KIEXILE kia Lumingu mu kamene, mu Jeluzaleme. Kiexile kizuua kia katunda, kizuua kia kusanguluka. O athu akexile mu bhanga o fesa ia dikota ia Pendekoxi. Ene akexile mu bhanga o fesa íii, mu kithangana kia kubhongolola o tiliku. Mu kamene kenióko, o mukunji ua dikota ua kexile mu bhana jisata mu tembulu. Mu kusuluka, mu ola ia kavua, muéne ua kexile mu bhana mbolo jiiadi, ja bhangele ni tiliku ia dianga kubhongolola mba o idima ia dianga. O mukunji ua dikota u zambesa o jimbolo, phala ku j’idikisa kua Jihova. Kiki kia bhitile mu fesa ia Pendekoxi ia muvu ua 33.​—Ijila 23:15-20.

1-3. Izulukutu iahi ia bhangesa o kizuua kia fesa ia Pendekoxi ku kituka kizuua kia dikota? Kiebhi o izulukutu íii ia kumbidila o kikanenu kia Mikanda Ikola? (Tala o foto ia dianga.)

² O mukunji ua dikota ua kexile mu satela o jimbolo ku mivu ioso. O kijila kiki, a ki bhangele ku hama ni jihama ja mivu. O jisata ja kexile mu lombolola kima kia dikota kia bhitile ku Pendekoxi ia muvu ua 33. O kizulukutu kiki, kia bhiti ni 120 a maxibulu, akexile mu samba mu inzo ia thandu mu Jeluzaleme.  (Ikalakalu 1:13-15) Hama a nake a mivu ku dima, o polofeta Jouele, ua kanene o kizulukutu kiki. (Jouele 2:28-32; Ikalakalu 2:16-21) Kizulukutu kiahi kia bhitile?

³ Tanga Ikalakalu 2:2-4. Ku Pendekoxi ia muvu ua 33, Nzambi ua undu o Jikidistá ni nzumbi ikola. (Ikalakalu 1:8) Mu kusuluka, o athu a mateka kubhongoloka. O maxibulu a mateka kuzuela o ima ia madiuanu ia monene, ni ima ievuile. Poxolo Phetele ua jimbulula o kima kia bhitile, anga u jimbulula ué o valolo ia kizulukutu kiki. Mu kusuluka, muéne ua tangela o mundu: “Dielenu, nda a mi batizale en’uenu oso, mu dijina dia Jezú Kristu, phala o ituxi ienu a mi loloke-iu, anga mu tambula kua Tata o ujitu ua Nzumbi Ikôla.” O athu a a batizala mu kizuua kieniókio, a tenesa 3.000, anga a tambula o nzumbi ikola.​—Ikalakalu 2:37, 38, 41.

4. (a) Mukonda diahi tua tokala kuijiia o ima ia bhiti mu kizuua kia Pendekoxi? (b) Nange kizulukutu kiebhi dingi kia bhiti mu kizuua kia Pendekoxi, ku mivu iavulu ku dima? (Tala ku disukilu dia milongi.)

⁴ Ihi ia kexile mu lombolola o mukunji ua dikota, ni ima ia kexile mu satela mu kizuua kia fesa ia Pendekoxi? O mukunji ua dikota, ua kexile mu lombolola Jezú. O jimbolo, ja kexile mu lombolola o maxibulu a Jezú a a undu ni nzumbi ikola. O maxibulu iá, a a solo bhu kaxi ka athu akua ituxi. Mu kiki, ene a kuata o “kididi kia dianga.” (Tiiaku 1:18) Nzambi ua xikina o maiala iá kala an’ê, iú ua a solo phala kutumina kumoxi ni Jezú ku diulu mu Utuminu uê. (1 Phetele 2:9) Bhu kaxi ka Utuminu uê, Jihova ua-nda besoala o athu oso a belesela. Mu kiki, kikale se tua kingila kutunga kumoxi ni Jezú ku diulu, mba mu palaízu mu ixi, o fesa ia Pendekoxi ia muvu ua 33, iala ni valolo ia dikota phala etu. ^[1]​—Tala ku disukilu dia milongi.

