1, 2. Le yɛɛ Pɔɔl ndoo poonyial lɛ Kilisiɔŋaa Hibuluiya yauwo?

O WƆSI 61 ve niŋ boondii Chiisu ve, kundala leKilisiɔŋndaŋ kpou o lɛŋnde Isɔluɛi leŋ niŋ wa kɔl nyuloo tueiyɔɔ yeela. Mi che bɛɛ kiilanɔɔ Pɔɔl wa o biyɔɔ niŋ Luom, kɛ ndoo nɔ tiindaŋndo maa o cho malɔɔ sɔla. Timoti ndaa kela wo bɛɛ ndoo sɔla ko malɔɔ sɛnɛi kinɛi. Nduyɛ ndaa nɔ tiindaŋndo le kɔlaŋ puaapiliaa yilɔɔ nda ŋiɔɔŋ o Chudiaa niŋ. (Hibuluiya 13:​23) Kɛ wɔsioŋ ŋuɛɛnu kpe muŋ lo niŋ ni le mi Kilisiɔŋnda o Chudiaa niŋ, taama taama a wa o Chulusɛlɛm niŋnda, le mi ndaa fula chɔ chɔ. Le sabu yɛɛ? Chiisu ndoo dimul nda niŋ maa, te a che pɛ mi puaa chɔuwa huŋ balu Chulusɛlɛm, ndaa nɔ ma nyaanuŋ.—Luku 21:​20-24.

² Wɔsilaŋ 28 laa hiou niŋ ni chɔŋ a teleŋ Chiisu ke nda sila koŋ ndo. O teleŋ koŋ bɛŋgu, mi Kilisiɔŋnda o Isɔluɛi niŋ lo o laalaŋ ndaa choo mi che bɛɛ naa a wa o nyɛpalaa bɛŋgu a o tɔɔndaŋndaŋ niŋ tau. (Hibuluiya 10:​32-34) Kɛ Pɔɔl ndoo yeema mbo bɛɛndiaa nda le nyɛ ndoo nɔ le yɔŋnɔŋndo o chilaŋ niŋndo. Ndaa nɔ le simul kala kalaa sɔlaa le tiindaŋ nda dɔu o Mɛlɛka niŋndo. (Maatiu 24:​20, 21; Hubuluiya 12:​4) Ndaa nɔ ma chɔm biuwɔŋndo nduyɛ mi ndaa dɔu tiindaŋndo o Mɛlɛka niŋ mbo hiou maa paandu. Nduyɛ le mi ndaa sɔla kindaa, ndaa nɔ ma diikuŋ nyɛ Chiisu dimul nda wo. (Nuawɔ Hibuluiya 10:​36-39.) Lelaŋ  Chɛhowa ndoo dimul Pɔɔl mbo poonyial puaapiliaa a ndepiliaa kaŋ ni. Yau koŋ naŋ veelu ni aa Hibuluiya, o poonyiaŋ le nda malaa a nyɛ ndoo nɔ le yɔŋnɔŋndo wo.

3. Le yɛɛ naŋ nɔ yɛ miŋ chɔm yeemɛi le yau Hibuluiya o Baabuiyo niŋ?

³ Naa Kilisiɔŋnda hau bɛɛ nɔ miŋ chɔm yeemɛi le yau Hibuluiya o Baabuiyo niŋ. Le yɛɛ? Kanifuule, naa bɛɛ cho hau o simul pilɔɔ bɛŋgu kpe maa Kilisiɔŋnda o Chudiaa niŋ. Ŋ cho o teleŋ “nyɛ palaa” bɛndoo niŋ. Wanaa bɔɔbɔɔ biunuŋ niŋ tɔɔndaŋnda kala kalaŋ nduyɛ a feŋaŋ o tiindaŋ ndaa choo le. (Timoti Diiŋ Ndɔɔ 3:​1, 12) Kɛ naa pumnda tau cho kɔl nyuloo tueiyɔɔ yeela nduyɛ tɔɔndaŋ kpele kpele komal lɔ naa le. Kɛ naa bɛɛ nɔ miŋ wa yekeŋ maa Kilisiɔŋnda o teleŋ Pɔɔllo niŋ. Le yɛɛ? Kanifuule, teleŋndo bendu lɛ le, naa bɛɛ cho sɔla tɔɔndaŋ kala kalaa le tiindaŋ naŋ nɔ wo!—Nuawɔ Luku 21:​34-36.

