1-3. Nemene la ewekë ka tru ka traqa ngöne la Penetekos macatre 33, nge nemene la hna qaja amë hë ekö göne la ewekë cili? (Wange ju la pane iatr.)

KETRE drai ka tru la drai celë e Ierusalema. Easë ngöne la sabathi hmakany, kola traqa la iatr troa atrune la Penetekos, ketre drai ne pui ne xen hna ahmitrötrën, nge ka xejë la hneijine menuëne la qitr. Nge ame ngöne la hmakanyi cili ngöne la ēnē, kola tro fë la huuj hnene la atre huuje ka sisitria. Nge ame hë e 9 h, nyidrëti a tro fë la lue areto hna levenën nyine simesim; hna kuca lue ej qa ngöne la itre pane qitr hna menuën. Nyidrëti a simesimën, maine enienijën lue ej göi troa tro fë koi Iehova. Hane hi lai hna kuca lo Penetekos ne la macatre 33.—Levitiko 23:15-20.

² Itre macatre qëmekene lai, hnene la atre huuje ka sisitria hna majemine e nöjei macatre troa tro fë la huuje celë. Hetre hnene ej hna qajaqaja, kolo ewekë ka tru ka traqa lo Penetekos macatre 33 kowe lo ala 120 lao itretre drei Iesu. Angatr a catre thith ngöne lo hnahage ka he koho e Ierusalema. (Ite Huliwa 1:13-15) Nge eitre hadredre lao macatre qëmekene lai, hnei Ioela perofeta hna qaja amë hë la ewekë cili. (Ioela 2:28-32; Ite Huliwa 2:16-21) Nemene la ewekë ka tru ka traqa e cili?

 ³ E jë la Ite Huliwa 2:2-4. Ame ngöne lo Penetekos macatre 33, hnei Akötresieti hna nenge kowe la itre keresiano la uati hmitrötre i Nyidrë, ame hna ië angatr e cili. (Ite Huliwa 1:8) Thupene lai, hna traqa koi angatr la ka ala nyimu, ame hna nyiqaane ithanatane hnene la itretre dreng la nöjei ewekë ka lolo ka traqa koi angatr. Hnei Peteru aposetolo hna qaja la ewekë ka traqa koi angatr memine la enyipiewekën ej. Matre, öni angeice kowe la ka ala nyimu: “Ietraju, mate isa bapataiso nyipunieti pi asë ngöne la atesiwa i Iesu Keriso ; mate shenge tije pi la nöjei ngazo i nyipunie ; nge tro nyipunie a hetenyi la ahnahna ene la [u]ati [h]mitöt.” Traqa koi 3 000 lao hna bapataisone la drai cili, me kapa fe la uati hmitrötr.—Ite Huliwa 2:37, 38, 41.

4. (a) Pine nemene matre loi e tro sa wangatrune la ewekë ka traqa lo Penetekos macatre 33? (b) Nemene la ewekë ka tru ka traqa ekö ngöne la drai cili ngöne lo hneijine i Mose? (Wange ju la ithuemacanyi e kuhu pun.)

⁴ Drei la hna nyihatrene hnene la atre huuje ka sisitria? Nge nemene la hna nyihatrene hnene la huuje hna tro fë e nöjei Penetekos? Iesu la hna nyihatrene hnene la atre huuje ka sisitria. Nge hna nyihatrene la lue areto hnene la itretre drei Iesu hna iën; hna ië angatre asë qaathene la itre atr ka ngazo, nge itre hna hëne ka hape, “pane wene.” (Iakobo 1:18) Hnei Akötresie hna nyi kuku angatr, me ië angatr troa ce musi me Iesu e hnengödrai ngöne la Baselaia i Akötresie. (1 Peteru 2:9) Tro Iehova elanyi a amanathithine la nöjei atr ka idrengethenge jëne la Baselaia i Nyidrë. Haawe, mele ju hë së elanyi e koho hnengödrai me Iesu, maine e celë fen, ngo ka tru aliene koi së asë la Penetekos macatre 33. [1] —Wange ju la ithuemacanyi e kuhu pun.

