KU MUVU ua 61, o athu mu ilunga ioso ia Izalaiele, akexile ni kutululuka. Sumbala poxolo Phaulu ua kexile mu kaleia mu mbanza ia Loma, muéne ua dielele kuila, keji bhita thembu iavulu mu kaleia. Timote, o mukalakadi ni mukuá, a mu katuile kiá mu kaleia. Mu kiki, ene akexile mu di iudika phala kuia mu kunda o jiphange mu mbanza ia Judeia. (Jihebeleu 13:23) Kua kambele ngó mivu itanu, o Jikidistá mu Judeia ni mu mbanza ia Jeluzaleme, eji di bhana ni ibhidi. Mu kiki, ene a tokalele ku disokejeka phala kukala polondo. Mukonda diahi? Mukonda Jezú ua tangele o akaiedi’ê kuila, kioso kieji kondoloka o mbanza ia Jeluzaleme ku masoladi, ene a tokalele kulenga.​—Luka 21:20-24.

1, 2. Mukonda diahi Phaulu ua soneka o mukanda phala o Jikidistá Jihebeleu?

² Tundé o kizuua kia bhanene Jezú o kitendelesu kiki ku akaiedi’ê, kua bhitile kiá 28 dia mivu. Sumbala a dibhanene ni izukutisu iavulu, o Jikidistá mu Izalaiele a kolokotele mu ufiiele uâ, ku mivu ioso íii. (Jihebeleu 10:32-34) Maji Phaulu ua mesenene ku a kuatekesa ku di iudika, mukonda dia  izulukutu ieji bhita ku pholo. Kua kambele ngó, ene eji dibhana ni izukutisu ia dikota, ieji polovala o kixikanu kiâ. (Matesu 24:20, 21; Jihebeleu 12:4) Ene eji bhinga kukolokota ni kulondekesa kixikanu kia kolo, phala kubelesela o kitumu kia Jezú kia kulenga. Phala kukala ku muenhu, ene a tokalele kulondekesa o ídifua íii. (Tanga Jihebeleu 10:36-39.) Mu kiki, Jihova ua bhangesa Phaulu kusoneka mukanda, phala o jiphange jiji. Lelu, o mukanda iú, o divulu dia Jihebeleu. O mukanda iú, a u soneka phala ku a suínisa, n’a kale polondo phala o ima ieji bhita ku pholo.

3. Mukonda diahi tua tokala kuijiia kiambote o milongi iala mu divulu dia Jihebeleu?

³ Kuma tu mundu ua Nzambi, tua tokala kuijiia kiambote o milongi iala mu divulu dia Jihebeleu. Mukonda diahi? Mukonda tua mu dibhana ué ni ibhidi, kála o Jikidistá mu Judeia. Tua tungu mu “jithembu jabhonzo.” Saí iá ene mu dibhana ni izukutisu iavulu, maji né kiki, a kolokota mu ufiiele uâ. (2 Timote 3:1, 12) Maji amukuá mudietu ene ni kutululuka, mukonda ka mu a zukutisa ku athu. Mu kiki, kála kia bhitile ni Jikidistá mu izuua ia Phaulu, tua tokala ku di langa. Mukonda diahi? Kua kambe ngó, tua-nda dibhana ni kizukutisu kia dikota, kia-nda polovala o kixikanu kietu!​—Tanga Luka 21:34-36.

4. Kiebhi o kibatulu kia muvu ua 2016? Mukonda diahi o kibatulu kiki, kia fuama phala o muvu iú?

⁴ Ihi ia-nda tu kuatekesa kukala polondo phala ku dibhana ni kizukutisu kiki? Mu divulu dia Jihebeleu, Phaulu ua tumbula ima iavulu, ia-nda tu kuatekesa kusuínisa o kixikanu kietu. O kitendelesu kia dikota, tu ki sanga mu divulu dia Jihebeleu 13:1. Diene di tu tendelesa: ‘Sulukenu ni kudizola.’ Kiki kiene o kibatulu kia Bibidia phala o muvu ua 2016.

5. Ihi ilombolola o kudizola ni jiphange?

⁵ Ihi ilombolola o ku dizola ni jiphange? O kizuelu kia tumbula Phaulu mu dimi dia Ngeleku, kilombolola ‘kuzola phange.’ O kudizola ni jiphange, kua lungu ni henda i di londekesa o athu ku muiji mba makamba a dizolo kiavulu. (Nzuá 11:36) O henda i tu londekesa ku jiphange, ia tokala i tunda ku muxima. Ki tu tokala kukala ni henda ia makutu, mukonda tu jiphange. (Matesu 23:8) Phaulu ua zuela: “Di zodienu mudienu mu undandu uambote mua Kristu, o mu ujitu kala muthu a xile mukuâ.” (Loma 12:10) O izuelu íii, ilondekesa kuila, tua tokala kuzola o jiphange jetu ni muxima uoso. O henda íii, kumoxi ni henda i moneka mukonda dia ijila ia Jikidistá, i kuatekesa o mundu ua Nzambi, kukala ni ukamba uambote mudiâ, ni ku dibunda kumoxi.

