1-3. Mambe mam ma bi yilha ngwa Pentékôt hilo hi tôbôtôbô? Lelaa mam ma bi tagbe i kel i, ma bi yônôs yom Bitilna bi bôk pot? (Béñge titii i bibôdle bi yigil.)

HALA a bé bikegla bi kel sonde i Yérusalem. I kel i, i bé tôbôtôbô, i bak ki kel maséé kiyaga. Bôt ba bé séé ngand i ngwa Pentékôt. I ngand i, i bé ngand inyu Yéhôva, i bak i bibôdlene bi libumbul li blé. I kegla i, i témpel, prisi keñi i bé ti bisesema bi hiki kel. I mam ma ngeñ bôô, a bé a sem séñha bikoga biba, bi ba bi boñ ni libumbul li bisu li blé, tole matam ma bisu. Prisi keñi i bé i ndéñgés bikoga i bisu bi Yéhôva. Hala a bé ngwa Pentékôt i ñwii 33.​—Lôk Lévi 23:15-20.

² Hala a yé ñwii ndi ñwii le, prisi keñi i ndéñgés bikoga i bisu bi Yéhôva hiki ñwii. Likébla li, li nlôôha bana maada ni jam li tôbôtôbô, li li bi bôña i ngwa Pentékôt i ñwii 33. Ngéda 120 banigil ba Yésu, i bé soohe ntôñ, i tuñ i ngii nyoo i tison i Yérusalem, ha nyen jam li li bi bôña. (Minson mi baôma 1:13-15) Mpôdôl Yôel a bi bôk pot mu jam li mbôgôl ñwii juem, ilole jam lini li mbôña. (Yôel 2:28-32; Minson mi baôma 2:16-21) Limbe jam li li nlôôha ba mahee li bi bôña?

 ³ Añ kaat Minson mi baôma 2:2-4. I ngwa Pentékôt i ñwii 33, Djob a bi ti bi bikristen mbuu mpubi, ni bo ba yila minhook. (Minson mi baôma 1:8) I mbus, bôt ba bi bôdôl bañ kéña bo, banigil ba kahal pot bihélha bi mam ba bi tip tehe ni nok. Ñôma Pétrô a bi toñol jam li ntip tagbe, ni inyuki li bé nseñ. I mbus, a kal limut le: “Hiela miñem, ni sôblana hi wada nan i jôl li Yésu Kristô inyu nwéhél bibéba binan; ndi n’a kôs likébla li mbuu mpubi.” I kel i, bebee le 3 000 di bôt di kôs sôble, yak bo ki ba kôs mbuu mpubi.​—Minson mi baôma 2:37, 38, 41.

4. (a) Inyuki jam li bi tagbe i ngwa Pentékôt li nlama ba bés nseñ? (b) Limbe jam lipe li bé lama tagbe i nlélém kel, ngandak ñwii i mbus? (Béñge bibuk i mamélél ma yigil.)

⁴ Prisi keñi ni sesema yé ba bé yimbne i kii? Prisi keñi i bé yimbne i Yésu. Bikoga bi bé yimbne i banigil ba Yésu, ba ba bé minhook. Banigil ba, ba bi pohlana ikété bikwéha bi bôt, ba nséblana ki le “matam ma bisu.” (Yakôbô 1:18) Djob a bi neebe le ba ba bon bé, a pohol ki bo le ba ba bikiñe ni Yésu i Ane Djob i ngii. (1 Pétrô 2:9) Yéhôva a ga gwélél Ane yé inyu sayap bôt ba manôgla bobasôna. Jon, too liyééne jés l’a ba ni Yésu i ngii, tole l’a ba ikété paradis hana isi, ngwa Pentékôt i ñwii 33 i yé bés nseñ kiyaga. [1] ​—Béñge bibuk i mamélél ma yigil.

