1-3. 1) Jméni xi koan nga sʼuí Pentecostés nó 33. 2) Jmé én xi kitjoson nga kui nichxin (chótsenlai sén xi faʼaitʼa ibi).

KʼIANGA taingo tanjio nga nó 33 kʼiaa kisʼejna je sʼuí Pentecostés ya Jerusalén. Je sʼuí jebi xki̱ nó kisʼejna kʼoa kʼiaa sʼejna nga sʼexkó títjon je trigo. Nga kui nichxin, je naʼmi ngʼajko̱ kitsjoatʼa tsojmi xi toxá bʼaitʼanile Jeobá. Kʼoa xijekoan, nga las 9:00 nga tanjio, jao nioxtila kitsjoatʼa je xi kui koanndani je trigo xi títjon koanjchá kʼianga kui nó. Kʼianga tsjoátʼale je Jeobá nioxtila jebi, je naʼmi ngaʼi̱ ngaján kanítjenya (Levítico 23:15-20).

² Tokʼoa jesiento nó tjínle nga kʼoasʼin jao nioxtila bʼaitʼale Jeobá nga xki̱ nó. Jebi kui kitsoyanile jmeni xi koan nga koanskanni. Kʼoa kʼiaa kitjoson nga sʼuí Pentecostés nó 33, kʼianga 120 mani je chjotale Cristo xi tjíobʼétsʼoa ya jngo kuarto xi tíjna ya Jerusalén (Hechos 1:13-15). Jmeni xi koan nga kui nichxin kui kitjoson je én xi tongini 800 nó kʼoakitso je profeta Joel (Joel 2:28-32; Hechos 2:16-21). Jméni xi koan nga kui nichxin.

³ (Tʼexkiai Hechos 2:2-4). Kʼianga sʼuí Pentecostés nó 33, je Niná kui nganʼiotsjele kisichjén kʼianga kiskoejin je chjotale Jesús  je xi 120 mani (Hechos 1:8) (chótsenlai je rekuadro “Jósʼin tsoyanile”). Nga kui nichxin, nʼio nkjín chjota kicho jñani tjío chjotale Jesús kʼoa kui kitsoyale jmeni xi ñaki xko̱n tsabeni kʼoa jmeni xi kinrʼoé. Je pastro Pedro kʼoakitsole ngatsʼi chjota jebi jmeni xi koan kʼoa anni nga nʼio chjísínile. Xijekoan i kitsole: “Kʼoakatamanino jéeno, kʼoa cha̱nisʼenngindáo yaono nga jngó jngó xi kao jaʼaínle Jesucristo ánni cha̱tʼasíni jéeno, kʼoa kʼoaikjoatjaono je nganʼiotsje”. Nga kui nichxin, janla jmi mani chjota kisʼenngindá kʼoa kʼoati tsakʼaile nganʼiotsjele Niná (Hechos 2:37, 38, 41, TNM).

4. 1) Ánni nga katamandosinsíniná jmeni xi koan nga sʼuí Pentecostés nó 33. 2) Jméni xi mangóson jokoan ngasʼa kao jmeni xi koan kʼianga sʼuí Pentecostés nga nó 33 (chótsenlai nota xi tíjna fetʼani kjoaʼmiya jebi).

⁴ Jméni xi tsoyanile je naʼmi ngʼajko̱ kʼoa kao nga jao nioxtila xi bʼaitʼa nga sʼuí Pentecostés. Je naʼmi ngʼajko̱ jé Jesús tsoyanile. Kʼoa nga jao nioxtila jé tsoyanile je chjotale Jesús xi ya ngʼajmi koai. Chjota jebi i Sonʼnde kitjoejinni. Ya Biblia kʼoatso nga je títjon kitjoejin chjota jebi (Santiago 1:18). Je Niná xtile tsole kʼoa kui xá kiskoejinni nga ya koatexomakao Jesús ya ngʼajmi (1 Pedro 2:9). Je Jeobá kui chjotaxá jebi sichjén nga tsjoále ngayeje jmeni xi machjénle je chjota xi sitjosonle. Tojñani tjínná kjoachoya, a i Sonʼnde axo yaa ngʼajmi, mandosinná jmeni xi koan kʼianga sʼuí Pentecostés nó 33. ^[1]

