1, 2. Lande na kakafundɛ Pɔɔlɔ Akristo w’ase Hɛbɛru mukanda?

LO ƆNƆNYI 61, tshumanelo dia l’Isariyɛlɛ diaki lo wɔladi wa lo tshanda mɔtshi tsho. Kaanga mbaki ɔpɔstɔlɔ Pɔɔlɔ lo lokanu la Rɔmɔ, nde akalongamɛka dia kem’edja nde ayotshungɔma. Timɔte, otshindedi ande aki oma la ntshungɔ oma lo lokanu, ndo vɔ ahende wakalongamɛka dia tembola kaamɛ anangɛso wa la Judeya. (Hɛbɛru 13:23) Lo ɛnɔnyi etanu eto, Akristo wa la Judeya, ndo djekoleko wanɛ wakasɛnaka la Jɛrusalɛma wakahombe nsala akambo la shamanya. Lande na? Nɛ dia, Yeso akatate ambeki ande dia etena kayowɛna Jɛrusalɛma ambodingama l’asɔlayi, vɔ kawolawɔ.—Luka 21:20-24.

² Yeso akasha ambeki ande ɔhɛmwɛlɔ ɔsɔ ɛnɔnyi 28 la ntondo. L’etena kɛsɔ, Akristo waki l’Isariyɛlɛ wakatshikala la kɔlamelo koyanga mbaki ɛhɛnyɔhɛnyɔ ndo ehemba efula. (Hɛbɛru 10:32-34) Koko, Pɔɔlɔ akalange talɔngɔsɔdi timba tawɔ dia kɛnɛ kakahombe ndjotomba lo nshi yayaye. Vɔ waki suke la mpomana l’ehemba woleki wolo tshɛ wa mbetawɔ kawɔ. (Mateo 24:20, 21; Hɛbɛru 12:4) Vɔ wakahombe monga l’ekikelo ndo la mbetawɔ lo yɛdikɔ yoleki tshɛ dia vɔ nkitanyiya ɛtɛkɛta wa Yeso wendana l’olawelo, nɛ dia nsɛnɔ yawɔ yakalemanɛka la dui sɔ. (Adia Hɛbɛru 10:36-39.) Ɔnkɔnɛ, Jehowa akakimanyiya  Pɔɔlɔ lo tshimbo ya nyuma kande dia nde mfundɛ anangɛso l’akadiyɛso wa ngandji asɔ. Mukanda akɔ, welamɛ kakianɛ ɔnɛ dibuku dia Hɛbɛru, wakatondjama l’oyango wa mbakeketsha l’ɔtɛ wa kɛnɛ kakahombe ntomba.

3. Lande na kahombaso ndjasha lo awui wa lo dibuku dia Hɛbɛru?

³ Oko weso ekambi wa Nzambi wa nshi nyɛ, sho pombaka ndjasha lo awui wa lo dibuku dia Hɛbɛru. Lande na? Nɛ dia tekɔ lo mpomana l’awui wafɔna la wanɛ wakahomana l’Akristo wa la Judeya. Tekɔ lo nsɛna lo “tena dia paa dia wolo mbikikɛ,” ndo anto efula wekɔ lo mbikikɛ la kɔlamelo ehemba wa wolo efula kana ɛlɔshamelo. (2 Timɔte 3:1, 12) Koko, efula ka l’atei aso tekɔ lo ngɛnangɛna la yema ya wɔladi ndo hatoleke mpomana la ɔlɔshamelo wasembwanɛ l’onto mbala kakɔ ɔtɔi. Ɔnkɔnɛ, l’ɛnyɛlɔ k’Akristo wa lo nshi ya Pɔɔlɔ, tekɔ l’ohomba wa vɔ tɔhɛmɔlaka. Lande na? Kem’edja, tayanga mpomana la ohemba woleki wolo tshɛ wa mbetawɔ kaso!—Adia Luka 21:34-36.

