1-3. a) Ka meha uagu weiri lubéi espechali lan pentekosutesi le lánina irumu 33? b) Ka meha profesía agunfulirubei weyu ligía? (Ariha humóun iyawaü to lídanboun lagumeseha arütíkulu).

ABAN weyu dimaasu binaafin lidan irumu 33 Herusalén, aban meha weyu espechaliti weyu ligía, ladüga ligía meha lefeduhóun Pentekosutesi. Aban meha fedu le efeduhóubei sagü irumu lidan lagumeserun talubahóun türigu. Binaafin ligía ténpulurugu, aba ladagaragüdüni fádiri le íñutimabei sákürifisiu le hadügübei súnwandan. Lárigiñe, kéiburi ladáün 9 binaafin, aba ladagaragüdünu bián fein to hadügüboun lau “furumiñeti lin” türigu le alubahóubei lidan irumu. Lun larufudunu fein tuguya ligibugiñe Heowá, aba meha layudeihanu fein tuguya (Fádirigu 23:15-20).

² Barühaña meha gürigia saragu irumu adagaragüda bián fein lun Heowá sagü irumu. Le linarün katei, úarati meha katei le luma somu katei súdiniti le lunbei meha lasuseredun ámuñegü. Susereti katei le lidan Pentekosutesi lidan irumu 33 lidan aban rumu Herusalén ñein habéi meha 120 hádangiñe lánigu Hesusu disipulu afurieida (Adügaü 1:13-15). Le asuseredubei  ñein adügati lun lagunfulirun aban katei le lariñagubei profeta Hoeli 800 irumu lubaragiñe dan ligía (Hoeli 2:28-32; Adügaü 2:16-21). Kati asuseredubei?

³ (Aliiha huméi Adügaü 2:2-4). Lidan Pentekosutesi lidan irumu 33, yusu lumuti Bungiu lani sífiri sandu lun lanúadirun 120 lánigu Hesusu disipulu (Adügaü 1:8) (ariha huméi rekuáduru “Ka mini lubéi?”). Weyuméme ligía aba hagumeserun saragu gürigia achülüra ñeinhin habéi disipulugu, ani aba hagumeserun disipulugu ayanuha houn luagu lubuidun katei le harihibei luma le haganbubei. Aba lafuranguagüdüni apostolu Féduru houn gürigia hagía ka lan asuseredubei luma ka lan uagu súdini lubéi. Lárigiñe aba lariñagun houn: “Asaküriha humá, badisei huguyame kada aban lidan liri Hesukrístu, ferudunawa láamuga hifigoun, ru láamugei Bungiu [s]ífiri [s]andu hun”. Weyu ligía badiseitiña kéiburi 3,000 gürigia ani resibi hamuti giñe sífiri sandu (Adügaü 2:37, 38, 41).

4. a) Ka uagu lunti lubéi wetenirun lun le meha asuseredubei lidan Pentekosutesi lánina irumu 33? b) Ka amu katei háfuga asuseredubei weyuméme ligía saragu irumu lubaragiñe? (Ariha huméi abürüdǘni lidan lagumuha arütíkulu).

⁴ Ka meha mini lubéi fádiri íñutimati tuma bián fein to adagarawagüdüboun lidan Pentekosutesi? Hesusu mini lubéi fádiri íñutimati. Ánhounti bián fein mini tan lani Hesusu disipulugu ha anúadiruañabaña. Haganaguagiñe gürigia gafigountiña hasagarúa. Ariñagatu Bíbülia ítara haña lan kei “furumiñeti alubahani” (Santiagu 1:18). Ánhaali Bungiu houn keisi lirahüñü, ani anúadira laaña lun harúeihan luma Hesusu lidan Larúeihan sielu (1 Féduru 2:9). Layusurubei Heowá arúeihani le lun líchugun saragu katei buiti houn ha gaganbadibaña lun. Ligíati, anhein wawinwandun lubéi lidan Paraísu ubouagu wemenigibei o sielu luma Hesusu, súngubei wagía mosu gunfuranda wamani le meha asuseredubei lidan Pentekosutesi lidan irumu 33 ^[1] (ariha huméi abürüdǘni lidan lagumuha arütíkulu).

5. Ida liña wasubudiruni mama lan súnwandan lasuseredun katei wéiriguti dan le lanuadirún aban kristiánu lau sífiri sandu?