5. Jósʼin ʼyañá kʼianga tsín tjín xi ma ngantsjai kʼianga ʼyani xi kjoejin Niná nga tsjoále je nganʼiotsjele.

⁵ Je xi 120 mani je chjotale Jesús xi tjío ya Jerusalén alikui jao kisʼele kʼianga je Niná kiskoejin kao nganʼiotsjele. Ya sonjko̱ jo ni̱je̱nlʼí kjoan xi kisatioson. Kʼoa saʼnda koanle nga kjaʼaí én kinchja̱ (Hechos 2:6-12). Tonga ali tsa totjínjin xi ma ngantsjai kʼianga ʼyani xi kjoejin Niná nga tsjoále je nganʼiotsjele. Jósʼin ʼyañá. Tobʼelañá, kʼianga tikuini nichxin je Niná nʼio nkjín jmi chjota kiskoejin, tonga ya Biblia alikui kʼoatso kʼiatsa kʼoati ni̱je̱nlʼí kisatioson jko̱. Je Niná kʼiaa kiskoejin nga kisʼenngindá (Hechos 2:38, TNM). Tonga je Niná ali tsakʼiajin kjoejin ngatsʼi je chjota kʼianga fisʼenngindá. Je chjotale Cristo xi ya Samaria tsʼe tokʼoa jekjoatse kisʼenngindá nga kitjoejin (Hechos 8:14-17, TNM). Kʼoa je Cornelio kao xi tjío ya yaniʼyale kʼiaa kitjoejin nga kjesa fisʼenngindájin (Hechos 10:44-48, TNM).

6. 1) Jméni xi bʼaile ngatsʼi xi ya koai ngʼajmi. 2) Jósʼin síxákao je nganʼiotsje xi ya koai ngʼajmi.

⁶ Tjínkʼa je chjotale Cristo xi sasa beni kʼianga jekiskoejin je Niná. Kʼoa tjínkʼa xi tobijbi be. Tonga tjín jmeni xi bʼaile ngatsʼi. Je pastro Pablo kitso: “Jon xi jekoankjainno, je Espíritu Santo xi kinisʼengino tsakasénchoa̱no nga̱ tiyokao Cristo. Kʼoasʼin Niná tsakʼéjnanginá je Espíritu Santo xi tʼatsʼe kjoatjaoná” (Efesios 1:13, 14). Kuinga tsjoásínile Jeobá ngatsʼi xi ya koai ngʼajmi je nganʼiotsjele. Kʼoa kui nganʼiotsjele Niná síxákao nga tsín jao sʼele nga ya koai ngʼajmi. Kʼoa kuinga kʼoakitsosíni je Pablo nga jngoyale kui kisʼejnangi je nganʼiotsje nga ya koai ngʼajmi (tʼexkiai 2 Corintios 1:21, 22; 5:5).

7. Jméni xi tjínnele sʼin nga jngó jngó xi ya koai ngʼajmi.

⁷ Kʼianga jngo chjotale Cristo kjoejin je Niná, a kui xi tsonile nga ñaki jeya koai ngʼajmi. Majain. Je xi tsín jao tjínná kuinga títsjoále kjoanda je Niná nga koa̱n ya koai ngʼajmi. Je Pedro i kitso: “Tixítíyalao yaono nga koakosontsaon nga Niná kinchja̱no kʼoa tsakjaʼájinno. Tsa kʼoasʼiaon je kjoabi, nitokʼiajin tsao̱ngio. Kʼoasʼin kjaínga tonda kʼoaiʼndeno kʼia nga kuitjásʼenjion kao kjoajeya je kjoatéxomantsjaile Jesucristo xi Nainá kʼoa xi tsakʼasjentjainá” (2 Pedro 1:10, 11). Nga jngó jngó je xi ya koai ngʼajmi machjénní nga kixi koa̱n. Tokʼianí  nga ya koai ngʼajmi kʼiatsa tsín yátsʼi̱n kuinyale je Jeobá (Hebreos 3:1; Apocalipsis 2:10).