4. Divɛsa diakɔna diambɔsɔnama dia ɔnɔnyi 2016, ndo lande na kele divɛsa sɔ kokaka mɛtɛ?

⁴ Kakɔna kayotokimanyia dia ndjalɔngɔsɔla lo dikambo diayotomba lo nshi yayaye sɔ? Lo dibuku dia Hɛbɛru, Pɔɔlɔ akatɛkɛta akambo efula wayotokimanyia dia sho nkeketsha mbetawɔ kaso. Hɛbɛru 13:1 toholaka dui dimɔtshi di’ohomba. Diɔ tokeketshaka ɔnɛ: “Ngandji kanyu k’onto l’ɔnango katetemale.” Ɔsɔ mbele divɛsa diambɔsɔnama dia monga divɛsa di’ɔnɔnyi 2016.

5. Ngandji k’onto l’ɔnango kɛdikɛdi na?

⁵ Ngandji k’onto l’ɔnango kɛdikɛdi na? Tshɛkɛta ya lo Grɛkɛ k’etatelo yakakambe Pɔɔlɔ la yɔ nembetshiyaka lo ndjela ekadimwelo ka tshɛkɛta lo tshɛkɛta ɔnɛ “ngandji k’otsha le ɔnangɛso.” Ngandji k’onto l’ɔnango ekɔ dimama dia wolo, ngandji kahɛtahɛta oko kɛnɛ kele lam’asa ase nkumbo kana angɛnyi wa ma ma. (Joani 11:36) Sho hatɔsɛmɛ tsho ɔnɛ tekɔ anto l’ɔnango. Koko, tekɔ anto l’ɔnango. (Mateo 23:8) Pɔɔlɔ mbutaka ate: “Nyokane ngandji k’oma k’ɛse otema oko onto l’ɔnango. Lo kɛnɛ kendana la nɛmiyana, nyosha ɛnyɛlɔ.” (Rɔmɔ 12:10) Ɛtɛkɛta ɛsɔ mɛnyaka ngandji ka wolo kele lam’asaso l’anangɛso. Ngandji k’onto l’ɔnango, mbidja ndo ngandji kohikami l’atɔndɔ w’Akristo, kimanyiyaka ekambi wa Nzambi dia vɔ monga angɛnyi wa ma ma lam’asawɔ ndo dia vɔ monga kaamɛ.

6. Ngande washihodia Akristo kitshimudi ya ngandji k’onto l’ɔnango?

⁶ Tshɛkɛta “ngandji k’onto l’ɔnango” ndekaka tanema mbala efula l’ekanda w’Akristo. Le ase Juda wa lo nshi yakete, tshɛkɛta “ɔnangɛso” yakalembetshiyaka mbala efula owotɔ ndo ntena dimɔtshi onto lele keema ose nkumbo. Koko, yɔ kokokaka nembetshiya pondjo onto lele keema ose Juda. Koko, oko weso Akristo wa mɛtɛ, “ɔnangɛso” ekɔ oseka Okristo tshɛ wa mɛtɛ, aha la menda wodja kana ngelo koye ɔnangɛso kana kadiyɛso. (Rɔmɔ 10:12) Jehowa tolakanyaka dia sho mbokana ngandji oko onto l’ɔnango. (1 Tɛsalɔnika 4:9) Ko lande na, kele ekɔ ohomba dia sho ntetemala mbokana ngandji k’onto l’ɔnango?

7. a) Naa ɔkɔkɔ woleki ohomba wɛnyanyaso ngandji k’onto l’ɔnango? b) Sha ɔkɔkɔ okina wele ekɔ ohomba nkeketsha ngandji kaso kele lam’asaso onto l’onto.

