Josué 6:10-15, 20 ipopia okuti omafualali ova Isilayeli elisetele nepundaumbo lio Jeriko otyikando tyike kese nthiki mononthiki epandu. Monthiki ya panduvali, avelisete nepundaumbo ovikando epanduvali. Huku atokesa ovimato viapama vio Jeriko, iya ova Isilayeli avahanyepo epundaumbo. Ovanongo vena etyi vavasa tyilekesa okuti ovimato vio Jeriko ankho kaviaile peulu ngetyi Ombimbiliya ipopia?

Kohale, epundaumbo ankho likala mokati kotyimato, iya tyina ovita viya okuluisa viliseta novimato ovio. Inkha ovimato vikala ehimbwe, ovanthu mepundaumbo valia ovikulia vapakele nawa. Tyina omafualali eya okuhanyapo epundaumbo, vatyinda ovipuka aviho vahanda, okukutikinyamo ovikulia vavasamo. Otyo ovanongo vokuheya omatunthu vavasila vala katutu okulia ine kavavasile movimato aviho vio Palestina viahanyenwe monkhalelo ngoyo. Mahi ovimato vio Jeriko ankho vielikalela. Omukanda umwe wati: “Ovipuka ovinyingi viavasilwe momatunthu oo ankho onombia, nonoñgima mbo tiliku.” Auyawisako okuti: “Muavasilwe onoñgima ononyingi mbo tiliku mbukahi nawa.”

Ombimbiliya ipopia okuti ova Isilayeli kavatyindile okulia mo Jeriko mokonda Jeova wevepopilile opo vahatyindemo natyike. (Josué 6:17, 18) Tupu ipopia okuti ova Isilayeli vahanyapo o Jeriko pomuvo wokuteya, etyi ankho mepundaumbo muna okulia okunyingi. (Josué 3:15-17; 5:10) Mokonda mo Jeriko muavasilwe onoñgima ononyingi, tyilekesa okuti ankho ovimato ovisupi ngetyi Ombimbiliya ipopia.