5. Kiebhi ki tuejiia kuila o athu oso ka a undu mu ukexilu umoxi?

⁵ O maxibulu oso akexile mu inzo ia thandu, keji jimba o kizuua kieniókio. Kala muthu ua kexile ni kima ku mutué, kia difuile ni mulengu ua túbhia. Jihova ua a bhanene o kutena kua kuzuela mu madimi engi. Ene ka kexile ni phata kuila, a a undile ni nzumbi ikola. (Ikalakalu 2:6-12) Maji o izulukutu íii, ki iene mu bhita ni Jikidistá joso, kioso kia a unda. Mu kifika, o Bibidia ki i zuela kuila, o athu amukuá a a undile mu kizuua kieniókio mu Jeluzaleme, akexile ué ni kima ku mitué, kia difuile ni mulengu ua túbhia. Ene a a undu mu kizuua kia a batizala. (Ikalakalu 2:38) Maji saí Jikidistá, kene mu a unda mu kizuua kia a batizala. O akua Samádia, a a undu mu kubhita kithangana kioso kia a batizala. (Ikalakalu 8:14-17) Maji Koloneliu ni athu akexile ku bhata diê, a a undu ande dia ku a batizala.​—Ikalakalu 10:44-48.

6. Ihi ia tambula o Jikidistá joso a a undu? Ni kiebhi kia divua ene?

⁶ Tu tena ku mona kuila, o ukexilu u divua o Jikidistá kioso kia a unda, ki u difu. Saí athu, kioso kia unda kua Jihova, ene a divua mu kithangana kieniókio kuila, a a undu. Maji saí iâ, a bhita kithangana kiavulu, phala kumona kuila a a undu. Maji poxolo Phaulu ua jimbulula o ima i bhita ni athu oso a a undu. Muéne uambe: “Enu uenu Kristu mua mu xikana. O Nzambi iú ua mi te o kidimbu kiê kia Nzumbi Ikôla, a mu tangele o kuiza. O Nzumbi Ikôla kifua diene o dixikina dia tu bhana dia kuila hinu tua kà tambula kua Nzambi kiokio kia kanena o  mundu uê.” (Efezo 1:13, 14) Mu kiki, bhu kaxi ka nzumbi iê ikola, Jihova ulondekesa kiambote ku Jikidistá jiji kuila, ua a solo phala kuia ku diulu. O nzumbi ikola iene “dixikina,” mba kima ki a londekesa kuila, a-nda tunga ku diulu katé ku hádia ni hádia.​—Tanga 2 Kolindo 1:21, 22; 5:5.

7. Ihi ia tokala kubhanga o Kidistá a mu undu phala kutambula o futu iê ku diulu?

⁷ Kioso o muthu kia mu unda, o kuila kiki kilombolola kuila, muéne ua-nda tambula o futu iê? Kana. Kala muthu mudiâ uejiia ni kidi kioso kuila, a mu solo phala kuia ku diulu. Maji muéne ua-nda tambula ngó o futu iê, se u kolokota mu ufiiele kua Jihova. Phetele ua jimbulula o maka enhá mu kuzuela: “Uila kiki, enu mu akuetu, phange jami, sotenu izuua ioso kukala ni muxima ua kolo mu kuijiia kuma Nzambi kidi kiene, muène ua m’ixana iú ua mi solo. Mbata se kiene ki mu bhanga, ki mua-nda kudibhala dingi. Maji mu kubhanga kiki, a kà mi bhana ungana ua kubokona mu Mbanza ixalela, ia ngene ia Ngana ietu, Mubhuludi Jezú Kristu.” (2 Phetele 1:10, 11) Mu kiki, o kidistá a mu undu, ka tokala kuehela kima kioso kioso ku mu fidisa kusidivila Jihova. Sumbala a a solo phala kuia ku diulu, se ka kolokota mu ufiiele uâ, ka-nda tambula o futu iâ.​—Jihebeleu 3:1; Dijingunuinu 2:10.

8, 9. (a) Mukonda diahi athu avulu ka tena kutendela kiebhi ki divua o muthu kioso kia mu unda? (b) Kiebhi o muthu kia tena o kuijiia se a mu solo phala kuia ku diulu?

⁸ Lelu, avulu bhu kaxi ka jiselevende ja Nzambi, ka tena ku tendela kiebhi ki divua o muthu kioso kia mu unda kua Nzambi. Maji ki tu tokala ku sasumuka. Ene a divua kiki, mukonda ka a a undu. Nzambi ua bhange o athu phala ku tunga mu ixi katé ku hádia ni hádia. (Dimatekenu 1:28; Jisálamu 37:29) Maji Jihova ua solo o athu phala kukala jisobha, ni akunji ku diulu. Mu kiki, kioso kia a unda, o kidielelu kiâ, ni ukexilu uâ ua kubanza u lunguluka. O ima ioso íii i lunguluka, mukonda ene a tokala kukingila o muenhu ua kalelaku ku diulu.​—Tanga Efezo 1:18.