5. Kii nyis bés le minhook nwominsôna mi nyila bé minhook ni nlélém njel?

⁵ Banigil ba bé i tuñ i ngii, ba ga hôya bé kel i. Hiki wada wap a bééna yom i bé pôôna hié i ngii ño. Yéhôva a bi ti bo ngap i pot dilémb dipe. Ba bééna bé pééna yo ki yo le ba yé nhook ni mbuu mpubi. (Minson mi baôma 2:6-12) Ndi manyaga ma, ma mbôñna bé bikristen gwobisôna bi bi nyila minhook. Kii héga, Bibel i nkal bé le yom i mpôôna hié, i bé i ngii miño mi dikôô di bôt di di bi yik yila minhook ha Yérusalem, i nlélém kel. Ba bi yila minhook ngéda ba bi kôs sôble. (Minson mi baôma 2:38) Ndi, bikristen gwobisôna bé gwon bi nyila minhook ngéda bi nkôs sôble. Bôt ba Samaria ba bi yila minhook ndék ngéda mbus sôble yap. (Minson mi baôma 8:14-17) Jam li tôbôtôbô li yé ki le, Kornéliô ni bôt ba ndap yé, ba bi yila minhook iloo yaga le ba nkôs sôble.​—Minson mi baôma 10:44-48.

6. Kii minhook nwominsôna mi nkôs, ni lelaa hala a ntihba bo?

⁶ Ntiik, bikristen bi nléba le bi yé minhook ni manjel nya di nya. Bebeg le bape ba nyi hala i nlélém ngéda Yéhôva a nyilha bo minhook. Bape ba nyi hala mbus ndék ngéda. Ndi, ñôma Paul a bi toñol jam li ntagbene hiki wada wap. A bi kal le: ‘Lakii ni bi hémle ki, wee ni bi bénda ni mbuu mpubi u likak, u u yé ban bum yés.’ (Efésô 1:13, 14) Jon, Yéhôva a ngwélél mbuu mpubi wé inyu yis bikristen ngi pééna yo ki yo, le a mpohol bo inyu ke i ngii. Ni njel i nyen mbuu mpubi u ‘nti bo ban i bisu bi ngéda,’ tole u nkwés bo nkaa le, i dilo di nlo, ba ga niñ i boga ni boga i ngii, he hana isi bé.​—Añ 2 Korintô 1:21, 22; 5:5.

7. Kii hiki nhook kristen u nlama boñ inyu kôhna nsaa wé i ngii?

⁷ Ngéda Kristen i nyila nhook, baa hala nkobla le a mal kôhna nsaa wé? Heni. A yé nkwoog nkaa le a nséblana inyu ke i niñ i ngii. Ndi, a ga kôhna ndik nsaa wé ibale a ntéñbe i gwélél Yéhôva. Ñôma Pétrô a bi toñol jam li lana le:  ‘Jon, a lôktata, nyamndana yaga iloo hala, le ni ôm makôô isi siñ siñ ikété nsébla ni téba nan. Ngo ibale ni mboñ hala [ibabé waa], n’a baage bé kekikel. Inyu hala nyen lijubul li Ane boga i Nwet wés ni Ntohol le Yésu Kristô l’a ba ni masoda ngandak inyu nan.’ (2 Pétrô 1:10, 11) Jon, hiki nhook kristen, u nlama bé nwas le jam jo ki jo li nkéñ nye njel i gwélél Yéhôva. To hala kii ba bi naña nye, tole ba bi sébél nye inyu ke i ngii, ibale a ntéñbe bé i gwélél Yéhôva, a ga kôhna bé nsaa wé.​—Lôk Héber 3:1; Masoola 2:10.

8, 9. (a) Inyuki i yéne libim li bôt ndutu i nok yom i ntagbene mut ngéda a nyila nhook? (b) Lelaa mut a nyi le a nséblana inyu ke niñ i ngii?