⁵ Chouru hamuti meha 120 disipulugu ha Herusalénbaña luagu anúadira lániña Bungiu lau sífiri sandu lidan weyu mabulieidúwaditi ligía. Súngubei hagía arihúati meha aban katei hábulugu lenege ligemeri watu. Ani gayarati meha hayanuhan lidan ámuñegueinarügü iñeñein (Adügaü 2:6-12). Gama lumoun, masuseredunti katei le sagü lanúadirun Bungiu aban gürigia lau sífiri sandu. Ida liña wasubudiruni? Kei hénpulu, weyuméme ligía anúadirati meha Bungiu saragu milu gürigia, gama lumoun mariñaguntu Bíbülia anihein lan meha ligemeri watu lóugiñe hachügü. Anúadira lumutiña Bungiu gürigia hagía lau sífiri sandu dan le habadiseirunbei (Adügaü 2:38). Gama lumoun, manúadirun lumutiña sun kristiánugu dan le habadiseirun. Anúadira lumutiña meha kristiánugu samariana fiú dan lárigiñe habadiseirun (Adügaü 8:14-17). Ánheinti Korunéliu hau sun tílana luban anúadiruatiña lubaragiñe habadiseirun (Adügaü 10:44-48).

6. a) Ka heresibirubei sun kristiánugu anuadirúaaña? b) Ka lánibei sífiri sandu efekütu hawagu kristiánugu anuadirúaaña?

⁶ Añahein kristiánugu fureseti híchugun fe luagu anúadira laaña lan Bungiu. Añahein amu murusun murusun híchiga fe. Gama lumoun, meberesenga ka lan dan híchiga fe luagu anuadirúaaña lan, anihein aban katei  le heresibirubei sun hagía. Afuranguagüda lumuti apostolu Pábulu: “Aba hafiñerun, máküwatün lau liseinin [s]ífiri [s]andu le füramasewabei. Sífiri [s]andu ligía achoururubalin woun luagu weresibirubei lan alagan le lunbei líchuguni Bungiu” (Éfesuna 1:13, 14). Ligíati, ru lumuti Heowá lani sífiri sandu houn sun kristiánugu anuadirúaaña. Ka lánibei katei le efekütu lidan habagari? Adügati lun chóurutima lan hasandiragun houngua luagu anuadirúaaña lan lun houdin sielun. Ligía lariñagunbei Pábulu ‘chóurugüda lani sífiri sandu houn’ luagu hawinwanduba lan sielu, mama ya ubouagu (aliiha huméi 2 Korintuna 1:21, 22; 5:5).

7. Ka lunbei ladügüni kada kristiánu anuadirúaali lun lidin sielun?

⁷ Dan le lanúadirun Bungiu aban kristiánu lau sífiri sandu, mini lan san le chóuruhali lan lídinba lan sielun? Uá. Le chóurubei luagu amisuraha laali lan Bungiu lun lidin sielun. Gama lumoun, ariñagati Féduru: “Ligía lubeiti niduheñu; áfaagua humá lun hederebuguduntima lau achoururuni luagu Bungiu lan agúarubalün ani anúadiralaün; anhein hadüga ítara, mábürühandügübadün. Ítara luba ua lan ni kata ásiñaragüdüti hebelurun lidoun larúeihan Wabureme Wasalbaragüle Hesukrístu, le magumuchadibei” (2 Féduru 1:10, 11). Ligíati, kada kristiánu anuadirúaali lunti láfaagun lun úaragua lan lun Heowá. Amisuraha laali Bungiu lun lidin sielun, gama lumoun lídinba ánheingubeirügü machararun lun Heowá (Ebüréu 3:1; Arufudúni 2:10).

8, 9. a) Ka uagu hénrengu lubéi houn besafu lubúeingu Bungiu gunfuranda hamani ka lan asuseredubei lun aban kristiánu dan le lanúadiruni Heowá lau sífiri sandu? b) Ida liña lasubudiruni aban kristiánu anuadirúaali lan lun lidin sielun?