4. Bolle Baabuile kuɛɛ nda hɛli yɛ le wɔsi 2016, nduyɛ le yɛɛ le bɛnda yɛ?

⁴ Yɛɛ cho yɛ naa mala le miŋ bɛɛndiaŋ le kpundɛ cho o chilaŋ niŋndo? O yau Hibuluiya niŋ, mi Pɔɔl poonyiaa sɔɔŋ tau ŋ mala naa le mi tiindaŋ naa kendu poŋ ndo. Ŋ saaluŋ suɛi sɔvɛi ipilɛ o Hibuluiya 13:​1 niŋ. Bolle Baabuileŋ ndeŋ le dɛɛniaa naa aa, “La hiou lachi a puaapiliaa nyaa kaalaa.” Bolle Baabuileŋ ndeŋ nda hɛli le wɔsi 2016 ni.

5. Yɛɛ puaapiliaa kaalaa sim yɛ?

⁵ Yɛɛ puaapiliaa kaalaa sim yɛ? Diom maKilikii Pɔɔl soliŋ kpeku wo sim le “kaala cho pɔmbɔɔ a bɛndoo tɛɛŋndo.” Kaala tuu kpɛi cho wanaa fula o yuŋgu pilɔɔ niŋ ɔɔ chaŋyaŋ tɛɛŋndo. (Chɔŋ 11:​36) Ŋ nɔ miŋ handuŋ o lahɔl maa puaapiliaa a ndepiliaa le naŋ cho le. Kɛ puaapiliaa a ndepiliaa kɛsɛ naŋ cho ni. (Maatiu 23:​8) Mi Pɔɔl dimi aa, “La kaaliaŋ vellaa velle maa wanaa laalaŋ. Nduyɛ wana o wana la ke chaaŋaa nyaa bɛɛleŋ mbo hiou bɛɛ mɛɛ nda ke nya yɛ.” (Luomaŋnda 12:​10) Diomndaŋ ndaŋ la chɔm mɛɛ kaala naa le puaapiliaa naa cho o kala yɛ. Kaalaa le puaapiliaa naa, a kaala leKilisiɔŋ tɔlnuŋ o sawala mandaala Baabuiyo choo wo, mala wanaa Mɛlɛkaa le ma nɔ chaŋyɛi kpɛɛluŋnde a diompilɔɔ ndapila tɛɛŋ.

6. Vɛɛ Kilisiɔŋaa tonyaa bii yɛ kaala puaapiliaa bila?

⁶ Diomndaŋ ndaŋ “puaapiliaa kaalaa” cho o yaula maKilisiɔŋndaŋ niŋ tau. Le Chuuwa o sindɔɔ niŋ, ndaa soliŋ diomndo hoo “puaapilɛnɔɔ” kpeku le wana nda cho yuŋgu pilɔɔ wo, ɔɔ lepum, wana cheleŋ. Kɛ o cho le wana ve Chuunɔ le wo le ndaa soliŋ diomndaŋ ndaŋ kpeku le. Kɛ le naa Kilisiɔŋnda, “puaapilɛnɔ” naa cho Kilisiɔŋnɔ kɛ kɛ ni, o wa bɛɛ mbo fula o lɛŋnde cheleŋ niŋ. (Luomaŋnda 10:​12) Chɛhowa pɛɛku naa le kaaliaŋndo vellaa velle. (Tɛsaloniaŋ Tasoo 4:​9) Kɛ le yɛɛ i cho yɛ suɛi sɔvɛ le hiouwɔɔ lachi a puaapiliaa naa kaalaa?

7. (a) Sabu sɔvɛ bɛndu kuɛɛ naŋ nɔ yɛ le puaapiliaa naa kaalaa? (b) Sabu sɔvɛ cheleŋ kuɛɛ naŋ nɔ yɛ le hiouwɔɔ lachi a kaaliaŋndo vellaa velle?

