1, 2. Saide Pawlesi be sikiifi wan biifi gi den Hebrew Kelesten?

AINI a yali 61, den baala anga sisa aini Islayeli á be e si enke ogii be sa miti den. A apostel Pawlesi be de a sitaafu-osu aini Rome a ten de, ma a be e winsi fu den be sa losi en gaw. Timoteyesi be komoto a sitaafu-osu a pisi ten de. Pawlesi anga Timoteyesi be wani go luku den baala di be de a Yudeya (Hebrewsama 13:23). Ma a á be doo feifi yali, neen den Kelesten di be de aini Yudeya be mu lowe, moomoo den wan di be de aini Yelusalem. Saide? Yesesi be taigi den bakaman fi en taki den be mu lowe komoto a Yelusalem te den be si den suudati lontu a foto.​—Lukasi 21:20-24.

² A 28 yali be pasa di Yesesi be wasikoi den bakaman fi en taki den be o abi fu lowe komoto a Yelusalem. Aini den 28 yali de, den Kelesten tan dini Gadu winsi fa tesi be e miti den (Hebrewsama 10:32-34). Ma Pawlesi be wani den de seekaseeka gi den sani di be o pasa, bika a be sabi taki gaan tesi be o miti den (Mateyesi 24:20, 21; Hebrewsama 12:4). Den be o abi fu holidoo. Den biibi be mu taanga tu fu du san  Yesesi be taki. Yesesi be taki den mu lowe efu den be wani tan a libi. (Leisi Hebrewsama 10:36-39.) Neen meke Yehofa meke Pawlesi sikiifi wan biifi gi den baala anga sisa de. A biifi ya, na a Beibel buku di Pawlesi sikiifi gi den Hebrewsama. A sikiifi en fu yeepi den fu teke seeka gi den sani di be o pasa.

3. Saide u mu poti pakisei a den sani di Pawlesi be sikiifi gi den Hebrewsama?

³ A foluku fu Gadu aini a ten ya mu poti pakisei a den sani di Pawlesi be sikiifi gi den Hebrewsama. Saide? Bika den sani di be e miti den Kelesten aini Yudeya e miti wi aini a ten ya tu. Wi e libi ’aini den kiiboi dei di e meke a libi taanga’. A omen Kotoigi aini a ten ya e holidoo te sama e du ogii anga den (2 Timotiyesi 3:1, 12). Ma kande den tesi di e miti den baala anga sisa de nai miti gaanse fu u. Tokuso u mu de na ain leti enke den Kelesten aini a ten fu Pawlesi. Saide? Dyonson wan tesi o miti u di á be miti u noiti ete!​—Leisi Lukasi 21:34-36.

4. San na a tekisi fu 2016? Saide a pelensipali?

⁴ San o yeepi u fu teke seeka gi den sani di o pasa? Aini den sani di Pawlesi sikiifi gi den Hebrewsama, a kai wantu sani di o yeepi u. Wan fu den pelensipali sani de sikiifi aini Hebrewsama 13:1. A sikiifi ape taki: „Tan lobi useefi enke fa baala lobi denseefi.” A disi na a tekisi fu 2016.

5. San a wani taki fu lobi useefi enke fa baala lobi denseefi?

⁵ San a wani taki fu lobi useefi enke fa baala lobi denseefi? A fii ya a wan fii di famii anga bun mati abi gi denseefi (Yohanisi 11:36). U nai taki anga mofu namo taki wi a baala anga sisa. Ma wi e libi enke tuutuu baala anga sisa (Mateyesi 23:8). Pawlesi taki: „U mu lobi useefi enke fa baala lobi denseefi. A yu mu de a fosiwan di e soi lesipeki gi taawan” (Romesama 12:10). Den wowtu ya e soi taki u lobi u baala anga sisa tuutuu. Na a lobi ya anga den sani di sikiifi aini Beibel e yeepi a foluku fu Gadu fu de tuutuu mati. Den sani ya e yeepi den tu fu libi na a wan.