8, 9. 1) Ánni nga me ngatsʼi je choʼndale Niná nga tsín majinnile josʼe kon je chjotale Cristo xi tjoejin nga ya ngʼajmi koai. 2) Jósʼin beni jngo chjotale Cristo kʼianga ya ngʼajmi koai.

⁸ Me ngatsʼi je choʼndale Niná nga tsín majinle josʼe kon je chjotale Cristo kʼianga jekjoejin Jeobá nga ya ngʼajmi koai. Kuinga tsín majinnile nga tsín tsa jejin kitjoejin nga ya ngʼajmi koai. Kʼoa je Niná kui xá kisindaniná nga i̱ kuiyoaa Sonʼnde, ali tsakuijin nga ya ngʼajmi koanngián (Génesis 1:28; Salmo 37:29). Tonga kui xá kiskoejin kʼani chjota je Jeobá nga rey koa̱n kʼoa naʼmi koa̱n ya ngʼajmi. Kʼianga jekjoejin Niná kao nganʼiotsjele, jebʼantjaiya josʼin síkjaʼaitsjen. Kʼoa kʼiaa fitsʼiani nga ya koyale nga ya ngʼajmi koai (tʼexkiai Efesios 1:18).

⁹ Jósʼin beni jngo chjotale Cristo kʼianga je kitjoejin nga ya koai ngʼajmi. Je Pablo kʼoakitsole je chjotale Cristo xi tsakatio ya Roma nga toxá kitjoejinni, kitsole: “Nga̱ jon alikui kichjoao kjoafaʼaitsjen xi tsʼe xi tjíonʼio, nga ngijngokʼa sʼe̱no kjoajkon, tonga kichjoénío je Espíritu Santo xi bekonná joni tsa xtile. Xi totʼatsʼe je Espíritu Santo nokjoaa Abba, xi tsoni Nʼai. Tijeni Espíritu Santo tojngo tsjoá kjoakixi kao ni̱ma̱ná nga kuiaa ʼndíle Niná” (Romanos 1:7; 8:15, 16). Tojosʼin tiʼyaa, kui xá síchjénni je nganʼiotsjele Niná nga tsín jao katasʼele je chjotale Cristo xi xá kitjoejinni nga ya ngʼajmi koai nga ya koatexomakao Jesús (1 Tesalonicenses 2:12).

10. Jósʼin tínchja̱nile 1 Juan 2:27 kʼianga kʼoatso nga je xi ya koai ngʼajmi nga tsín timachjénnile nga ʼya xi kuitsoyale.

¹⁰ Alikui machjén nga tjín xi kʼoakuitsole je chjotale Cristo xi ya koai ngʼajmi nga je kiskoejin Jeobá nga ya koai ngʼajmi. Jé Jeobá binyakao nga tsín jao sʼele nga ya koai. Je pastro Juan i kitsole xi ya koai ngʼajmi: “Tjínno je Espíritu Santo, xi je xi tsje kitsjoano joni siti̱ xi kinonjon yaono. Ñaki ʼyanío jo tjínni kjoabi”. Kʼoa i kitsosale: “Je Espíritu Santo xi jon kitsʼaino joni siti̱ xi kinonjon yaono, tíjnajinntsjai ni̱ma̱no. Liʼya xi machjénno xi kuitsoyano” (1 Juan 2:20, 27). Ngatsʼiñá nga machjénná nga kuitsoyaná je Jeobá ninga je xi ya koai ngʼajmi. Tonga je xi ya koai ngʼajmi alikui timachjénnile nga kʼuínyale nga ya koai, nga̱ jebe. Nga tsín jao sʼe̱le, kui nganʼiotsjele Jeobá síchjén.

