1-3. Vyuma muka vyalingishile likumbi lyaPendekoseta lipwenga lyakulipwila, kaha vyuma kana vyateselemo ngachilihi mazu amuVisoneka? (Talenu muvwimbimbi wakulivanga.)

LYAPWILE lyaSondo nachimene muYelusalema. Likumbi kana lyapwile lyamwaza, kaha nawa lyapwile lyakulipwila. Halwola kana, vatu vapwile kuchiwanyino chaPendekoseta, chize chapwile chiwanyino chajila kukuputuka chakwaha tiliku. Likumbi lize nachimene, kapilishitu wakulitulaho ahanyinenga mawana avimuna vakuvatula. Kaha nachimene nalwola lwa 09:00, ahanyinenga jimbolo jivali jachimbalwila jakufuma kutiliku yatete, chipwe kujimbuto jakulivanga kwaha. Kapilishitu wakulitulaho ahungishilenga jize jimbolo kumeso aYehova. Eyi yapwile Pendekoseta yamumwaka wa 33.—VyavaLevi 23:15-20.

² Hamyaka yayivulu, kapilishitu wakulitulaho ahanyinenga wana kanou wakuhungisa, kaha alingilenga ngocho mwaka himwaka. Wana kanou walifwanako navyuma vimwe vyavilemu chikuma vize vyalingiwile haPendekoseta yamumwaka wa 33. Vyuma kana vyalingiwile kuli tumbaji twaYesu 120 vaze vapwile nakulomba  mukapete kahelu muYelusalema. (Vilinga 1:13-15) Shimbu kanda vyuma kanevi visoloke, kafwe myaka 800 kunyima, kapolofweto Yowele asonekele vyuma kanevi. (Yowele 2:28-32; Vilinga 2:16-21) Vyuma muka vyavilemu vyasolokele?

³ Tangenu Vilinga 2:2-4. HaPendekoseta yamumwaka wa 33, Kalunga ahanyine vaze vaka-Kulishitu shipilitu yenyi yajila, kaha vapwile jino vakuwavisa. (Vilinga 1:8) Kutwala muze, liyongomena lyavatu lyavajingilikile, kaha tumbaji vaputukile kuhanjika vyuma vyamwaza vize vamwene nakwivwa. Kaposetolo Petulu alumbunwine vyuma vyasolokele novyo vyapwililile vyavilemu. Kaha ambile jino kuli lize liyongomena ngwenyi: “Pihililenu nakwalumuka, kaha vamimbapachise mutu himutu mulijina lyaYesu Kulishitu mangana vamikonekele jishili jenu, kaha namutambula shipilitu yajila yawana wakanyombo.” Halikumbi kana, vatu vakuheta ku 3,000 vavambapachishile, kaha navakiko vatambwile shipilitu yajila.—Vilinga 2:37, 38, 41.

4. (a) Mwomwo ika vyuma vyalingiwile haPendekoseta vyapwila vyavilemu kuli etu? (b) Vyuma vyeka muka vyavilemu vize pamo vyasolokelenga kushikulu halikumbi vene lize? (Talenu kwinyikila chakusongo yachihande.)

⁴ Uno kapilishitu wakulitulaho namawana aze ahanyinenga haPendekoseta vyemanyinyineko ika? Kapilishitu wakulitulaho emanyinyineko Yesu. Kaha jimbolo jemanyinyineko tumbaji twaYesu vawavisa. Ava tumbaji vavasakwile muli vaka-shili nakuvavuluka ngwavo “mihako yatete.” (WaYakova 1:18) Kalunga etavila vatu kana kupwa vana venyi vaze asakula mangana vakayule kupwa vamyangana naYesu mwilu muWangana waKalunga. (WaPetulu 1, 2:9) Yehova mwakakisula vatu vakwononoka vosena kuhichila muWangana kanou. Shikaho, numba natukatwama mwilu hamwe naYesu chipwe mupalachise hano hamavu, oloze vyuma vyasolokele haPendekoseta mumwaka wa 33 vyapwa vyavilemu chikuma kuli etu tuvosena. ^[1] —Talenu kwinyikila chakusongo yachihande.

