakej katlejua tlakuikaltin kuelkakiya. Ika tlen okichiujkej, yejua opeuj kita itaj ken se akin kuajli iuan nouika. Yejon okichiuj matlajto iuan itaj san itech tlenon. Kuakon, maka xnemili ika xok uelis tiknauatis mokoneuj tla iuan timouika noso tikchiua iuan manouika Jehová (Salmo 25:14). Mokoneuan kitaskej ika tikintlasojtla niman tikintlakaita. Yejon kichiuas mouan matlajtokan maski san itech tlenon.

5. ¿Tlenon noneki kichiuaskiaj inomachtijkauan Jesús tla kinekiyaj yolpakiskej?

⁵ Jesús kimatstoya ika inomachtijkauan melauak pakiskiaj tla ika inyojlo kitekichiuiliaj Jehová niman chikauak tenojnotsaj. Ika yejon, okinyolchikauj manokojtilikan matenojnotsakan niman okimijli ika kinpaleuiskia makichiuakan yejon tekitl (Mateo 28:19, 20).

6, 7. ¿Tleka tajtin kimititiaj inkoneuan ika kintlasojtla tla kinpaleuiyaj manomachtikan nochipa kichiuaskej tlen Jehová kineki?

⁶ Tejua tikneki ika mokoneuan kuajli manouikakan iuan toTajtsin. Niman Jehová yomitsmakak tlanauatijkayotl niman ijkon xkinmachti niman xkinmelajkatlali mokoneuan (Efesios 6:4). Kuakon noneki xkinmachti nochipa itech Biblia. Xnemili itech yejuin: ¿Tleka noneki mokoneuan mayakan ipan kaltlamachtijli? Pampa tikmatstika ika kinpaleuis ipan innemilis tlen ompa nomachtiskej. Ika yejon, noneki tikitas ika mokoneuan maka manopolouilikan tlanechikojli, uejueyimej tlanechikoltin niman ijkuak tikueyichiua toTajtsin iuan mochanejkauan. Xkilnamiki ika tlen nomachtiskej itech Jehová uelis kinmakixtis. Kuakon xkinpaleui mapakikan ijkuak kitekichiuiliskej Jehová niman makasikamatikan ika yejua uelis kinmachtis kuajli makitlapejpenikan tlen kichiuaskej ipan innemilis (Proverbios 24:14). Noijki noneki tikinmachtis makitakan ika melak noneki titenojnotsaskej. Xchiua ken Jesús niman xkinpaleui mokoneuan mapakikan ijkuak temachtiskej itech Biblia.

⁷ Melak kuajli tla nochipa tomachtiaj Biblia, tiauej ipan tlanechikoltin niman titenojnotsaj. ¿Tleka melak kuajli ika akin yotelpochtiakej makichiuakan nochi yejuin? Se  tokniuj siuatl, akin chanej Sudáfrica, kijtoua ika yejua niman ikniuan xkuelitayaj nomachtiskej Biblia, yaskej ipan tlanechikojli niman tenojnotsaskej. Kemantika hasta kichiuayaj makikajkauakan manomachtikan ken familia. San ika, intajuan xkeman onoteltijkej ika kinmachtiayaj itech Biblia. Yejua kijtoua ika melak kitlasojkamati pampa yejon okimachti ika melak noneki manochiua. Aman, ijkuak xueli yauj ipan tlanechikojli noso ontenojnotsa, kichiua nochi tlen ueli niman ijkon oksejpa yauj.

8. a) ¿Kenon okiteititi Jesús ika yolyemanki katka? b) Pampa Jesús yolyemanki katka, ¿kenon okinpaleui inomachtijkauan?

⁸ Maski Jesús xkipiaya tlajtlakojli, yolyemanki katka niman okimijli inomachtijkauan ika nonekiya kiselis itlapaleuilis Jehová (xpoua Juan 5:19). Yejuin xokichiuj maka sa makitlakaitakan Jesús. Ijkuak kitayaj kenon kitlajtlaniliaya Jehová makipaleui, melak kineltokayaj Jesús. Sakin, yejuamej noijki okichiujkej ken yejua, onochiujkej yolyemankej (Hechos 3:12, 13, 16).

9. ¿Tleka melak kuajli tla tejua tiyolyemanki niman tikijtoua ijkuak timopopoloua?

⁹ Tejua xijkon ken Jesús. Xnochi uelis kuajli tikchiuas. Ika yejon, ijkuak timopopolos, xyolyemanki niman xseli ika otimopopolo (1 Juan 1:8). Yejon kichiuas ika mokoneuan noijki makiselikan ijkuak nopopolouaj niman melak mamitstlakaitakan. Xnemili, ¿akinon melak tiktlakaitaj? ¿Se akin kiselia ijkuak nopopoloua noso se akin xkeman kiselia? Se tokniuj siuatl itoka Rosemary kijtoua ika yejua niman iueuentsin nochipa kijtouayaj ixpan inkoneuan ijkuak nopopolouayaj. Yejua kijtoua ika yejon tlen okinpaleui inkoneuan makinekikan kimijliskej tlen kixnamikiyaj. Niman okinmachtijkej kenon kuajli kiyektlaliskej tlaueltin tlen kipiayaj. Ijkuak kinekiskej makinpaleuikan, nochipa noneki makichiuilikan teoyotl Jehová niman makitejtemokan ipan amatlajkuiloltin tlen kinpaleuis.