⁸ Libim li bagwélél ba Djob i len ini, li nla léba hala ndutu i nok yom i ntagbene mut, ngéda Djob a nyilha nye nhook. Hala a ta bé hélha jam, inyule ba ta bé minhook. Djob a bi heg bôt ba binam inyu niñ i boga ni boga hana isi, ha i ngii bé. (Bibôdle 1:28; Tjémbi 37:29) Ndi, Yéhôva a mpohol ngim bôt le ba ba bikiñe ni biprisi i ngii. Jon, ngéda Djob a nyilha bo minhook, botñem yap i nhéñha. Ba nhéñha ki litehge jap li mam, kayéle ba mbem ndigi niñ i ngii.​—Añ Efésô 1:18.

⁹ Ndi baa lelaa mut a nyi le a nséblana inyu ke niñ i ngii? Béñge yom ñôma Paul a bi kal lôk kéé i i bé minhook i tison i Rôma, ba bak ki “baséblaga i ba bapubhaga.” A bi kal bo le: “Ni bi kôs bé mbuu u ba minkol le ni tiimba kon woñi; ndi ni bi kôs mbuu u ngwalakbel, mu nyen di nlôndôl le: “A Abba, Tata!” Mbuu womede u mbok nlélém mbôgi kiki mimbuu nwés le di yé bon ba Nyambe.” (Rôma 1:7; 8:15, 16) Ni njel mbuu mpubi wé, Yéhôva a ntibil yis mut ngi pééna yo ki yo le a nséblana inyu ane kiki kiñe i ngii ni Yésu.​—1 Tésalônika 2:12.

10. Kii kaat 1 Yôhanes 2:27 i nkobla ngéda i nkal le nhook kristen u gwé bé le mut numpe a niiga nye?

¹⁰ Bôt ba nkôhna nsébla u Djob ba gwé bé le mut numpe a kal bo le ba yé minhook. Yéhôva nyemede a ntibil yaga yis bo jam li. Ñôma Yôhanes a nkal bikristen bi bi yé minhook le: “Bé ni gwé nhoop u nlôl yak Numpubi, bé bobasôna ki ni gwé yi.” A nkal ki le: “Ndi nhoop bé ni kôs nyeni u yii ikété nan, ndi i nsômbla ha bé ki ni bé le mut a niiga bé; ndi kikii nhoop wé u yé u niiga bé inyu mam momasôna, womede u yé ki hodo, u ta bé bitembee, wee yéna ni ikété yé kingéda maéba u ti bé.” (1 Yôhanes 2:20, 27) Minhook mi bikristen mi gwé ngôñ le Yéhôva a niiga bo kiki bôt bobasôna. Ndi mi gwé bé le mi bem le mut numpe a kémhe le mi yé toi minhook. Yéhôva a mal gwélél ngui yé, i i nlee ini ngui ipe yosôna, hala wee mbuu mpubi wé, inyu yis bo ibabé pééna le ba yé minhook!

11, 12. Kii kristen i i nyila nhook i nla badba, ndi imbe pééna a gwé bé kekikel?

¹¹ Ngéda bikristen bi nyila minhook ni mbuu mpubi, ba nhéñha ngandak. Ni mbale, Yésu a bi kal le ba “ngwéé yondo,” tole “ligwéé jap li nlôl i ngii.” (Yôhanes 3:3, 5, MN) I mbus, Yésu a bi toñol le: “U hel bañ lakii me nkal we le: Ni nlama gwéé yondo. Mbebi i nhôñ homa i ngwés, u nok yo mbimba, ndi u nyi bé het i nlôl, to het i nke; hala ki nyen i yé ni hi mut a ngwééne mbuu.” (Yôhanes 3:7, 8) Ntiik, nhook to wada u nla bé tibil toñlene mut numpe nu a ta  bé nhook, lelaa u bi nôgda ngéda u bi yila nhook. [2]​—Béñge bibuk i mamélél ma yigil.