⁷ Sabu sɔvɛ bɛndoo le puaapiliaa naa kaalaa cho ni maa, Chɛhowa dimul naa ni le miŋ kaala nda. Ŋ nɔla kpeekpei miŋ kaala Chɛhowa le te o wa pɛ miŋ kɛɛ puaapiliaa naa kaalaa. (Chɔŋ Tasoo 4:​7, 20, 21) Sabu cheleŋ cho ni maa, ŋ nɔ yeemɛi le maaliaŋndo vellaa velle, o bii fau a teleŋnda sɔɔŋ kiandu naa choo wo. Teleŋ Pɔɔl poonyiaa yau ndɔɔ o Kilisiɔŋaa Hibuluiya lo wo, mbo sina maa teleŋndo ndoo lo lɛ o bɔɔ le mi ndaa mɛi chiɛila ndalaŋ a nyɛmkɛŋ ndaŋ te. Mi Chiisu tɛɛsiaa mɛɛ teleŋ koŋ ndoo nɔ mbo kendu yɛ. (Maki 13:​14-18; Luku 21:​21-23) Tuupa mi teleŋ koŋ fuuluu, Kilisiɔŋaa kaŋ ndaa  nɔ ma hiou lachi a kaaliaŋndo vellaa velle.—Luomaŋnda 12:​9.

8. Yɛɛ naŋ nɔ yɛ miŋ tosa suŋsuŋ tuupa mi nyɛpalaa bɛndoo kanduŋ?

⁸ Nyɛpalaa bɛndu bɛndu cho waŋchieeya komallo cho suŋ hunɔɔ. (Maki 13:​19; Sɔɔŋ Chɔɔmaŋndoŋ 7:​1-3) Sila naŋ nɔ miŋ diikuŋndo cho ni, “La luɛi chiɛilaŋ niŋ wanaa niaa, mi la kiindiaŋ diolaŋ kɔɔli. La vioŋnuŋ chiɛilaŋ niŋ mi la wa loŋ le teleŋ biŋgi, haaa mbo lo o koŋ mi tumbe Mɛlɛka dɔɔnuŋ ndo o pɔlul.” (Aiasaya 26:​20) Ŋ dimi maa kundala naala leKilisiɔŋndaŋ la cho “chiɛilaŋ” ndaŋ ni. Loŋ naŋ piɛi Chɛhowa a puaapiliaa a ndepiliaa naa latulu ni. Kɛ o cho ko le bɔɔŋiaŋndo diompilɛ lɔɔlɔɔ le naŋ nɔ miŋ landuŋ kɔl te. Mi Pɔɔl dimul vɛlɛ Kilisiɔŋaa Hibuluiya maa a nɔ ma dɛɛniaŋ vellaa velle, ma kaaliaŋ, nduyɛ ma wa kɛndɛi tosaa ndapila tɛɛŋ. (Hibuluiya 10:​24, 25) Ŋ nɔ miŋ tosa kaala naa suŋsuŋ o kala poŋ le puaapiliaa naa kanifuule, hei tosaa mala naa le miŋ biunuŋ nyɛpalaa suu o suu o chilaŋ niŋ.

9. (a) Fonda kuɛɛ naŋ nɔ hau le puaapiliaa naa kaalaa? (b) Chɔmndɔ tamaseliilaŋ a mɛɛ wanaa Chɛhowaa chɔm niŋ puaapiliaa ndaa kaalaa yɛ?

⁹ Ŋ nɔ hau nɛilaŋ tau le puaapiliaa naa kaalaa tuupa mi nyɛpalaa bɛndoo kanduŋ. Lɛŋnde nyiiyaaleŋ, mɛŋma koŋgi bɛnduaŋ, hueiyii fuku fukuei, ɔɔ sɔɔŋ kpundɛŋ cheleŋ cho puaapiliaa naa saaŋgiaa tau. Apum cho tɔɔndaŋndaŋ biuwɔŋndo. (Maatiu 24:​6-9) Nduyɛ, bahawɛi nyɛsɔlaa cho lɔɔlɔɔ le mɛɛ naŋ cho o chieeŋ lakafaa hoo niŋ yɛ. (Sɔɔŋ Chɔɔmaŋndoŋ 6:​5, 6) Kɛ, mɛɛ puaapiliaa naa sɔla bahawɛilaŋ fau, lende koni naŋ sɔla fondaa le chɔmndo mɛɛ kpɛ naŋ kaala nda yɛ ni. Mi che bɛɛ naa kaala cho o chieeŋndo hoo niŋ te, kɛ ŋ nɔ miŋ hiou lachi a puaapiliaa naa kaalaa. (Maatiu 24:​12) ^[1]—Tofa diomnda chɔɔlaalaŋ.