5. Uno twatachikiza ngachilihi ngwetu vawavisa vosena kaveshi kuvawavisa mujila yoyimweko?

⁵ Tumbaji vaze vapwile muze mukapete kahelu kavavulyamine likumbi kanako. Mutu himutu apwile navyuma vimwe vize vyasolokele nge mulangi wakakahya hamutwe wenyi. Yehova avahanyine uhashi wakuhanjika malimi eka. Chikupu vene, vatachikijile ngwavo vavawavishile nashipilitu yajila. (Vilinga 2:6-12) Oloze vyuma kanevi vyakukomwesa kavyeshi kusoloka kuli vaka-Kulishitu vosena omu veji kuvawavisangako. Chakutalilaho, Mbimbiliya kayasolola nge vatu vavavulu muYelusalema vaze vawavishile halwola lweka halikumbi vene lize navakiko vapwile navyuma vize vyasolokele nge milangi yakakahya hamitwe yavoko. Oloze vavawavishile omu vavambapachishile. (Vilinga 2:38) Kaha nawa, keshi nge vaka-Kulishitu vosena veji kuvawavisanga halwola veji kuvambapachisangako. VaSamaliya vavawavishile omu mwahichile lwola kufuma haze vavambapachishile. (Vilinga 8:14-17) Kolonelyu navaze vakuzuvo yenyi vavawavishile shimbu kanda vavambapachise, kaha chuma kana chapwile chakulipwila.—Vilinga 10:44-48.

6. Vyuma muka veji kutambulanga vaze vawavisa vosena, kahechi cheji kuvalingisanga vatachikize vyuma muka?

⁶ Pundu vene, vaka-Kulishitu veji kutachikizanga mujijila jakulisezaseza nge vanavawavisa. Vamwe veji kutachikizanga hahaze vene ngwavo Yehova navawavisa. Vakwavo nawa veji kutachikizanga nge munahichi  lwola. Oloze kaposetolo Paulu alumbunwine vyuma vyeji kusolokanga kumutu himutu. Ambile ngwenyi: “Omu mwetavile, vamihakile katachikijilo kuhichila muli ikiye nashipilitu yajila yize vashikile, yize yinapu chijikilo chauswana wetu wakulutwe.” (Wavaka-Efwesu 1:13, 14) Ngocho, Yehova eji kuzachisanga shipilitu yenyi yajila mangana ava vaka-Kulishitu vatachikize nge navasakula kuya mwilu. Shikaho, shipilitu yajila yapwa “chijikilo,” chipwe unjiho wakusolola nge kulutwe navakatwamanga mwilu haya myaka yosena, keshi hano hamavuko.—Tangenu Wavaka-Kolinde 2, 1:21, 22; 5:5.

7. Vyuma muka vaka-Kulishitu vawavisa vatela kulinga mutu himutu numba akatambule fweto yenyi mwilu?

⁷ Nge muka-Kulishitu vanamuwavisa, kutala echi chalumbununa nge chikupu vene mwakatambula fweto yenyi tahi? Nduma. Eji kutachikizanga chikupu nge mwakaya mwilu. Oloze mwakatambula fweto yenyi kuvanga kaha nge mwapwa lika wakushishika kuli Yehova. Petulu alumbunwine ngwenyi: “Shikaho enu vandumbwami, zatenu chikuma nangolo mangana kumisanyika chize vamisanyika nakumisakula chize vamisakula vizame mbe muli enu, mwomwo kachi nge namulinganga vyumevi, kaha chikupu vene kamweshi kwiza kukalimbukako. Ngocho navakamitavisa kwingila muWangana wahaya myaka yosena waMwata wetu, uze nawa apwa Mulwilo wetu Yesu Kulishitu.” (WaPetulu 2, 1:10, 11) Ngocho muka-Kulishitu himuka-Kulishitu uze vawavisa katela kulingisa chuma numba chimwe chimuhonese kuzachila Yehovako. Numba tuhu vanamusanyika kuya mwilu, oloze keshi kukatambula fweto yenyiko nge mwahona kupwa lika wakushishika.—WavaHepeleu 3:1; Kusoloka 2:10.

8, 9. (a) Mwomwo ika chapwila chachikalu kuli vatu vavavulu kutachikiza kanawa vyuma vyeji kusolokanga kumutu nge vanamuwavisa? (b) Uno mutu eji kutachikizanga ngachilihi ngwenyi vanamusanyika akaye mwilu?