⁹ Maji kiebhi o muthu kia tena kuijiia se a mu solo phala kuia ku diulu? Tala o kima kia tange Phaulu ku jiphange ku Loma, akexile mu a exana “mundu” ua Nzambi. Muéne ua a tangela: ‘Mbata enu ki mu tambula Nzumbi ia ubhika, kuila mu kala dingi ni uôma. Maji mua tambula Nzumbi ia uana i mi bhangesa kukala mu an’a Nzambi, o mu nguzu ia tu bhana o Nzumbi, ki tu bhana kudikola kua Nzambi: Abha, Tata! O Nzumbi ia Nzambi iene i bhana umbangi ni nzumbi ietu, kuma tuala tu an’a Nzambi.’ (Loma 1:7; 8:15, 16) Bhu kaxi ka nzumbi iê ikola, Nzambi ulondekesa ku muthu kuila, a mu solo phala kutumina kumoxi ni Jezú ku diulu.​—1 Tesalonika 2:12.

10. Ihi ia mu lombolola o divulu 1 Nzuá 2:27, mu kuzuela kuila, o Kidistá a mu undu kua Nzambi, ka bhingi ku mu tangela kuila a mu undu?

¹⁰ O athu a a sola kua Nzambi phala kuia ku diulu, ka bhingi ku a tangela kuila a a  undu. Jihova u a bhangesa kuxikina ni kidi kioso kuila, ua a solo. O poxolo Nzuá ua tangela o Jikidistá a a undu kuila: “Enu-phe Kristu ua mi lunduluila o Nzumbi Ikôla ku thandu dienu, enu muejiia enhoso o kidi.” Muéne uambe ué: ‘Kioso ki mua i tambula kua muène, iala moxi dienu, ki mua bhingi dingi muthu ku mi longa. Mukonda o nzumbi ikôla iene i longa mu ima ioso, kuma o kulonga kuê kua kidi ki kua makutu, kana. Kala kiki, kioso kiá kia mi longo o nzumbi ikôla, kiene ki mu kuata, mu jijile o kudiongeka ni Kristu.’ (1 Nzuá 2:20, 27) O Jikidistá a a undu a bhingi ué ku a longa kua Jihova, kála kiene mu longa o athu a mukuá. Maji ene ka bhingi ku a tangela kuila, a a undu. Bhu kaxi ka nzumbi iê ikola, o kutena kuê kua dikota, Jihova u a londekesa ni kidi kioso kuila, ua a undu!

11, 12. Nange ibhuidisu iebhi ieji dibhanga o Kidistá a mu undu, maji phata iahi keji kala na-iu?

¹¹ Kioso o Jikidistá kia a unda ni nzumbi ikola, ene a lungulula o ukexilu uâ. Mu kidi, Jezú uambe kuila, a a “vuala lua mukuá.” (Nzuá 3:3, 5) Muéne ua jimbulula o maka enhá, kioso kiambe: ‘Uila kiki ku diuane mukonda nga ku ambela ngixi: Enu’oso mua bhingi ku mi vuala dingi. O kitembu ki bhusila kuoso ku kiandala, eie uívua o kunuma kuê, maji ku tena-phe kuijiia kuoso ku kia tundu, ni kuoso ku kia múia. Kiene ué ki bhita ni muthu uoso a mu vuala ku Nzumbi.’ (Nzuá 3:7, 8) Sé phata, ki bhonza kiavulu ku jimbulula kiebhi ki divua o muthu a mu solo phala kuia ku diulu, kua ió ka mu undu kua Nzambi. ^[2]​—Tala ku disukilu dia milongi.

