1-3. Yihorokwa musinke ya ninkisire ezuva lyoPentekoste li kare lyokulikarera, ntani ngapi omu yihorokwa oyo ya sikisire mo eyi ga pumba matjangwa? (Tara efano.)

AZO kwa kere ngurangura zoSondaha moJerusarema. Eli kwa kere ezuva lyokulikarera. Ketamekero lyomuzangu gonombuto, vantu ngava dana Pentekoste, sipito sokupongoka. Ngurangura pontembeli, mupristeli gomunene nga zamba zambo zankenye ezuva. Koyiha yovili zauntane zongurangura, age kwa geve nomboroto mbali edi va rugana korukokotwa, komuzangu gokuhova. Mupristeli gomunene kwa zembe nomboroto edi mbali kwaJehova. Ezi kwa kere Pentekoste zomvhura 33.—Levitikus 23:15-20.

² Mupristeli gomunene nga zamba zambo ezi nkenye mvhura. Nzambo ozo kwa karerere po sininke somulyo esi sa horokere poPentekoste 33. Aso kwa horokerere kovarongwa vaJesus 120, ava va pongere kumwe monzugo moJerusarema. (Yirugana 1:13-15) Nomvhura mafere ntantatu komeho zeyi, muporofete Jowera ga pumbire eyi ya horokere mezuva  olyo. (Jowera 2:28-32; Yirugana 2:16-21) Yininke musinke yomulyo ya ya horokere?

³ Resa Yirugana 2:2-4. PoPentekoste 33, Karunga kwa gwavekere Vakriste nompepo zokupongoka. (Yirugana 1:8) Mbunga tazi tameke kuvakundurukida makura varongwa tava tameke kuuyunga yininke yoyiwa eyi va mwene neyi va zuvhire. Mupositoli Peturusa kwa fatwilire eyi ya horokerere oyo neyi ya karerere nomulyo. Age makura ta va tantere asi: “Litezurureni namuvenye, mu likuhwire medina lyaJesus Kristusa, va mu dongwenene po nonzo deni, ntani ngomu tambura uhwi woMpepo zoKupongoka.” Ezuva olyo, vantu wokusika ngwendi 3 000 kwa gwene ekuho nokuvapowomwena mpepo zokupongoka.—Yirugana 2:37, 38, 41.

4. (a) Morwasinke natu litulira mo mweyi ya horokere poPentekoste? (b) Silika musinke somulyo esi sa horokere mezuva lyokulifana monomvhura dononzi da ka pita? (Tara mauzera gamwe.)

⁴ Yisinke ga fanekesa mupristeli gomunene nonzambo ezi nga gava poPentekoste? Mupristeli gomunene kwa fanekesa Jesus. Nomboroto kwa fanekesa varongwa vaJesus wovagwavekwa. Varongwa owo kwa va horowere mokatji kovantu wononzo nokuyavatumbura asi ‘wokuhova.’ (Jakopo 1:18, NW) Karunga kwa tambura vagwavekwa owo ngovana vendi ntani kwa va horowora va ka pangere naJesus moUhompa waKarunga meguru. (1 Peturusa 2:9) Jehova nga ruganesa Uhompa wendi a tungike vantu navenye wovalimburukwi. Yipo nye yi kare asi ose ngatu ka kara naJesus meguru ndi pevhu moparadisa, Pentekoste 33 kuna kara mvhura zomulyo kwetu. ^[1]

