1, 2. Mwomwo ika Paulu asonekelele mukanda vaka-Kulishitu vavaHepeleu?

MUMWAKA wa 61, vikungulwilo vyamuIsalele vyosena vyapwilenga mukuunda. Kaposetolo Paulu apwilenga mukamenga muLoma, oloze ashinganyekelenga ngwenyi kalinwomu vamulovolemo. Kaha nawa Chimoteu, uze atambukilenga nenyi apwile hivanamulovola lyehi mukamenga, ngocho vapwile nakushinganyeka kuya hamwe nakutambukila vandumbwavo kuYuleya. (WavaHepeleu 13:23) Oloze vaka-Kulishitu vaze vapwile muYuleya, chikumanyi vaze vatwaminenga muYelusalema, vatelele kuchina washi nakufuma mujinganda javo. Chuma kanechi chatelele kusoloka mumyaka yitanu kufuma mu 61. Mwomwo ika? Mwomwo hakavanga Yesu ahuhumwine vaka-kumukavangiza ngwenyi, omu navakamona Yelusalema vanayijingilika kumaswalale, kaha vakachine.—Luka 21:20-24.

² Mwahichile myaka 28 kufuma haze Yesu avahuhumwine. Halwola kana, vaka-Kulishitu muIsalele vapwilenga vakushishika chamokomoko naluyanjisa naukalu weka vamwenenga. (WavaHepeleu 10:32-34) Kaha Paulu asakile kuvakafwa vapwenga vakulizanga naukalu wapwile nakwiza kulutwe. Mwomwo vapwile hakamwihi nakumona ukalu waunene uze naweseka lufwelelo lwavo. (Mateu 24:20, 21; WavaHepeleu 12:4) Halwola  kana, vatelelele kupwa nalukakachila nalufwelelo chikuma numbanyi vahase kukavangiza mazu ahuhumwine Yesu, kaha nawa kuyoya chavo chapendaminyine hakukavangiza mazu kana. (Tangenu WavaHepeleu 10:36-39.) Ngocho, Yehova ahwiminyinyine Paulu asonekele vandumbwenyi mukanda, uze vavuluka jino ngwavo WavaHepeleu, kaha vausonekele mangana uvazamikise havyuma vyapwile nakwiza kulutwe.

3. Mwomwo ika twatela kufwila kutanga nakulinangula mukanda WavaHepeleu?

³ Hakupwa tuvatu jaKalunga makumbi ano, twatela kufwila kutanga nakulinangula mukanda WavaHepeleu. Mwomwo ika? Mwomwo tuli nakuyoyela mulwola lwalukalu nge muze chapwile kuli vaka-Kulishitu vamuYuleya. Tuli ‘mumakumbi akukuminyina amakalu,’ kaha vatu vavavulu vanomikanga kuukalu waunene chipwe luyanjisa. (WaChimoteu 2, 3:1, 12) Oloze etu vavavulu tweji kulivwisanga kuwaha kutwama mukuunda, kaha nawa kaveshi nakutuyanjisa chikumako. Ngana mwavaka-Kulishitu vamumakumbi aPaulu, nayetu nawa twatela kupwa vakuvanguluka. Mwomwo ika? Mwomwo kalinwomu tumone ukalu waunene uze naweseka lufwelelo lwetu.—Tangenu Luka 21:34-36.

4. Chisoneka chamwaka wa 2016 chika, kaha mwomwo ika chinapwila chakutamo?

⁴ Vyuma muka navitukafwa tulizange havyuma navisoloka kulutwe? Mumukanda WavaHepeleu, Paulu avulukilemo vyuma vyavivulu vize navitukafwa tuzamikise lufwelelo lwetu. Chishina chimwe chachilemu chikuma shina chize chili hamukanda WavaHepeleu 13:1. Mukanda kana watukolezeza ngwawo: “Zangi yenu yakuzanga vandumbwetu yitwaleho lika.” Chisoneka kana vanachisakula chipwenga chisoneka chamwaka wa 2016.

5. Kuzanga vandumbwetu chalumbununa ika?

⁵ Uno kuzanga vandumbwetu chalumbununa ika? Lizu lyachiHelase azachishile Paulu lyalumbununa “kuzanga ndumbwove.” Kuzanga vandumbwetu chalumbununa kupwa nausoko wakukola navatu vamutanga yetu chipwe masepa jetu. (Yowano 11:36) Katweshi kulyonga hakuvuluka vatu twetava navo ngwetu vandumbwetuko, oloze chikupu vene vapwa hivandumbwetu. (Mateu 23:8) Paulu ambile ngwenyi: “Hakuzanga vandumbwenu, pwenunga namuchima wakulizanga chikuma navakwenu. Kaha hakulisolwela kavumbi navakwenu, pwenunga vatete kulinga ngocho.” (Wavaka-Loma 12:10) Mazu kana asolola chikupu nge twazanga chikuma vandumbwetu. Zangi kaneyi yapendamina hajindongi jamuMbimbiliya, kaha yikiko yeji kulingisanga vatu jaKalunga valizange chikuma nakulinunga hamwe navakwavo.

