1-3. Nso ikanam usen Usọrọ Pentecost eke isua 33 edi ata akpan usen, didie ke se iketịbede usen oro okosu se N̄wed Abasi eketịn̄de? (Se akpa ndise ibuotikọ emi.)

MME owo ẹma ẹkop inemesịt etieti ke usenubọk Sunday emi ẹkediade Usọrọ Pentecost. Ẹkesinịm usọrọ emi ke ntọn̄ọ ini ukpen̄e wheat. Edi usen usọrọ enye emi ekedi ata akpan usen ke Jerusalem. Usenubọk oro, akwa oku ama awa uwa emi enye esiwade kpukpru usenubọk ke temple. Ekem ke n̄kanika usụkkiet usenubọk, enye ama awa uyo iba oro ẹkesịnde leaven, emi ẹkedade akpa mfri wheat ẹsan̄. Akwa oku ama ofụn̄ uyo iba emi ke iso Jehovah. N̄kpọ emi eketịbe ke Pentecost eke isua 33.—Leviticus 23:15-20.

² Akwa oku ekesiwa edifụn̄ uwa emi kpukpru isua ke usen Pentecost. Se akwa oku ekesinamde emi ke kpukpru Pentecost akada aban̄a ata akpan n̄kpọ oro eketịbede ke Pentecost eke isua 33. N̄kpọ emi eketịbe ke ini mbet Jesus 120 ẹkedude ke ubet enyọn̄ ke Jerusalem, ẹbọn̄ akam. (Utom 1:13-15) Isua 800 mbemiso n̄kpọ emi eketịbede, prọfet Joel  ama etetịn̄ ke emi eyetịbe. (Joel 2:28-32; Utom 2:16-21) Nso idi ata akpan n̄kpọ oro eketịbede ke Pentecost eke isua 33?

³ Kot Utom 2:2-4. Ke usen oro, Abasi ama ada edisana spirit esie eyet mme mbet Jesus 120 oro aran. (Utom 1:8) Ekem, otuowo ẹma ẹsan̄a ẹkpere mmọ, ndien mmọ ẹma ẹtọn̄ọ nditịn̄ mban̄a mme utịbe utom Abasi oro mmọ ẹkekụtde ẹnyụn̄ ẹkopde, ẹnọ otuowo oro. Apostle Peter ama anam otuowo oro ẹfiọk ke ata akpan n̄kpọ eketịbe oro. Ekem, enye ama ọdọhọ mmọ ete: “Ẹkabade esịt, kpukpru mbufo ẹnyụn̄ ẹna baptism ke enyịn̄ Jesus Christ man ẹfen mme idiọkn̄kpọ mbufo, ndien mbufo ẹyebọ edisana spirit emi edide enọ mfọn.” N̄kpọ nte owo 3,000 ẹma ẹna baptism usen oro, ẹnyụn̄ ẹbọ edisana spirit.—Utom 2:37, 38, 41.

4. (a) Ntak emi se iketịbede ke Pentecost eke isua 33 ekpebehede nnyịn? (b) Etie nte nso akpan n̄kpọ en̄wen eketịbe ediwak isua ko ke edem ke ukem usen oro ẹkesinịmde Pentecost? (Se ikọ idakisọn̄.)

⁴ Anie ke akwa oku akada aban̄a, ndien nso ke uwa oro enye ekesiwade kpukpru Pentecost akada aban̄a? Akwa oku akada aban̄a Jesus. Uyo iba oro enye ekesiwade akada aban̄a mme mbet Jesus oro ẹkeyetde aran. Abasi emek mme mbet Jesus oro osio ke otu ubonowo nte “akpa mbun̄wụm.” (James 1:18) Abasi enyịme mmọ ẹdi nditọ esie onyụn̄ emek mmọ ẹtiene Jesus ẹkara nte ndidem ke Obio Ubọn̄ Abasi. (1 Peter 2:9) Jehovah ayada Obio Ubọn̄ esie ọdiọn̄ kpukpru mbon oro ẹkopde item. Ntre, inamke n̄kpọ m̀mê nnyịn ididu ke heaven itiene Jesus ikara, m̀mê ididu uwem mi ke Paradise isọn̄, se iketịbede ke Pentecost eke isua 33 enen̄ede ebehe nnyịn. ^[1] —Se ikọ idakisọn̄.

