Yoshua 6:10-15, 20 i sumbedza uri maswole a Isiraele o mona na muḓi wa Yeriko luthihi nga ḓuvha kha maḓuvha a rathi. Nga ḓuvha ḽa vhusumbe, o mona muḓi lwa sumbe. Nga zwenezwo, Mudzimu a ita uri mitsheṱo yo khwaṱhaho ya Yeriko i we nahone Vhaisiraele vha thuba wonoyo muḓi. Naa vhagudi vha zwo fukulwaho mavuni vho wana naho tshi tshini tshi sumbedzaho uri muḓi wa Yeriko wo govhelwa nga u bonya ha iṱo, sa zwe Bivhili ya zwi amba?

Tshifhingani tsha kale, mmbi yo vha i tshi tanga mitsheṱo musi i tshi ṱoḓa u i govhela, yo ḓilugiselela u lwa. Arali wa govhelwa lwa tshifhinga tshilapfu, vhathu vha re muḓini vho vha vha tshi ḽa zwiḽiwa zwe vha zwi vhulunga. Musi maswole a tshi thuba muḓi, o vha a tshi dzhia zwoṱhe zwine a zwi ṱoḓa, u katela na zwiḽiwa zwo salaho. Ndi ngazwo vhagudi vha zwo fukulwaho mavuni vho wana zwiḽiwa zwiṱuku kana vha songo wana na tshithu na tshithihi mashubini oṱhe a miḓi ya ngei Palestina e a vutshelwa nga yeneyi nḓila. Fhedzi mashubi a Yeriko ha fani na maṅwe. Biblical Archaeology Review i ri: “Vhunzhi ha zwithu zwe zwa waniwa henefho fhethu nga nnḓa ha zwithu zwa vumba, ndi mavhele.” I dovha ya ri: “U wana mavhele manzhi nga u ralo zwi a mangadza vhukuma.”

Bivhili i amba uri Vhaisiraele a vho ngo dzhia zwiḽiwa Yeriko ngauri Yehova o vha vhudza uri vha songo zwi dzhia. (Yoshua 6:17, 18) I dovha ya ri Vhaisiraele vho vutshela muḓi wa Yeriko nga tshifhefho, nga murahu ha khaṋo, musi hu na mavhele manzhi o vhulungwaho. (Yoshua 3:15-17; 5:10) Nga nṱhani ha uri ho vha hu tshi kha ḓi vha na mavhele manzhi ngei Yeriko musi wo no govhelwa, zwenezwi zwi khwaṱhisedza uri honoho u govhelwa ho vha ha tshifhinga tshiṱuku, sa zwe Bivhili ya zwi amba.