6. Uno vaka-Kulishitu vamuchano vevwishisa ngachilihi mwalumbunukila kuzanga vandumbwavo?

⁶ Mazu akwamba ngwavo, ‘kuzanga vandumbwetu’ vawazachisa chikuma mumikanda yavaka-Kulishitu. VaYuleya kushikulu vazachishilenga lizu “ndumbwetu” kutalisa kukausoko nakuli mutu uze kapwile wamutanga kanako. Oloze kavazachishilenga lizu kana kutalisa kuli mutu uze kapwile kaYuleyako. Oloze etu vaka-Kulishitu vamuchano, lizu “ndumbwetu” tweji kulizachisanga kuli kala muka-Kulishitu wamuchano chamokomoko nakulifuchi atwama chipwe okwo afuma. (Wavaka-Loma 10:12) Yehova natunangula kuzanga vandumbwetu vosena. (Wavaka-Tesolonyika 1, 4:9) Mwomwo ika chapwila chachilemu kuzanganga vandumbwetu?

7. (a) Chuma muka chachilemu chize chatela kutulingisa tuzangenga vandumbwetu? (b) Vulukenu chuma chikwavo chize chatela kutulingisa tuzangenga chikuma vandumbwetu.

⁷ Chuma chachilemu chikuma chatela kutulingisa tuzangenga vandumbwetu shina mwomwo Yehova atulweza kulinga ngocho. Katweshi kuhasa kuzanga Yehova kachi nge natukana kuzanga vandumbwetuko. (WaYowano 1, 4:7, 20, 21) Chuma chikwavo nawa shina twasaka kulikafwa umwe namukwavo chikumanyi nge tuli muukalu. Omu Paulu asonekele mukanda kuli vaka-Kulishitu vavaHepeleu, atachikijile ngwenyi vamwe kalinwomu vaseze jizuvo javo navikumba vyavo. Yesu avulukilile chimweza omu nalukakaluhwa lwola kana. (Mako 13:14-18; Luka 21:21-23) Ngocho, vaka-Kulishitu vatelele kulizanga chikuma umwe namukwavo shimbu kanda lwola luze luhete.—Wavaka-Loma 12:9.

8. Vyuma muka twatela kulinga oholyapwa shimbu kanda luyando lwalunene luputuke?

⁸ Luyando lwalunene luze kanda lusolokengaho lyehi kuvatu kalinwomu lwizenga. (Mako 13:19; Kusoloka 7:1-3) Ngocho twatela kukahaka muchima kumazu vahuhumuna, akwamba ngwavo: “Enu vatu jami, yenunga mwingile mutupete twenu, lisokelelenumo. Swamenu hakapyapya kakandende, palanga nomu naukuma utenu.” (Isaya 26:20) ‘Tupete’ kana twatalisa kuvikungulwilo vyetu. Kukiko tweji kulemeselanga Yehova navandumbwetu. Chipwe ngocho, kuli vyuma vikwavo twatela kulinga keshi nge kulikungulwilanga hamwe kahako. Paulu anukishile vaka-Kulishitu vavaHepeleu ngwenyi vatela nawa kulikolezeza nakulizanga navandumbwavo nakuvalingilanga vyuma vyamwaza. (WavaHepeleu 10:24, 25) Ngocho twatela kuzanga chikuma vandumbwetu oholyapwa, mwomwo nachitukafwa tumike kukala ukalu unahase kwiza kulutwe.

9. (a) Vyuma muka viliko makumbi ano, vize vyatela kutulingisa tuzange vandumbwetu? (b) Hanenu vyakutalilaho vize vyasolola omu vatu jaYehova vanasololanga nge vazanga vandumbwavo.

⁹ Kuli vyuma vyavivulu makumbi ano, vize vyatela kutulingisa tuzange vandumbwetu shimbu kanda luyando lwalunene luputuke. Vandumbwetu vavavulu vali nakuyanda kumindenda, nakumavaji, nakujipeho janyamanganda nakumaukalu eka akulijila avene. Kaha vandumbwetu vamwe vachili nakumika kuluyanjisa. (Mateu 24:6-9) Kaha nawa mwomwo yakuyoyela mukaye kano kakapi, vatu vali nakumona ukalu wakuhona jimbongo. (Kusoloka 6:5, 6) Ngocho twatela kuzanga chikuma vandumbwetu, chikumanyi halwola vali nakumona ukalu waunene mukuyoya chavo. Numba tuhu vatu muno mukaye kavasolola zangi kuli vakwavoko, oloze etu twatela kuzanga lika vandumbwetu. (Mateu 24:12) ^[1]—Talenu kwinyikila chakusongo yachihande.