5. Ngapi twa yi diva asi navenye ava va gwavekere kapi va gwene egwaveko monkedi zokulifana?

⁵ Varongwa ava va kere monzugo zekeguru kapi va divarere olyo ezuva. Nkenye gumwe kwa mu temberere maraka gomundiro pomutwe gwendi. Jehova kwa va pere uhwi wokuuyunga maraka peke-peke. Yipo nye va yi divire nawa-nawa asi kwa va gwavekere nompepo zokupongoka. (Yirugana 2:6-12) Nye, naina maraka ogo gomundiro kapi aga tembere ponomutwe doVakriste ava ava gwaveke. Pasihonena, Bibeli kapi za uyunga asi maraka gomundiro kwa monekere ponomutwe dovantu mayovi ava va gwavekere hena ezuva olyo moJerusarema. Awo kwa va gwavekere apa va gwene ekuho. (Yirugana 2:38) Ntani, kapisi Vakriste navenye kuvagwaveka apa ava gwana ekuho. Vasamaliya kapi va va gwavekere apa va gwene ekuho nye kwa ya va gwavekere konyima. (Yirugana 8:14-17) Koroneliusa nava vembo lyendi kwa va gwavekere komeho va gwane ekuho.—Yirugana 10:44-48.

6. Yisinke ava gwana vagwaveka navenye, ntani ngapi ayi va kundama?

⁶ Vakriste kuyidimburura mononkedi dokulisiga-siga asi vana va gwaveke. Vamwe kuyidimburura poopo asi Jehova ana va gwaveke. Ano vamwe kuyayidimburura konyima zosiruwo. Nye mupositoli Paurusa kwa fatwilire eyi ayi horokere nkenye gumwe gwawo. Age kwa tente asi: ‘Apa mwa pulire Kristusa, makura Karunga yiyo ga mu tura sinongweneso sendi, mpepo zokupongoka, ezi ga mu tumbwidilire. Mpepo zokupongoka kukoreka asi ngatu  ka pinga eyi ga pingidira Karunga vantu vendi.’ (Vaefeso 1:13, 14) Jehova kuruganesa mpepo zendi zokupongoka mokuyihorwera Vakriste owo asi awo ngava za meguru. Monkedi zangesi, mpepo zokupongoka “kukoreka” ndi kugava umbangi asi ngava ka kara meguru kapisi pevhu.—Resa 2 Vakolinte 1:21, 22; 5:5.

7. Yisinke ga hepa kurugana nkenye mugwavekwa mokukagwana mfeto zendi meguru?

⁷ Apa Mukriste ava mu gwaveke, ayo kutanta asi nga ka gwana mfeto zendi ndi? Hawe. Age kuyidiva asi vana mu zigida nga ze meguru. Nye mokukagwana mfeto zendi ga hepa kutwikira kulimburukwa Jehova. Peturusa kwa yi fatwilire monkedi ezi asi: “Ano vakwetu, kondjeni nye unene, ezigido lyeni nehoroworo lyeni li kore. Nsene mu yi kara eyi, yosili ngano kapi ngomu punduka nampili rumwe. Mwangesi yimo ngava mu pera epulisiro lyene-lyene lyokuhwilira moUntungi wanarunye waHompa Muzowoli gwetu Jesus Kristusa.” (2 Peturusa 1:10, 11) Yipo nye, nkenye mugwavekwa kapisi a pulisire nkenye eyi yi mu hagekese mokukarera Jehova. Nampili ngomu va mu zigida a ze meguru, nsene a dira kutwikira kulimburukwa, kapi nga gwana mfeto zendi.—Vahebeli 3:1; Ehororo 2:10.

8, 9. (a) Morwasinke ayi digoperere vantu wovanzi kukwata egano eyi ayi horoka komuntu nsene vana mu gwaveke? (b) Ngapi omu muntu na yi diva asi age kwa mu zigida nga ze meguru?

⁸ Vakareli vaKarunga wovanzi kuvadigopera kukwata egano eyi ayi horoka komuntu nsene Karunga ana mu gwaveke. Yimo ya kara ngorooro, morwa awo kapi va va gwaveka. Karunga kwa sitire vantu va parukire narunye pevhu, kapisi meguru. (Genesis 1:28; Episarome 37:29) Nye Jehova kwa horowora vamwe va ka kare vahompa novapristeli meguru. Apa Jehova a va gwaveke, ehuguvaro lyawo ntani nomu ava gazara kurunduruka, yipo va kare nendindiro lyokukaparukira meguru.—Resa Vaefeso 1:18.