5. Nemene la ka amamane ka hape, tha ka ceitune kö la aqane iëne la itre keresiano?

⁵ Tha tro pi kö lo ala 120 lao itretre dreng a thëthëhmine la drai cili. Hna isa të hui angatr la ketre ewekë ceitu me ketre ukahlokin eë. Nge hnei Iehova hna aijijë angatr troa ithanatane la itre xa qene hlapa kö. Mama hnyawa pi hi ka hape, hna ië angatre hnei uati hmitrötr. (Ite Huliwa 2:6-12) Ngo tha celë kö lai ka traqa kowe la nöjei keresiano la kola ië angatr. Tha hnei Tusi Hmitrötre kö hna qaja ka hape, hetre ewekë ka ceitu me ukahlokin eë ka mama hune la he ne lo ala thauzane e Ierusalema, itretre hna iën e thupen ngöne la drai cili. Hna ië angatr ngöne lo ijine kola bapataiso angatr. (Ite Huliwa 2:38) Ketre, tha hna iën asë kö la itre keresiano la kola bapataiso angatr. Ame la angetre Samaria, tre hna ië angatr thupene hë la hna bapataiso angatr. (Ite Huliwa 8:14-17) Ame pena Konelio me itre atrene la hnalapa i angeic, tre hna ië angatr qëmekene troa bapataiso angatr.—Ite Huliwa 10:44-48.

6. Nemene la hna kapa hnene la nöjei keresiano hna iën, nge nemene la thangane lai koi angatr?

⁶ Eje hi laka, isa aqane drenge kö la itre keresiano ka hape, hna ië angatr. Canga drenge hi itre xan, nge ame itre xan, trotrohnine pë hë angatr e thupen. Ngo hnei Paulo aposetolo hna qejepengöne la ka traqa koi angatr, isa ala cas, la kola ië angatr. Öni angeic, qa ngöne la hna lapaune koi Iesu, “ame hna acatenyi nyipunieti fe hnei [u]ati [h]mitöte lo hna thinge hnaean, celë hi hatene la edö shë uti hë la troa amelene la ite hna itön, nyine atrune la lolo i anganyidë.” (Efeso  1:13, 14) Haawe, jëne la uati hmitrötr, Iehova a amamane hnyawane kowe la itre keresiano celë ka hape, hnei Nyidrëti hna ië angatr troa mel e koho hnengödrai. Matre uati hmitrötre hi e cili, lo “hatene la edö” i angatr, ewekë hi lai ka anyipicine koi angatr ka hape, tha angatre kö elanyi a troa mel e celë fen, ngo e koho hnengödrai.—E jë la 2 Korinito 1:21, 22; 5:5.

7. Nemene la nyine tro la nöjei keresiano a isa kuca matre troa kapa la edrö i angatr e hnengödrai?

⁷ E hna iëne la ketre keresiano, hapeu, kolo hë lai a hape, ka tro hë angeice elanyi a kapa la edrö i angeic? Ohea. Nyipici laka, xecie hnyawa koi angeic ka hape, hna hane hë angeic troa mele e hnengödrai. Ngo, tro hi angeic elanyi a kapa la edrö i angeic e tro angeic a mele nyipici koi Iehova. Öni Peteru: “Qa ngöne lai ange tejine fe, catejë nyipunie troa anyipicine la hna hëne me ië nyipunie ; ke maine kucajë nyipunie la nöjei ewekë cili tha tro palua kö nyipunie a thixöt ; ke tune lai troa nyipi nue koi nyipunie troa lö kowe la baselaia ka tha ase palua kö ne la Joxu shë, Ate amelen, ene Iesu Keriso.” (2 Peteru 1:10, 11) Celë hi matre, loi e tro la nöjei keresiano hna iën a isa thupën matre tha tro kö la ketre ewekë a ajeanyi angatre qa ngöne la huliwa i Iehova. Maine nyipici laka, hna hë angatr troa hane mele e hnengödrai, ngo tro jë kö angatr elanyi a kapa la edrö i angatr, e hnei angatre hna mele nyipici uti hë la pun.—Heberu 3:1; Hna Amamane 2:10.

8, 9. (a) Pine nemene matre jole pi hë kowe la itre keresiano troa trotrohnine la pengöne la trejin hna iën? (b) Nemene la ka amamane kowe la trejin ka hape, hna hane hë angeice kowe la mel e koho hnengödrai?