⁸ Uguñe weyu, hénrenguti houn hiibe-agei lubúeingu Bungiu gunfuranda hamani ka lan asuseredubei lun aban kristiánu dan le lanúadiruni Heowá lau sífiri sandu. Ani úati gunfuranda hamani ladüga manúadirun lumutiña Bungiu kristiánugu ha lun hawinwandun sielu. Adüga lumutiña Heowá gürigia lun hawinwandun ya ubouagu, mama sielu (Agumesehani 1:28; Sálumu 37:29). Gama lumoun, anúadahaali Heowá fiú kristiánugu lun houdin sielun lun urúeigu hamá fádirigu hagíame. Dan le lanúadiruniña Bungiu lau sífiri sandu, aba lasansirun ligaburi hasaminan. Lúmagiñe oura ligía, aba hemenigi hamá hawinwandun sielu (aliiha huméi Éfesuna 1:18).

⁹ Ida liñati lasubudiruni aban kristiánu anuadirúaali lan? Samina humá luagun le lariñagubei Pábulu houn kristiánugu anuadirúaaña ha Rómabaña ha meha únbaña laguarúa ‘lumutuniña Bungiu’. Ariñagati houn: “Sífiri [s]andu le heresibirubei, mama aban sífiri lánina idamuni lunya hanufudedun; [s]ífiri le heresibirubei, ligía le adügübalün lun lirahüñü humá Bungiu. Ligía gayara lubéi wagúaruni Bungiu Baba: Gefenti lani Bungiu [s]ífiri woun luagu lirahüñühadiwa lan Bungiu” (Rómana 1:7; 8:15, 16). Kei aubei warihei, yusu lumuti Bungiu lani sífiri sandu lun hachoururuni kristiánugu anuadirúaaña  luagu harúeihaba lan luma Hesusu sielu (1 Tesalónikana 2:12).

10. Ka mini lubéi 1 Huan 2:27 dan le lariñagun memegeirun hamá kristiánugu anuadirúaaña larufudahóun houn?

¹⁰ Kristiánugu ha anuadirúaaña lun houdin sielun memegeiruntiña lun lariñawagún houn anúadira laaña lan Bungiu lau sífiri sandu. Adügati Heowá lun hasubudiruni luagu anuadirúaaña lan. Ariñagati apostolu Huan houn kristiánugu anuadirúaaña: “Ánheinti huguya, ru laali [Bungiu] [s]ífiri [s]andu hun, ani subuditi sun katei hun”. Ariñagati giñe houn: “Ánheinti huguya, anihein [s]ífiri [s]andu [...] huma; memegeiruntün lubeiti amu lun larufudahan hun” (1 Huan 2:20, 27). Sun lubúeingu Heowá megei wamuti larufudahan, íbini kristiánugu anuadirúaaña. Gama lumoun, memegeiruntiña kristiánugu anuadirúaaña lariñawagún houn anúadira laaña lan Bungiu. Yusu lumuti Heowá lani sífiri sandu, erei le héretimabei, lun lachoururuni katei le houn.

11, 12. a) Ka burí álügüdahani gayarabei ladügüni aban kristiánu anuadirúaali lúniwagua? b) Ka ichouruni hasandirubei kristiánugu anuadirúaaña?

¹¹ Dan le heresibiruni kristiánugu amisurahani lun houdin sielun, sánsitiña saragu. Ligía lariñagunbei Hesusu aba lan nasiruaya hamá (Huan 3:3, 5). Lárigiñe, aba lariñagun: “Lunti [...] hágurahouniwa sun gürigia. Ítara kei láfurun garabali le ñéingiñe lumuti labusenra, aganbabéi lamuri, ani ibidiñeti bun halíagiñe lan liabin ni halíñoun lan lidin, ítara haña giñe sun ha águrahoubaña lídangiñe [s]ífiri [s]andu” (Huan 3:7, 8). Kei aubei warihei, siñati wafuranguagüdüni ka lan lasandirubei aban kristiánu anuadirúaali lun aban gürigia le mama kristiánu anuadirúaali ^[2] (ariha huméi abürüdǘni lidan lagumuha arütíkulu).