⁹ Nye ngapi omu muntu na yi diva asi age kwa mu zigida nga ze meguru? Koneka eyi ga uyungire Paurusa kovagwavekwa vakwawo womoRoma ava ga tumbwire asi “mbunga zava va horowora.” Age kwa va tanterere asi: “Yeeyi Mpepo ezi mwa tambura kwaKarunga kapisi zokumuninka vapika, asi mu kare hena moutjirwe. Azo Mpepo zokutuninka tu kare vana vaKarunga, makura yiyo atu kugu kwaKarunga asi, ‘Tate! tate!’ Mpepo zaKarunga kulipakerera nompepo zetu, zi gave undipo asi ose vana vaKarunga.” (Varoma 1:6; 8:15, 16) Kupitira mompepo zendi zokupongoka, Karunga kuyihorwera muntu asi age kwa mu zigida a ka pangere ngahompa kumwe naKristusa meguru.—1 Vatesaronika 2:12.

10. Yisinke azi tanta 1 Johanesa 2:27 apa azi uyunga asi Vakriste wovagwavekwa kapi va hepa muntu asi a va ronge?

¹⁰ Ava ava gwana ezigido olyo kwaKarunga  kapi va hepa muntu gongandi a va tantere asi awo kwa va gwaveka. Jehova mwene a va ninkisa va lizuvhe asi kwa va gwaveka. Mupositoli Johanesa kutantera Vakriste wovagwavekwa asi: “One Mupongoki ga mu poomwena Mpepo zendi, yiyo nye mwa diva usili.” Age kwa tanta hena asi: “One ko, Kristusa ga mu poomwena Mpepo zendi. Azo ngazi karerera mweni. Ano one kapi mwa hepa asi muntu a mu ronge, yeeyi Mpepo zendi yizo azi rongo nayinye, ano eyi azi rongo, yosili, kapisi yimpempa. Ano moomu za mu ronga, omu kare mwaKristusa.” (1 Johanesa 2:20, 27) Vagwavekwa nawo Jehova a va rongo ngwendi moomu a rongo vakareli vendi navenye. Nye awo kapi va hepa asi muntu a va ronge asi awo kwa va gwaveka. Jehova kwa ruganesa mpepo zendi zokupongoka mokuyivazeresera asi awo kwa va gwaveka!

11, 12. Yisinke pamwe a lipura ogu va gwaveka, nye yisinke ga diva?

¹¹ Erunduruko lyenene eli ali horoka moVakriste ava ava gwaveke nompepo zokupongoka, kwa lifana ngwendi kwa va ‘hampurukurura’ ngamoomu ga yi uyungire Jesus. (Johanesa 3:3, 5) Age kwa fatwilire asi: “Ya ha ku tetura eyi na ku tantere asi: Namuvenye ava mu hampurukurure ntani. Mpepo kupepera oku zina hara. Ove to zi zuvhu, nye nokudiva si oku zina tundu noku zina kuza. Nava navenye va hampurukira moMpepo yimo nye.” (Johanesa 3:7, 8) Yosili, ayo udigu kufatwilira muntu ogu va dira kugwaveka omu ava lizuvhu vagwavekwa. ^[2]

