1, 2. ¿Tleka tlatitlanil Pablo okintlajkuilili hebreos?

ITECH xiuitl 61, akinmej okichiuayaj ken Cristo amo otlajyouiayaj. Tlatitlanil Pablo otsaktoka itech ueyi altepetl Roma, pero okichiaya ma kikixtikan. Uan iyolikni tlen itoka Timoteo, yikin okikixtijkej itech telpiloyan. Okinekiayaj yaskej kinmitatiuij inmikniuan itech altepetl Judea (Hebreos 13:23). Pero amo uelis ijkon kichiuaskiaj. Makuili xiuitl satepan, romanos okiyaualojkej altepetl Jerusalén. Uan Jesús okijto ijkuak romanos kiyaualoskiaj Jerusalén, akinmej okichiuayaj ken Cristo itech Judea uan Jerusalén omonekiaya ma cholokan (Lucas 21:20-24).

² Yopanok 28 xiuitl Jesús okijto ijkon ma kichiuakan. Akinmej okichiuayaj ken Cristo itech Israel sapanoa okintlajyouiltijkej pero amo okikajkej Jehová (Hebreos 10:32-34). Pero kinpanoskia itlaj tlen melauak kiyejyekoskia intlaneltokilis (Mateo 24:20, 21; Hebreos 12:4). Tla okinekiayaj kitlakamatiskej Jesús uan yoltoskej, omonekiaya kipiaskej chikauak intlaneltokilis uan mochijchikauaskiaj miak (xiktlajtolti Hebreos 10:36-39). Ik non, Jehová  okichi tlatitlanil Pablo ma kijkuilo se carta tlen axkan moixmati ken carta tlen okinmijkuilili Hebreos. Non carta okinpaleui ma kixikokan tlen panoskia.

3. ¿Tleka moneki timomachtiskej tlen okinmijkuililijkej hebreos?

³ Axkan tinochtin moneki kuali ma timomachtikan tlen kijtoa amatlajkuilol Hebreos. ¿Tleka? Pampa tinochtin uelis techpanos ken akinmej ochantiayaj Judea. Tejuan noijki tikatej “itech iksemi tonatijmeh”. Miakej yotitlajyouijkej uan otitlaxikojkej (2 Timoteo 3:1, 12). Miakej kuali tikatej uan amo titlajyouiaj. Ijkon ken akinmej tlatitlanil Pablo okintlajkuilili, moneki ma titlachixtokan pampa uits se ueyi ouijkayotl tlen okachi kiyejyekos totlaneltokilis (xiktlajtolti Lucas 21:34-36).

4. (1) ¿Tlen tlaxelol motekitiltis itech xiuitl 2016? (2) ¿Tleka motekitiltis Hebreos 13:1?

⁴ ¿Tlen techpaleuis ma titlachixtokan? Sapanoa techpaleuis tlen ijkuilitok itech Hebreos 13:1. Ompa kijtoa: “Nochipa matimosepantlasojtlakah kemi tiiknimeh”. Nin se tlanauatil tlen tlatitlanil Pablo okinmilui hebreos pampa okachi ma mochikaua intlaneltokilis. Nin tlaxelol motekitiltis itech xiuitl 2016. ¿Tleka? Nin techpaleuis okachi ma mochikaua totlaneltokilis.

5. ¿Tlen kijtosneki “matimosepantlasojtlakah”?

⁵ ¿Tlen kijtosneki “matimosepantlasojtlakah”? Nin tlajtoli kijtosneki tlasojtlalistli tlen tikinpialiaj tokalchanejkauan noso toyolikniuan (Juan 11:36). (Xikita recuadro “¿Tlen kijtosneki?”). Akinmej tikchiuaj ken Cristo amo san tikijtoaj tiiknimej. Tejuan melauak tiiknimej (Mateo 23:8). Tlatitlanil Pablo okijto: “Ximotlasojtlakah non nochteh kemi nonmiknimeh, iwa okachi ximosepantlasojtlakah nomejwah akimeh non kineltokah Cristo” (Romanos 12:10). Ninmej tlajtolmej kiteititiaj moneki sapanoa ma timotlasojtlakan. Tla timotlasojtlaj, timochiuaskej tiyoliknimej uan san sekan tiyetoskej.

6. ¿Akinmej moneki ma tikintlasojtlakan?

