Karanga a Iosua 6:10-15, 20 e kua māti takapini te au vaeau Iseraela i te oire o Ieriko okotai taime i te rā no tetai ono rā. I te itu o te rā, kua māti takapini ratou i te oire e itu taime. E oti na te Atua i topa pu ei te au patu ketaketa o Ieriko ki raro, e kua opukinaia te oire e to Iseraela. Kua kitea ainei tetai mea e te aronga keri apinga taito tei akaari e kua opuia a Ieriko i roto i tetai tuatau poto ua, mei ta te Pipiria e akakite ra?

I te au tuatau taito, ka opukinaia tetai oire me takapiniia tona au patu e te au vaeau, tei papa ua i te tamaki i te oire. Me roa te tuatau e ope ei te opukina anga, ka kai ua te tangata i roto i te oire i te maata anga o te manga ta ratou i akaputu. I te openga me opukinaia te oire e te au vaeau, ka apai pouroa ratou i te au apinga ta ratou ka inangaro, kapiti mai tetai ua atu manga tei toe mai. Te tumu te reira i kite mai ei te aronga keri apinga taito e iti ua te manga me kore kare takiri e apinga i roto i te ngai tanea o te au oire Paretaina tei tamakiia na teia tu. Inara e tuke rai te akapou anga o Ieriko. Karanga te Biblical Archaeology Review e: “Te apinga maata roa atu tei kitea i roto i te akapouanga, i te pae mai i te au apinga karakaraea, ko te sitona.” Karanga te reira e: “E mea umere tikai te kitea anga mai e āka putunga sitona tetai.”

Te karanga ra te Pipiria kare to Iseraela i apai i tetai ua atu kai i Ieriko no te mea kua akaue a Iehova ia ratou auraka e rave i te reira. (Iosua 6:17, 18) Te karanga katoa ra e kua tamaki to Iseraela ia Ieriko i te tuatau tupuanga rau, i muri poto ua ake i te tuatau mou, e maata te sitona tei akaputuia i roto i te oire. (Iosua 3:15-17; 5:10) I te mea e maata rai te sitona e toe ra i Ieriko i muri ake i te akapou anga, te akapapu maira e tuatau poto ua te opu anga, mei ta te Pipiria e akakite ra.