10. Vyuma muka natushimutwila?

¹⁰ Natuhasa ngachilihi kutwalaho lika kuzanga vandumbwetu chamokomoko naukalu tuli nawo? Tunahase kusolola ngachilihi nge twazanga chikuma vandumbwetu? Omu  kaposetolo Paulu akumishile kuhanjika mazu akwamba ngwenyi: “Zangi yenu yakuzanga vandumbwetu yitwaleho lika,” avulukile jijila jajivulu jize vaka-Kulishitu vatela kulingilamo ngocho. Tuchishimutwilenu jino hajijila 6.

11, 12. Uno kusolola chisambo chalumbununa ika? (Talenu muvwimbimbi wakulivanga.)

¹¹ “Kanda namuvulyama kusololanga chisamboko.” (Tangenu WavaHepeleu 13:2.) Uno lizu “chisambo” lyalumbununa ika? Lizu livene azachishile Paulu lyalumbununa “kusolwela vangeji likoji.” Lizu kana lyeji kutwanukisanga Apalahama naLote. Ava malunga vavali vasolwele likoji kuli vangeji vaze kavatachikijileko. Kutwala muze, Apalahama naLote vatachikijile jino ngwavo vangeji kana vapwile vangelo. (Kuputuka 18:2-5; 19:1-3) Vyakutalilaho kana vyakafwile vaka-Kulishitu vavaHepeleu vazange chikuma vandumbwavo hakuvasolwelanga chisambo.

¹² Tunahase kusolwela ngachilihi vakwetu chisambo? Tunahase kusanyika vandumbwetu kujizuvo jetu mangana tulyenga navo hamwe vyakulya chipwe kuvasanyika mangana tulikolezeze. Numba tuhu katwatachikijile kanawa kalama wakujinguluka namuka-mahyenyiko, oloze tunahase kuvasanyika kujizuvo jetu halwola luze navatambukila chikungulwilo chetu. (WaYowano 3, 5-8) Echi kachasakiwa kuwahisa vyakulya vyavivulu chipwe kuzachisa jimbongo jajivuluko. Twatela kufwila kulikolezeza navandumbwetu keshi nge kuvasanyika mangana vamone vyuma tuli navyoko. Kaha nawa katwatela kusanyika kaha vaze vanahase kutukafwa muvyuma vimweko. (Luka 10:42; 14:12-14) Chuma chachilemu chikuma shina kuwana lwola lwakusolwela vakwetu chisambo.

13, 14. Tunahase kwanuka ngachilihi vandumbwetu vaze ‘vanakase mutumenga’?

¹³ “Anukenunga vaze vanakase mukamenga.” (Tangenu WavaHepeleu 13:3.) Paulu hakusoneka awa mazu, apwile nakutalisa kuli vandumbwetu vaze vapwile mukamenga mwomwo yalufwelelo lwavo. Paulu asangejekele vatu muchikungulwilo kana mwomwo vevwililile “keke vaze vapwile mukamenga.” (WavaHepeleu 10:34) Vandumbwetu vamwe vakafwile Paulu hamyaka yiwana yize apwile mukamenga, oloze vakwavo vatwaminenga kwakusuku chikuma. Uno vaze vapwile kwakusuku vahashile kukafwa ngachilihi Paulu? Vahashile kulinga ngocho hakumulombelako chikuma.—Wavaka-Fwilipi 1:12-14; WavaHepeleu 13:18, 19.

¹⁴ Makumbi ano, Vinjiho vavavulu vanavakase mutumenga mwomwo yalufwelelo lwavo. Vandumbwetu vaze vatwama kwakamwihi navakiko vanahase kuvakafwa muvyuma vimwe. Oloze etu vavavulu twatwama kwakusuku chikuma navakiko. Ngocho natuhasa ngachilihi kuvakafwa nakusolola nge katwavavulyamineko? Kuzanga chikuma vandumbwetu nachitulingisa tuvalombelengako lwola lwosena. Chakutalilaho, tunahase kulombelako vandumbwetu vosena, hamwe kaha navanyike vaze vali mutumenga mulifuchi lyaEritrea, kuhakilako navandumbwetu vaze vanakase mutumenga hamyaka yakuhambakana 20, vakufwana nge Paulos Eyassu, naIsaac Mogos, naNegede Teklemariam.