⁶ Se ixtlamatki kijtoa, san akinmej kichiuaj ken Cristo okitekitiltijkej itech iamatlajkuiloluan tlajtoli “ximosepantlasojtlakah”. Yiuejkika, judíos okinnotsayaj “nokni” san akinmej inkalchanejkauan noso akinmej okachi kuali inmiuan omouikayaj. Amo keman okinotsayaj “nokni” akin amo judío. Pero akinmej melauak kichiuaj ken Cristo, nochtin akinmej kitekichiuiliaj Jehová kinmitaj ken inmikniuan, maski san kanin chantij (Romanos 10:12). Ik non, tinochtin timotlasojtlaj ken tiiknimej, non tlen Jehová techmachtia (1 Tesalonicenses 4:9). Pero ¿tleka miak ipati ma timotlasojtlakan ken tiiknimej?

7. (1) ¿Tleka moneki timotlasojtlaskej ken tiiknimej? (2) ¿Tlen okse tlamantli kiteititia moneki okachi ma timotlasojtlakan?

⁷ Moneki ma timotlasojtlakan pampa Jehová techiluia ijkon ma tikchiuakan. Amo uelis tiktlasojtlaskej Jehová tla amo tikintlasojtlaj tokniuan (1 Juan 4:7, 20, 21). Moneki ma timotlasojtlakan pampa tikixnamikij ouijkayotl. Ijkuak  tlatitlanil Pablo okintlajkuilili hebreos, okimatiaya miakej omonekiaya choloskej uan kikauaskej miak tlamantli. Jesús yokijtojka yetoskia ouijkayotl (Marcos 13:14-18; Lucas 21:21-23). Achto ajsiskia non tonal, akinmej okichiuayaj ken Cristo omonekiaya okachi motlasojtlaskej (Romanos 12:9).

8. Pampa ayamo peua ueyi tlajyouilistli, ¿tlen moneki ma tikchiuakan?

⁸ Ueyi tlajyouilistli ayakmo uejka kajki (Marcos 13:19; Apocalipsis 7:1-3). Ijkuak peuas moneki tiktlakamatiskej nin tlanauatil: “Noaltepe, xikalaki itech mocuartos tlen katej tlaijtik, uan ximokaltsakua. San seki kauitl ximotlati hasta ma pano ouijkayotl” (Isaías 26:20). “Mocuartos tlen katej tlaijtik” kijtosneki tlanechikolmej. Ompa tikueyichiuaj Jehová inmiuan oksekimej tokniuan. Pero amo san moneki ma timonechikokan sejse semana. Tlatitlanil Pablo okinmilnamikti hebreos omonekiaya moyolchikauaskej pampa motlasojtlaskej uan oksekimej kinchiuiliskej tlen kuali (Hebreos 10:24, 25). Axkan moneki okachi ma timotlasojtlakan, pampa non techpaleuis tikxikoskej ouijkayotl tlen peuas.

9. (1) ¿Tlen tlamantli kichiua ma tikteititikan tikintlasojtlaj tokniuan? (2) Xikijto se neskayotl ken tokniuan okiteititijkej kintlasojtlaj tokniuan kanin tichanti noso itech okse altepetl.

⁹ Pampa ayamo peua ueyi tlajyouilistli, tikpiaj miak tlamantli pampa tikteititiskej tikintlasojtlaj tokniuan. Miakej tokniuan tlajyouiaj pampa tlalolini, tlatemi, chikauak ejeka uan kiaui, noso pampa panoa se tlaxixinilistli. Oksekimej kintlajyouiltiaj pampa tetlapouiaj (Mateo 24:6-9). Uan miakej kixnamikij ouijkayotl pampa miak tlamantli tlen amo kuali panotok (Apocalipsis 6:5, 6). Pampa miak ouijkayotl kipiaj tokniuan, okachi uelis tikteititiskej tikintlasojtlaj. Maski miakej tlaltikpaktlakamej amo kiteititiaj tlasojtlalistli, tejuan moneki ma timotlasojtlakan ken tiiknimej (Mateo 24:12). ^[1] (Xikita nota kanin tlami tlamachtil).

10. ¿Tlen timomachtiskej?