6. San tuu Kelesten e fusutan te den yee den wowtu lobi useefi enke fa baala lobi denseefi?

⁶ Aini den buku fu den Kelesten yu o moo leisi den wowtu „lobi useefi enke fa baala lobi denseefi”. Gi den Dyu fu fositen, a wowtu „baala” be e soi go a wan famii. Son leisi a be e soi go a wan sama di á be de aini a famii. Noiti a be e soi go a wan sama di á be de wan Dyu. Ma enke tuu Kelesten, u „baala” na ala den tuu Kelesten, winsi sowtu kondee den komoto (Romesama 10:12). Yehofa e leli u taki u mu lobi useefi enke fa baala lobi denseefi (1 Tesalonikasama 4:9). Ma saide a de taanga fanowdu fu lobi useefi enke fa baala lobi denseefi?

7. (a) San na a moo pelensipali sani di meke u mu lobi useefi enke fa baala lobi denseefi? (b) San a wan taa sani di meke u mu lobi useefi?

⁷ A moo pelensipali sani di meke u mu lobi useefi enke fa baala lobi denseefi, a fu di Yehofa taki so. Wi á poi lobi Yehofa efu wi á lobi u baala anga sisa (1 Yohanisi 4:7, 20, 21). Wan taa sani, a taki wi abi useefi fanowdu, moomoo te sani nai go bun. Di Pawlesi sikiifi a biifi gi den  Hebrew Kelesten, a be sabi taki son wan fu den be o abi fu fika den osu anga taa gudu a baka. Yesesi be taki a fesi fa a ten de be o taanga (Malikisi 13:14-18; Lukasi 21:21-23). Fosi a ten de be doo, den be o abi fu meke moiti fu lobi denseefi.​—Romesama 12:9.

8. San u mu du nownow fosi a gaan banowtu bigin?

⁸ A moo gaan banowtu di o miti libisama o doo dyonson (Malikisi 13:19; Openbaring 7:1-3). A o de fanowdu fu du san sikiifi aini Yesaya 26:20. A sikiifi ape taki: „Mi foluku, u go aini u kambaa, da u tapu u doo. U go kibii fu wan pisi ten, te enke mi ati á boon moo”. Kande den „kambaa” de e soi go a den kemeente. Na ape wi e dini Yehofa anga u baala anga sisa. Ma a ná kon u mu e kon makandaa anga u baala anga sisa da a kaba. Pawlesi be membee den Hebrew Kelesten taki den be mu gi denseefi taanga-sikin fu soi lobi anga fu du bun wooko (Hebrewsama 10:24, 25). U mu meke moiti nownow fu lobi useefi enke fa baala lobi denseefi, bika a sani de o yeepi u fu holidoo winsi sowtu tesi o miti wi aini a ten di e kon.

9. (a) On ten wi abi a okasi fu soi den baala anga sisa fu u taki u lobi den? (b) Sowtu ondoofeni toli e soi taki a foluku fu Yehofa lobi den baala anga sisa tuutuu?

⁹ Fosi a gaan banowtu doo, wi abi omen okasi fu soi u baala anga sisa taki u lobi den. A omen gaan ogii e pasa aini den kondee pe den baala anga sisa fu wi e tan. Son leisi a doti e seke, son leisi gaan winta e wai efuso alen e kai sungu a peesi pe den e tan. Boiti dati, sama e du ogii anga son wan fu den baala anga sisa fu u (Mateyesi 24:6-9). Son wan fu den e abi moni polobelema fu di den e libi aini a goontapu fu Saatan pe sama e bidiigi taawan (Openbaring 6:5, 6). Ma te den sowtu polobelema ya e miti u baala anga sisa, da wi abi a okasi fu soi den taki u lobi den tuutuu. Winsi fa den sama aini a goontapu ya á lobi denseefi, tokuso u mu meke moiti fu soi u baala anga sisa taki u lobi den (Mateyesi 24:12). ^[1]​—Luku a pisi ete wan pelensipali sani.