6. Phala o Jikidistá ja kidi, ihi ilombolola o kudizola ni jiphange?

⁶ O izuelu “kudizola ni jiphange,” a beta kota ku i tumbula mu madivulu a Jikidistá. Phala o Jijudé m’ukulu, o kizuelu “phange,” kia kexile mu lombolola ndandu. Saí bhabha, kia kexile mu lombolola ué muthu ka tokalele ku muiji. Maji ki kiexile mu lombolola muthu kexile Judé. Maji kuma tu Jikidistá ja kidi, muthu uoso uoso u kituka Kidistá, ‘phang’ietu,’ né muéne se ua tokala ku ixi iéngi. (Loma 10:12) Jihova ua tu longo o kudizola ni jiphange. (1 Tesalonika 4:9) Mukonda diahi tua tokala kukolokota mu kudizola ni jiphange?

7. (a) Kiebhi o kima kia dianga ki tu bhangesa kudizola ni jiphange? (b) Jimbulula o kima kia mukuá ki tu bhangesa kudizola mudietu.

⁷ O kima kia dianga kia tokala ku tu bhangesa kudizola ni jiphange, o kuijiia kuila, Jihova u tu tumina kubhanga kiki. Se tu dituna kuzola o jiphange jetu, ki tu tena kuzola Jihova. (1 Nzuá 4:7, 20, 21) Tua tokala ué kudizola ni jiphange, mukonda tua bhindamena o kikuatekesu kia akuetu, benge benge mu ithangana ia bhonzo. Kioso Phaulu kia sonekena Jikidistá ja akua Jihebeleu, muéne uejidile kuila, kua kambele ngó, ene eji xisa o jinzu ni jimbongo jâ. Jezú ua jimbuluile o hadi ieji tala mu kithangana kieniókio. (Marku 13:14-18; Luka 21:21-23) Mu kiki, ande dia kubhixila o kithangana kiki, o Jikidistá a bhingile kusuínisa o henda iâ mudiâ.​—Loma 12:9.

8. Ihi i tua tokala kubhanga ande dia kumateka o hadi ia dikota?

⁸ O hadi ia dikota ia mu kuíza. Sé-ku kizulukutu kia bhiti kiá, kia sokela ni kizulukutu kiki. (Marku 13:19; Dijingunuinu 7:1-3) Tua-nda bhinga kukaiela o kitendelesu kiki: “Uila kiki, enu mu mundu uami, ndenu, mu bokone mu jinzu jenu, mu di jikile momo, mu suame ngó kathangana, katé ki somboka o njinda.” (Izaia 26:20) Nange o “jinzu” jiji, o ilunga ietu. O jinzu jiji, bhuene bhu tu bhezela Jihova kumoxi ni jiphange jetu. Maji ki tu tokala ngó ku diongeka mu ithangana ioso. Phaulu ua lembalesa o Jikidistá akua Jihebeleu kuila, a tokalele kubhanga nguzu phala kulondekesa o henda, ni kubhanga ima iambote. (Jihebeleu 10:24, 25) Tua bhingi kusuínisa o henda ietu mudietu kindala, mukonda o henda íii, ia-nda tu kuatekesa ku dibhana ni izukutisu ioso ioso ia-nda moneka ku pholo.

9. (a) Kithangana kiebhi ki tu tena kulondekesa o henda ietu ku jiphange? (b) Bhana phangu ilondekesa kiebhi o mundu ua Jihova uene mu londekesa o henda iâ ku jiphange.

⁹ Tuala ni kithangana kiavulu phala kulondekesa o henda ietu mudietu, ande dia kumateka o hadi ia dikota. Né muene lelu, tu tena kulondekesa o henda íii. Jiphange javulu a tala hadi mukonda dia itungutu ia ixi, kalemba, kitembu kia dikota, ni mavuua amukuá. Saí jiphange ene mu a zukutisa ku athu. (Matesu 24:6-9) Kuma tua tungu ku mundu iú ua iibha, izuua ioso tu dibhana ué ni maka a lungu ni kitadi. (Dijingunuinu 6:5, 6) Maji o ibhidi iavulu i bhita na-iu o jiphange jetu, i tu bhana ué kithangana phala ku a londekesa o henda ietu. Sumbala o athu ku mundu iú kene mu londekesa o henda, tua tokala kukolokota mu kudizola ni jiphange jetu. (Matesu 24:12) ^[1]​—Tala ku disukilu dia milongi.