10. ¿Kenon okiteititi Jesús ika yejua yolyemanki katka hasta ijkuak kimijliaya inomachtijkauan tlen nonekiya kichiuaskej?

¹⁰ Jesús kipiaya tlanauatijkayotl itech inomachtijkauan niman ueliskia kimijliskia tlenon kichiuaskej. San ika, yejua yolyemanki katka. Ika yejon miyekpa okimijli tleka nonekiya kichiuaskej. Yejua xsan okimijli kachtopa makitejtemokan iTekiuajyo toTajtsin niman imelajkayo, noijki okimijli kenon kinpaleuis tla kichiuaj: “Dios mechmakas nochi tlen mechpoloua”. Niman ijkuak okimijli ika maka mateistlakokan noijki okimijli: “Para ijkon Dios no xmechistlakos, pampa tla nemejuamej nentetlajtlakoltiskej, Dios no mechtlajtlakoltis” (Mateo 6:31–7:2).

11. ¿Kenon uelis kinpaleuis mokoneuan tla tikimijlia tleka itech tlen yotiktlapejpeni tikchiuas?

¹¹ Ijkuak tejua itlaj tiktlapejpenis, xtejtemo kemanon kuajli tikintomilis mokoneuan tleka yejon otiktlapejpeni tikchiuas. Ijkon  yejuamej kinekiskej tetlakamatiskej. Se tokniuj, akin kipiya naui ikoneuan, kijtoua ika tekoneuan akin yotelpochtiakej tlaneltokaj itech intajuan ijkuak kimijliaj tleka kitlapejpeniaj tlen kichiuaskej. Yejuin kinpaleuiya makasikamatikan ika intajuan kinekij mapano tlen kuajli itech tlen kintlapejpeniaj. Xkilnamiki ika mokoneuan xok sa kokonej. Yejuamej nomachtijtokej tlanemiliskej niman kitlapejpeniskej tlen kichiuaskej (Romanos 12:1, TNM). Yejuin tokniuj noijki kijtoua ika akin yotelpochtiakej noneki matlanemilikan ijkuak kitlapejpeniskej tlen kichiuaskej niman maka san ipampa tlen kimachiliaj (Salmo 119:34). Ika yejon, xyolyemanki niman xkimijli mokoneuan tleka noneki nochiuas tlen yotiktlapejpeni. Kuakon, yejuamej uelis kichiuaskej tlen tejua tikchiua niman kitaskej ika tejua tikintlakaita niman ika tikimita kentla akin youejueyiyakej.

12. ¿Kenon Jesús okipaleui Pedro?

¹² Jesús nochipa kimatstoya kenon kinpaleuis inomachtijkauan. Se neskayotl, ijkuak okintomili ika kimiktiskiaj, Pedro okijli ika maka manajmana kichiuas tlen xnonekiya. Jesús kimatstoya ika Pedro okijli yejon pampa kitlasojtlaya. San ika, noijki kimatstoya ika Pedro xkuajli ken tlanemiliaya. ¿Kenon Jesús okipaleui Pedro niman oksekimej inomachtijkauan? Kachtopa okimelajkatlali Pedro. Sakin okijto tlenon ipan nochiuas akin xkitlakamati Jehová ijkuak itlaj kita ouijtika. Niman sakin okijto ika Jehová kinteochiuas akin xsan intech tlanemiliaj (Mateo 16:21-27). Niman Pedro okasikamat yejon (1 Pedro 2:20, 21).

13, 14. a) ¿Kenon uelis tikmatis tla semej mokoneuan kineki xpaleui machikaui itlaneltokil? b) Tla tikneki tikmatis kenon tikinpaleuis mokoneuan, ¿kenon noneki tikchiuas?

¹³ Xtlajtlanili Jehová mamitspaleui niman tikmatis kenon tikinpaleuis (Salmo 32:8). Kanaj tikitas se mokoneuj xok ika iyojlo nemij noso xkuajli tlajtoua itech tokniuan. Kanaj tejua tiknemilis itlaj panoua, san ika, mokoneuj xmitsijlia. * Maka nimantsin xnemili ika itlaj kichiujtika tlaiyankan. San ika, noijki maka xchiua kentla xtlaj panoua noso yejon tlauejli xnoneki yakaj kiyektlalis. Uelis mokoneuj kinekis makipaleuikan machikaui itlaneltokil.