5. Nso iwụt ke Abasi isiyetke mme owo aran ke ukem usụn̄?

⁵ Mme mbet Jesus oro ẹkedude ke ubet enyọn̄ ke Jerusalem ikefreke se iketịbede usen oro. N̄kpọ oro ebietde edemeikan̄ ama odoro kpukpru mmọ ke ibuot. Jehovah ama anam mmọ ẹkeme nditịn̄ ikọ ke esen usem. Mmọ ẹma ẹnen̄ede ẹdiọn̄ọ ke ẹma ẹda edisana spirit ẹyet mmimọ aran. (Utom 2:6-12) Edi n̄kpọ oro ebietde edemeikan̄ isidoroke ke ibuot kpukpru ikọt Abasi ke ini ẹyetde mmọ aran. Ke uwụtn̄kpọ, Bible idọhọke ke n̄kpọ oro ebietde edemeikan̄ ama odoro ke ibuot tọsịn ikọt Abasi oro ẹkeyetde aran kpa usen oro ke Jerusalem. Ẹkeyet mmọ aran ke ini mmọ ẹkenade baptism. (Utom 2:38) N̄ko, idịghe kpukpru mme Christian ke ẹsiyet aran ke ini mmọ ẹnade baptism. Ke ini mbon Samaria ẹkenade baptism, ndusụk ini ama ebe mbemiso ẹkeyetde mmọ aran. (Utom 8:14-17) Nte ẹkeyetde Cornelius ye ikọtufọk esie aran ama enen̄ede okpụhọde, koro ẹkeyet mmọ aran mbemiso mmọ ẹkenade baptism.—Utom 10:44-48.

6. Nso ke ẹnọ kpukpru mbon oro ẹyetde aran, ndien nso ke emi anam mmọ ẹnịm?

⁶ Idịghe kpukpru mbon oro ẹyetde aran ẹsidiọn̄ọ ke ẹyet mmimọ aran ke ndondo oro ẹyetde mmọ aran. Esisịt ini esibe mbemiso ndusụk mmọ ẹdiọn̄ọde ke ẹyet mmimọ aran. Edi apostle Paul ama etịn̄ se ẹsinamde kpukpru mbon  oro ẹyetde aran. Enye ọkọdọhọ ete: “Ke mbufo ẹma ẹkenịm ke akpanikọ, ẹma ẹfịk mbufo idiọn̄ọ ke edisana spirit oro ẹken̄wọn̄ọde, emi edide idiọn̄ọ . . . emi ẹbemde iso ẹnọ nnyịn.” (Ephesus 1:13, 14) Ntre, Jehovah esida edisana spirit esie anam mbon oro ẹyetde aran ẹnen̄ede ẹdiọn̄ọ ke imọ imemek mmọ ndika heaven. Ntem, edisana spirit edi ‘idiọn̄ọ emi ẹbemde iso ẹnọ mmọ,’ m̀mê se inamde mmọ ẹnịm ke mmọ ẹdidu uwem ke nsinsi ke heaven, idịghe ke isọn̄.—Kot 2 Corinth 1:21, 22; 5:5.