¹⁰ ¿Tlen uelis tikchiuaskej pampa timotlasojtlaskej ken tiiknimej maski tikpiaj ouijkayotl? ¿Uan ken uelis tikteititiskej timotlasojtlaj? Itech Hebreos tlakotonal 13, tlatitlanil Pablo okijto: “Nochipa matimosepantlasojtlakah kemi tiiknimeh”.

11, 12. ¿Tlen kijtosneki kuali tikinseliskej oksekimej? (Xikita tlaixkopinal tlen ika peua tlamachtil).

¹¹ “Nochipa xitekalotikah” (xiktlajtolti Hebreos 13:2). Nin techilnamiktia tlen okichi Abrahán uan Lot. Yejuan okinkalotijkej akinmej amo okinmixmatiayaj uan satepan okimatkej okinkalotijkej ángeles (Génesis 18:2-5; 19:1-3). Tlatitlanil Pablo okinmilui  nin neskayotl ikniuan hebreos pampa kinyoleuas kuali ma kinselikan akinmej amo kinmixmatij.

¹² ¿Ken uelis kuali tikinseliskej oksekimej? Uelis tikinmiluiskej tokniuan ma tlakuatij tochan noso inmiuan timotlapouiskej. Uan ijkuak akin tlayekana itech circuito yetos tonechikol, uelis tikyoleuaskej tochan maski amo kuali tikixmatij (3 Juan 5-8). Amo moneki tikchiuaskej se tlakuali sapanoa oui noso sapanoa patio. Amo tiknekij tikintlajtlachialtiskej tokniuan, tiknekij inmiuan timoyolchikauaskej. Pero amo tikinyoleuaskej san akinmej uelis noijki techyoleuaskej (Lucas 10:42; 14:12-14). Maski amo timajxiliaj, nochipa kuali ma tikinselikan tokniuan.

13, 14. ¿Ken uelis tikinpaleuiskej tokniuan tlen tsaktokej?

¹³ “Xikinmilnamikikah non tsaktokeh” (xiktlajtolti Hebreos 13:3). Ijkuak tlatitlanil Pablo okinmijkuilo ninmej tlajtolmej, omokuayejyekojtoka itech tokniuan tlen otsaktokaj pampa amo okikajkej Jehová. Tlatitlanil Pablo okinmilui kuali tlen okichijkej hebreos pampa “okinmiknomatkeh akimeh otsaktokah” (Hebreos 10:34). Tlatitlanil Pablo otsaktoka Roma pero sekimej tokniuan tlen amo uejka ochantiayaj okipaleuijkej. Oksekimej uejka okatkaj. ¿Ken okipaleuijkej? Okitlatlaujtijkej toTajtsin Dios ma kipaleui (Filipenses 1:12-14; Hebreos 13:18, 19).

¹⁴ Itech ninmej tonalmej, miakej tokniuan noijki tsaktokej pampa amo keman kikauaj Jehová. Tokniuan tlen amo uejka katej kinpaleuiaj. Pero uelis tejuan uejka tikatej. ¿Ken uelis tikinpaleuiskej uan tikteititiskej amo tikinmilkauaj? Tla tikintlasojtlaj ken tokniuan, nochipa timotlatlaujtiskej inpampa. Se neskayotl, uelis timotlatlaujtiskej inpampa tokniuan tlakamej, siuamej uan chokotsitsintin tlen tsaktokej itech altepetl Eritrea, ken Paulos Eyassu, Isaac Mogos uan Negede Teklemariam. Ninmej tokniuan yikipiaj 20 xiuitl tsaktokej.

15. ¿Ken uelis tikteititiskej tiktlakaitaj namiktilistli?

¹⁵ “Nochteh akimeh yomonamiktijkeh moneki mamotlakitakah” (xiktlajtolti Hebreos 13:4). Noijki tikteititiskej titetlasojtlaj tla tiktlakaitaj namiktilistli uan amo tiauilnemiskej (1 Timoteo 5:1, 2). Se neskayotl, tla tiauilnemiskej iuan se tokni tlakatl noso siuatl, tikyolkokoskej ye uan noijki ikalchanejkauan. Uan noijki tokniuan ayakmo totech tlaneltokaskej (1 Tesalonicenses 4:3-8). Noijki ma timokuayejyekokan ken momachiliskia se tokni siuatl tla kimati inamik kita pornografía. ¿Kimachiliskia inamik kitlasojtla  uan kitlakaita inamiktilis? (Mateo 5:28).

