Nitre israelita rükä juta Jericó diani ño jai ye Josué 6:10-15, 20 tä mike gare. Niaratre nänbare köbö ti juta ye bäre ta, aune nänbare kwetre batibe köbö kwatire kwatire te juta ye bäre ta. Köbö kükükäre yete nänbare bä kükü kwetre bäre ta. Juta Jericó yebiti ki krikri nämene mikani ye Jehovakwe mikani niken tibien, aune ye ngwane nitre israelita diani jai. ¿Kukwe namani bare kirabe kädrieta Bibliabätä ye metre o ñakare ye dre dre tä mike gare?

Kirabe sete, nitre rükä tö nämene ja mikai juta keteiti rüere ye ngwane, ruäre ngwane niaratre nämene nemen ki ye bäre ta ne kwe nitre ñaka gitiadre jire iti. Nitre rükä ye rabadre nemen kä raire te juta ye bäre ta angwane, jondron kwetadre ye raba krüte. Nitre rükä nämene juta ye den jai angwane, dre dre ie niaratre tö nämene ye jökrä nämene niken ngwena jai, nämene niken jondron kwetadre ye ngwena jai arato. Yebätä, juta keta kabre palestina ye rüere ja mikani aune juani ngwarbe yete jondron kwetadre ye jämi kwen jire nitre arqueólogo ie. Akwa juta Jericó juani ngwarbe ye ñaka ja erebe. Täräkwata tä blite arqueología yebätä tä niere ye erere, nitre ja tötikaka krikri yei nura ngwä aune jondron ngwä kwanina krubäte. Täräkwata ye tä mike gare juta keta kabre rüere ja mikani yete nura ngwä ñaka kwanbare krubäte ye erere.

Biblia tä niere nitre israelita rükä ye ñaka nikani jondron kwetadre juta Jericó yete ngwena jai ñobätä ñan aune Jehovakwe ñäkäibare ietre (Josué 6:17, 18). Krimu jökrä jatani nireta aune nura öta käi nikani ta ye bätäräbe ja mikani juta ye rüere nieta Bibliakwe arato. Yebätä, niaratre ja mikani juta ye rüere ye ngwane nura ngwä nämene krubäte yete (Josué 3:15-17; 5:10). Aisete juta Jericó juani ngwarbe yekänti nura ngwä ükaninkrö kwani ye tä mike gare metre kä braibe te juta ye diani jai, Biblia tä niere ye erere.