7. Nso ke ana kpukpru mbon oro ẹyetde aran ẹnam man ẹka heaven?

⁷ Ndi ọwọrọ ke Abasi ama eyeyet owo aran, ke enye ayaka heaven? Iwọrọke ntre. Owo oro Abasi eyetde aran enịm ke Abasi emek imọ nditiene n̄ka heaven. Edi ana enye ọsọn̄ọ ada anam n̄kpọ Jehovah tutu esịm utịt, mbemiso enye ekemede ndika heaven. Apostle Peter ọkọdọhọ ete: “Ke ntak emi, nditọete, ẹdọdiọn̄ ẹsịn ofụri ukeme mbufo ndinam ikot eke ẹkekotde mbufo ye edimek eke ẹkemekde mbufo ẹnyene nsọn̄ọ; koro edieke mbufo ẹkade iso ndinam mme n̄kpọ emi mbufo idituakke ukot iduọn̄ọ. Ntem ke ẹdiberede usụn̄ ẹnịm ata in̄wan̄ ẹnọ mbufo ndibe ndụk nsinsi obio ubọn̄ Ọbọn̄ ye Andinyan̄a nnyịn Jesus Christ.” (2 Peter 1:10, 11) Ntre, inaha owo oro ẹyetde aran ayak n̄kpọ ekededi akpan enye ndinam n̄kpọ Jehovah. Kpa ye oro Abasi ama ekeyet owo aran ndika heaven, edieke owo oro mîsọn̄ọke ida inam n̄kpọ Abasi isịm utịt, enye idikaha heaven.—Mme Hebrew 3:1; Ediyarade 2:10.

8, 9. (a) Ntak emi ata ediwak ikọt Abasi mîkemeke ndifiọk nte Abasi esiyetde owo aran? (b) Owo oro ẹyetde aran esinam didie ọdiọn̄ọ ke Abasi eyet imọ aran ndika heaven?

⁸ Ata ediwak ikọt Abasi mfịn ikemeke ndifiọk nte Abasi esiyetde owo aran. Mmọ ikemeke ndifiọk sia Abasi iyetke mmọ aran. Abasi okobot mme owo man ẹdụn̄ ke isọn̄ ke nsinsi, idịghe ndidụn̄ ke heaven. (Genesis 1:28; Psalm 37:29) Edi Jehovah emek ndusụk owo ndidi ndidem ye mme oku ke heaven. Ntre, ke ini enye eyetde mmọ aran, mmọ ẹsidori enyịn ndikodu uwem ke heaven, ndien emi esinam nte mmọ ẹkerede n̄kpọ ye nte mmọ ẹdade uwem emi, okpụhọde.—Kot Ephesus 1:18.

⁹ Edi, owo oro ẹyetde aran esinam didie ọdiọn̄ọ ke Abasi eyet imọ aran ndika heaven? Kop se Paul eketịn̄de ọnọ nditọete oro ẹkeyetde aran ke Rome, emi “ẹkekotde ẹte ẹdidi ndisana owo.” Enye ọkọdọhọ mmọ ete: “Mbufo ikọbọhọ spirit ufụn oro anamde ẹfiak ẹkop ndịk, edi mbufo ẹkebọ spirit emi anamde ẹda nnyịn ẹnyene nte nditọ, onyụn̄ oto ke spirit emi nnyịn ifiori ite: ‘Abba, Ete!’ Spirit Abasi etiene spirit nnyịn etie ntiense ete nnyịn idi nditọ Abasi.” (Rome 1:7; 8:15, 16) Abasi esida edisana spirit esie anam owo ọdiọn̄ọ ke imọ  imemek enye nditiene Jesus n̄kara ke heaven.—1 Thessalonica 2:12.