11, 12. 1) Jméni xi tsakui nichxin skónangile yaole jngo xi ya koai ngʼajmi. 2) Jméni xi tsín jao tjínle xi ya koai ngʼajmi.

¹¹ Kʼianga jetjoejin xi ya koai ngʼajmi ñaki bʼantjaiyaní. Kʼoa kuinga kʼoakitsosíni Jesús nga tsin ijngokʼa (Juan 3:3, 5). Je Jesús kitso: “Machjén nga ngijngo kʼa jtsíon. Je ntjao̱ tojñanibe kjonajonní, kʼoa noʼyanilai nga fane, tonga likui ʼyai jña nga nroani, ni jña fi. Kʼoasʼin ma ngatsʼi xi tʼatsʼe Espíritu Santo kitsinni” (Juan 3:7, 8). Tojosʼin tiʼyaa, je xi tsín ya koai ngʼajmi alikui koa̱nchoyale jotjío kon je xi ya koai ninga kʼoakuitsole. ^[2]

¹² Tsakui nichxin kʼoakuitso jngo xi ya ngʼajmi koai ánni nga je kitjoejinsíni nga tsín tosa kjaʼaí xi kitjoejinsíni. Tsakui nichxin kui sikjaʼaitsjen tsa kuitjosonle xá jebi. Je xi tsín jao tjínle kuinga Jeobá kiskoejin nga ya koai ngʼajmi. Kʼoa kuinga tsjoa tjínsínile kʼoa tsjoásíni kjoanda. Kʼoatjío kon jokitso je Pedro, kitso: “Jó tondale Niná Nʼaile Jesucristo Nainá, xi kʼoasʼin totse kjoamatakon tjínle nga kisichjotseyangániná, jméni nga chóyasínilee xi tíjnakon nga jaʼáyajinnile kʼen Jesucristo. Kui kʼoasʼin kʼoaikjoatjaono xi nikʼiajin kjuitsónyani, xi nikʼiajin koa̱njndíni, nixíndsójin, xi tíjnatjaono ya ngʼajmi” (1 Pedro 1:3, 4). Kʼianga bʼéxkia én  jebi je xi ya koai ngʼajmi, bení kʼianga je xotíʼmile.

13. 1) Kʼianga kao nganʼiotsjele Niná kjoejinni xi ya koai ngʼajmi, jósʼin bʼantjaiya kjoafaʼaitsjenle. 2) Ánni nga bʼantjaiyasíni kjoafaʼaitsjenle xi ya koai ngʼajmi.

¹³ Tojosʼin tiʼyaa, kʼianga jngo chjotale Cristo kjoejinni Niná kao nganʼiotsjele, bʼantjaiyaa je kjoafaʼaitsjenle. Kʼianga kjesa bʼaijinle kjoanda jebi nga ya koai ngʼajmi, kui tíkoyale tsakai nga i̱ kʼoéjna ngantsjai nichxin i̱ Sonʼnde. Tsakui nichxin kui mele skoe̱ kʼianga kjoaʼaíkao ʼNdenaxó je Jeobá kʼoa nga kjoaʼaxin xi chʼaotjín. Tsakui nichxin kui kisikjaʼaitsjen nga skoéya xínkjín xi jekʼien kʼoa tsa jngo miyole. Kʼoa tsakuije̱ nga kʼoenda niʼyale kʼoa nga ski̱ne tole je yá xi jesoa kʼoentje (Isaías 65:21-23). Tonga kʼianga kitsjoale kjoanda jebi je Jeobá nga ya koai ngʼajmi, je kjoafaʼaitsjenle tsʼantjaiyaa. A kuinga tsʼantjaiyani tsa kjoañʼai tsakjaʼá kʼoa tsa kinroajen kon. Axo kuinga kʼoasʼin kisikjaʼaitsjen nga tokoa̱ntsʼe nga i̱ Sonʼnde kʼoéjna kʼoa nga tsín tsjoa sʼe̱le. Axo kuinga mele skoe̱ jókoa̱n tsa ya ngʼajmi kʼoéjna. Majain. Je kjoafaʼaitsjenle kuinga tsʼantjaiyani nga je Jeobá xi kʼoasʼin koanmele. Kʼianga jngo chjotale Cristo xi kʼoatsole Jeobá nga ya koai ngʼajmi, kui nganʼiotsjele síchjén kʼianga katabʼantjaiya kjoafaʼaitsjenle kʼoa nga kui kjoachoya katasʼele.