16. ¿Ken mouikaj yolpakilistli uan tlasojtlalistli tlen tikinpialiaj tokniuan?

¹⁶ “Xipakikah ika tlan ya nonkipiah” (xiktlajtolti Hebreos 13:5). Tla titlaneltokaj itech Jehová, tiyolpakiskej san ika tlen tikpiaj. Pero ¿ken mouika yolpakilistli iuan tlasojtlalistli? Tla tiyolpakij san ika tlen tikpiaj, okachi tikinpatioitaskej tokniuan uan amo tomin noso okseki tlamantli (1 Timoteo 6:6-8). Amo ma tikijtokan itlaj amo kuali itech tokniuan nion ma tikijtokan amo kuali tikatej. Amo ma tiknekikan tikpiaskej tlen oksekimej kipiaj noso amo ma tiknekikan tikpiaskej okachi miak tlamantli. Okachi kuali, ma tiktemakakan tlen tikpiaj (1 Timoteo 6:17-19).

17. ¿Ken techpaleuia yolchikaualistli amo ma timomojtikan tikinmititiskej tikintlasojtlaj tokniuan?

¹⁷ “Weletis tikijtoskeh ika miak tlaneltokálistli” (xiktlajtolti Hebreos 13:6). Tla titlaneltokaj itech Jehová, tiyetoskej tiyolchikauakej uan amo timomojtiskej ijkuak tikpiaskej ouijkayotl. Techpaleuis pampa tikinpaleuiskej uan tikinyolseuiskej tokniuan. Ijkon tikteititiskej tikintlasojtlaj (1 Tesalonicenses 5:14, 15). Tla titlaneltokaj itech Jehová, tiyetoskej tiyolchikauakej uan amo timomojtiskej ijkuak peuas ueyi tlajyouilistli, pampa tikmatokej ayakmo uejkauas techmakixtis Jehová (Lucas 21:25-28).

18. ¿Tlen techpaleuis okachi ma tikintlasojtlakan tlayekankej?

¹⁸ “Xikinmilnamikikah n tokniwah  tlayakankeh” (xiktlajtolti Hebreos 13:7, 17). Tlayekankej chikauak tekitij pampa kimaluiskej tlanechikol. Ik non, moneki “xikintlakitakah iwa xikintlasojtlakah por n tekitl non kichijtokeh” (1 Tesalonicenses 5:13). Moneki ma timokuayejyekokan tlen kichiuaj pampa techpaleuiskej. Tla ijkon tikchiuaj, tikintlasojkamatiliskej tlen kichiuaj uan okachi tikintlasojtlaskej. Tiknekij ma yolpakikan uan amo tiknekij tikinyolkokoskej ika tlen tikchiuaj. Okachi kuali, tiknekij inmiuan titekitiskej uan tikintlakamatiskej.

19, 20. ¿Tlen techpaleuis okachi ma tikintlasojtlakan tokniuan?

¹⁹ TiiTlaixpantijkauan Jehová techixmatij pampa tinochtin timotlasojtlaj. Itech itonaluan tlatitlanil Pablo ijkon opanoaya. Pero tlatitlanil Pablo okinyole okachi ma motlasojtlakan. Okinmilui: “Okachi mamomiakili nomotlasojtlalis” (1 Tesalonicenses 4:9, 10). ¿Tlen techmachtia? Uelis okachi tikintlasojtlaskej tokniuan.

²⁰ Ik non, ijkuak tikitaskej tlaxelol tlen techyekanas itech nin xiuitl itech kali kanin timonechikoaj, ma timotlajtlanikan: ¿Uelis okachi kuali nikinselis oksekimej? ¿Ken uelis nikinpaleuis nokniuan tlen tsaktokej? ¿Niktlakaita namiktilistli? ¿Niyolpaki san ika tlen nikpia? ¿Tlen nechpaleuis okachi ma nitlaneltoka itech Jehová? ¿Tlen uelis nikchiuas pampa okachi nikintlakamatis tlayekankej? Ma timochijchikauakan tikchiuaskej ninmej chikuase tlamantli uan tlaxelol tlen techyekanas itech nin xiuitl amo yetos san se amatl. Techpaleuis pampa ma tikilnamiktokan tlen okijto tlatitlanil Pablo: “Nochipa matimosepantlasojtlakah kemi tiiknimeh” (Hebreos 13:1).