10. Akpa n̄wed John 2:27 ọdọhọ ke mbon oro ẹyetde aran iyomke owo ndomokiet ekpep mmimọ n̄kpọ. Nso ke emi ọwọrọ?

¹⁰ Idịghe owo esidọhọ mbon oro Abasi eyetde aran ke ẹyet mmọ aran. Jehovah esinam mmọ ẹdiọn̄ọ ke imọ imeyet mmọ aran. Apostle John ọdọhọ mbon oro ẹyetde aran ete: “Enye emi edide edisana emeyet mbufo aran; kpukpru mbufo ẹmenyụn̄ ẹnyene ifiọk.” Enye adian do ete: “Amaedi mbufo, aran oro enye eyetde mbufo osụk odu ye mbufo, mbufo inyụn̄ iyomke owo ndomokiet ekpep mbufo. Edi, aran oro enye eyetde mbufo ekpep mbufo kpukpru n̄kpọ onyụn̄ edi akpanikọ idịghe nsu. Ndien kpa nte enye ekekpepde mbufo, ẹka iso ẹbuana n̄kpọ ye enye.” (1 John 2:20, 27) Jehovah esikpep mbon oro ẹyetde aran n̄kpọ, kpa nte enye esikpepde kpukpru ikọt esie eken n̄kpọ. Edi owo isikpepke-kpep mbon oro ẹyetde aran ite ke ẹyet mmọ aran. Jehovah esida edisana spirit esie anam mmọ ẹfiọk ke ẹyet mmọ aran.

11, 12. Nso ke owo oro ẹyetde aran ekeme ndikere, edi nso ke enye enịm?

¹¹ Ke ini Abasi adade edisana spirit eyet mme owo aran, nte mmọ ẹkerede n̄kpọ ye nte mmọ ẹdade uwem emi esinen̄ede okpụhọde. Ntak edi oro Jesus ọkọdọhọde ke mmọ ‘ẹtọn̄ọ ntak ẹmana.’ (John 3:3, 5) Jesus ama onyụn̄ ọdọhọ ete: “Kûyịk koro ndọhọde fi nte, Mbufo ẹnyene nditọn̄ọ ntak mmana. Ofụm efịme aka ebiet eke enye amama, afo onyụn̄ okop uyom esie, edi ufiọkke ebiet eke enye otode edi ye ebiet eke enye akade. Ntre ke edi ye kpukpru owo eke ẹtode ke spirit ẹmana.” (John 3:7, 8) Owo emi Abasi mîyetke aran ikemeke-keme ndifiọk nte esitiede mbon emi Abasi eyetde aran ke idem. ^[2]—Se ikọ idakisọn̄.

¹² Owo oro Abasi eyetde aran ekeme ndikere, ‘Ntak edide ami ke Jehovah emek?’ Enye ekeme ndikere ke idịghe utọ owo nte imọ ke Jehovah ekpemek. Edi oro iwọrọke ke enye inịmke ke Jehovah emek imọ ndika heaven. Enye enịm, ndien oro anam enye enen̄ede okop inemesịt onyụn̄ ọkọm Abasi ke utọ akwa ifet oro. Mbon oro ẹyetede aran ẹnyịme ye se Peter eketịn̄de emi ete: “Itoro enyene Abasi ye Ete Ọbọn̄ nnyịn Jesus Christ, koro nte ekemde ye akwa mbọm esie enye okobon nnyịn obufa ete inyene odu-uwem idotenyịn ebe ke ediset Jesus Christ ke n̄kpa, ete inyene udeme eke mîkemeke ndibiara mînyụn̄ isabakede mînyụn̄ ikemeke ndibe mfep. Ẹnịm enye ke heaven ẹnọ mbufo.” (1 Peter 1:3, 4) Ke ini mbon oro ẹyetde aran ẹkotde itien̄wed emi, mmọ ẹfiọk ke Ete mmimọ, Jehovah, etịn̄ ikọ emi ọnọ mmimọ.