¹² Muntu ogu va gwaveka kuvhura a lipure asi: ‘Morwasinke Jehova ga horowera nge ga hana kuhorowora gwapeke?’ Kuvhura hena a lipure nsene ga wapera situmbukira oso. Nampili ngoso, age ga yi diva asi Jehova ga mu horowora. Age kulizuvha ruhafo nokulikida rupandu kouhwi wangoso. Vagwavekwa kulizuvha monkedi omu ga lizuvhire Peturusa apa ga uyungire asi: “Tu hamberereni Karunga, GuhyaHompa gwetu Jesus Kristusa! Morwaufenkenda wendi wounene, yiyo ga tu pera mwenyo gomupe pokupindura Jesus Kristusa koufe. Eyi kuna koreke nye ehuguvaro lyetu, asi ngatu ka pinga upingwa ou au dili kuzonauka po ndi u nyate ndi asi u hage. Awo kwa u mu pungwira meguru.” (1 Peturusa 1:3, 4) Apa vagwavekwa ava resa nonkango odo, awo va yi pura nawa-nawa asi Guhyawo kuna kuvauyungisa nkenye ogu pomundinda gwendi.

13. Ngapi omu aga runduruka magazaro gomuntu apa ava mu gwaveke nompepo zokupongoka, ntani yisinke ayi ga rundurura?

¹³ Komeho Jehova a zigide Vakriste owo meguru, awo kwa kere nehuguvaro lyokuparukira pevhu. Awo ngava ndindire nononkondo siruwo apa Jehova nga ka ninka evhu li ka kare paradisa nokukagusa po vadinikarunga navenye. Nampo ngava ligazara vene omu ngava ka tambura vekoro ndi vakaume vawo ava va fa. Awo ngava  ndindire nononkondo mokukatunga mambo omu ngava ka kara nokutapeka yitji nokukalya enyango. (Jesaya 65:21-23) Morwasinke va tamekera kugazara yokulisiga? Awo kwa rundurura magazaro gawo morwa kudompa mutjima nokuhepa unene ndi? Awo kwa tokora vene kuza meguru morwa kuparukira narunye pevhu ngayi ka seta ntani kapi ngava ka gwana ruhafo ndi? Ndi awo kwa hara kukalimonena omu ya fana kuparukira meguru? Hawe. Karunga yige a va tokwere po mweyi. Apa a va zigida, age kuruganesa mpepo zendi zokupongoka mokurundurura magazaro gawo va ndindire nononkondo mfeto zawo.

14. Ngapi omu ava lizuvhu vagwavekwa kuhamena eparu lyawo lyepevhu?

¹⁴ Eyi kutanta nye asi vagwavekwa kwa hara kufa ndi? Paurusa kwa singonona omu ava lizuvhu vagwavekwa. Age kwa hetakanesere marutu gawo gopanyama ‘norutambo’ pokuuyunga asi: “Ose ava tuna kara simpe morutambo oru rwepevhu, kuna kukema moudigu, morwa kapi tuna hara kutuhutura rutu oru, nye kutudwareka hena oru rwemeguru, makura rutu rwetu rokufa ngagu ru mine mwenyo.” (2 Vakolinte 5:4) Vakriste ava kapi va hara kufa. Awo kwa hara kuhafera eparu nokukarera Jehova nkenye ezuva nomapata novakaume vawo. Nye nkenye eyi ava rugana, awo kudiworoka eyi ga va tumbwidira Karunga komeho.—1 Vakolinte 15:53; 2 Peturusa 1:4; 1 Johanesa 3:2, 3; Ehororo 20:6.