⁷ Ɔkɔkɔ woleki ohomba wɛnyanyaso ngandji k’onto l’ɔnango ele nɛ dia Jehowa totɛka dia sho nsala dui sɔ. Sho hatokoke lo  mɛtɛ mboka Jehowa ngandji, naka tekɔ lo ntona mboka anangɛso ngandji. (1 Joani 4:7, 20, 21) Ɔkɔkɔ okina ele, nɛ dia tekɔ onto l’onto l’ohomba wa wonyande, djekoleko lo ntena dia wolo. Etena kakafundɛ Pɔɔlɔ Akristo wa la Hɛbɛru mukanda, nde akeyaka dia kem’edja amɔtshi wakahombe ntshika ngelo la diangɔ diawɔ hita. Yeso akatatshi woho wayonga etena kɛsɔ wolo. (Makɔ 13:14-18; Luka 21:21-23) Ɔnkɔnɛ, la ntondo k’etena kɛsɔ nkoma, Akristo asɔ wakahombe nkeketsha ngandji ka lam’asawɔ.—Rɔmɔ 12:9.

8. Kakɔna kahombaso nsala oma ko kakianɛ la ntondo ka mfɔnu ka woke ntatɛ?

⁸ Mfɔnu koleki woke tshɛ ka l’ɔkɔndɔ w’ana w’anto kekɔ lo ndjaye kem’edja. (Makɔ 13:19; Ɛnyɛlɔ 7:1-3) Tayonga l’ohomba wa nkitanyiya dako diata ɔnɛ: ‘Anto ami le, nyotshu, nyɔtɔ lo mvudu ya l’etei, ndo nyodihe nkuke yanyu. Nyoyashɛ lo tshanda ya tshitshɛ edja ndo nkɛlɛ kambeta.’ (Isaya 26:20) ‘Mvudu ya l’etei’ shɔ mbeyaka nembetshiya tshumanelo diaso. Lɛkɔ mbatɛmɔlaso Jehowa kaamɛ l’anangɛso l’akadiyɛso. Koko, lo dihole dia sanganaka tsho kaamɛ mbala la mbala, ekɔ awui akina wahombaso nsala. Pɔɔlɔ akohola Akristo wa la Hɛbɛru dia vɔ wakahombe tshutshuyana onto l’onto dia mɛnyanya ngandji ndo dia salanɛ akambo w’ɛlɔlɔ. (Hɛbɛru 10:24, 25) Tekɔ l’ohomba wa nkeketsha ngandji kaso k’onto l’ɔnango oma ko kakianɛ, nɛ dia kɛsɔ kayotokimanyiya dia ntetemala mbikikɛ oyadi weho w’ehemba akɔna wayotokoka mpomana la wɔ lo nshi yayaye.

9. a) Waaso akɔna wele laso wa mɛnyanya ngandji k’onto la ɔnango ɛlɔ kɛnɛ? b) Sha bɛnyɛlɔ dia woho wakɛnyanya ekambi waki Jehowa ngandji k’onto l’ɔnango.

⁹ Tekɔ la waaso efula wa mɛnyanya ngandji k’onto l’ɔnango koyanga ɛlɔ kɛnɛ, la ntondo ka mfɔnu ka woke ntatɛ. Anangɛso efula l’atei aso wekɔ lo nsowa l’ɔtɛ wa adidimu wa nkɛtɛ, dola, pɛpɛ ya wolo, tsunami, kana weho ekina wa mpokoso y’oma lo diangɔ diakatongama. Anangɛso akina efula wekɔ lo mbikikɛ ɔlɔshamelo. (Mateo 24:6-9) Ndo wekɔ lo diɛnɛ lushi la lushi l’ekakatanu wendana la ekondjelo oko wasɛnawɔ lo andja wambolola l’awui wa kɔlɔ. (Ɛnyɛlɔ 6:5, 6) Oko wataleke anangɛso mpomana l’ekakatanu efula, mbeso ndo la waaso efula wa nyomoleka mbaɛnya woke woke wa ngandji kawaokaso. Kaanga mbele l’andja ɔnɛ anto hawokana ngandji, sho tekɔ l’ohomba wa ntetemala mɛnyanya ngandji k’onto l’ɔnango. (Mateo 24:12) ^[1]—Enda nɔtɛ ka la koma.