10. Yɛɛ naŋ cho yɛ hunɔɔ yaasiaa?

¹⁰ A bahawɛila naŋ nɔlaŋ kpou, vɛɛ naŋ nɔ yɛ miŋ hiou lachi a puaapiliaa naa kaalaa? Vɛɛ naŋ chɔm yɛ maa ŋ nɔ kaala suu waa naa le puaapiliaa naa? Mɛɛ Pɔɔl dimi maa “la hiou lachi a puaapiliaa nyaa kaalaa,” mbo chɔm nɛila siaama Kilisiɔŋnda tosa heiyo. Ŋ yaasiaŋndɔ nɛilaŋ la ŋɔmpum.

11, 12. Yɛɛ mialla yiyaa sim yɛ? (Tofa fotueiyo o peele naŋ kandu leŋ choo.)

¹¹ “La mal mialla yiyaa o chiɛila nyalaŋ niŋ te.” (Nuawɔ Hibuluiya 13:​2.) Yɛɛ “mialla yiyaa” sim yɛ? Diomnda Pɔɔl soliŋ ndaŋ kpeku laŋ la sim le “mialla kɛndɛi tosallo.” Kɛlɛŋgaa diomndaŋ ndaŋ la tosa miŋ loonuŋ a Ebilaham nda Lɔtu okɔɔ. Mi puaa ŋiɔɔŋnda haa yiya mialaa ndaa sina le wa. O mɛɛlulaŋ kpɔŋ, mi Ebilaham nda Lɔtu sina maa maalikɛiya wa mialaa kaŋ ni. (Chɛnɛsee 18:​2-5; 19:​1-3) Tamasilaŋ ndaŋ la dɛɛniaa Kilisiɔŋaa Hibuluiya le ma kaala puaapiliaa ndaa nduyɛ ma tosal nda kɛndɛi.

¹² Vɛɛ naŋ chɔm yɛ wanaa cheleŋnda kɛndɛi? Ŋ veelu puaapiliaa a ndepiliaa naa o chiɛila naalaŋ le nyɛdiaa ɔɔ le nda kɔllo dɛɛniaa. Mi che bɛɛ naa ŋ sina buɛi naa ibuŋgaa a laandɔ nyɛkɛndɛi le, ŋ nɔla miŋ yiya nda te a hiŋ pɛ yilɔɔ o kunda naa niŋ. (Chɔŋ Ŋgaa Ndɔɔ 5-8) Ŋ nɔ miŋ yau nyɛdiaa, ɔɔ miŋ soliŋ nyɛsɔlaa kpeku tau le nda le. Kpeleŋ naa cho le puaapiliaa naa dɛɛniaa ni, kɛ o cho le nda chɔmndo nyɛ naŋ nɔ wo le. Nduyɛ o cho ko wanaa tosal naa kɛndɛi o nɛiyo opum choo wa le naŋ nɔ miŋ yiya le. (Luku 10:​42; 14:​12-14) Mɛɛ mɛɛ naŋ wa kpɔndi kpɔndi, ŋ nɔ miŋ nuuviaa fondaa le puaapiliaa naa kɛndɛi tosallo!

13, 14. Vɛɛ naŋ nɔla yɛ miŋ loonuŋ “wanaa cho o biyɔɔ niŋ nda”?

¹³ “La puɛɛŋ wanaa cho o biyɔɔ niŋ nda le.” (Nuawɔ Hibuluiya 13:​3.) Teleŋ Pɔɔl  poonyiaa diomndaŋ ndaŋ ndo, a puaapiliaa wa o biyɔɔ niŋ le laalaŋ ndaa wa okɔɔ o wa suɛi ni. Mi Pɔɔl yil kundaa balikaa tau le mɛɛ nda ‘bii mɔnɛi le wanaa nda dɔu a chiɛila manyumndaŋ niŋ nda’ yɛ. (Hibuluiya 10:​34) Mi puaapiliaa apum mala Pɔɔl teleŋ o wa o biyɔɔ niŋ le wɔsilaŋ la hiɔɔlu wo. Kɛ vɛɛ puaapiliaa wa levil la ndaa looku yɛ niŋ ma mala Pɔɔl? Ndaa nɔ ma hiou lachi a piɛileŋ kekelee le ndu.—Filipiaŋnda 1:​12-14; Hibuluiya 13:​18, 19.