10. Ihi i tua-nda di longa?

¹⁰ Sumbala ni ibhidi i tu dibhana na-iu, kiebhi ki tu tena kukolokota mu kudizola ni jiphange jetu? Kiebhi ki tu tena kulondekesa o henda íii ku jiphange jetu? Kioso kia tendelesa o Jikidistá kuila, “o kudizola ni jiphange ki mu ku ehe,” poxolo Phaulu ua tumbula maukexilu avulu a kubhanga kiki. Tua-nda di longa maukexilu a samanu.

11, 12. Ihi ilombolola o kuzalela akuetu? (Tala o foto ia dianga.)

¹¹ “Kana kufula kutambulula asonhi mu mabhata menu.” (Tanga Jihebeleu 13:2.) Ihi ilombolola o kizuelu “kutambulula asonhi?” O izuelu ia tumbula Phaulu, ilombolola “kutambula o asonhi ni ngalasa.” Nange o izuelu íii, i tu bhangesa kulembalala Mbalahamu ni Lote. O mala iá, a tambula o asonhi ni ngalasa ioso, maji ka a ejidile. Mu ku suluka, Mbalahamu ni Lote a mono kuila, o asonhi enhó, exile ji-anju. (Dimatekenu 18:2-5; 19:1-3) O phangu íii, ia suínisa o Jikidistá Jihebeleu kudizola mudiâ, ni kulondekesa o ukexilu ua kuzalela.

¹² Kiebhi ki tu tena kuzalela akuetu? Tu tena kuixana o jiphange jetu phala kudia kumoxi n’etu bhu mabhata metu, mba ku a exana phala ku a suínisa. Né muene se ki tuijiia kiambote o kafunga ketu ka ilunga ni muhat’uê, tu tena ku a zalela kioso kia kunda o kilunga kietu. (3 Nzuá 5-8) Ki tu bhingi kulamba ima iavulu, mba kukala ni kitadi kiavulu phala kubhanga kiki. Ki tu tokala kuzalela o jiphange phala kulondekesa o jimbongo jetu. Tua tokala ku a zalela phala ku a suínisa. Ki tu tokala ué kuixana ngó o jiphange a tena ku tu bhana, mba ku tu bhangela ué kima. (Luka 10:42; 14:12-14) O kima ki tua tokala o kubhanga, o ku di langa, phala ki tu thandanganhe kiavulu ni ima ietu, anga tu kamba kuzalela akuetu!

13, 14. Kiebhi ki tu tena ku ‘lembalala oso ala mu jikaleia?’

¹³ “Lembalalenu oso ala [mu jikaleia.]” (Tanga Jihebeleu 13:3.) Kioso kia soneka o izuelu íii, Phaulu ua kexile mu zuela ia lungu ni jiphange akexile mu kaleia, mukonda dia kixikanu kiâ. Phaulu ua ximana o kilunga, mukonda ene a “tale o hadi kumoxi ni ene oso a kexile . . . mu jikaleia.” (Jihebeleu 10:34) Saí jiphange, a kuatekesele Phaulu ku mivu iuana ia bhitile mu kaleia, maji amukuá a tungile dikanga. Kiebhi kieji kuatekesa ué Phaulu? Ene a tokalele kukolokota mu ku mu sambela.​—Filipe 1:12-14; Jihebeleu 13:18, 19.

¹⁴ Lelu, Jimbangi javulu ala mu kaleia mukonda dia kixikanu kiâ. O jiphange ja tungu bhua zukama, a tena ku a kuatekesa mu ku a bhangela ima iavulu. Maji avulu mudietu, tua tungu dikanga. Kiebhi ki tu tena ku a lembalala, ni ku a kuatekesa? O henda ietu mudietu, ia tokala ku tu bhangesa ku a sambela kiavulu. Mu kifika, tu tena ku sambela o jiphange jetu ja mala ni ja ahatu,  ni an’a ndenge ala mu kaleia ku ixi ia Eritréia. Tu tena ku sambela ué phange Paulos Eyassu, Isaac Mogos, ni Negede Teklemariam, ala kiá mu kaleia mu 20 a mivu.