10. Kakɔna kayangaso nsɛdingola kakianɛ?

¹⁰ Kaanga mbeso l’ekakatanu, ngande wakokaso monga la eshikikelo dia tekɔ lo ntetemala mɛnya ngandji kaso k’onto l’ɔnangɔ? Ngande wakokaso mɛnya dia tekɔ la woho wa ngandji ka ngasɔ  otsha le anangɛso? L’ɔkɔngɔ wa nde mbuta ɔnɛ: “Ngandji kanyu k’onto l’ɔnango katetemale,” ɔpɔstɔlɔ Pɔɔlɔ akashile toho efula takoka Akristo nsala dui sɔ. Nyɛsɔ tɔsɛdingole kakianɛ toho tosamalo l’atei atɔ.

11, 12. Alembetshiya nongola angɛndangɛnda? (Enda osato wele lo mbɔtwɛlɔ.)

¹¹ “Tanyohɛke nongolaka angɛndangɛnda.” (Adia Hɛbɛru 13:2.) Kakɔna kalembetshiya etelo k’ɔnɛ “nongolaka angɛndangɛnda”? Lo ndjela ekadimwelo ka tshɛkɛ lo tshɛkɛta, etelo kakakambe Pɔɔlɔ la tɔ nembetshiyaka ɔnɛ “kɛnɛmɔlɛ angɛndangɛnda lɔsɛngɔ.” Ondo etelo kɛsɔ toholaka Abrahama la Lɔta. Apami ahende asɔ wakɛnya lɔsɛngɔ otsha le angɛndangɛnda wakiwɔ kombeyaka. L’ɔkɔngɔ diko, Abrahama la Lɔta wakayeyaka dia angɛndangɛnda asɔ waki mɛtɛ andjelo. (Etatelo 18:2-5; 19:1-3) Bɛnyɛlɔ sɔ diakakeketsha Akristo w’ase Hɛbɛru dia vɔ mɛnyanya ngandji k’onto l’ɔnango lo nongɔnaka.

¹² Ngande wakokaso nongolaka anto akina? Sho koka mbelɛka anangɛso l’akadiyɛso lawakaso dia ndɛ yangɔ kana dia keketshana. Koyanga mbele sho koka ndjaala ko hateye omendji w’otshimbedi la wadɛnde dimɛna efula, sho kokaka mbaelɛ etena kembolawɔ etshumanelo kaso. (3 Joani 5-8) Sho keema la ohomba wa nsala paka dambo dia lɔɔka kana nsala adepasɛ wa lokeema la falanga. Oyango aso ele wa nkeketsha anangɛso, koko aha ɔnɛ kele kawotake ɔnɛ sho mbele la falanga. Ndo hatohombe mbelɛ paka wanɛ wayokoka ndjotokaloyɛ ɔlɔlɔ aso lo yoho mɔtshi. (Luka 10:42; 14:12-14) Kɛnɛ koleki ohomba ele hatokoke mbuta pondjo ɔnɛ akambo wambotoleka efula mbambotohɛ nongola angɛndangɛnda!

13, 14. Ngande wakokaso mbohɔka “wanɛ wele lo nkanu”?

¹³ “Nyohɔke wanɛ wele lo nkanu.” (Adia Hɛbɛru 13:3.) Lam’akafunde Pɔɔlɔ dui sɔ, nde akatɛkɛtaka dikambo dia anangɛso waki lo nkanu l’ɔtɛ wa mbetawɔ kawɔ. Pɔɔlɔ akandola ase etshumanelo nɛ dia vɔ wakoke “wanɛ waki lo lokanu kandji.” (Hɛbɛru 10:34) Anangɛso amɔtshi wakakimanyiya Pɔɔlɔ l’edja k’ɛnɔnyi ɛnɛi lam’akinde lo lokanu, koko akina wakadjasɛka etale. Ngande wakawakokaka nkimanyiya Pɔɔlɔ? Vɔ wakakokaka ntetemala nɔmba efula dikambo diande.—Filipɛ 1:12-14; Hɛbɛru 13:18, 19.

