In tzaj tqʼamaʼn Josué 6:10-15, 20 alkye tten e ok tzoqpaj qe soldad aj Israel tiʼj tnam Jericó. Toj qaq qʼij e bʼet tiʼjele tnam, jun maj toj junjun qʼij. Tojtzun twuqin qʼij e bʼet wuq maj tiʼjele tnam. E kubʼ tzʼaq aʼyeju tmuro Jericó tuʼn Jehová, iktzun tten e ok tzoqpaj qe soldad aj Israel tiʼj tnam. ¿Ateʼpe yekʼbʼil tiʼj aju in tzaj kyyekʼun qa ax tok aju txʼolbʼabʼil in yolin Tyol Dios tiʼj?

Toj ambʼil ojtxe, qa at jun kʼloj soldad kyajbʼil tuʼn kyok tzoqpaj tiʼj jun tnam, at maj in noktoq kytxolin kyibʼ tiʼjju tmuro tnam tuʼntzun miʼn ttzoqpaj jun xjal. Qa in noktoq kytxolin kyibʼ soldad tiʼj tnam toj nim ambʼil, jakutoq kubʼ bʼaj wabʼj at toj tnam. Aj tkubʼtoq tiʼj jun tnam kyuʼn soldad, in xi kyiʼn tkyaqilju kyajbʼil. Axpe ikx in xi kyiʼn wabʼj. Tuʼntzunju, aqeju in che xnaqʼtzan tiʼjju ikʼ kyiʼj xjal ojtxe, o kanet chʼin moqa mintiʼx wabʼj kyuʼn kyoj qeju tbʼuchil tnam Palestina aju kubʼ xiten ik tzeʼn jlu. Noqtzun tuʼnj, nya ikju o kanet toj tbʼuchil tnam Jericó. At jun uʼj in yolin kyiʼj xjal in che xnaqʼtzan tiʼjju ikʼ kyiʼj xjal ojtxe, in tzaj tqʼamaʼn qa toj tbʼuchil tnam Jericó o kanet nim kʼil ex twitz awal kyuʼn qeju aj nabʼil. Axju uʼj lu in tzaj chikʼbʼante qa nya tkyaqil maj in kanet nim twitz awal kyoj qeju tnam in che kubʼ xiten ik tzeʼn jlu.

In tzaj tqʼamaʼn Tyol Dios qa mintiʼ xi kyiʼn qe soldad te aj Israel wabʼj toj tnam Jericó, tuʼnju otoq txi tqʼamaʼn Jehová kye tuʼn miʼn txi kyiʼn (Josué 6:17, 18). Ax ikx in tzaj tqʼamaʼn Tyol Dios qa e ok tzoqpaj aj Israel tiʼj tnam toj ambʼil tej in che xulin juntl maj qe tzeʼ, moqa tzmatoq in kubʼaj ambʼil tuʼn tjaw chmet twitz awal. Tuʼntzunju, attoq nim twitz awal toj tnam tej kyok tzoqpaj aj Israel tiʼj (Josué 3:15-17; 5:10). Kyjuʼtzun, tkyaqil aju o kanet toj tbʼuchil tnam Jericó, in tzaj kyyekʼun qa toj chʼin ambʼil kubʼ tiʼj tnam, ik tzeʼn in tzaj tqʼmaʼn Tyol Dios.