¹² Háfuga álügüdaguati aban kristiánu anuadirúaali lungua ka lan uagu lanúadirei Heowá, lubaragiñe hamuga lanúadirun amu. Háfuga nidiheri lan luagu anhein gayarabei lubéi lagunfulirun lau buligasion le. Gama lumoun, chouru lumuti anúadira laali lan Heowá lun lawinwandun sielu. Ligía gunda lubéi ani ligía líchugunbei seremei lun Bungiu. Sandiguatiña kristiánugu anuadirúaaña houngua kei apostolu Féduru dan le lariñagun: “Ru wamá uéiriguni lun Bungiu, le Lúguchibei Wabureme Hesukrístu, luagu lueirin lugudemehabu woun. Rúhali iseri ibagari woun lau lásaaragüdüni Kristu lídangiñe óunweni. Ligía buin tiña lubéi wanigi lau aban emenigini wínwanti, ani ladügüba lun wabihibei lan alagan le aranse láalibei wabá sielu” (1 Féduru 1:3, 4). Dan le haliihani kristiánugu anuadirúaaña dimurei burí le, chouru hamuti layanuhaña lan Heowá houn.

13. a) Dan le lanúadirun Bungiu aban kristiánu lau lani sífiri sandu, ida liña lasansirun ligaburi lisaminan? b) Ka uagu lasansira lisaminan aban kristiánu le anuadirúaali?

¹³ Kei aubei warihei, dan le lanúadirun Bungiu aban kristiánu lau sífiri sandu, aba lasansirun ligaburi lasaminarun kristiánu ligía. Ida? Lubaragiñe lanuadirún lun lidin sielun, hemenigiti meha lawinwandun lun súnwandan ubouagu. Fagua ayumaha lan meha larihini  weyu danme le ladügüni Heowá Ubóu ábanme paraísu, gidaléime sun wuribani. Másiñati samina lan meha líchugun aban lubuidun achülürüni houn liduheñu o lumadagu ha hilaguaañabaña. Ani háfuga saminati lan meha lábunagunu luban ani houleime lin linadürigu (Isaíasi 65:21-23). Ani dan le lamisurahanbalin Bungiu lun lidin sielun, aba lasansirun lisaminan kristiánu ligía. Ka uagu? Ladüga funa san weiri lan íruni luagu ladüga lasufurirun saragu? Ladüga funa san sódini lan desidírü lan mabuidunbei lan ibagari ubouagu ani magundaarunbei lan saragu ya? Ladüga funa aba lan busén lan lasandiruni ida liña lan ibagari sielu? Uá. Sánsiti ligaburi lisaminan ladüga Heowá lan desidírübalin. Dan le lanúadirun Bungiu aban kristiánu lun lidin sielun, yusu lumuti lani sífiri sandu lun ladügün lun lasansiruni ligaburi lisaminan luma afayeiruahaü le lagurabubei leresibirun.

14. Ka hasaminarubei kristiánugu anuadirúaaña luagu habagari ya ubouagu?

¹⁴ Mini lan san le busén hamá kristiánugu anuadirúaaña hóunwegun lau lóufudagun lun houdin sielun? Uá. Afuranguagüda lumuti Pábulu le hasandirubei. Ariñagati: “Sun awanha lan abagarida lau úgubu le wawagubei, daritiwa mégeiti luagu; sandigua wagía woungua lau idiheri. Mama hamuga wabusenruña wóunwegun [...] le wabusenrubei, lun lasansiragun wágubu le gagumuchadibei [...] lidoun wágubu le magumuchadibei, móunwenga wagía” (2 Korintuna 5:4). Afuranguagüda lumuti Pábulu mabusenrun hamá kristiánugu anuadirúaaña hóunwegun. Gúndaatiña lau ibagari ani busentiña hayusuruni lun heseriwidun lun Heowá hama haduheñu luma hama hamadagu. Gama lumoun, meberesenga ka lan idan heseriwida, haritagua hamuti lani Bungiu füramasei (1 Korintuna 15:53; 2 Féduru 1:4; 1 Huan 3:2, 3; Arufudúni 20:6).