¹² Mut nu a nyila nhook a nla badba le, ‘Inyuki Yéhôva a mpohol ndik me, ha mut numpe bé?’ A nla yak badba too a kôli toi kôhna nson nkeñi u. Ndi a mpééna bé le Yéhôva a mal pohol nye. A nlôôha ba maséé, a tinak ki mayéga inyu likébla li. Minhook mi gwé minlélém mi mahoñol kiki ñôma Pétrô ngéda a bi kal le: “Lipém li ba ni Nyambe, Isañ Nwet wés Yésu Kristô, nu a bi gwal bés yondo ni ngui bitugne bi Yésu Kristô ikété bawoga inyu botñem i yômi, kingéda ngandak yé konangoo, le di kôs ngababum i nla bé ôbi, ni i i nla bé nyogba mahindi to héñha, yon i yé bé mbiiak nyoo ngii.” (1 Pétrô 1:3, 4) Ngéda minhook mi ñañ bibañga bini, mi nyi ibabé pééna le, Isañ wap a yé yaga i pôdôs bo.

13. Lelaa mahoñol ma mut ma nhéñha ngéda a nyila nhook ni mbuu mpubi, ni kii nlona mahéñha ma?

¹³ Ilole Yéhôva a nsébél bini bikristen i ke niñ i ngii, ba bééna botñem i niñ i boga ni boga hana isi. Ba bé bem ngéda Yéhôva a ga yilha hisi paradis, a mélés ki béba yosôna. Bebeg le ba bé hoñol kiki ba ga leege mut wap lihaa tole liwanda jap, li li bi wo. Ba bé bem ki ngéda ba ga oñ ndap yap, ba yénék ki mu, ni lelaa ba ga bel bibebela, ba jek ki matam map. (Yésaya 65:21-23) Ndi inyuki ba bi bôdôl bana mahoñol mape? Baa ba bi héñha mahoñol map inyule ba bééna nduña keñi, tole inyule ba bé nok ngandak ndutu? Baa ba bi kit ndik kunda yada le niñ i boga ni boga hana isi i ga lémél bé bo, ni le ba ga ba bé maséé i niñ hana isi? Tole ba bééna ndik ngôñ i tehe lelaa niñ i nla ba i ngii? Heni. Ndi, Djob nyemede nyen a bi kit hala inyu yap. Ngéda a bi sébél bo, a bi gwélél mbuu wé mpubi inyu héñha litehge jap li mam, ni nsaa ba bé bem.

14. Lelaa minhook mi ntehe niñ yap hana isi?

¹⁴ Ndi baa hala a nkobla le minhook mi nyéñ wo? Ñôma Paul a bi toñol lelaa minhook mi nôgda. A bi kal le manyuu map ma bôt ba binam ma yé kiki “ndap libadô” ngéda a bi toñol le: “Inyule bés ba di yéne munu lap ini, di ñumnde, lakii di bééga mbegee i ñét; ha lana bé le di nsômbôl engla, ndigi le di énga, le ndi niñ i mil nyuu i nwo tjwat.” (2 Korintô 5:4) Bini bikristen bi nsômbôl bé wo. Ba yé maséé i ba i niñ, ba nyéñ ki gwélél Yéhôva ni bégés nye ni mahaa map, yak ni mawanda map, hiki kel ni kel. Ndi to ibale ba mboñ kii, ba mbigda jam Yéhôva a bi bôn bo inyu dilo di nlo.​—1 Korintô 15:53; 2 Pétrô 1:4; 1 Yôhanes 3:2, 3; Masoola 20:6.

