Ariñagati Hosué 6:10-15, 20 aba lan hagañeiruni súdaragu ísüraelina uburugu Herikó. Geyegua hamuti uburugu luagu sisi weyu, aban wéiyaasu luagu weyu. Lidan lisedün, geyegua hamuti uburugu sedü wéiyaasu. Adügati Heowá lun lábürühan sun lubarieirun uburugu, ítara liña hárügüdüni ísüraelina. Anihein san somu katei arufuduti inarüni lan le tabahüdagubei Bíbülia?

Anihein meha dan hegeyedaguni súdaragu lubarieirun uburugu le uágunbei habusenra hábürühan lidan binadu dan lun ua lan ni aban anurahati. Ánhaña meha eredera súdaragu saragu dan geyegu lau uburugu, gayaraati meha lagumuchun éigini. Dan le meha hárügüdüni súdaragu uburugu, barǘ hamuti sun le habusenrubei, íbini éigini. Ligía anihein lubéi burí lárigirugu uburugu le agünrinchawagúbei ítara Palestina le ídanbei madari hamá aturiahatiña ni murusun éigini o murusunrügüñein lan hadarirun. Gama lumoun, mama ligiaméme asuseredubei lun uburugu Herikó. Según aban garüdia, darihaña aturiahatiña siensia saragu ilaü luma gíndili. Ariñagatu garüdia to ua lan kamani lan ladarirún saragu ilaü lidan burí uburugu le meha agünrinchawagúbei ítara.

Ariñagatu Bíbülia manügün hamani súdaragu ísüraelina éigini le Herikóbei ladüga ariñaga lan Heowá houn lun manügün hamani (Hosué 6:17, 18). Ariñagatu giñe Bíbülia ábürüha hamá luagu uburugu murusun dan lárigiñe lidaani alubahani. Ligía gibe lubéi ilaü lidan uburugu dan le hábürühanbei luagun (Hosué 3:15-17; 5:10). Ligíati, sun burí ilaü le adarirúbei lidan lárigirugu uburugu Herikó chóurugüda lumuti ragǘ hamani ísüraelina uburugu lidan murusun dan, ítara kei tariñaguni Bíbülia.