15. Uno natuhasa ngachilihi kuvumbika malo etu?

¹⁵ “Ulo vauvumbikenga kuli vosena.” (Tangenu WavaHepeleu 13:4.) Tunahase nawa  kusolola nge twazanga vandumbwetu hakupwa navilinga vyamwaza. (WaChimoteu 1, 5:1, 2) Chakutalilaho, nge natulinga ujila nandumbwetu walunga chipwe wapwevo, kaha natwenyeka puho yenyi yamwaza nayize yavaka-tanga yenyi. Kaha nawa puho yetu yamwaza twapwile nayo kuli vandumbwetu nayilyenyeka. (Wavaka-Tesolonyika 1, 4:3-8) Achishinganyekenu omu mwevwa pwevo kumuchima nge mwatachikiza ngwenyi lunga lyenyi anakutalanga mivwimbimbi yauselesele. Kutala uze pwevo mwashinganyeka ngwenyi lunga lyenyi amuzanga nakuvumbika ulo wavo tahi?—Mateu 5:28.

16. Kusuuluka navyuma tuli navyo nachitukafwa ngachilihi tuzange vandumbwetu?

¹⁶ ‘Suulukenu navyuma muli navyo.’ (Tangenu WavaHepeleu 13:5.) Kufwelelanga Yehova nachitukafwa tusuuluke navyuma tuli navyo. Uno echi nachitukafwa ngachilihi tuzange vandumbwetu? Nge natusuuluka navyuma tuli navyo, kaha natutachikiza ngwetu vandumbwetu vaka-Kulishitu vapwa vavalemu chikuma kuhambakana jimbongo navikumba. (WaChimoteu 1, 6:6-8) Katweshi kuyayavala hali vandumbwetu chipwe havyuma tuli nakumona mukuyoya chetuko. Katweshi kupwa nalwiso hali vandumbwetu chipwe kupwa nalifwiko. Oloze nge natusuuluka navyuma tuli navyo, kaha natupwa namuchima wazumbu.—WaChimoteu 1, 6:17-19.

17. Kupwa ‘vakumika’ nachitukafwa ngachilihi tuzangenga vandumbwetu?

¹⁷ Pwenunga ‘vakumika.’ (Tangenu WavaHepeleu 13:6.) Kufwelela Yehova cheji kutukafwa tupwenga vakumika mulwola lwaukalu. Kumika kana cheji kutukafwanga tupwenga namuchima wamwaza havyuma tuli nakumona. Muchima kanou weji kutukafwanga tuzangenga vandumbwetu hakuvakolezeza  nakuvavendejeka. (Wavaka-Tesolonyika 1, 5:14, 15) Nomu nalukeza lwola lwaluyando lwalunene, natukahasa kupwa vakumika hakutachikiza ngwetu kuyovoka chetu chili hakamwihi.—Luka 21:25-28.

18. Natusolola ngachilihi nge twazanga chikuma vakulwane muchikungulwilo?

¹⁸ “Anukenu vaze vali nakutwaminyina.” (Tangenu WavaHepeleu 13:7, 17.) Vakulwane muchikungulwilo veji kuzachisanga lwola lwavo mangana vatukafwe. Nge natushinganyeka hamilimo veji kuzatanga muchikungulwilo, kaha natuvazanga chikuma nakuvasakwilila. Katweshi nakusaka kulinga vyuma vize navivalingisa vahone kuzata milimo yavo nakuwahilila chipwe vapihilileko. Oloze twatela kuvononoka namichima yetu yosena. Nge natulinga ngocho, kaha natuvavumbika “chikuma muzangi mwomwo yamilimo yavo.”—Wavaka-Tesolonyika 1, 5:13.

19, 20. Natuhasa kusolola ngachilihi nge twazanga chikuma vandumbwetu?

¹⁹ Vatu jaYehova vavatachikijila hakulizanga navandumbwavo. Omu mukiko chapwile namumakumbi aPaulu. Oloze Paulu akolezezele vandumbwenyi valizangenga chikuma. Kaha ambile ngwenyi: “Mutwaleho lika kulingangamo chikuma.” (Wavaka-Tesolonyika 1, 4:9, 10) Chikupu vene, twatela kutwalaho lika kuzanga vandumbwetu.

²⁰ Shikaho, omu natutala chisoneka chauno mwaka muZuvo yaWangana, twatela kuhunanana havihula vino: Kutala ngunahase kusolola chikuma muchima wachisambo tahi? Ngunahase kukafwa ngachilihi vandumbwetu vali mutumenga? Kutala ngwavumbika vyuma alongesa Kalunga kupandama kuulo tahi? Vyuma muka navingukafwa ngusuuluke navyuma nguli navyo? Uno ngunahase kusolola ngachilihi nge ngwafwelela chikuma Yehova? Nangusolola ngachilihi nge ngwavumbika chikuma vaze vali nakututwaminyina muchikungulwilo? Nge natuzachila havyumevi 6 tunashimutwila, kaha echi chisoneka chauno mwaka kacheshi kupwa chamalengesoko, oloze nachitulumbunukila nakukavangiza mazu aPaulu akwamba ngwenyi: “Zangi yenu yakuzanga vandumbwetu yitwaleho lika.”—WavaHepeleu 13:1.