⁸ Eje hi laka, tha nyipi trotrohnine kö la itre trejin la ewekë ka traqa ngöne la Akötresie a iëne la itre xa keresiano. Tha sesëkötre kö së, ke tha hnei angatre kö hna hane melëne lai. Nge ketre, tha hnei Akötresieti kö hna xupe la atr troa mel e koho hnengödrai ngo e celë fene pe. (Genese 1:28; Salamo 37:29) Ame pe, Iehova a iëne la itre xa trejin troa hane joxu me atre huuj e hnengödrai. Matre, ame la kola ië angatr, ketre saze pi hi la mejiune i angatr, memine la aqane waiewekë i angatr. Celë hi matre, angatr a trengeneune la ijine tro angatr elanyi a mel e hnengödrai.—E jë la Efeso 1:18.

⁹ Ngo hna atre tune kaa hnene la trejin ka hape, hna hane hë angeic troa mele e hnengödrai? Hanawange la hnei Paulo hna qaja kowe la itre keresiano hna iën e Roma, lo itre “hna hëne nyine ite ka hmitöt.” Öni angeic: “Tha hna kapa kö hnei nyipunie la u ne la hlu, mate tro nyipunie a qou hmaca; ngo hna kapa hnei nyipunie la u ne la ate hna nyi kukun, mate hëjë shë, ka hape, Aba, Kaka. Ame la [u]a kola ce anyipicine me ite u shë, laka ite nekö i Akötesieti shë.” (Roma 1:7; 8:15, 16) Haawe, jëne la uati hmitrötr, Akötreiseti a amamane hnyawane kowe lai trejin  ka hape, hna hane hë angeic troa ce musi me Keriso e hnengödrai.—1 Thesalonika 2:12.

10. Nemene la aliene la hna qaja ka hape, “tha nyipi koi nyipunie tro kete ate a ini nyipunie”?

¹⁰ Iehova la ka sipu anyipicine kowe la trejin ka hape, hna ië angeic. Ngo, tha atr kö la ka troa qajaqaja koi angeic. Öni Ioane aposetolo kowe la itre keresiano hna iën ka hape: “Hetenyi nyipunie la hna siëne qa thene la Kahmitöt, nge ate hë nyipunie la nöjei ewekë asëjëihë.” Öni angeice fe: “Kola cile huti thei nyipunie la hna siëne hnei nyipunie hna kapa qa thei nyidë, nge tha nyipi koi nyipunie tro kete ate a ini nyipunie ; ngo ame la hna siëne hnei nyidë kola ini nyipunie ngöne la nöjei ewekë asë, nge nyipici ej, nge tha thoi kö, nge tune lai hnen’ eje hna ini nyipunie, nyipunie a cile huti ngön.” (1 Ioane 2:20, 27) Nyipi ewekë tro la keresiano hna iën a kapa la ini qaathei Iehova tune la nöjei keresiano. Ngo, tha ketre atr kö la ka troa anyipicine ka hape, hna ië angeic. Hnei Iehova hna amamane hnyawa lai koi angeice jëne la uati hmitrötre i Nyidrë, lo mene ka pë san!

11, 12. Nemene jë la mekune ka traqa kowe la trejin hna iën, ngo nemene la ka xecie koi angeic?

¹¹ Ame la kola iëne la ketre keresiano hnei uati hmitrötr, tre, nyimu ewekë ka saze thei angeic matre öni Iesu, ‘hna hnaho angeice hmaca.’ (Ioane 3:3, 5) Öni nyidrëti fe: “The sheshëköte kö ene la hnenge hna qaja koi ’ö, ka hape, Nyipi ewekë tro ha hnaho nyipunieti hmaca. Kola hnahna la enyi ngöne la hnei nyëne hna ajan, dengë hë eö la nyën’ a palamumu [maine utraxulu], ngo tha ’te kö eö qa i nyën’ e ka, nge tro nyën’ ië ; tune lai la nöjei ate asë hna hnahone qa thene la [u]a.” (Ioane 3:7, 8) Haawe, mama hnyawa pi hi ka hape, thatreine kö së qejepengöne la ewekë ka ej e kuhu hni ne la atr hna iën. [2]—Wange ju la ithuemacanyi e kuhu pun.