14. Jótjío kon xi ya koai ngʼajmi nga i̱sa tjío i̱ Sonʼnde.

¹⁴ A kui xi tsonile jebi nga jemele kuiyá tojoni nga jeya ngʼajmi koai. Majain. Je Pablo kʼoakitso jotjío kon je xi ya koai ngʼajmi, kitso: “Nga̱ kʼoatisʼinni jinjin xi tiyuijin je ndʼianajñobi, tsenaijin nga ñʼai kjinenajin kjoa, likui nga menajin nga chja̱ʼaxinnajin ndʼianajñobi, tonga kui nga menajin chʼa̱kjásuinjin, jméni nga je xi mʼe kʼoasʼin kʼoantjaiyajinni kao kjoabijnachon” (2 Corintios 5:4). Je Pablo, ndʼianajño kisingósonkao je yaole xi ya koai ngʼajmi. Kʼianga kʼoakitso nga tsín mele chja̱ʼaxinle ndʼianajño jebi, kui xi kitsonile nga tsín mele kuiyá. Nda tjíole nga tjíokon kʼoa mele nga kʼoasʼin síchjén nichxinle nga síxále Jeobá kao familiale kʼoa kao miyole. Tojmeni xi tjíosʼín, kui síkjaʼaitsjen je kjoanda xi tsjoále Niná (1 Corintios 15:53; 2 Pedro 1:4; 1 Juan 3:2, 3; Apocalipsis 20:6).

15. Jméni xi koa̱n skónangile yaole jngo choʼndale Jeobá xi kʼoasʼin síkjaʼaitsjen nga ya ngʼajmi koai, kʼoa a kui xi tsonile nga ya ngʼajmi koai.

¹⁵ Tsakui nichxin kui nikjaʼaitsjain tsa ji kiskoejinli Niná nga ya ngʼajmi kʼuín. Kʼiatsa jaon, tikjaʼaitsjenjin kjoachjonangi jebi: A tsen mali nga ñaki kao kjoatsjoa ʼmiyasuin. A nʼio tsjoachai nga chotʼayajin je Biblia kʼoa nga fasjaiyai “je xi ñʼai tjín xi tsʼe Niná” (1 Corintios 2:10). A tsen mali nga ñaki kjaʼaísʼin tíbasenkaoli je Jeobá kʼianga ʼmiyasuin. A ñaki nʼio meli nga kui kʼoasʼiain jmeni xi mele je Niná. A nʼio tsjoachai je ndsʼai kʼoa a tsen mali nga kui xá kjineli nga kuisenkoai nga ngisa nda katasíxále Jeobá. A tiʼyaní josʼin tíbasenkaoli je Jeobá jokji tse nga jetinixálai. Kʼiatsa jaon kasi ngayeje kjoachjonangi jebi, a kui xi tsonile nga ya ngʼajmi kʼuín. Majain. Nga̱ ngatsʼiñá nga koa̱n kʼoasatío tokoán ninga tsín ya ngʼajmi koanngián. Je Jeobá koaanle sichjén nganʼiotsjele nga tsjoánganʼiole ngatsʼi je choʼndale, ni ya ngʼajmi koai kʼoa ni i̱ Sonʼnde koatio. Kʼiatsa tsín ñaki ʼyai tsa ji kiskoejinli Niná nga ya ngʼajmi kʼuín, kui xi tsonile nga tsín ya kʼuín. Je xi ya koai ngʼajmi alikui kui kjonangile yaole, nga̱ ñaki bení nga ya koai.

