Yozue 6:10-15, 20 ke tuba nde basoda ya Izraele ziungaka mbanza Yeriko mbala mosi konso kilumbu mpi bo salaka mutindu yina bilumbu sambanu. Na kilumbu ya nsambwadi, bo ziungaka Yeriko mbala nsambwadi. Ebuna, Nzambi bwisaka bibaka ya ngolo ya mbanza mpi bantu ya Izraele botulaka Yeriko. Keti bantu yina ke longukaka bima ya ntama me monaka nzikisa ya ke monisa nde bantu ya Izraele botulaka Yeriko na nima ya ntangu fioti, mutindu Biblia ke tubaka?

Na ntangu ya ntama, sambu na kubotula mbanza, basoda vandaka kuziunga bibaka na yo sambu na kunwanisa yo. Kana kuziunga yina kubaka ntangu mingi, bantu ya mbanza vandaka kudia madia mingi yina bo bumbaka. Kana basoda me botula mbanza, bo vandaka kubaka bima yonso yina bo me zola ata nkutu madia yina bo me kuta na mbanza . Yo yina, bantu yina ke longukaka bima ya ntama monaka madia fioti to nkutu ata madia ve na bambanza ya insi Palestine yina basoda botulaka, yina me bikalaka mayumbu. Kansi, na mbanza Yeriko bo kutaka mambu mutindu ya nkaka. Zulunalu mosi (Biblical Archaeology Review) ke tuba nde: “Na mbanza Yeriko, katula mabungu, bima mingi yina bo monaka kele bambuma ya ble.” Zulunalu yango ke yika nde: “Kumona bambuma ya ble mingi mutindu yai ke yitukisa.”

Biblia ke tuba nde bantu ya Izraele bakaka ve madia yina bo kutaka na Yeriko sambu Yehowa pesaka nsiku nde bo baka yo ve. (Yozue 6:17, 18) Biblia ke tuba diaka nde bantu ya Izraele botulaka Yeriko na nsungi ya mvula (na printemps), kaka ntangu nsungi ya kukatula bambuma manaka; na nsungi yango madia vandaka mingi na Yeriko. (Yozue 3:15-17; 5:10) Ntangu bantu ya Izraele botulaka mbanza Yeriko, bo kutaka madia mingi, diambu yai ke ndimisa nde bo ziungaka mbanza bilumbu fioti, kaka mutindu Biblia ke tuba.