13. Nso isinam mbon oro ẹyetde aran mîdorike enyịn aba ndidụn̄ ke isọn̄ ke nsinsi?

¹³ Mbemiso Jehovah ekeyetde mmọ aran ndika heaven, mmọ ẹkedori enyịn ndidu uwem mi ke isọn̄ ke nsinsi. Ama  ọdọn̄ mmọ ndikụt ini emi Jehovah edinamde isọn̄ edi Paradise, onyụn̄ anam kpukpru idiọkido etre. Ekeme ndidi ama ọdọn̄ mmọ ndidu ini emi ẹdinamde mbon mmọ m̀mê ufan mmọ, ẹset. Anaedi ama onyụn̄ ọdọn̄ mmọ ndibọp ufọk nnyụn̄ ndụn̄ ke esịt, m̀mê nditọ in̄wan̄ nnyụn̄ ndia mbun̄wụm esie. (Isaiah 65:21-23) Edi ntak emi mmọ ẹdoride enyịn ndika heaven idahaemi? Ndi edi ke ntak emi ediwak n̄kpọ ẹtịmerede mmọ esịt ke isọn̄ emi, mmọ ẹnyụn̄ ẹnen̄erede ẹbọ ufen? Ndi mmọ ẹkere ke uwem eyefek mmimọ edieke idụn̄de ke isọn̄ ke nsinsi, ke isọn̄ idinyụn̄ inemke mmimọ? Mîdịghe, ndi mmọ ẹyom ndika heaven man ẹkese nte uwem etiede ke heaven? Baba. Abasi ebiere ke mmọ ẹdika heaven. Ke ini enye ekemekde mmọ ndika heaven, enye ama ada edisana spirit esie okpụhọde nte mmọ ẹkerede n̄kpọ, ye utịp oro mmọ ẹdoride enyịn ndibọ.

14. Ntak emi idọhọde ke mbon oro ẹyetde aran isiyomke ndikpa man ẹsọsọp ẹdaha heaven?

¹⁴ Ndi se inemede emi ọwọrọ ke mbon oro ẹyetde aran ẹsiyom ndikpa man ẹsọsọp ẹdaha heaven? Paul ama etịn̄ nte esitiede mbon oro ẹyetde aran ke idem. Enye ekemen idem mmọ odomo ye “tent” onyụn̄ ọdọhọ ete: “Ke akpanikọ, nnyịn emi idude ke tent emi idu ke mmụm, onyụn̄ efịghe nnyịn; koro nnyịn iyomke ndisio enye nnịm, edi iyom ndimen enye eken nsịne, man uwem ekpemen se idikpade emen.” (2 Corinth 5:4) Emi owụt ke mbon oro ẹyetde aran isiyomke ndikpa man ẹsọsọp ẹdaha heaven. Mmọ ẹkop inem uwem emi, ẹnyụn̄ ẹma nditiene mbonubon mmọ ye mme ufan mmọ nnam n̄kpọ Jehovah kpukpru usen. Kpa ye oro, mmọ ifreke ke Jehovah oyom mmimọ ika heaven.—1 Corinth 15:53; 2 Peter 1:4; 1 John 3:2, 3; Ediyarade 20:6.

15. Nso ikeme ndinam owo ekere ke ekeme ndidi Abasi eyet imọ aran?

¹⁵ Ekeme ndidi emesikere m̀mê Jehovah akam eyet fi aran man etiene aka heaven. Edieke ekerede ke etie nte Jehovah eyet fi aran, kere ban̄a mme akpan mbụme emi: Ndi emekere ke emenen̄ede esịn idem ọkwọrọikọ? Ndi esinen̄ede enem fi ndikpep Bible nnyụn̄ mfiọk “mme ntotụn̄ọ n̄kpọ Abasi”? (1 Corinth 2:10) Ndi emekere ke Jehovah enen̄ede ọdiọn̄ utom ukwọrọikọ fo? Ndi esinen̄ede ọdọn̄ fi ndinam se ededi oro Jehovah ọdọhọde inam? Ndi amama mme owo ke ofụri esịt onyụn̄ enen̄ede oyom ndin̄wam mmọ ẹnam n̄kpọ Jehovah? Ndi enyene ndusụk akpan usụn̄ emi okụtde nte Jehovah enen̄erede an̄wam fi? Edieke ọbọrọde ih ke kpukpru mbụme emi, ndi emi ọwọrọ ke Abasi eyet fi aran man etiene aka heaven? Ihih, iwọrọke ntre. Ntak-a? Koro kpukpru ikọt Abasi ẹkeme ndikere mme n̄kpọ emi, edide mbon oro ẹyetde aran m̀mê mbon oro owo mîyetke. Jehovah ekeme ndinọ asan̄autom esie ekededi edisana spirit esie. Ntre, afo ndikekere m̀mê Jehovah akam eyet fi aran ndika heaven ọwọrọ ke enye iyetke fi aran. Mbon oro Jehovah eyetde aran isikereke-kere m̀mê Jehovah eyet mmimọ aran. Mmọ ẹnen̄ede ẹdiọn̄ọ ke enye eyet mmimọ aran.