¹⁴ Ɛlɔ kɛnɛ, Ɛmɛnyi efula wekɔ lo nkanu dikambo dia mbetawɔ kawɔ. Anangɛso la akadiyɛso wasɛna suke suke la wɔ mbeyaka mbakimanyiya la diangɔ diewɔ la diɔ ohomba. Koko, efula kaso mangana etale la wanɛ wele lo nkanu. Ngande wakokaso mbakimanyiya ndo wahatakoke mbaohɛ? Ngandji k’onto l’ɔnango kayototshutshuya dia sho nɔmbaka efula lo dikambo diawɔ. Ɛnyɛlɔ, sho kokaka nɔmba dikambo di’anangɛso, di’akadiyɛso, ndo koyanga di’ana w’akɛnda wele lo nkanu lo Érythrée, mbidja ndo anangɛso anɛ: Paulos Eyassu, Isaac Mogos, ndo Negede Teklemariam, wele polo ndo ɛlɔ kɛnɛ lo lokanu ambolekana ɛnɔnyi 20.

15. Ngande wakokaso nɛnya diwala diaso?

¹⁵ “Diwala diɔsamake la kɛnɛmɔ le anto tshɛ.” (Adia Hɛbɛru 13:4.) Sho koka nto mɛnya ngandji kaso k’onto l’ɔnango lo mongaka la lɔkɛwɔ la pudipudi.  (1 Timɔte 5:1, 2) Ɛnyɛlɔ, naka tayasuke la nsala akambo wa mindo wa dieyanelo l’ɔnangɛso kana la kadiyɛso, teye dia tayosalɛ onto ɔsɔ la nkumbo kande kɔlɔ. Wɛkamu wele lam’asaso l’anangɛso wayofukutana. (1 Tɛsalɔnika 4:3-8) Ohokanyiya nto woho wayoyaoka wadi naka nde amboyoshola dia omɛnde mendaka esato wɛnyawɔ anto etakataka. Onde nde kokaka ndjaoka dia omɛnde mbolangaka ndo nɛnyaka diwala diawɔ?—Mateo 5:28.

16. Ngande wele ngɛnangɛna la kɛnɛ kele la so tokimanyiyaka dia sho mɛnyanyanya ngandji kaso k’onto l’ɔnango?

¹⁶ “Nyɔngɛnangɛnake la kɛnɛ kele la nyu.” (Adia Hɛbɛru 13:5.) Ndjaɛkɛ le Jehowa ayotokimanyiya dia sho ngɛnangɛnaka la kɛnɛ kele la so, mbuta ate, mɛna ɔnɛ kɛnɛ kele la so tokokaka. Ngande wakoka dikambo sɔ tokimanyiya dia sho mɛnyanya ngandji kaso k’onto l’ɔnango? Etena kangɛnangɛnaso la kɛnɛ kele la so, tayohɔka dia anangɛso l’akadiyɛso w’Akristo ndeka falanga kana diangɔ nɛmɔ la fwa. (1 Timɔte 6:6-8) Hatototalelalelaka l’ɔtɛ w’akambo wakatosalɛ anangɛso kana di’akambo wele la so lo lɔsɛnɔ. Ndo hatotoka anto akina kandjema kana monga akanga wa lokaki. Lo dihole dia monga ngasɔ, lam’angɛnangɛnaso la kɛnɛ kele la so, tayonga la lokaho.—1 Timɔte 6:17-19.

