Dapre Zozie 6:10-15, 20 bann solda Izraelit ti fer letour lavil Zeriko enn fwa par zour pandan sis zour. Me lor setiem zour, zot ti fer letour lavil set fwa. Lerla Bondie finn fer bann miray Zeriko grene, ek bann Izraelit ti gagn viktwar lor sa lavil-la. Eski bann arkeolog inn trouv bann prev ki montre ki finn atak Zeriko dan enn tigit letan, parey kouma Labib dir?

Dan lepok Biblik, enn larme ti atak enn lavil kan li ti antour so bann miray, ek ti pre pou atak li. Si sa ti dire pandan plizir zour, bann dimounn ti pou fini manz bann manze ki zot ti ena dan stok. Kan finalman bann solda ti gagn viktwar lor sa lavil-la, zot ti pou pran tou seki zot ti anvi, ek tou manze ki ti reste. Ala kifer bann arkeolog pa ti trouv preske okenn manze dan bann rwinn bann lavil dan Palestine. Me bann rwinn lavil Zeriko diferan. Enn magazinn ki apel Biblical Archaeology Review dir: “Apre destriksion [Zeriko], kitsoz ki ti ena plis an-abondans apart bann resipian later, se bann lagrin sereal.” Li azoute: “Li ti bien rar pou trouv sa kantite lagrin sereal la.”

Labib dir ki bann Izraelit pa ti pran okenn manze ki ti ena dan Zeriko parski Zeova ti defann zot pou fer sa. (Zozie 6:17, 18) Labib dir osi ki bann Izraelit ti atak Zeriko lepok printan, zis apre rekolt, kan ti ena enn kantite lagrin sereal an stok dan sa lavil-la. (Zozie 3:15-17; 5:10) Ti ena ankor enn kantite lagrin sereal dan Zeriko apre ki ti atak sa lavil-la. Alor, sa konfirme ki latak kont Zeriko pa ti pran boukou letan, parey kouma Labib dir.