Mukanda waYoshuwa 6:10-15, 20 wahosha nawu amashidika awaIsarela anyeñumukili musumba waYeriku kapampa kamu hefuku hadi mafuku atanu nadimu. Hefuku damuchitanu natuyedi, anyeñumukili mapampa katanu nakayedi. Dichi Nzambi wahumwini mpwembu jaYeriku jakola, nawa aIsarela atambwili musumba. Mwalala akwakusandujola anawani yuma yinakumwekesha nawu musumba waYeriku awutambwili mukapinji kanti hohu neyi chahosha Bayibolu?

Kunyima, musumba awutambwileña neyi amashidika anyeñumuka mpwembu yamusumba kulonda awulukuki. Neyi amashidika ashimbula kulukuka musumba henohu awunyeñumuka dehi, antu adi mukachi adileña yakuda yatentekeluwu. Neyi amashidika atambula musumba, asendeleña yuma yejima kushilahu niyakuda yashileñawu. Dimuloña waweni akwakusandujola chabulileñawu kuwana yakuda yantesha mumahembi anyisumba yaPalestine yalukukiluwu muniyi njila. Ilaña mahembi aYeriku ambukaku. Mukanda waBiblical Archaeology Review wahosha nawu: “Mumahembi awanamu mawumbeka nitidiku yayivulu.” Wahosheli cheñi nawu: “Musumba neyi anawulukuki mwashalileña wanyi tidiku.”

Bayibolu yahoshaña nawu aIsarela asendeli wanyi yakuda yidi yejima muYeriku muloña Yehova wayikaanishili kusenda. (Yoshuwa 6:17, 18) Yahosha cheñi nawu aIsarela alukukili Yeriku hanyima yakwila anañuli dehi tidiku nawa anashi dehi munkalaña. (Yoshuwa 3:15-17; 5:10) Chineli mwadiña tidiku yayivulu muYeriku hanyima yakutambula musumba, chinamwekeshi nawu musumba awitambwili mukapinji kantesha, neyi chahosha Bayibolu.