17. Ngande wele monga “la dihonga di’efula” tokimanyiyaka dia sho mɛnyanya ngandji kaso k’onto l’ɔnango?

¹⁷ “Diakɔ dieso la dihonga di’efula.” (Adia Hɛbɛru 13:6.) Ndjaɛkɛ le Jehowa toshaka dihonga dia mbikikɛ ehemba wa wolo. Dihonga sɔ diayotokimanyiya dia monga l’ekanelo ka yimba k’ɔlɔlɔ. Ndo etena kakanaso yimba ɔlɔlɔ, sho kokaka mɛnya ngandji kaso k’onto l’ɔnango lo nkeketsha ndo lo nsamba anangɛso l’akadiyɛso. (1 Tesalɔnika 5:14, 15) Kaanga lo mfɔnu ka woke, sho koka monga la dihonga teeya shate etshungwelo kaso kaya k’asa ɔhɛmbɛ l’onyɔ.—Luka 21:25-28.

18. Ngande wakokaso keketsha ngandji kaso k’onto l’ɔnango otsha le dikumanyi diaso?

 ¹⁸ “Nyohɔ wanɛ wanyɔlɔmbɔla” (Adia Hɛbɛru 13:7, 17.) Dikumanyi dia l’etshumanelo kaso, mbetshaka wenya awɔ hita lo nkamba wolo lo dikambo diaso. Etena kakanaso yimba lo kɛnɛ tshɛ kasalawɔ, ngandji kaso la lowando laso otsha le wɔ tafulanɛka. Sho hatokombola pondjo dia vɔ nshisha ɔngɛnɔngɛnɔ awɔ kana mbanyangiya l’ɔtɛ wa dui dimɔtshi diasalaso. Lo dihole dia nsala ngasɔ, sho kombolaka mbakitanyiya la lolango tshɛ. Lo nsala ngasɔ, mbayotoleka “mbasha nɛmɔ di’efula [lo ngandji] l’ɔtɛ w’olimu awɔ.”—1 Tɛsalɔnika 5:13.

19, 20. Ngande wakokaso ntetemala mɛnyanya ngandji kaso k’onto l’ɔnango lo yoho yoleki efula?

¹⁹ Ekambi wa Jehowa mbeyamaka oma lo ngandji kawɔ k’onto l’ɔnango. Ngasɔ mbakidiɔ mɛtɛ lo nshi ya Pɔɔlɔ. Koko, Pɔɔlɔ akakeketsha anango dia vɔ mɛnyanya ngandji lo yoho yoleki efula. Nde akate ate: “Nyotetemale nsala ngasɔ lo yɛdikɔ y’efula.” (1 Tɛsalɔnika 4:9, 10) Mbokɛmaka hwe di’ɔnɛ, ekɔ ohomba wa salaka etshikitanu w’amɛna nshi tshɛ!

²⁰ Ɔnkɔnɛ, lam’ayotendaka divɛsa diaso dia l’ɔnɔnyi ɔnɛ l’ehele ka Mbalasa kaso ka Dielelo, katokanake yimba la ambola wayela anɛ: Onde dimi koka nyomoleka nanga nongola angɛndangɛnda? Ngande wakokami nkimanyiya anangɛso wele lo nkanu? Onde dimi nɛmiyaka atɔndɔ waki Nzambi wendana la diwala? Kakɔna kayokimanyiya dia dimi monga l’ɔngɛnɔngɛnɔ wa mɛtɛ? Ngande wakokami nyomoleka ndjaɛkɛ le Jehowa? Ngande wakokami nyomoleka nkitanyiya wanɛ watɔlɔmbɔla? Naka sho nsala la wolo dia ndjalɔngɔsɔla lo toho tosamalo tɔsɔ, kete divɛsa dia l’ɔnɔnyi hadiotoonga oko djembetelo tsho l’ehele, koko diayotoholaka dia sho kitanyiyaka ɛtɛkɛta wa Pɔɔlɔ wata ɔnɛ: “Ngandji kanyu k’onto l’ɔnango katetemale.”—Hɛbɛru 13:1.