10. San wi o luku now?

¹⁰ San o yeepi u fu lobi useefi winsi wi abi polobelema? Fa u sa soi u baala anga sisa taki u lobi den tuutuu? Baka di Pawlesi taki „tan lobi useefi enke fa baala lobi denseefi”, a kai wantu sani di Kelesten sa du fu soi a lobi ya. Meke u go luku sigisi fu den sani ya.

11, 12. San u sa du te u kai sama kon a wi osu? (Luku a fowtow na a bigin.)

¹¹ „Ná feegete fu kai sama kon a yu osu.” (Leisi Hebrewsama 13:2.) A sani ya e meke u pakisei a toli fu Abalaham anga Lot. Den tu man ya be kai sama di den á be sabi kon a den osu. Bakaten Abalaham anga Lot kon si taki den sama di den be kai, a be engel (Genesesi 18:2-5; 19:1-3). A toli ya be e gi den Hebrew Kelesten taanga-sikin fu kai taawan kon a den osu tu. A sani de be o soi taki den lobi den baala anga sisa tuutuu.

¹² Useefi sa kai sama kon a wi osu. U sa kai u baala anga sisa fu nyan wan sani makandii efuso fu gi useefi taanga-sikin. Winsi wi á kaba sabi a kelen-owluman anga en uman, tokuso u sa kai den kon a wi osu te den kon a wi kemeente (3 Yohanisi 5-8). U ná abi fu seeka omen switi  nyanyan efuso bai omen sani. A wani u wani gi den baala taanga-sikin, a ná soi u wani soi den san wi abi. A ná sama di u sabi taki o kai u kon a den osu baka wawan u mu kai (Lukasi 10:42; 14:12-14). San moo pelensipali, wi á mu fuka te da u nai fende ten fu kai sama kon a wi osu.

13, 14. Fa u sa „pakisei den sama di de a sitaafu-osu”?

¹³ „Pakisei den sama di de a sitaafu-osu.” (Leisi Hebrewsama 13:3.) Di Pawlesi sikiifi a sani ya, a be e taki fu den baala di be de a sitaafu-osu fu den biibi ede. Pawlesi be gafa den kemeente, bika den be soi taki den e „pakisei den sama di de a sitaafu-osu” (Hebrewsama 10:34). Wantu baala be yeepi Pawlesi di a be de fo yali a sitaafu-osu. Ma son wan fu den á be e tan koosube. Fa den be o man du yeepi Pawlesi? A te den be o go e begi gi en naamo.​—Filipisama 1:12-14; Hebrewsama 13:18, 19.

¹⁴ Aini a ten ya, a omen Kotoigi de a sitaafu-osu fu den biibi ede. Baala anga sisa di e tan koosube sa yeepi den anga sani di den abi fanowdu. Ma somen fu wi nai tan na a pisi pe den de. Fa u sa yeepi den? Fa u sa soi taki u nai feegete den? A te wi e begi gi den. Neen meke u sa begi gi den baala anga sisa efuso den pikinengee di de a sitaafu-osu aini Eritreya. U sa begi tu gi Paulos Eyassu, Isaac Mogos anga Negede Teklemariam. Den baala fu u ya de moo enke 20 yali a sitaafu-osu kaba.

15. Fa u sa soi taki wi abi lesipeki gi a toowlibi?

¹⁵ „Ala u mu abi lesipeki gi a toowlibi.” (Leisi Hebrewsama 13:4.) Wan taa fasi fa wi e soi taki u lobi useefi enke fa baala lobi denseefi, a te wi e meke moiti fu libi wan kiin libi (1 Timotiyesi 5:1, 2). Efu u be o didon anga wan baala efuso wan sisa di á de u toowpaa, u be o poli a sama de libi. A á be o bun gi en famii.  Kande wan hii pisi ten baala anga sisa á be o fitoow u moo (1 Tesalonikasama 4:3-8). Pakisei tu fa wan uman be o fii efu a fusutan taki en man e luku fa taa uman anga man e didon anga denseefi a felon efuso buku. A be o si enke en man lobi en? A be o si enke ai lesipeki a toowlibi?​—Mateyesi 5:28.