¹² O muthu a mu undu kua Nzambi nange u diuana, anga u dibhudisa: ‘Mukonda diahi Jihova ua ngi solo eme, mu veji dia kusola muthu uéngi?’ Nange muéne u dibhuidisa se uala muéne ni ídifua iambote mba uhete phala kutambula o ujitu iú. Maji muéne ka kala ni phata ia kuila, a mu solo kua Jihova. Mu veji dia kiki, muéne u sanguluka kiavulu, ni kulondekesa kisakidilu mukonda dia ujitu iú. O Jikidistá a a undu a divua kala kia divuile Phetele, kioso kiambe: “Tu sakidilienu jinga Nzambi, Tata ia Ngana ietu Jezú Kristu! Mukonda muène mu kulenduka kuê kuavula kinéne, ua tu bhana dingi muenhu uobhe, kia fukununa Jezú Kristu mu madifundu. Kien’iki o mixima ietu iezala ni kudielela kua kidi. Uila kiki, tua kinga kutambula kua Nzambi o mabesá ma bhakela o mundu uê. Muanda kumona o undundu ki uene kubôla, ki uene kuxila, ku uene kulela, ua mi xikamena ku diulu.” (1 Phetele 1:3, 4) Kioso o athu a a undu kia tanga o izuelu íii, ene ejiia ni kidi kioso kuila, o Tata iâ ua mu zuela ni ene.

13. Kiebhi ki lunguluka o ibanzelu ia muthu kioso kia mu sola, ni ihi i bhangesa kulungulula o ibanzelu iê?

¹³ Ande dia Jihova kusola o Jikidistá jiji phala kuia ku diulu, ene akexile ni kidielelu kia kukala ni muenhu ua kalelaku mu ixi. Ene a mesenene kumona o kithangana kioso  Jihova kieji bhangesa o ixi ku kituka palaízu ni kuzubha o kuiibha kuoso. Nange ene akexile ué mu xinganeka kusangesa ndandu, mba dikamba dia fuile. Akexile mu banza kutunga jinzo jâ ni kutunga-mu, mba kukuna jimbutu ni kudia o ibundu iâ. (Izaia 65:21-23) Mukonda diahi o ibanzelu iâ ia lunguluka? O kuila kiki kia bhiti, mukonda ene akexile mu tala hadi iavulu? O kuila ene a mono kuma, o muenhu mu ixi ueji bhonza kiavulu, ni kuila, ene keji sanguluka mu ixi? Mba a mesenene kuijiia o ukexilu ua muenhu ku diulu? Kana. Nzambi muéne ua solo ku a bhana o ukexilu iú ua muenhu. Kioso Nzambi kia a sola, muéne u lungulula o ibanzelu iâ, ni kidielelu kiâ kia muenhu, bhu kaxi ka nzumbi iê ikola.

14. Kiebhi o Jikidistá a a undu kia mona o muenhu uâ mu ixi lelu?

¹⁴ Maji o kuila, kiki kilombolola kuila, o Jikidistá a a undu a mesena kufua? Phaulu ua soneka se kiebhi ki divua o Jikidistá a a undu. Muéne ua sokesa o mikutu iâ ni ‘tenda,’ iú uambe: “Kuma kidi kiene, etu kioso ki tuala mu fund’umu ia mukutu uetu, tu kema mukonda dia kinemenu kia tu xina. Ki mukonda tu andala a tu zula o mukutu uetu iú ua bhoxi, mbata tua mu kuinda ku tu zuika ni mukutu ua diulu, phala o muenhu u jikinise kiki kia xikamena o kufua.” (2 Kolindo 5:4) O Jikidistá jiji ka mesena kufua mu vondadi iâ. Ene a uabhela kukala ku muenhu, a katula mbote ku muenhu phala kusidivila Jihova kumoxi ni miji, ni makamba mâ. Maji kima kioso-kioso kia bhanga kindala, ene a lembalala o ima ia a kanena Nzambi ia lungu ni hádia.​—1 Kolindo 15:53; 2 Phetele 1:4; 1 Nzuá 3:2, 3; Dijingunuinu 20:6.