⁸ Vangamba jaKalunga vavavulu makumbi ano vanahase kuchiwana kupwa chachikalu kutachikiza kanawa vyuma vyeji kusolokanga kumutu nge vanamuwavisa kuli Kalunga. Echi kachapwa chakuhengako, mwomwo vakiko kavavawavisako. Kalunga atengele vatu vatwamenga hano hamavu haya myaka yosena, keshi mwiluko. (Kuputuka 1:28; Samu 37:29) Oloze Yehova nasakula vamwe hamavu vakapwe vamyangana navapilishitu mwilu. Ngocho, nge Kalunga navawavisa, lutalililo lwavo, navishinganyeka vyavo vyeji kwalumukanga mangana vatalilile kukayoyela mwilu.—Tangenu Wavaka-Efwesu 1:18.

⁹ Uno mutu eji kutachikizanga ngachilihi ngwenyi vamusanyika akaye mwilu? Achishinganyekenu vyuma ahanjikile Paulu kuli vandumbwenyi vawavisa muLoma, vaze “vasanyika nakupwa vaka-kujila.” Avalwezele ngwenyi: “Enu kamwatambwile shipilitu yaundungo yakumivwisa cheka womako, oloze mwatambwile shipilitu yakumitavila kupwa muvana, yize tweji kutambakananga nayo ngwetu: ‘Apa, Ove Tata!’ Shipilitu yivene yeji kuhananga unjiho nashipilitu yetu ngwayo tuvana vaKalunga.” (Wavaka-Loma 1:7; 8:15, 16) Kalunga eji kuzachisanga shipilitu yenyi  yajila nakuhana unjiho kumutu wakusolola hatoma nge vanamusanyika akapwe mwangana mwilu hamwe naYesu.—Wavaka-Tesolonyika 1, 2:12.

10. Mukanda WaYowano 1, 2:27 hakwamba ngwawo, muka-Kulishitu vawavisa kasakiwa mutu weka kumunangulako, walumbununa ika?

¹⁰ Vatu vaze eji kusanyikanga Kalunga kavasakiwa mutu weka kuvalweza nge vanavawavisako. Yehova eji kuvakunyulanga nakuvahana unjiho wakutamo. Kaposetolo Yowano alwezele vaka-Kulishitu vawavisa ngwenyi: “Enu vamiwavisa lyehi kuli ou wajila, kaha enu muvosena munatachikiza muchano.” Ambile cheka ngwenyi: “Oloze enu kwenu, kuwavisa chize amiwavishile muchili lika nacho, ngocho kamweshi nakusakiwa mutu wakuminangulako, mwomwo kuwavisa amiwavishile chili nakuminangula vyuma vyosena, kaha nawa chapwa chamuchano, kacheshi chamakuliko. Kaha nganomu chinaminangula, likatenunga naikiye.” (WaYowano 1, 2:20, 27) Vaka-Kulishitu vawavisa navakiko vasakiwa kuvanangula kuli Yehova ngana mwavatu vosena. Oloze kavasakiwa mutu weka kwiza nakuvalweza nge chikupu vene vanavawavisako. Yehova eji kuzachisanga shipilitu yenyi yajila, yize yapwa ngolo jajinene, mangana ahane unjiho wakusolola nge chikupu vene vatu kana vanavawavisa.

11, 12. Vyuma muka nahase kuhuhwasana muka-Kulishitu vawavisa, kaha vyuma muka vize keshi kuhuhwasanako?

¹¹ Nge vaka-Kulishitu vanavawavisa nashipilitu yajila, veji kwalumukanga chikuma. Kwalumuka kana chikiko chalingishile Yesu ambenga ngwenyi, ‘vasemuka cheka,’ chipwe ‘kusemuka kufuma mwilu.’ (Yowano 3:3, 5; kwinyikila chamwishi) Kaha alumbunwine ngwenyi: “Kanda ulikomokelako omu ngunakulweze ngwami: Enu vatu mwatela kusemuka cheka. Peho yeji kuyanga kweshokwo yinasake, kaha weji kwivwanga kuhuhwa chayo, oloze kaweshi kutachikiza oku yili nakufuma noku yili nakuyako. Ngocho omu mukiko mwanapu namutu uze nasemuka kuli shipilitu.” (Yowano 3:7, 8) Pundu vene, vatu vaze vawavisa veji kuchiwananga kupwa chachikalu kulumbunwina vaze kavawavisako omu veji kwivwanga nge vanavawavisa. ^[2]—Talenu kwinyikila chakusongo yachihande.

