Josuey 6:10-15, 20 willakun Israel casta soldadokuna Jerico llaqtata imayna purmachisqanmanta. Suqta punchawmi huk kutita sapa punchaw pirqankunapa qipanta purirqaku. Qanchis kaq punchawpiñataqmi qanchis kutikama kaqmanta muyurqaku. Chay punchawmi Jerico llaqtapa lliw pirqankunata Jehova Dios tuñirachirqa hinaptinmi Israel casta soldadokunaqa chay llaqtaman yaykurqaku. ¿Chaynachu karqa? ¿Imataq qawachiwanchik chaynapuni kasqanta?

Ñawpaq tiempopi soldadokunam ima llaqtamanpas yaykuyta munaspankuqa puntata waykaruqku. Punchawkuna waykaruptinkum mikuyninku pisiruq. Soldadokuna yaykuspankuñataqmi tukuy imanta hinaspa mikunankunata apakuqku. Chaymi ñawpaqpi ima pasakusqanmanta estudiaq runakunaqa, Palestina lawpi ñawpaq llaqtakunapa raqayninkunapiqa mana ima mikuytapas tarirqakuchu. Jerico llaqtapa raqayninkunapim ichaqa huk qillqapa nisqanman hina puyñukunapi kawsaykunata tarirqaku. Chay qillqapitaqmi willakun chayna purmasqa llaqtakunapi kawsaykuna tariyqa sasa kasqanta.

Bibliapim willawanchik Israel soldadokuna Jerico llaqtaman yaykuruspanku kawsayninkuta mana apakusqankuta. ¿Imanasqa? Jehova Diosmi kamachirqa chay llaqtamantaqa imatapas mana apakunankupaq (Jos. 6:17, 18). Bibliapiqa willakuntaqmi cosecha pasayllata soldadokuna Jerico llaqtaman yaykusqankuta. Chaymi soldadokuna yaykusqanku punchawpiqa chay llaqtapi kawsaykunaqa huntay-huntayllaña karqa (Jos. 3:15-17; 5:10). Jerico llaqtapa raqayninkunapi achka kawsaykuna tarisqankum qawachin, bibliapa nisqanman hina as punchawllapi chay llaqta purmachisqa kasqanta.