15. Ihi ilondekesa kuila o muthu ka mu undu ni nzumbi ikola?

¹⁵ Nange eie u dibhuidisa se Jihova ua kusolo phala kuia ku diulu mba kana. Se ua mu banza kuila a kusolo, xinganeka mu ibhuidisu íii: O kuila u mona kuma, uene mu boka ni kusuína kuoso? Ua uabhela ku di longa o Bibidia, ni kutokuesa o “ima ia zongo ia sueka Nzambi?” (1 Kolindo 2:10) O kuila ua mono kuma, Jihova ua kubhangesa ku ditunda kiambote mu sidivisu ia kuboka? O kuila u mesena ku di bhakula ngó mu kubhanga o vondadi ia Jihova? O kuila ua zolo kiavulu o athu, anga u mona kuila ua tokala kubhanga ioso phala ku a kuatekesa kusidivila Jihova? O kuila ua monene kiá o kikuatekesu kia Jihova mu kima ki ua bhindamene ku muenhu uê? Nange eie ua tambuijila kiene, mu ibhuidisu íii. Maji o kuila kiki kilombolola kuma, a kusolo kua Nzambi phala kuia ku diulu? Kana, ki kiene. Mukonda diahi? Mukonda o jiselevende joso ja Nzambi a tena ku divua kiki, kikale se a a undu mba kana. Bhu kaxi ka nzumbi iê ikola, Jihova u tena kubhana nguzu ku jiselevende jê, kikale se a-nda tunga ku diulu mba mu ixi. Mu kidi, se uala hanji ni phata se ua-nda kuia ku diulu mba kana, kiki kilombolola kuila, ka kusolo kua Nzambi. O athu a a solo kua Jihova kala ni phata ia lungu ni kidielelu kiâ! Ene ejiia ni kidi kioso!

16. Kiebhi ki tuejiia kuila, ko athu oso a tambula o nzumbi ikola ia Nzambi, a a solo phala kuia ku diulu?

¹⁶ Mu Bibidia tu sanga-mu phangu ia athu avulu, a tambula o nzumbi ikola ia Jihova, maji kai ku diulu. O phangu ia dianga, Nzuá dia Batizu. Jezú ua zuela kuila, ki mu kexile muthu ua betele kota, Nzuá ndenge. Maji  muéne uambe ué kuila, Nzuá keji tumina ku diulu kala sobha. (Matesu 11:10, 11) Davidi ua tambuile ué o nzumbi ikola. (1 Samuuele 16:13) O nzumbi ikola ia mu kuatekesa kutendela o milongi ia zongo ia lungu ni Jihova, ni kusoneka o milongi ia Bibidia. (Marku 12:36) Poxolo Phetele uambe kuila, Davidi “ku diulu ka bandele-ku.” (Ikalakalu 2:34) Bhu kaxi ka nzumbi iê ikola, Jihova ua kuatekesa o maiala iâ kubhanga ima ia madiuanu, maji muéne ka a solo ni nzumbi ikola, phala kuia ku diulu. O kuila kiki kilombolola kuma, ene kexile mu sidivila Nzambi ni ufiiele uoso, mba kexile ni ídifua iambote phala kutumina kumoxi ni Jezú ku diulu? Kana. Jihova ua-nda ku a bheka dingi ku muenhu phala kukala mu Palaízu mu ixi.​—Nzuá 5:28, 29; Ikalakalu 24:15.

17, 18. (a) Kidielelu kiahi kiala na-kiu o mazunda ni mazunda a jiselevende ja Nzambi lelu? (b) Ibhuidisu iebhi i tua-nda di longa mu milongi ia-nda kaiela?

¹⁷ Mazunda ni mazunda a jiselevende ja Nzambi lelu, ka-nda’ia ku diulu. Kala kia bhitile ni Mbalahamu, Davidi, Nzuá dia Batizu ni jiselevende ja mukuá jo ukulu, ene a mesena kiavulu kukala mu ixi, bhu kaxi ka unguvulu ua Nzambi ua-nda tumina o ixi ioso. (Jihebeleu 11:10) 144.000 ja athu, a-nda tumina kumoxi ni Jezú ku diulu. Maji o Bibidia izuela ia lungu ni “iá a subhuka” ku Jikidistá a a undu, ala hanji mu ixi mu izuua íii isukidila-ku. (Dijingunuinu 12:17) Mu kiki, ku 144.000, avulu ala kiá ku diulu.

¹⁸ Maji se muthu u zuela kuila a mu undu, ihi ia tokala o kubhanga o athu ala ni kidielelu kia kukala mu ixi? Se mu kilunga kiê mu kala muthu u kuata kudia o mbolo, ni kúnua o vinhu mu Lembalasa ia Kufua kua Jezú, kiebhi ki ua tokala o ku mu mona? Abha se o athu a zuela kuila a a undu, a di bandekesa dingi? O kuila eie ua tokala kuthandanganha ni maka enhá? Tua-nda tambuijila o ibhuidisu íii mu milongi ia-nda kaiela.