¹² Tro jë la ketre trejin hna iën a sipu waipengöi angeic me hape, ‘Pine nemene matre ië ni jë hnei Iehova, ngo tha hna ië ketre kö? Ijijinge fe kö troa xome la hnëqa celë?’ Maine nyipici laka, angeice a mekune tune lai, ngo xecie hnyawa koi angeic laka, hnei Iehova hna ië angeic. Matre, kola elitrauje la madrine i angeic, nge tru la ole i angeic kowe la ahnahna cili. Casi hi la mekuna ne la itre hna iën memine la hna qaja hnei Peteru, lo kola hape: “Qaja aloinyi Akötesie me Tetetroti ne la Joxu shë Iesu Keriso, lo ate hnaho shë hmaca pi, thenge la ihnimi atraqate i nyidë, kowe la mejiune ka mel, hnene la mele hmaca jë Iesu Keriso qa hna mec, kowe la edö ka tha hnyeqete kö me ka pë ethan, nge tha wahnyatenge kö [maine tha ka fitre kö] hna amë hnengödrai thatraqai shë.” (1 Peteru 1:3, 4) Haawe, ame la kola e hnene la itre hna iën la itre ithanata celë, xecie hnyawa koi angatr ka hape, kola sipu ithanata koi angatr hnene la Keme i angatr.

13. Nemene la ka saze thene la keresiano la kola ië angeic hnei uati hmitrötr, drei la qaane la ewekë cili?

¹³ Nyipici laka, qëmekene tro Iehova a  hëne la ketre keresiano troa mel e hnengödrai, ka mejiune angeic troa mele palua e celë fen. Angeic ekö a trengeneune la ijine tro Iehova a aparadraisone la ihnadro elany, me apatrene la iangazo. Maine jë, hnei angeice hna lapa mekune la ijine tro angeic a iöhnyi hmaca memine la ketre atrene la hnepe lapa i angeic, me ketre sinee i angeice pena ka meci hë. Maine angeice pena a lapa mekune la ijine tro angeic elany a xupe la uma i angeic, me tra feja, me xeni wen ej. (Isaia 65:21-23) Pine nemene matre ujë ju hi la mekune me hni angeic? Tha hnene kö laka ka hace la mele i angeic, matre ujë jë tune lai. Ketre tha hnene kö laka, ka pëkö aliene la troa mele palua e celë fen. Maine pena, tha angeice kö a thele troa tupathe la mel e hnengödrai. Kolo pe a ujë la mekune me hni angeic, ke hnei Akötresieti hna amekötine lai koi angeic. Ame la Iehova a hë angeic, Nyidrëti hi lai a ujëne la mekune me hni angeic me edrö hnei angeic hna trengeneun jëne la uati hmitrötre i Nyidrë.

14. Nemene la aqane goeëne hnene la itre hna iën la mele i angatr enehila?

¹⁴ Hapeu, kolo kö lai a hape, ka pi mec la itre trejin hna iën? Hnei Paulo hna amamane la mekuna ne la itre hna iën. Hnei angeice hna aceitunëne la ngönetrei i angatr me ketre “uma ne heta,” me hape: “Ame huni ngöne la uma ne heta celë kola awe, nge hace hë ; ke tha ngöne laka aja huni troa unapi, loi pe troa xet, mate ulumeju la meci hnene la mel.” (2 Korinito 5:4) Eje hi laka, tha ajane kö angatre troa mec. Tru la madrine i angatr troa mel e nöjei drai, me nyihlue i Iehova cememine la hnepe lapa i angatr me itre sinee i angatr. Ngo kuca ju hë angatre la nöjei huliwa, ngo tha thëthëhmine kö angatre laka, hetre ketre mele kö hnei Iehova hna hnëkëne amë hë thatraqai angatr.—1 Korinito 15:53; 2 Peteru 1:4; 1 Ioane 3:2, 3; Hna Amamane 20:6.