16. Fa wi o soi taawan taki u lobi den te u tifeedi anga san wi abi?

¹⁶ „U mu tifeedi anga san wi abi nownow.” (Leisi Hebrewsama 13:5.) Te wi e fitoow Yehofa, wi o tifeedi anga san wi abi. Fa a sani ya o yeepi u fu soi u baala anga sisa taki u lobi den? Wi o holi a pakisei taki u Kelesten baala anga u sisa pelensipali moo moni anga gudu (1 Timotiyesi 6:6-8). U ná o kuutu u baala anga sisa. Boiti dati, u ná o kuutu te u libi nai waka enke fa u wani. U ná o dyalusu efuso giili u baala anga sisa. Ma wi o lobi gi taawan sani.​—1 Timotiyesi 6:17-19.

17. Fa „deki-ati” o yeepi u fu soi taki u lobi u baala anga sisa?

¹⁷ I mu abi „deki-ati.” (Leisi Hebrewsama 13:6.) Efu wi e fitoow Yehofa, wi o tei deki-ati te tesi e miti u. Te wi abi deki-ati wi o denki bun. Te wi e denki bun, wi o gi taa baala anga sisa deki-ati tu. Wi o gi den taanga-sikin (1 Tesalonikasama 5:14, 15). U sa abi deki-ati, winsi u de na a ten fu a gaan banowtu, bika u sabi taki Gadu o fii wi.​—Lukasi 21:25-28.

18. Fa u sa soi den owluman taki u lobi den?

¹⁸ „Membee den fesiman.” (Leisi Hebrewsama 13:7, 17.) Den owluman aini u kemeente e koboloiki den ten fu wooko taanga gi u. Efu wi e pakisei ala den sani di den e du, wi o moo lobi den. Wi o teke a wooko di den e du fu bigi tu. Noiti u wani du wan sani di o meke den á du den wooko anga piisii moo. U wani aliki den. A so wi e soi taki wi e „lesipeki den tuutuu.” A so wi e soi tu taki u „lobi a wooko di den e du”.​—1 Tesalonikasama 5:13.

19, 20. Fa u sa meke moo moiti fu soi taki u lobi useefi enke fa baala lobi denseefi?

¹⁹ Sama sabi a foluku fu Yehofa enke sama di lobi denseefi tuutuu. A so a be de aini a ten fu Pawlesi. Ma Pawlesi be gi den Kelesten taanga-sikin fu soi moo lobi. A be taki u mu „lobi den moo san u be lobi den kaba” (1 Tesalonikasama 4:9, 10). A sani ya e soi taki u sa du moo sani fu soi u baala anga sisa taki u lobi den!

²⁰ Te wi o go e si a tekisi fu a yali ya aini a Kownukondee zaal, da u mu akisi useefi den sani ya: Mi poi meke moo moiti fu kai sama kon a mi osu? Fa mi sa yeepi den baala di de a sitaafu-osu? Mi abi lesipeki gi a toowlibi di Gadu sete? San o yeepi mi fu tifeedi anga san mi abi? San o yeepi mi fu moo fitoow Yehofa? Fa mi sa aliki den owluman moo bun? Efu wi e meke moiti fu go a fesi a den pisi ya, u ná o si a tekisi fu a yali enke wan sani namo di sikiifi aini a zaal. Ma a o yeepi u fu du san Pawlesi be taki aini Hebrewsama 13:1. A sikiifi ape taki: „Tan lobi useefi enke fa baala lobi denseefi.”