15. Ka burí katei marufudubalin anúadira laali lan Bungiu aban kristiánu lau sífiri sandu?

¹⁵ Háfuga álügüdaguatün lan hungua anhein amisuraha laadün lubéi Bungiu lun hidin sielun. Anhein ítara liña lubéi, óunaba huméi álügüdahani burí le: Apurichiha humuti san uganu buiti lau ubebeni? Hínsiñeti san hun haturiahanu Bíbülia luma lun hafurendeirun luagu “lilulin-agei laritagun Bungiu”? (1 Korintuna 2:10). Ariha humaali san ida liña lan líderagunün Heowá lidan apurichihani? Le san lúgubu busén humá hadügüni lugundan Bungiu tau sun hanigi? Hínsiñetiña san híbirigu hun darí lun busén humá híderaguniña lun heseriwidun lun Heowá? Ariha humaali san lidan hibagari ida liña lan líderagunün Heowá? Anhein ariñaga hubéi anha lun álügüdahani burí le, mini lan san le luagu anúadira laadün lan Bungiu lun hidin sielun? Uá, lugundun gayarati hasandiragun sun lubúeingu Bungiu houngua ítara, íbini mama hamá kristiánugu anuadirúaaña. Gayarati layusuruni Heowá lani sífiri sandu lun líchugun erei houn sun lubúeingu, meberesenga anhein hemenigi habéi hawinwandun sielu o ubouagu. Ligíati, anhein machourun hubalin anhein aban hubéi kristiánu anuadirúaali, mini lan le luagu mama lan hugía aban hádangiñe. Málügüdaguntiña kristiánugu anuadirúaaña houngua anhein inarüni lubéi anúadira laaña lan Bungiu lau sífiri sandu. Lugundun chouru hamuti luagu anuadirúaaña lan.

16. Ida liña wasubudiruni mama lan sun ha eresibirubaña sífiri sandu lun hamisurahóuba lan lun houdin sielun?

¹⁶ Ayanuhatu Bíbülia hawagu saragu lubúeingu  Heowá ha úaraguabaña ha eresibirubalin lani Bungiu sífiri sandu ani mídintiña sielun. Huan le Abadiseihabei aban hádangiñe. Ariñagati meha Hesusu aban lan meha wügüri espechaliti Huan, gama lumoun ariñagati giñe mídinbei lan sielun arúeiha (Matéu 11:10, 11). Dawidi ábanya hádangiñe. Resibi lumuti meha ladundehan lani Bungiu sífiri sandu (1 Samueli 16:13). Seremei lun adundehani ligía gayara lubéi meha gunfuranda lani saragu katei luáguti Bungiu ani abürüha ligía fiú fánreinti le wadarirubei tidan Lererun Bungiu (Márükosu 12:36). Ariñagati meha apostolu Féduru: “Mama Dawidi amudeirubei sielun” (Adügaü 2:34). Yusu lumuti Heowá lani sífiri sandu lun hadügün wügüriña ha saragu katei wéinamuti, gama lumoun mayusurun lumuti lun lamisurahaniña lun houdin sielun. Ladüga funa san múaragun hamá o ladüga meseriwin hamá lun houdin sielun? Uá. Mini lan le láguyuguagüdübaña lan Heowá lun hawinwandun lidan Paraísu ya ubouagu (Huan 5:28, 29; Adügaü 24:15).

17, 18. a) Halíaba san hawinwanda hiibe-agei lubúeingu Bungiu? b) Kaba burí álügüdahani wóunaba lidan le aban arütíkulu?

¹⁷ Hiibe-agei lubúeingu Heowá mídinbaña sielun. Hemenigitiña hawinwandun ya ubouagu lábugiñe larúeihan Bungiu, ítara kei meha Abüraámü, Dawidi, Huan le Abadiseihabei hama amu wügüriña hama würiña lánina tidaani Bíbülia (Ebüréu 11:10). Ñéinbaña 144,000 urúeigu luma Kristu sielu lun hagumadiruniwa. Gama lumoun, ariñagatu Bíbülia míbebaña lan kristiánugu anuadirúaaña ubouagu lidan lagumuhóun dan le (Arufudúni 12:17). Ligía gayara lubéi wariñagun añaheinhaña lan hiibe-agei kristiánugu anuadirúaaña sielu.

¹⁸ Gama lumoun, anhein ariñaga aban kristiánu anuadirúaali lan, ida liña lunti lan hóunabun kristiánugu ha lúnbaña hawinwandun ubouagu? Ida luba wóuserun aban íbiri le agumeseruti eiga tídangiñe fein gurá ligía tídangiñe diwéin lidan Aritaguagülei? Lunti san wadiheridun ladüga laganwoundun hanumerun ha ariñagubaña anuadirúaaña lan lau sífiri sandu? Wóunabubei álügüdahani burí le lidan le aban arütíkulu.