¹⁴ Chɛhowɛiyaa bɔɔbɔɔ cho hau o biyɔɔ niŋ le laalaŋ ndaa. Puaapiliaa a ndepiliaa cho machɛlu wa nɔla ma mala nda a nyɔɔŋ ŋpum. Kɛ naa pumnda cho levil a puaapiliaa naa cho o biyɔɔ niŋnda. Vɛɛ naŋ looku yɛ nda mala nduyɛ ŋ puɛɛŋ nda le? Kaala naŋ nɔ le nda wo nɔla mbo nyindu naa le miŋ piɛi le nda kekelee. Le tamaseliiyo, ŋ piɛi le puaapiliaa, ndepiliaa, a chuaambuaa cho o biyɔɔ niŋ o lɛŋnde Ɛliteeliaa leŋ niŋnda. Mɛɛ ŋgɔɔ Pɔlos Iyasu, Isak Mokos, a Nɛkɛde Tekilamaliam cho naa yɛ. A cho niŋ o biyɔɔ niŋ le wɔsioŋ bidiiŋ a nyɛ lechoo.

15. Vɛɛ naŋ ke yɛ nɔ naa bɛɛleŋ?

¹⁵ “Wana o wana la kɛsi nɔɔ lebɛɛ.” (Nuawɔ Hibuluiya 13:​4.) Ŋ nɔla vɛlɛ miŋ kaala puaapiliaa naa te ŋ wa pɛ a diandaa o kaa niŋ. (Timoti Tasoo 5:​1, 2) Te o wa pɛ miŋ tosa kaa ihini nɔɔlɛiyo a puaapilɛnɔɔ ɔɔ ndepilɛnɔɔ, ŋ nɔla miŋ yɔŋul wana koŋ a yuŋgu ndɔɔ. Nduyɛ mi kiisaŋndo luɛi naa tɛɛŋ vellaa velle. (Tɛsaloniaŋ Tasoo 4:​3-8) Yiyaŋndɔ vɛlɛ a mɛɛ lanɔɔ cho yiyaŋ yɛ te o saaluŋ pɛ maa pɔnɔ ndɔ cho fotueilaŋ a wunduma tum fonduaŋ nuaa. O nɔla pa mbo yiyaŋ maa pɔnɔ ndɔ kaala ndu, nduyɛ maa o cho bɛɛleŋ chɔmndo le kɛɛsiaa nɔɔ?—Maatiu 5:​28.

16. Vɛɛ kɔl hiniaa nɔɔ mala yɛ naa le puaapiliaa naa kaalaa?

¹⁶ “La duau kɔlta nyalaŋ o kaala ŋkanioo le.” (Nuawɔ Hibuluiya 13:​5.) Tiindaŋ naŋ nɔ o Chɛhowa niŋndo nɔla mbo mala naa miŋ hini kɔl a nyɛ naŋ nɔ wo. Vɛɛ hei mala yɛ naa le puaapiliaa naa kaalaa? Te ŋ nɔ pɛ kɔl hiniaa, ŋ nɔla miŋ kɛsiŋ o kɔl maa puaapiliaa a ndepiliaa naa Kilisiɔŋnda cho  a sɔvɛ mbo hiau kanioŋ ɔɔ nyɛm naŋ nɔ woŋ. (Timoti Tasoo 6:​6-8) Ŋ ŋɔɔchiaŋ a puaapiliaa naa ɔɔ a bahawɛi cho naa choo wo le. Nduyɛ ŋ paŋala wanaa cheleŋnda ɔɔ miŋ nɔ sɔŋkpɔɔŋndo le. Kɛ, te ŋ nɔ pɛ kɔl hiniaa, ŋ wa wanaa ikɛndɛ.—Timoti Tasoo 6:​17-19.