16. Jósʼin ʼyañá nga tsín ya ngʼajmi koai ngatsʼi je xi bʼaile nganʼiotsjele Niná.

¹⁶ Ya Biblia nʼio nkjín chjota síkʼaxki̱ xi kʼoati tsakʼaile nganʼiotsjele Niná tonga alikui ya ngʼajmi ki. Tobʼelañá, je Juan Bautista. Je Jesús kʼoakitso nga tsín jngo chjota xi koanngóson kao Juan, tonga kʼoati kitso nga tsín ya koai ngʼajmi nga ya koatexoma (Mateo 11:10, 11).  Kʼoa je David kʼoati kui nganʼiotsjele Niná tsakándiaale (1 Samuel 16:13). Kʼoa nga kisʼele nganʼiotsjele Niná koanjinle jme xi ñʼai tjín xi tʼatsʼe Niná kʼoa kui nganʼiotsjele Niná tsakándiaale nga nkjín xo̱n xi tsʼe Biblia kiski (Marcos 12:36). Tonga je pastro Pedro kʼoakitso nga tsín ya ngʼajmi ki je David (Hechos 2:34). Je Jeobá kitsjoale nganʼiotsjele chjota jebi kʼoa tokʼoamaná jme xi kisʼin tonga alikui xá kitsjoanile Niná nganʼiotsjele nga ya koai ngʼajmi. A kui xi tsonile nga tsín kixi koan kʼoa nga tsín bakinle nga ya ngʼajmi koai. Majain. Kui xi tsonile nga je Jeobá tsjoá ijngokʼale kjoabijnachon i̱ Sonʼnde nga jeʼndenaxó koa̱n (Juan 5:28, 29; Hechos 24:15).

17, 18. 1) Jñáni koyale nga koatio je choʼndale Niná xi tjío ndʼaibi. 2) Jméni xi chótʼayá ya kjoaʼmiya xi ijngo.

¹⁷ Me ngatsʼi je xi tjíosíxále ndʼai je Jeobá nga tsín ya ngʼajmi koai. I Sonʼnde mele koatio nga jekoatexoma Chjotaxále Niná. Kui koyale jme xi kiskoyale je Abrahán, David, Juan Bautista kʼoa kao xi ngikʼa chjota xi síkʼaxki̱ ya Biblia xi xʼin kao xi yánchjín (Hebreos 11:10). Ya ngʼajmi 144,000 mani xi ya koatexomakao Cristo. Tonga ya Biblia kʼoatso nga tjíosa kʼa xi ya koai ngʼajmi nichxin fetʼa jebi (Apocalipsis 12:17). Jeme kʼien ngatsʼi, je xi 144,000 mani kʼoa jeya tjío ya ngʼajmi.

¹⁸ Tonga tsa ʼyani xi kʼoakuitso nga ya ngʼajmi koai, jósʼin tjínnele sikjaʼaitsjen je xi i̱ koatio Sonʼnde. Kʼoa ya jtín jñani mangián, kʼiatsa tjín xi koakjen je nioxtila kʼoa skʼuí je bino nga kjoaʼaítsjenya Kjoabiyale Cristo, jósʼin tjínnele jchatokoán. Kʼoa tsa sa nkjín sa nkjín mani xi kʼoakuitso nga ya koai ngʼajmi, jósʼin si̱kjaʼaitsjeen. Xi tʼatsʼe jebi, kui chótʼayá ya kjoaʼmiya xi ijngo.