¹² Mutu uze vanawavisa nahase kukakasana nakulihulisa ngwenyi, ‘Mwomwo ika Yehova nasakwila ami muchishishisa chakusakula mutu weka?’ Nahase nawa kuhuhwasana numba nge mwakahasa kuzata milimo yasakiwa. Olozenyi keshi kuhuhwasana ngwenyi Yehova ikiye namusakulako. Kaha eji kuwahililanga nakusakwilila chikuma hawana kana. Vawavisa veji kwivwanga ngana muze evwile Petulu omu ambile ngwenyi: “Vamwalisenga Kalunga, Ise yaMwata wetu Yesu Kulishitu. Mwomwo yakutetela chenyi chachinene, atulingishile tusemuke cheka mangana tupwenga nalutalililo lwalutonyi kuhichila mukusanguka chaYesu Kulishitu kuvafu, mangana tupwenga nauswana wakuhona kupola, wakuhona kupihya, wakuhona kupiluka. Uswana kana vanamilaminawo mwilu.” (WaPetulu 1, 1:3, 4) Omu vawavisa veji kutanganga mazu kana awa, kaveshi kuhuhwasanako, oloze veji kutachikizanga chikupu ngwavo, Sevo ali nakuhanjika kuli vakiko.

13. Vishinganyeka vyamutu vyeji kwalumukanga ngachilihi nge vanamuwavisa nashipilitu yajila, kaha ika yeji kulingisanga vishinganyeka vyenyi vyalumuke?

 ¹³ Vaka-Kulishitu vawavisa vapwile nalutalililo lwakukayoyela hano hamavu haya myaka yosena shimbu kanda Yehova avasakule vakaye mwilu. Vatalililenga kulwola luze Yehova mwakalingisa mavu kupwa palachise nakufumisaho vyuma vyavipi vyosena. Pamo vashinganyekelenga kukamona cheka vausoko wavo namasepa javo vaze vafwa. Kaha vatalililenga nawa kukatunga jizuvo nakukatwamangamo, nakutumba mitondo nakulya mihako yayo. (Isaya 65:21-23) Uno chuma muka chavalingishile valumune vishinganyeka vyavo? Kutala valumwine vishinganyeka vyavo mwomwo yakuhomba chipwe kuyanda chikuma tahi? Uno vashinganyekele ngwavo navakevwa uli kuyoya haya myaka yosena hano hamavu, nakushinganyeka nge kaveshi kukapwa vakuwahililako nyi? Nyi pamo vasakile kaha kukamona omu chapwa chiyoyelo chamwilu tahi? Nduma. Oloze Kalunga ikiye avasakwilile chuma kanechi. Omu avasanyikile, azachishile shipilitu yenyi yajila yalumune vishinganyeka vyavo, nafweto yize vatalilila kulutwe.

14. Uno vawavisa veji kwivwanga ngachilihi hakuyoya chavo chahano hamavu?

¹⁴ Uno echi chalumbununa nge vawavisa vasaka kufwa tahi? Paulu alumbunwine omu veji kwivwanga vaze vawavisa. Afwanyishile mijimba yavo yautu ‘kumbalaka.’ Ambile ngwenyi: “Chikupu vene etu tuli mumbalaka yino, tweji kulikemenenanga hakuwana nge tunalemuwa, mwomwo etu katwasakile ngwetu tuzule mbalaka yinoko, oloze ngwetu tuvwale yeka, mangana echi cheji kufwanga vachimine kuli kuyoya.” (Wavaka-Kolinde 2, 5:4) Ava vaka-Kulishitu kavasaka vafwengako. Veji kulivwisanga kuwaha kuyoya, kaha vasaka kuzachila Yehova hakumbi hakumbi hamwe kaha najitanga javo namasepa javo. Chipwe ngocho, veji kwanukanga vyuma avashika Kalunga kulutwe, chamokomoko navyuma vali nakulinga oholyapwa.—Wavaka-Kolinde 1, 15:53; WaPetulu 2, 1:4; WaYowano 1, 3:2, 3; Kusoloka 20:6.