15. Kiebhi ki tu tena kuxila o ukaza uetu?

¹⁵ “O ukaza u kale ku ujitu kua ene oso.” (Tanga Jihebeleu 13:4.) Tu tena ué kulondekesa o henda ietu ku jiphange mu kulenga o ufusa. (1 Timote 5:1, 2) Mu kifika, se tu bhanga o undumbu ni phange, tua-nda bheka ibhidi iavulu kua phang’ietu ni muiji uê. Ki tua-nda kala dingi ni ukamba uambote ni jiphange mu kilunga. (1 Tesalonika 4:3-8) Xinganeka ué kiebhi kieji divua o muhatu se uivua kuila, o munumi’ê uene mu tala o ufusa. O kuila muéne ueji divua kuma o munumi’ê ua mu zolo, mba u xila o ukaza uâ?—Matesu 5:28.

16. Kiebhi o kusanguluka ni ima i tuala na-iu ku tu kuatekesa kulondekesa o henda ietu ku jiphange?

¹⁶ “Ioso i mua mono i mi soke.” (Tanga Jihebeleu 13:5.) O kidielelu kietu kua Jihova, kia-nda tu kuatekesa kusanguluka ni ima i tuala na-iu. Kiebhi o ukexilu iú, ua-nda tu kuatekesa kulondekesa o henda ietu ku jiphange? Se tu sanguluka ni ima i tuala na-iu, tua-nda lembalala kuila, o jiphange jetu a beta-o-kota, o kitadi ni jimbote ndenge. (1 Timote 6:6-8) Ki tua-nda ditenda mukonda dia jiphange jetu, mba ibhidi i tu bhita na-iu ku muenhu. Ki tua-nda kala ni difuba dia akuetu, mba kulondekesa o luímbi. Mu veji dia kiki, se tu sanguluka ni ima i tuala na-iu, tua-nda londekesa o ukexilu ua kubhana.​—1 Timote 6:17-19.

¹⁷ ‘Kolokotenu.’ (Tanga Jihebeleu 13:6.) O kidielelu kietu kua Jihova, ki tu suínisa kukolokota kioso ki tu dibhana ni ibhidi. O kusuína kuku, ku tu kuatekesa kubhanga ima iambote, kála o kulondekesa o  henda ietu ku jiphange mu ku a suínisa ni ku a konda o malamba. (1 Tesalonika 5:14, 15) Né muene mu kithangana kia hadi ia dikota, tu tena kulondekesa o kusuína mu kuijiia kuila, o kubhanduluka kuetu kua zukama.​—Luka 21:25-28.

18. Kiebhi ki tu tena kuzola dingi o tufunga tuetu?

¹⁸ “Lembalalenu athu a mi [kala] ku pholo.” (Tanga Jihebeleu 13:7, 17.) O tufunga mu kilunga kietu, a kalakala kiavulu phala o mbote ietu. Kioso ki tu xinganeka mu ima ioso ia bhanga, o henda ietu ni kisakidilu kietu kua ene i di bandekesa. Ki tu mesena kuila, ene a luuala mba a kamba kusanguluka, mukonda dia ima i tu bhanga. Mu veji dia kiki, tua mesena ku a belesela ni muxima uoso. Se tu bhanga kiki, tua-nda ku “a xila kiavulu muene, ni ku a edikiza jinga o henda, mukonda dia kukalakala kuâ.”​—1 Tesalonika 5:13.

19, 20. Kiebhi ki tu tena kukolokota mu kulondekesa dingi o henda ietu ku jiphange jetu?

¹⁹ O athu ejiia kuila, o mundu ua Jihova ua di zolo. Kiene kia a ejidile ué mu izuua ia Phaulu. Maji né kiki, Phaulu ua suínisa o jiphange kubandekesa o henda iâ. Muéne uambe: ‘Vulenu ku ki bhanga jinga.’ (1 Tesalonika 4:9, 10) Sé phata, tu tena kubandekesa o henda ietu!

²⁰ Mu kiki, kioso ki tu mona o kibatulu kia Bibidia kia muvu iú bhu Kididi Kietu Kia Ubhezelu, tua tokala ku dibhuidisa: O kuila ngi tena kuzalela dingi akuetu? Kiebhi ki ngi tena kukuatekesa o jiphange jetu ala mu kaleia? O kuila ngi xila o kitumu kia Nzambi kia lungu ni ukaza? Ihi ia-nda ngi kuatekesa kusanguluka ni ima i ngala na-iu? O kuila ngi tena kudielela kua Jihova? Kiebhi ki ngi tena kubelesela o jiphange ala ku pholo? Se tu bhanga nguzu phala ku kumbidila o ima isamanu íii, ki tua-nda mona ngó o kibatulu kia Bibidia kia muvu, kala kijimbuete kio soneke mu ilumbu. Mu veji dia kiki, o kibatulu kiki, kia-nda tu bhangesa kulembalala o izuelu ia Phaulu iambe: ‘Sulukenu ni kudizola.’​—Jihebeleu 13:1.