17. Vɛɛ “kɔlta simulaalaŋ” nɔɔ mala yɛ naa le puaapiliaa naa kaalaa?

¹⁷ “La ŋ nɔŋnuŋ kɔlta simulaalaŋ.” (Nuawɔ Hibuluiya 13:​6.) Tiindaŋ naŋ nɔ o Chɛhowa niŋndo ke naa kɔl sikpaa le tɔɔndaŋnda kala kalaŋ biunɔŋndo. Kɔl sikpaa hoo mala naa le yiyaŋ kɛndɔɔ nɔɔ. Nduyɛ te ŋ nɔ pɛ yiyaŋ kɛndɔɔ, ŋ nɔla miŋ kaala puaapiliaa a ndepiliaa naa nduyɛ miŋ wa nda kɔltaŋ dɛɛniaa. (Tɛsaloniaŋ Tasoo 5:​14, 15) A teleŋ nyɛpalaa bɛndoo bɛɛ, ŋ nɔla miŋ sɔla kɔl sikpaa nduyɛ miŋ sina maa pioŋɔɔ naa cho niŋ kpɛɛluŋ.—Luku 21:​25-28.

18. Vɛɛ naŋ hiau yɛ lachi a wanaa chua chilaŋ o kundaa niŋnda kaalaa?

¹⁸ “La loonuŋ a wanaa cho chilaŋ chuaa nya tɛɛŋnda.” (Nuawɔ Hibuluiya 13:​7, 17, NW.) Wanaa chua chilaŋ o kundaa niŋnda cho teleŋ ndaa soliŋndo kpeku le wallo tosaa kekelee le naa. Te ŋ yiyaŋ pɛ a walta nda cho tosaa o kundaa niŋndaŋ kpou, ŋ nɔla miŋ hiou lachi a nda kaalaa nduyɛ a nda balikaa mello. Ŋ yeema vɛlɛ kposoŋ mi nyɛ naŋ cho tosaa wo tɛɛmbuu nda kɔllo le. Kɛ, ŋ yeema miŋ diikuŋ nda a kɔllo wulee. Ŋ nɔ miŋ ‘chua waŋnda haa maa wanaa naa bana kpeekpei, nduyɛ miŋ kaala nda, kani fuule, le wali o wali nda cho tosaa.’—Tɛsaloniaŋ Tasoo 5:​13.

19, 20. O nɛila kuɛɛ niŋ naŋ nɔ yɛ miŋ hiou lachi a puaapiliaa naa kaalaa?

¹⁹ Waŋnda sina wanaa Chɛhowaa le kaala nda nɔ le puaapiliaa ndaa wo. Waŋnda o palɛi Pɔɔl le niŋ bɛɛ ndaa sina nda le hei. Kɛ mi Pɔɔl dɛɛniaa puaapiliaa le ma kaaliaŋ mbo hiou bɛɛ maa paandu. Mbo dimi aa, “La hiou lachi a suɛi hei tosaa mbo hiou bɛɛ maa paandu poloŋ.” (Tɛsaloniaŋ Tasoo 4:​9, 10) A tonya, ŋ nɔ miŋ wa hiouwɔɔ lachioo tosaa lɔɔlɔɔ!

²⁰ Lelaŋ, te ŋ wa pɛ bolle Baabuile naale iwɔsileŋ tofaa o Toŋgo leMasa naa niŋ le wɔsioo hoo, ŋ nɔ miŋ yiyaŋ o nyunalaŋ ndaŋ choo, I nɔ pa mi chɔɔlu kɛndɛi tosa? Vɛɛ ya looku yɛ mi mala puaapiliaa niaa cho o biyɔɔ niŋnda? I cho pa bɛɛleŋ chɔmndo le kɛɛsiaa Mɛlɛkaa a nɔɔ okɔɔ? Vɛɛ ya nɔla yɛ mi chɔɔlu diikɔŋ wanaa cho chilaŋ chuaa o kundaa niŋnda? Te o wa pɛ miŋ tosa hiouwɔɔ lachioo o nɛila ŋɔmpum ndaŋ niŋ, bolle Baabuile iwɔsileŋ ndeŋ le cho ko wa le holaa o Toŋgo leMasaa niŋ te. Kɛ le cho naa wa loonɔŋndo le diikɔŋndo diomnda Pɔɔl dimilaŋ. Laŋ la cho ni, “La hiou lachi a puaapiliaa nyaa kaalaa.”—Hibuluiya 13:​1, NW.