15. Vyuma muka vize kavyasolola mutu nge vanamuwavisako?

¹⁵ Pamo muli nakukakasana numba nge Yehova namisanyika mukaye mwilu nyi chiku. Nge mukiko, kaha lihulisenu vihula vino vyavilemu: Kutala mwamona nge mweji kuzatanga natwima mumulimo wakwambulula tahi? Uno mweji kwivwanga kuwaha kulinangula Mbimbiliya ‘navyuma vyakujiminyina vyaKalunga’ tahi? (Wavaka-Kolinde 1, 2:10) Kutala mwamona nge Yehova namikisula chikuma mumulimo wakwambulula tahi? Uno mwafwila kulinga vyuma vize asaka Yehova kuhambakana vyuma vyeka nyi? Kutala mwazanga chikuma vakwenu nakufwila kuvakafwa vazachile Yehova tahi? Uno mwamona unjiho wakusolola nge Yehova namikafwe mujijila jimwe jakulipwila mukuyoya chenu nyi? Kachi nge namukumbulula ngwenu eyo kuvihula vyosenevi, kutala echi chalumbununa nge vamisanyika kuya kwilu tahi? Nduma, omu keshi mukikoko. Mwomwo ika? Mwomwo vangamba jaKalunga vosena veji kwivwanga vene ngocho, numba vapwa vakuwavisa nyi chiku. Yehova eji kuhananga shipilitu yenyi yajila kuli vangamba jenyi vosena kuteseka hamwe, chamokomoko nalutalililo vatwama nalwo. Kachi nge munakuhuhwasana numba nge vamisanyika mukaye mwilu nyi chiku, kaha tachikizenu ngwenu kavamisanyikako. Mwomwo vatu vaze vasanyika kuli Yehova kavahuhwasanako. Vatachikiza chikupu ngwavo, vavasanyika.

16. Uno twatachikiza ngachilihi ngwetu keshi vosena vaze vatambula shipilitu yaKalunga vavasanyika kuya mwiluko?

 ¹⁶ MuMbimbiliya vavulukamo vatu vakushishika vaze Yehova ahanyine shipilitu yenyi yajila, oloze kavaya mwiluko. Mutu umwe shina Yowano Muka-kumbapachisa. Yesu ambile ngwenyi kakweshi mutu weka wakuhambakana Yowanoko, oloze ambile nawa ngwenyi, Yowano katwama nalutalililo lwamwiluko. (Mateu 11:10, 11) Ndavichi nayikiye vamutwaminyinyine nashipilitu yajila. (Samwele 1, 16:13) Shipilitu yajila yamukafwile atachikize kanawa vyuma vyakujiminyina vyaYehova nakumutwaminyina asoneke mikanda yimwe yamuMbimbiliya. (Mako 12:36) Chipwe ngocho, kaposetolo Petulu ambile ngwenyi, Ndavichi “kayile mwiluko.” (Vilinga 2:34) Yehova ahanyine ava vatu shipilitu yenyi yajila mangana valinge vyuma vyakukomwesa, oloze kayizachishile avasanyike vakaye mwiluko. Uno echi chalumbununa nge kavapwile vakushishika chipwe kutamo kukayula mwiluko tahi? Nduma. Oloze Yehova mwakavasangula vakayoye cheka muPalachise hano hamavu.—Yowano 5:28, 29; Vilinga 24:15.

17, 18. (a) Lutalililo muka vatwama nalwo vangamba jaKalunga vavavulu makumbi ano? (b) Vihula muka natushimutwila muchihande chinakavangizaho?

¹⁷ Vangamba jaKalunga vavavulu makumbi ano kaveshi kukaya mwiluko. Ngana mwaApalahama, naNdavichi, naYowano Muka-kumbapachisa, navatu veka vaze vasoneka muMbimbiliya, ava vangamba jaKalunga navakiko vatalilila kukayoya hano hamavu omu Wangana waKalunga naukavayula. (WavaHepeleu 11:10) Vatu vakuheta ku 144,000 vakiko kaha navakayula hamwe naYesu. Oloze Mbimbiliya yahanjika hali ‘vasalaho,’ vaze vachili hano hamavu mumakumbi ano akukuminyina. (Kusoloka 12:17) Ngocho vatu vavavulu hali vaze 144,000 vafwa lyehi, kaha vaya mwilu.

¹⁸ Nge mutu umwe mwamba ngwenyi vanamuwavisa, kaha vatu vaze vatwama nalutalililo lwakukayoyela hano hamavu vatela kulinga ika? Uno mwatela kumona ngachilihi mutu uze mwaputuka kulya mbolo nakunwa vinyo haKwanuka Kufwa chaMwata muchikungulwilo chenu? Nyi ngachilihi nge vawavisa vali nakuvulilako lika? Kutala mwatela kulizakamina hachuma kana tahi? Vihula kana natuvikumbulula muchihande chinakavangizaho.