15. Yininke musinke ayi dili kugava umbangi asi muntu va mu gwaveka nompepo zokupongoka?

¹⁵ Nampo nove kulipura nsene asi Jehova ga ku zigida o ze meguru. Nsene yimo o lizuvhu ngoso, gazadara ko komapuro aga gomulyo asi: Ove kulizuvha asi wa kara noupampi wokulikarera mosirugana sokuzuvhisa ndi? Ove kuhafera kulironga Bibeli nokukonakona ‘magazaro gaKarunga aga ga horama konhiinhi’ ndi? (1 Vakolinte 2:10) Ove kulizuvha asi Jehova ga ku tungika mosirugana sokuzuvhisa ndi? Ono hara kurugana eyi Jehova ana ku harere kupitakana nkenye eyi ndi? Ove wa hara unene wopeke nokulizuvha asi wa kara nositumbukira sosinene sokuvavatera va karere Jehova ndi? Wa kara noumbangi asi Jehova ga ku vatera mononkedi dokulikarera meparu lyoge ndi? Nsene elimbururo lyoge komapuro ogo asi nhi, eyi kutanta nye asi ove kwa ku zigida o ze meguru ndi? Hawe. Morwasinke? Morwa vakareli navenye vaKarunga kuvhura va lizuvhe monkedi zangoso, va kare asi vagwavekwa ndi hawe. Kupitira mompepo zendi zokupongoka, Jehova kuvhura kugava nonkondo dokulifana kwankenye mukareli gwendi, yi kare asi mfeto musinke nga ka gwana. Yosili, nsene ove wa kara nomasinganyeko kuhamena kuza meguru, eyi kutanta asi kapi va ku zigida. Ava ga horowora Jehova kapi va kara nomasinganyeko! Awo va yi diva!

16. Ngapi omu twa yi diva asi kapisi navenye ava va gwene mpepo zaKarunga kwa va zigida va ze meguru?

¹⁶ MoBibeli, mwa kara yihonena yoyinzi yovantu wovalimburukwi ava va gwene mpepo zokupongoka zaJehova nye kapi va za meguru. Sihonena simwe saJohanesa Mukuhwi. Jesus kwa uyungire asi kutupu ogu ga pita Johanesa, nye ga uyungire hena asi Johanesa kapi nga ka pangera meguru  ngahompa. (Mateusa 11:10, 11) Ndafita nage kwa mu gendesere mpepo zokupongoka. (1 Samwere 16:13) Mpepo zokupongoka kwa mu vaterere a kwate egano yininke yokonhiinhi kuhamena Jehova ntani kwa mu gendesere a tjange maruha gamwe goBibeli. (Marukusa 12:36) Nampili ngoso, mupositoli Peturusa kwa uyungire asi Ndafita “kapi ga ronda meguru.” (Yirugana 2:34) Jehova kwa ruganesere mpepo zendi zokupongoka mokupa vantu ava nonkondo dokurugana yininke yokutetukisa, nye kapi ga zi ruganesere mokuvazigida va ze meguru. Eyi kutanta nye asi kapi va limburukwire mokusikisa mo eyi ya hepa po mokukapangera meguru ndi? Hawe. Ayo kutanta asi Jehova nga va pindura koufe yipo va ka paruke moParadisa apa pevhu.—Johanesa 5:28, 29; Yirugana 24:15.

17, 18. (a) Mfeto musinke vana kundindira sinzi sovakareli vaKarunga naina? (b) Mapuro musinke ngatu ka limburura mosirongwa sokukwama ko?

¹⁷ Sinzi sovakareli vaKarunga kapi ngava za meguru. Ngwendi Abirahamu naNdafita naJohanesa Mukuhwi ntani navamwe ava va tumbura moBibeli, awo kundindira nononkondo mokukaparuka pevhu apa epangero lyaKarunga ngali ka va pangera. (Vahebeli 11:10) Ava ngava ka pangera naJesus kuna kara vantu 144 000. Nye Bibeli kuuyunga kuhamena vagwavekwa ‘vakwawo’ ava vana hupu po simpe pevhu pomazuva aga gopouhura. (Ehororo 12:17) Sinzi sovagwavekwa va fa nare ntani va za meguru.

¹⁸ Nye nsene gumwe ta uyunga asi age mugwavekwa, ngapi nava mu tara ava va kara nehuguvaro lyokukaparukira pevhu? Nsene gumwe gomombungakriste zeni a tameka kulya komboroto nokunwa kovhinyu poMurarero, ngapi no mu tekura? Nye ngapi nsene sivaro sowo ava uyunga asi kwa va gwaveka kuna kuligwederera? Kuvhura o kare nosinka kuhamena oyo ndi? Sirongwa sokukwama ko ngasi ka limburura mapuro ogo.