15. Mambe mam ma ñunda bé le mut a yé nhook ni mbuu mpubi?

¹⁵ Bebeg le u mbadba too Yéhôva a nsébél we inyu ke niñ i ngii. Ibale u nhoñol le a nsébél we, tibil badba mana mambadga ma yé nseñ: Baa u nôgda le u gwé makénd ma tôbôtôbô inyu nson u añal ñañ nlam? Baa u yé toi maséé i nigil Bibel ni i yi ‘ndip mam ma Nyambe’? (1 Korintô 2:10) Baa u nôgda le Yéhôva a nsayap nson woñ u likalô i nya i mbuma ñañ? Baa u gwé ngôñ i boñ sômbôl Yéhôva iloo jam lipe jo ki jo? Baa u gwé soso gwéha inyu bôt bape, u nôgdaga ki le u gwé mbegee keñi i hôla bo i gwélél Yéhôva? Baa u ntehe mam ma nkwés we nkaa le Yéhôva a nhôla we ikété ngandak manjel ma tôbôtôbô mu niñ yoñ? Ibale u ntimbhe le “ñ” munu mambadga mana momasôna, baa wee hala a nkobla le u nkôhna nsébla i ke i ngii? Heni! Inyuki  di nkal hala? Inyule bagwélél ba Djob bobasôna ba nla bana minlélém mi mahoñol, to ba yé minhook tole to. Ni le, ni njel mbuu mpubi wé, Yéhôva a nla ti to numbe ngwélél wé, nlélém ngui ibabé béñge ntén nsaa a ga bana. I pot maliga, ibale u mbadba le too w’a ke i ngii, wee hala a nkobla le, u nkôhna bé nsébla. Bôt Yéhôva a mpohol ba mbadba bé hala! Ba nyi yaga le ba nséblana!

16. Kii nyis bés le ba bobasôna ba bi kôhna mbuu Djob, ba bi kôhna bé nsébla i ke niñ i ngii?

¹⁶ Ikété Bibel di nléba ngandak ndémbél i bôt ba telepsép ba ba bi kôhna mbuu mpubi u Yéhôva, ndi ba bi ke bé ngii. Hihéga hiada hi yé Yôhanes Nsôble. Yésu a bi kal le mut numpe a bé loo bé Yôhanes, ndi a kal ki le Yôhanes a ga ane bé kiki kiñe i ngii. (Matéô 11:10, 11) Mbuu mpubi ki won u bé éga David. (1 Samuel 16:13) Mbuu mpubi u bi hôla nye i nok ndip mam i Djob, u éga ki nye mu kii a bé tila bipes bi Bibel. (Markô 12:36) Ndi to hala, ñôma Pétrô a bi kal le ‘David a bi bet bé ngii.’ (Minson mi baôma 2:34) Yéhôva a bi gwélél mbuu wé mpubi inyu ti bôt bana ngui i boñ bihélha bi mam, ndi a bi gwélél bé yo inyu sébél bo i ke niñ i ngii. Baa hala a nkobla le ba bééna bé telepsép i yôni, tole ba kôli bé i ane i ngii? Heni. Hala a nsômbôl ndik kal le Yéhôva a ga tugul bo inyu niñ ikété Paradis hana isi.​—Yôhanes 5:28, 29; Minson mi baôma 24:15.

17, 18. (a) Umbe nsaa libim li bagwélél ba Djob i len ini li mbem? (b) Mambe mambadga di ga wan mu yigil i noñ?

¹⁷ Libim li bagwélél ba Yéhôva ba len ini ba ga ke bé ngii. Kiki Abraham, David, Yôhanes Nsôble, ni ngandak bape, bôlôm ni bôda ba ngéda Bibel i bi tilbana, ba mbem niñ hana isi, ngéda Ane Djob i ga ane ngii yap. (Lôk Héber 11:10) Ba ba ga ane ni Yésu i ngii, ba yé 144 000 bôt. Ndi, minhook mi mi ngi yii munu hisi i lisuk li ngéda, Bibel i nsébél bo le “minyégla.” (Masoola 12:17) Jon, libim li 144 000 bôt li bi mal wo, li yé i len ini i ngii.

¹⁸ Ndi ibale mut a nkal le a yé nhook, lelaa bet ba gwé botñem i niñ hana isi ba nlama tehe jam li? Ibale mut mu likoda joñ a mbôdôl je koga, a nyok ki wai ngéda Bilôp bi Nwet, lelaa u nlama yoñ nye? Ibale nsoñgi u bôt ba nkal le ba yé minhook u mbet ndigi bet ni bet, baa u nlama tôñ inyu hala? Di ga timbhe mambadga mana i yigil i noñ.