16. Isan̄a didie ifiọk ke idịghe kpukpru mbon oro Abasi ọnọde spirit esie ke enye emek ẹka heaven?

¹⁶ Bible etịn̄ aban̄a ediwak mme anam-akpanikọ  asan̄autom Jehovah oro Jehovah ọkọnọde edisana spirit esie, edi enye ikemekke mmọ ndika heaven. Owo mmọ kiet edi John Andinịm Owo Baptism. Jesus ọkọdọhọ ke idụhe owo emi okokponde akan John, edi enye ama ọdọhọ n̄ko ke John iditieneke ikara ke heaven. (Matthew 11:10, 11) Abasi ama ọnọ David n̄ko edisana spirit esie. (1 Samuel 16:13) Edisana spirit ama an̄wam David ọfiọk ntotụn̄ọ n̄kpọ aban̄a Jehovah, onyụn̄ an̄wam enye ewet ndusụk ikpehe Bible. (Mark 12:36) Kpa ye oro, apostle Peter ọkọdọhọ ke David “ikọdọkke ikodụk heaven.” (Utom 2:34) Jehovah ama ọnọ mme asan̄autom esie emi edisana spirit ẹnam ikpọ n̄kpọ, edi ikadaha edisana spirit emi imek mmọ ẹka heaven. Ndi emi ọwọrọ ke mmọ ikanamke n̄kpọ Abasi ikem m̀mê ikodotke ndika heaven? Iwọrọke ntre. Edi ọwọrọ ke Jehovah okoyom mmọ ẹdu mi ke isọn̄, ntak edi oro enye edinamde mmọ ẹset ẹdidu uwem ke Paradise mi ke isọn̄.—John 5:28, 29; Utom 24:15.

17, 18. (a) Ata ediwak ikọt Abasi mfịn ẹdori enyịn ndidu uwem ke m̀mọ̀n̄? (b) Mme mbụme ewe ke idibọrọ ke ibuotikọ oro etienede?

¹⁷ Ata ediwak ikọt Abasi mfịn idikaha heaven. Mmọ ẹdori enyịn ndidu uwem mi ke isọn̄ ke ini Obio Ubọn̄ Abasi edikarade isọn̄, kpa nte ediwak ikọt Abasi oro Bible etịn̄de aban̄a ẹkedoride, utọ nte Abraham, David, ye John Andinịm Owo Baptism. (Mme Hebrew 11:10) Owo 144,000 ẹditiene Jesus ikara ke heaven. Edi Bible etịn̄ aban̄a “mbon oro ẹsụhọde” ke otu mbon oro ẹyetde aran, emi ẹsụk ẹdude ke isọn̄ ke mme akpatre usen emi. (Ediyarade 12:17) Emi ọwọrọ ke ata ediwak ke otu owo 144,000 ẹma ẹkpa ẹdaha heaven.

¹⁸ Edi mbon oro ẹdoride enyịn ndidu uwem mi ke isọn̄ ẹkpenam n̄kpọ didie ke ini owo ọdọhọde ke Abasi eyet imọ aran? Edieke owo ke esop mbufo ọtọn̄ọde ndita uyo nnyụn̄ n̄n̄wọn̄ wine ke ini Editi, akpanam n̄kpọ didie ye enye? Edieke ibat mbon oro ẹdọhọde ke ẹyet mmimọ aran akade-ka iso ndidọk, ndi akpana ayak oro afịna fi? Iyọbọrọ mme mbụme emi ke ibuotikọ oro etienede.