¹⁴ Tla tikneki tikmatis kenon tikinpaleuis mokoneuan, xkintlajtolti tlenon tikneki tikmatis ika tlakaitalistli niman tlasojtlalistli. Yejuin kentla tijkixtiskia atl ipan pozo. Tla xyolik tikchiua niman xkuajli tikchiua, xtijkixtis miyek atl. Kuakon, ijkuak itlaj tiktlajtoltis mokoneuj maka nimantsin xneki mamitsijli niman xkita kenon tikchiua. Tla xijkon tikchiua, xuelis tikmatis tlen kinemiliaj mokoneuan niman tlen kimachiliaj (xpoua Proverbios 20:5). * Ipan párrafo 4 otitlajtokej itech Ilaria. Yejua kilnamiki ika ijkuak ichpochtli katka, kinekiya san kistinemis imiuan akin nomachtia. San ika, yejua kimatstoya ika xkuajli katka, niman ika yejon xkuajli nomachiliaya. Intajuan okitakej ika itlaj kajmanaya. Se tonajli okitakej ika najmanaya niman okitlajtoltijkej tla itlaj xkuajli panouaya. Yejua opeuj choka, okimijli tlen panouaya niman okintlajtlanili makipaleuikan. Kuakon yejuamej okinapalojkej, okijlikej ika kasikamatiyaj niman okijlikej ika kipaleuiskiaj. Niman sakin nimantsin okipaleuijkej makipiya akin iuan nouikas ipan tlanechikojli.

15. ¿Kenon okiteititi Jesús ika kimasikamatiya oksekimej?

¹⁵ Jesús kimasikamatiya inomachtijkauan niman kitaya inkualneskayouan. Se neskayotl, ijkuak Natanael okikak ika Jesús ualeuaya Nazaret, okijto: “¿Intech on tlakamej yejuan chantij ne Nazaret uelis kisas se yejuan  tepaleuis?” (Juan 1:46). Tla tejua ompa tinemiskia, ¿tiknemiliskia ika Natanael san kinemiliaya tlen xkuajli itech oksekimej noso xkipiaya tlaneltokijli? Jesús xijkon otlanemili. Yejua kasikamatiya Natanael niman kimatstoya ika san kijtotoya tlen kinemiliaya. Ika yejon okijto: “Se yejuan melauak hebreo yejuan xkeman tlakajkayaua” (Juan 1:47). Jesús ueli kimatiya tlen kinemiliayaj tlaltikpakchanejkej, niman kuajli nesi ika kitaya inkualneskayouan tlen kipiayaj.

16. ¿Kenon uelis tikinyolchikauas motelpochuan makichiuakan tlen kuajli?

¹⁶ Tejua xuelis tikmatis tlen kinemilijtokej mokoneuan, san ika, kema uelis tikinmasikamatis. Jehová mitspaleuis xkimita inkualneskayouan. Niman tla kemantika nopopolouaj, maka xkijto ika xkuajli nochi tlen kichiuaj noso xok uelis itlaj tikchiuas ika tikinpaleuis. Nion maka xnemili yejon. Xkimijli ika tikita inkualneskayouan niman ika tikmatstika ika kinekij kichiuaskej tlen kuajli. Xkita kenon nochikauaj kichiuaskej tlen kuajli niman xkimijli ika kema kuajli kichiuaj. Niman ijkuak uelis, xkinmaka itlaj makichiuakan tlen makinpaleui kipiyaskej kualneskayomej, ken makichiua teoyotl ijkuak nenkiueyichiuaj Jehová ken familia noso makitejtemo tlen nemomachtiskej. Yejon tlen okichiuj Jesús iuan inomachtijkauan. Ijkuak yopanoka se xiuitl uan tlajko ika kixmatiya, Jesús okimakak tekitl Natanael ken itlatitlankauj akin (noijki kixmati ken Bartolomé). Niman Natanael kuajli okichiuj yejon tekitl (Lucas 6:13, 14; Hechos 1:13, 14). Ika yejon, xchiua ken Jesús, niman maka keman xchiua ika mokoneuan manomachilikan ika xtlaj kuajli kichiuaj. Xkinyolchikaua niman xkimijli tlen kuajli kichiuaj. Xkimijli ika tejua iuan Jehová melak nenpakij pampa yejuamej nochikauaj, niman uelis kitekitiltiskej tlen uelij kichiuaj ika kitekichiuiliskej Jehová.

17, 18. ¿Kenon tonkisas tla kuajli tikinmachtia motelpochuan?

¹⁷ Pablo itlatitlankauj Cristo okinpaleui miyekej makixmatikan Jehová. Yejua katka kentla se tajtli akin kintlasojtlaya niman inpampa najmanaya. Xkinekiya nion se makikajkaua makitekichiuili Jehová (1 Corintios 4:15; 2 Corintios 2:4). Kanaj tejua melak timajmana itech mokoneuan ken Pablo. San ika, xnemili itech tlen okijto Victor se iteixpantijkauj Jehová. Sakin ijkuak okimiskalti ikoneuan, kijtoua ika ijkuak otelpochtiakej melak ouijtika katka. San ika, Jehová okipaleui yejua iuan isiuauj kuajli manouikakan iuan inkoneuan.

¹⁸ Tajtin, tikmatstokej ika nemejuamej melak nenkintlasojtlaj nemokoneuan niman nemochikauaj nenkinmachtiskej. Kuakon maka xkajkauakan tlen nenkichiuaj. Xnemilikan kenon melak nenpakiskej ijkuak yejuamej kitlapejpeniskej kitekichiuiliskej Jehová niman xkeman kikauaskej (3 Juan 4).