Josuwa 6:10-15, 20 kwa tanta asi vakwayita woVaisraeli kwa kundurukidire sitata saJeliko rumwe nkenye ezuva momazuva gatano nalimwe. Mezuva lyautano nauvali, tava kunduruka sitata rukando rutano naruvali. Makura Karunga ta ganda makuma gaJeliko, ano Vaisraeli tava kwata sitata. Vasimaguli va gwana umbangi au likida asi Jeliko kwa mu kundurukidire siruwo sosisupi ngomu za yi tanta Bibeli ndi?

Moyiruwo yanare, sitata ngava si kundurukida vakwayita nsene kuna hara kusihomona. Nsene ekundurukido ligusa siruwo, vantu womositata kuvhura va mane kulya nondya dawo edi va pungura. Apa vakwayita ngava kwata sitata, awo ngava gusa nkenye eyi, kukwatera mo nondya edi dina hupu po. Eyi yiyo vasimaguli va gwanene nondya dononsesu moyitata yaPalestina eyi va homwene monkedi ezi. Nye ezonaguro lyaJeliko kwa lisigire. Buke zimwe kwa tanta asi: “Yininke yoyinzi va gwene apa va zonagwire Jeliko kuna kara nombuto, kugusa ko yikandimbe.” Azo kwa gweda ko asi: “Ayo kapi ya hwire kugwana nombuto dononzi ngoso.”—Biblical Archaeology Review.

Bibeli kwa tanta asi Vaisraeli kapi va gusire nondya moJeliko morwa yimo ga va pangerere Jehova. (Josuwa 6:17, 18) Azo kwa tanta hena asi awo kwa homwene Jeliko pomangenyena, konyima tupu zokuzangura nombuto, apa va kere nonombuto dononzi mositata. (Josuwa 3:15-17; 5:10) Konyima zekundurukido lyesupi, nombuto simpe nonzi da kere moJeliko ngomu za yi tanta Bibeli.