15. Nemene la ka anyipicine ka hape, hna iëne la ketre keresiano hnei uati hmitrötr?

¹⁵ Maine jë, epuni hnyingëne thele ka hape, ‘Hnei Iehova kö hna hane hë ni troa mel e hnengödrai?’ Maine kola traqa koi epuni la itre mekune ka tune lai, me luelu, pane mekune ju la itre hnyinge celë: Ka catre kö epuni cainöje trootro? Ka madrine pala hi epuni troa inine la Tusi Hmitrötr, me atrepengöne la itre ‘ewekë ka jui Akötesie’? (1 Korinito 2:10) Tru kö la thangane la hnei epuni hna cainöje trootro? Hetre aja i epuni kö troa amë panëne la aja i Iehova ngöne la mele i epun? Tru kö la ihnimi epuni kowe la itre atr, nge ka tru kö koi epuni la troa xatua angatre troa nyihlue i Iehova? Öhne kö epuni la hatrene la ixatua i Iehova ngöne la itre götrane gaa tru ne la mele i epun? Maine epuni a nangëne la nöjei hnyinge celë, kolo kö lai a anyipicine ka hape, hna hë epuni fe troa mel e hnengödrai? Ohea, ke celë fe hi aqane mekune lai hnene la nöjei hlue i Iehova, itre hna iën me itre xa mamoe. Jëne la uati hmitrötr, Nyidrëti a hamëne la men ka casi kowe la nöjei hlue i Nyidrë, ngacama isa edrö i angatre kö elany. E epuni a hnyingëne thele ka hape, tro kö epuni a mel elanyi e hnengödrai, kolo lai a hape, tha hna hë epuni kö. Pëkö luelue thene la itre hna iën!

16. Tro kö la nöjei hlue i Iehova ka kapa la uati hmitrötr a hane mel e hnengödrai?

¹⁶ Hetrenyi e hnine la Tusi Hmitrötr la  itre hlue i Iehova ka kapa la uati hmitrötre i Nyidrë, ngo itre ka tha tro kö a mel e hnengödrai. Ioane Bapataiso la ketre e angatr. Öni Iesu göi Ioane, pëkö atr qëmeke i angeic ka sisitria hui angeic, ngo tha tro kö angeic a hane musi e koho hnengödrai. (Mataio 11:10, 11) Davita fe la ketre hna ea hnene la uati hmitrötr. (1 Samuela 16:13) Jëne la uati hmitrötr, hetre itre ewekë ka jui göi Iehova hnei angeic hna trotrohnin, nge celë fe ka upi angeic troa cinyihane la itre xa götrane ne la Tusi Hmitrötr. (Mareko 12:36) Ngo öni Peteru, “tha elë kö Davita kowe la hnengödrai.” (Ite Huliwa 2:34) Hnei Iehova hna hamëne la uati hmitrötr koi angatr matre aijijë angatre troa kuca la itre ewekë nyine hain. Ngo tha hnei Nyidrëti kö hna nue la uati hmitrötr koi angatr göi troa hë angatr kowe la mel e hnengödrai. Tha kolo kö lai a hape, tha ijiji angatre kö troa musi e hnengödrai. Ngo, hetre edrö i angatre kö hnei Iehova hna hnëkën, ene la troa amele angatre hmaca ngöne la Paradraiso e celë fen.—Ioane 5:28, 29; Ite Huliwa 24:15.

17, 18. (a) Nemene la hna trengeneune enehila hnene la itre hlue i Iehova ka nyimutre? (b) Nemene la itre hnyinge hna troa ce ithanatane ngöne la tane mekune ka troa xulu?

¹⁷ Nyimutre la itre hlue i Iehova enehila ka tha tro kö a hane mel e hnengödrai. Nge nyimutre la itre hlu, trahmanyi me föe ka mele ekö ngöne la itre drai hna qaja hnei Tusi Hmitrötr, itre ka trengeneune la ijine tro angatr mel fene la Baselaia i Akötresie. (Heberu 11:10) Ala 144 000 la ka troa ce musi me Iesu e hnengödrai. Ngo Tusi Hmitrötre fe a qaja la “ite thelene” la itre hna iëne ka mele petre kö e celë fen ngöne la hneijine la pun. (Hna Amamane 12:17) Matre, ala nyimu catre hë thene la ala 144 000, itre ka meci hë, nge ka mele hë e hnengödrai.

¹⁸ Ngo e qaja jë ketre ka hape, hna ië angeic, tune kaa la aqane tro la itre ka troa mel e celë fen a ujë? Maine ketre atrene la ekalesia a xen la areto me ij la waina ngöne la Drai Ne Amekunën, tune kaa la aqane tro sa ujë koi angeic? Nge tune kaa fe la aqane ujë së la kola elë trootro la etrune la itre hna iën? Tro kö sa hnehengazon? Tro pë hë së a sa la itre hnyinge celë ngöne la tane mekune ka troa xulu.